Leri fu a fasi fa den apostel fu Yesus tan na ai
„Tan na ai nanga mi.”—MAT. 26:38.
1-3. (a) Sortu fowtu den apostel meki na a lasti neti di Yesus ben de na grontapu? (b) San e sori taki den leri fu a fowtu fu den?
PRAKSERI fa a ben de na a lasti neti di Yesus ben de na grontapu. Yesus ben de na ini a dyari fu Getseimanei, na a owstusei fu Yerusalem. A ben lobi fu kon na a presi disi èn disi leisi a ben de drape nanga den apostel fu en di tan horibaka gi en. Fu di Yesus ben abi furu na en ede, meki a ben musu suku wan presi pe a ben kan de en wawan, so taki a ben kan begi.—Mat. 26:36; Yoh. 18:1, 2.
2 Den dri apostel Petrus, Yakobus, nanga Yohanes ben waka nanga Yesus go moro fara na ini a dyari. Ne Yesus taigi den: „Tan dya èn tan na ai nanga mi.” Baka dati a waka go moro fara fu begi. Di a drai kon baka, a si taki den mati fu en e sribi. Agen Yesus taigi den: „Un tan na ai.” Ma toku den fadon na sribi ete tu tron! Nowan fu den apostel ben fruwakti san ben o pasa bakaten na a srefi neti dati. Den no tan na ai. Fu taki en leti, den lon gowe libi Yesus en wawan srefi!—Mat. 26:38, 41, 56.
3 A no de fu taki dati a hati den apostel taki den no ben tan na ai. Ma a no teki langa fosi den reti-ati man disi leri fu a fowtu di den meki. A Bijbel buku Tori fu den apostel e sori taki den apostel fu Yesus tan na ai trutru èn taki den de heri moi eksempre gi wi. A musu fu de so taki a fasi fa den tai hori na Gado, gi den Kresten brada nanga sisa fu den deki-ati fu du a srefi tu. Now wi musu tan na ai tu moro leki iniwan ten na fesi (Mat. 24:42). Meki wi poti prakseri na dri sani di wi kan leri fu a buku Tori fu den apostel èn di o yepi wi fu tan na ai.
DEN TAN NA AI FU SABI PE DEN BEN MUSU GO PREIKI
4, 5. Fa a santa yeye sori Paulus nanga den tra brada di ben de nanga en, san den musu du?
4 A fosi sani di wi kan leri, na taki den apostel tan na ai fu sabi pe den ben musu go preiki. Bijbel e sori wi fa Yesus gebroiki a santa yeye di a ben kisi fu Yehovah, fu tiri na apostel Paulus nanga den tra brada di ben de nanga en. Di den ben de na pasi, wan tu aparti sani pasa (Tori 2:33). Meki wi leisi san pasa.—Leisi Tori fu den apostel 16:6-10.
5 Paulus, Silas, nanga Timoteyus ben gowe libi a foto Listra di ben de na a zuidsei fu Galasia. Wan tu dei baka dati, den doro na wan fu den prenspari pasi fu Rome di ben o tyari den go na westsei, na a distrikt Asia pe bun furu sma ben e libi. Paulus nanga den tra brada ben wani teki a pasi disi fu go na difrenti foto pe dusundusun sma ben de di no ben yere fu Krestes ete. Ma wan sani tapu den fu go drape. Vers 6 e taki: ’Den ben waka pasa na ini Frigia èn na ini a kontren fu Galasia, fu di a santa yeye ben tapu den fu preiki a wortu fu Gado na ini a distrikt Asia.’ Bijbel no e sori fa a santa yeye tapu den man disi, ma san wi sabi na taki den no ben man go preiki na ini a distrikt Asia. Paulus nanga den tra brada di ben de nanga en ben frustan taki a santa yeye tapu den fu preiki drape, fu di Yesus ben wani taki den go preiki na wan tra presi.
6, 7. (a) San pasa nanga Paulus èn den tra brada di den ben de krosibei fu Bitinia? (b) San den disipel bosroiti fu du, èn san ben de a bakapisi?
6 Pe den fayafaya preikiman disi go? Vers 7 e taki: „Di den doro na Misia, den pruberi fu go na Bitinia. Ma Yesus meki a yeye tapu den fu go drape.” Di a santa yeye tapu Paulus nanga den tra brada fu go preiki na ini Asia, den teki pasi go na noordsei fu go preiki na ini den foto fu Bitinia. Ma di den ben kon krosibei fu Bitinia, dan Yesus gebroiki a santa yeye baka fu tapu den fu go drape. A no de fu taki dati den man ben e aksi densrefi fu san ede a santa yeye tapu den fu go drape tu. Den ben sabi san den ben musu preiki èn fa den ben musu preiki, ma den no ben sabi pe den ben musu preiki. A ben de neleki den naki na tapu a doro fu go na ini Asia, ma a doro no opo. Ne den naki na tapu a doro fu go na ini Bitinia, ma a doro dati no opo tu. Yu denki taki den man disi lasi-ati? Nôno, den fayafaya preikiman dati no lasi-ati kwetikweti!
7 Baka dati den man teki wan bosroiti di yu no ben o fruwakti kande. Na ini vers 8 wi e leisi: „Den pasa Misia èn den go na Trowas.” Sobun, den man drai go na westsei. Den waka sowan 550 kilometer pasa omeni foto teleki den doro na a lanpe fu Trowas pe den ben kan teki boto go na Masedonia. Vers 9 e fruteri wi san pasa baka dati: „Wan neti Paulus kisi wan fisyun: Wan man fu Masedonia ben e tanapu na en fesi èn a begi en: ’Abra kon na Masedonia fu yepi wi.’” Now fosi Paulus ben sabi pe den ben musu preiki. A ben de neleki Paulus nanga den tra brada naki na tapu a doro fu a di fu dri tron, èn disi leisi a doro wai opo gi den. Sondro fu draidrai, den man teki boto go na Masedonia.
8, 9. San wi kan leri fu a tori fu Paulus di a ben go preiki na tra kontren?
8 San wi kan leri fu a tori disi? Luku taki na baka di Paulus teki pasi go na Asia, Gado en santa yeye sori en pe a ben musu go. Na baka di Paulus kon krosibei fu Bitinia, Yesus sori en san a ben musu du. Te fu kaba, na baka di Paulus doro na Trowas, Yesus sori en taki a ben musu go na Masedonia. Leki Edeman fu a gemeente, Yesus kan tiri wi na a srefi fasi (Kol. 1:18). Fu eksempre, kande yu abi na prakseri wan heri pisi ten kaba fu go pionier, noso fu froisi go na wan tra kontren pe moro preikiman de fanowdu. Ma a kan taki na baka te yu du muiti fu du den sani disi di yu abi na prakseri fu du, Yesus o tiri yu nanga yepi fu a santa yeye fu Gado. Wi kan agersi en na a fasi disi: Te wan sma de na ini wan wagi, a kan meki a wagi go na kruktu-anusei noso na reti-anusei soso te a wagi e rèi. Na so a de tu taki te wi wani du moro na ini a diniwroko, Yesus kan tiri wi soso te wi e go na fesi noso te wi e meki muiti trutru fu du san wi abi na prakseri fu du.
9 Ma san yu o du te yu no abi bun bakapisi wantewante? Yu o lasi-ati, fu di yu e denki kande taki Gado en santa yeye no e tiri yu? We, memre taki sani no pasa wantewante soleki fa Paulus ben wani. Ma toku a tan suku okasi fu preiki èn a tan naki na tapu den doro teleki wan fu den opo gi en. Na so a de tu, taki te yu tan du muiti fu feni „wan moi okasi fu du furu wroko”, dan yu kan kisi furu blesi tu.—1 Kor. 16:9.
DEN BEN E BEGI DORONOMO
10. San e sori taki wi musu begi doronomo efu wi wani tan na ai?
10 Luku now a di fu tu sani di wi kan leri fu a fasi fa wi Kresten brada na ini a fosi yarihondro tan na ai: Den ben e begi doronomo (1 Petr. 4:7). Efu wi wani tan na ai, dan wi musu horidoro na ini begi. Memre taki na ini a dyari fu Getseimanei, syatu bifo den kon grabu Yesus, a taigi dri fu den apostel fu en: „Un tan na ai èn begi doronomo.”—Mat. 26:41.
11, 12. (a) Fu san ede Herodes ben e du ogri nanga den Kresten èn nanga Petrus? (b) San a du nanga den?
11 Petrus ben de nanga Yesus a neti dati èn bakaten ensrefi ondrofeni o prenspari a de fu begi doronomo. (Leisi Tori fu den apostel 12:1-6.) Na ini den fosi vers, wi e leisi taki Herodes ben e frufolgu den Kresten, fu di a ben wani taki den Dyu feni en bun. Soleki fa a sori, dan Herodes ben sabi taki Yakobus ben de wan apostel di ben de wan bun mati fu Yesus. Dati meki Herodes meki sma kiri Yakobus “nanga wan feti-owru” (vers 2). Na so a gemeente lasi wan apostel di den ben lobi srefisrefi. Dati ben de wan bigi tesi gi den Kresten brada nanga sisa!
12 San Herodes du baka dati? Vers 3 e taki: „Di a si taki den Dyu ben feni dati bun, dan a grabu Petrus tu.” Wan pisi ten na fesi, den ben poti Petrus nanga tra apostel na strafu-oso, ma na wan wondru fasi den ben kon fri (Tori 5:17-20). A kan taki Herodes ben sabi dati. Dati meki Herodes du ala san a man fu sorgu taki Petrus no komoto na ini a strafu-oso. A poti Petrus na ini strafu-oso pe „fo grupu fu fo srudati baka makandra ben musu hori wakti na en doronomo. A ben wani tyari en go na fesi a pipel baka a Paskafesa” (vers 4). Prakseri a tori! Herodes ben keti na apostel Petrus na mindri tu srudati, èn tinasiksi srudati di ben prati na ini fo grupu ben e hori wakti gi en baka makandra, dei nanga neti, so taki a no ben kan lowe. Herodes ben wani kiri Petrus baka a Paskafesa, fu di a ben wani plisi a pipel. San den Kresten brada nanga sisa fu Petrus ben kan du na ini a muilek pisi ten dati?
13, 14. (a) San a gemeente du di sma poti Petrus na ini strafu-oso? (b) Te wi e luku san den Kresten brada nanga sisa fu Petrus du, dan san dati e leri wi fu a fasi fa wi musu begi?
13 A gemeente ben sabi heri bun san fu du. Na ini vers 5 skrifi: „Den hori Petrus na strafu-oso. Ma a gemeente ben tan begi Gado fayafaya gi en.” Iya, nanga den heri ati den ben e begi fayafaya gi a lobi brada fu den. Sobun, baka di den kiri Yakobus, a gemeente no lasi-ati, èn den no ben kon abi a denki taki begi no e yepi. Na presi fu dati, den ben sabi taki den begi fu reti-ati anbegiman prenspari srefisrefi gi Yehovah. Efu den begi dati e kruderi nanga a wani fu en, dan a e piki den begi dati.—Hebr. 13:18, 19; Yak. 5:16.
14 San wi kan leri te wi e luku san den Kresten brada nanga sisa fu Petrus du? Wan sma di e tan na ai, no e begi gi ensrefi nomo, ma a e begi tu gi en Kresten brada nanga sisa (Ef. 6:18). Yu sabi brada nanga sisa di e kisi tesi? Kande sma e frufolgu sonwan fu den, kande lanti tapu a wroko fu den, noso kande den kisi fu du nanga wan rampu. A ben o bun fu begi gi den nanga yu heri ati. Kande yu sabi tra brada nanga sisa di e kisi tesi, ma furu sma no sabi dati. Kande den abi osofamiri problema, kande den e firi brokosaka doronomo, noso kande den e siki. A ben o bun fu prakseri den sortu sma disi èn kari den na den nen te yu e begi Yehovah, „a sma di e arki begi”.—Ps. 65:2.
15, 16. (a) Fruteri fa na engel fu Yehovah puru Petrus na ini strafu-oso. (Luku a prenki na ondrosei.) (b) Fu san ede a e gi wi trowstu te wi e prakseri fa Yehovah frulusu Petrus?
15 Ma fa sani waka moro fara nanga Petrus? A lasti neti di Petrus ben de na ini strafu-oso, a ben e sribi na mindri den tu waktiman. A neti dati Petrus ondrofeni wan tu spesrutu sani. (Leisi Tori fu den apostel 12:7-11.) Pruberi fu si a tori na yu fesi: Wantronso, wan bigi leti bigin skèin na ala sei fu a strafu-oso kamra pe a ben de. Wan engel ben e tanapu drape, ma soleki fa a sori, dan den waktiman no ben e si en. Na engel taigi Petrus fu opo esi-esi. Ne wantronso den keti di ben fasi na Petrus en anu fadon komoto na en anu! Baka dati, na engel tyari Petrus komoto na ini a strafu-oso kamra. Den pasa leti na fesi den waktiman di ben de na dorosei èn te fu kaba den pasa na ini a bigi isri portu di „opo fu ensrefi”. Di den komoto na ini a strafu-oso, dan wantronso na engel no ben de fu si moro. Na so Petrus kon fri!
16 A e tranga yu bribi te yu e prakseri a bigi makti di Yehovah abi fu frulusu den futuboi fu en, a no so? A tru taki wi no e fruwakti taki Yehovah sa frulusu wi na wan wondru fasi na ini a ten disi. Ma wi e bribi trutru taki a e gebroiki en krakti fu yepi en pipel na ini a ten disi (2 Kron. 16:9). Nanga yepi fu en santa yeye, a kan gi wi a krakti fu kakafutu gi iniwan tesi di kan miti wi (2 Kor. 4:7; 2 Petr. 2:9). Heri esi Yehovah sa gi en Manpikin a makti fu gi milyunmilyun dede sma wan opobaka, bika dede de leki wan strafu-oso pe den no man komoto na ini (Yoh. 5:28, 29). A bribi di wi abi na ini den pramisi fu Gado kan gi wi bun furu deki-ati te wi e kisi tesi na ini a ten disi.
TESI NO TAPU DEN FU „PREIKI FINIFINI”
17. Fa Paulus na wan moi eksempre fu wan sma di ben e preiki fayafaya?
17 A di fu dri sani di wi kan leri fu a fasi fa den apostel tan na ai, na taki den tan preiki finifini aladi den ben e kisi tesi. Fu man tan na ai, a de tumusi prenspari fu preiki fayafaya. Iya, wi musu si a preikiwroko leki wan sani di wi musu du nownow. Na apostel Paulus ben de wan heri bun eksempre ini a tori disi. A ben e preiki fayafaya, a ben e go na farawe kontren, èn a ben e seti furu nyun gemeente. A ben e kisi furu tesi, ma toku a preikiwroko ben de a moro prenspari wroko di a ben du èn a tan preiki fayafaya.—2 Kor. 11:23-29.
18. Fa Paulus tan preiki di a ben de wan strafuman na ini Rome?
18 A lasti sani di wi kan leisi fu Paulus na ini a buku Tori fu den apostel skrifi na kapitel 28. Paulus doro na ini Rome, pe a ben musu go na fesi Nero. A ben de wan strafuman èn a kan taki den ben keti en na wan fu den waktiman. Ma noti no ben man tapu a mofo fu a fayafaya apostel disi! Paulus tan suku fasi fu preiki gi sma. (Leisi Tori fu den apostel 28:17, 23, 24.) Baka dri dei, a seni kari den fesiman fu den Dyu, so taki a ben kan preiki gi den. Baka dati, den meki mofo fu miti wan tra dei. A dei dati Paulus preiki gi moro sma. Vers 23 taki: „Den [Dyu fu Rome] meki mofo fu miti en wan tra dei. A dei dati den kon nanga wan moro bigi grupu na a presi pe a ben tan. Fu man tyari a heri tori kon na krin gi den, Paulus preiki finifini fu Gado Kownukondre. A gebroiki a Wèt di Gado gi Moses nanga den buku fu den Profeiti fu sori den taki den sani di abi fu du nanga Yesus, tru. Na so a taki fu mamanten te neti.”
19, 20. (a) Fu san ede Paulus ben abi bun bakapisi te a ben e preiki? (b) San Paulus du di son sma no teki a bun nyunsu?
19 Fu san ede Paulus ben abi bun bakapisi te a ben e preiki? Vers 23 e taki fu wan tu sani di meki taki Paulus ben abi bun bakapisi: (1) A ben e poti prakseri na a Kownukondre fu Gado èn na Yesus Krestes. (2) A sori den arkiman fu san ede den ben kan bribi taki den sani di a taki tru. (3) A gebroiki den Buku fu Bijbel fu taki-go-taki-kon nanga den sma. (4) A sori taki a ben e broko en ede moro nanga trawan, leki nanga ensrefi. Dati meki a ben e preiki „fu mamanten teleki mofoneti”. Paulus gi den bun leri, ma a no ala sma teki a bun nyunsu. Vers 24 e sori taki „wan tu fu den bigin bribi den sani di a ben taki, ma trawan no ben wani bribi”. A sani disi meki taki den sma bigin haritaki nanga makandra èn baka dati den gowe.
20 Ma yu denki taki Paulus lasi-ati fu di son sma no teki a bun nyunsu? Kwetikweti! Na ini Tori fu den apostel 28:30, 31 wi e leisi: „Paulus tan tu yari langa drape na ini na oso di ensrefi ben yuru. A ben sori switifasi gi ala den sma di ben kon na en. Sondro frede a ben e fruteri den fu a Kownukondre fu Gado, a ben e leri den sani di abi fu du nanga Masra Yesus Krestes èn nowan sma ben tapu en fu du dati.” Den moi wortu disi di e gi wi deki-ati, na den lasti wortu di skrifi na ini a buku Tori fu den apostel.
21. San wi kan leri fu Paulus di a ben de leki strafuman na ini wan yuru-oso?
21 San wi kan leri fu na eksempre fu Paulus? Fu di den ben e hori Paulus leki strafuman na ini wan yuru-oso, meki a no ben man komoto na ini na oso fu go preiki. Toku a no lasi-ati, ma a tan preiki gi ala sma di ben kon na en. Na so a de tu na ini a ten disi taki furu anbegiman fu Gado de na strafu-oso fu a bribi fu den ede. Ma toku den e prisiri fu dini Gado èn den e tan preiki a bun nyunsu. Sonwan fu wi lobi brada nanga sisa no man komoto na ini den oso tu. Kande sonwan fu den di kon owru noso di kon siki, e libi na presi pe sma e luku owrusma noso sikisma. Te den man, dan den e preiki gi datra nanga sma di e wroko drape, den e preiki gi sma di e kon luku den, èn gi tra sma di e kon drape. Nanga den heri ati den wani preiki finifini fu Gado Kownukondre. Fu tru, wi breiti nanga den sma disi di de heri moi eksempre gi wi!
22. Sortu fasti bosroiti yu teki, aladi yu e wakti a kaba fu a grontapu disi?
22 A de krin taki wi kan leri furu fu a fasi fa den apostel nanga den tra Kresten fu a fosi yarihondro tan na ai, soleki fa wi kan leisi na ini a Bijbel buku Tori fu den apostel. Aladi wi e wakti a kaba fu a grontapu disi, meki wi abi a fasti bosroiti fu preiki fayafaya èn sondro frede neleki den Kresten fu a fosi yarihondro. A moro bigi grani di wi kan abi na ini a ten disi, na fu „preiki finifini” fu Gado Kownukondre!—Tori 28:23.
[Aksi fu a tori disi]
[Prenki na tapu bladzijde 12]
Wan engel tyari Petrus pasa a bigi isri portu
