‘Sallusuissutip ersiutaa inatsisini pigivat.’ — ROMAMIUT 2:20.

1. Sooq Mosesip inatsisai pillugit Paulusip allagaanik paasinninnissarput pingaaruteqarpa?

APUSTILIP PAULUSIP isumassarsisitaalluni allagai Mosesip inatsisaani peqqussutigineqartut ilarpassuisa qanoq pingaaruteqartiginerannik paasinninnissamut iluaqutigaavut. Assersuutigalugu Paulusip hebræerinut allakkamini erseqqissarpaa Jiisusip ‘palasiunerunera unneqqarissoq’ iluaqutaajuartussamik ataasiaammik pilliuteqartoq. Pilliummik tamatuminnga upperinnittut Guutimik eqqisseqateqarsinnaapput ‘naassaanngitsumillu utertinneqaatissinneqarsinnaallutik’. (Hebræerit 2:17; 9:11, 12) Paulusi aamma nassuiaavoq tupeq naapeqatigiittarfik ‘qilammiittut tarrartaannarigaa’ Jiisusilu angerutsimi Mosesip inatsisaanit pitsaanerusumi akunnermiliuttuusoq. (Hebræerit 7:22; 8:1-5) Mosesip inatsisaaniittut sunut assersuutaanerisa nassuiarneqarnerat Paulusip nalaani kristumiut iluaqutigisimaqaat. Uaguttaaq Guutip uagut pilluta iliuuserisimasaanik qujamasuutiginninnerulernissamut iluaqutigissavarput.

2. Sooq kristumiut juutinik nagguillit Guuti taassumalu inatsisai pillugit juutiunngitsunit ilisimasaqarneruppat?

² Paulusip kristumiut Romamiittut allaffigigamigit ilaatigut saaffigai ilagiinniittut juutinik nagguillit Mosesillu inatsisaanik ilinniartinneqarsimasut. Nassuiaappai taakkua Inatsisit nalunnginnamikkit Jehova taassumalu najoqqutassiai naapertuilluartut pillugit ‘ilisimassutsip sallusuissutillu ersiutaat pigereeraat’. Sallusuissutit tunngaviusut Inatsisiniittut paasillugillu nuannaraat, taamaammallu juutit kristumiut sioqqullugit inuusut pisarsimanerattut Jehova pillugu sallusuissutit tunngaviusut allanut ilinniartitsissutigisinnaavaat. — Atuakkit Romamiut 2:17-20.

JIISUSIP PILLIUTAATA ‘TARRAANNAI’

3. Juutit pilliutigisarsimasaannik misissuineq qanoq iluaqutigisinnaavarput?

³ Sallusuissutit tunngaviusut Mosesip inatsisaaniittut,  Paulusip sallusuissutip ersiutaatut allaatigisai, Jehovap siunertaanik paasinninnissamut iluaqutigaavut. Jehovap Inatsisit aqqutigalugit innuttaminut ilinniartitsissutigisai suli pingaaruteqarmata maanna Mosesip inatsisaani pilliutigeqquneqartut sammissavavut. Juutit maniguuttut pilliuteqartarnertik Missiarsip pisariaqartinneqarneranik aamma Guutip piumasaanik paasinninnissamut iluaqutigaat. Jehovallu kiffaminut piumasaqaatai tunngaviusut allanngujuitsuummata, taassuma Israelikkunnut pilliutit pillugit inatsisai ullumikkut uagut nammineq taassumunnga kiffartoriaatsitsinnik misissuinissamut iluaqutigisinnaavavut. — Malaki 3:6.

4, 5. (a) Mosesip inatsisai juutinut sunik eqqaasitsissutitaqarpat? (b) Pilliutit sumut tikkuussippat?

⁴ Mosesip inatsisaani peqqussutigineqartut ilarpassui juutinut eqqaasitsissutaapput ajortiliunerannik. Assersuutigalugu kinaluunniit inuup timaanik toqungasumik attuisoq imminut minguiartariaqarpoq. Minguiarumalluni ussik arnaviaq aappalaartoq ippinnaateqanngitsoq palasimut toqutsissavaa ikuallatsillugulu, arsakullu palasip “imermut minguiaatissamut” atussavai. Inuup minguttuunngorneranit ullut pingajuanni arfineq-aappaannilu palasip imeq taanna minguiaatitut taassumunnga serpartaatigissavaa. (4 Mosesi 19:1-13) Aamma inuit tamarmik naammalluinnanngitsuullutik ajortiliullutillu inunngortarnerannik eqqaasitsissutitut arnaq meerartaartoq piffissap ilaani minguttuujusarpoq, tamatumalu kingorna taanna saammaanneqaqqulluni pilliuteqassaaq. — 3 Mosesi 12:1-8.

⁵ Juutit inuunerminni allarpassuarnut tunngasutigut ajortiminnik isumakkeerfigineqaqqullutik uumasunik pilliuteqartartussaapput. Paasilluarsimanngikkaluarpassulluunniit taamani tupermi naapeqatigiittarfimmi kingusinnerusukkullu naalaffimmi pilliutigisartagaat Jiisusip pilliutaata naammalluinnartup ‘tarraannarai’. — Hebræerit 10:1-10.

PILLIUTINUT EQQORTUMIK ISIGINNITTAASEQARNEQ

6, 7. (a) Israelikkut pilliutissaminnik toqqaassagaangamik suut eqqarsaatigisariaqarpaat, tamannalu sumut siumut assersuutaava? (b) Imminut qanoq aperisinnaavugut?

⁶ Jehovap Israelikkut peqquai taamaallaat uumasunik ‘innarluuteqanngitsunik’, tappiitsuunngitsunik, ajoquserneqanngitsunik, napparsimanngitsunik iloqiaanngitsunillu pilliuteqartaqqullugit. (3 Mosesi 22:20-22) Israelikkut inerititaminnik Jehovamut pilliuteqaraangamik katersamik ‘inereqqaataat’ ‘pitsaanersaallu’ pilliutigisartussaavaat. (4 Mosesi 18:12, 29) Pigisamik pitsaanersarinngisaannik pilliuteqartut Jehovap akuerineq ajorpai. Israelikkut uumasuutimik pitsaanersaannik pilliuteqartarnerat Jiisusip pilliutaata innarluuteqarnanilu isornaateqanngitsuujumaarneranut Jehovallu inuiaat ajortimit toqumillu annaakkumallugit pitsaanerpaamik erliginerpaasaminillu pilliuteqarumaarneranut assersuutaavoq. — 1 Petrusi 1:18, 19.

⁷ Pilliuteqarniartoq Jehovap ajunngingaassusianik qujamasuutiginnikkuni pigisami pitsaanersaannik kajumilluni pilliuteqarumassaaq. Taassuma sumik pilliuteqarnissani nammineq aalajangersinnaavaa. Nalunngilaali pigisami pitsaanersarinngisaannik pilliuteqaruni, Guutip tamanna iluarinavianngikkaa. Taamaaliorunimi ersersissavaa pilliutit pingaartinnagit immaqalu allaat Jehovamit piumaffigineqarpallaartutut misigaluni. (Atuakkit Malaki 1:6-8, 13). Tamanna Guutimut kiffartornitsinnik  eqqarsaatiginninnissamut kajumississutigisariaqarparput, imminut ima aperaluta: ‘Sooq Jehovamut kiffartorpunga? Taassumunnga kiffartorninni allannguisariaqarpunga? Sapinngisara tamaat iliuuseqarpunga?’

8, 9. Israelikkut pilliutinut isiginnittaasiat sumik ilinniarfigisinnaavarput?

⁸ Israelikkuusoq nammineq kajumissutsiminik pilliuteqarsinnaavoq Jehovamut qujamasunnini ersersinniarlugu. Imaluunniit Jehovamit iluarisaajumalluni nammineq kajumissutsiminik ikikkagassamik pilliuteqarsinnaavoq. Taamatut pilliuteqartussaatilluni qularnanngitsumik uumasuutimi pitsaanersaannik toqqaanissani ajornartinneq ajorpaa. Pigisami pitsaanersaannik Jehovamut tunniussaqarnini nuannaarutigissavaa. Ullumikkut uagut Mosesip inatsisaani pilliutigeqquneqartut pilliutigisariaqanngilavut, piffissattali nukittalu pigisattalu Jehovamut kiffartornermi atornerisigut pilliuteqartarpugullusooq. Kristumiutut neriuuterput oqaluussissutigigaangatsigu ‘Guuti qujaniutinik pilliivigisarparput’, aamma apustilip Paulusip “ikiuisarneq tukkornerlu” pilliutitut Guutip iluarisaatut allaatigai. (Hebræerit 13:15, 16) Jehovamut kiffartornermut isiginnittaatsitsigut ersersissavarput taassuma uagutsinnut tunniussaanik tamanik qanoq qujamasuutiginnitsigaluta. Taamaattumik Israelikkut pisimanerattut Guutimut kiffartornermut isiginnittaaserput kiffartornissamullu kajumississutigisavut misissortariaqarpavut.

⁹ Mosesip inatsisaani piumasaqaatigineqartut ilaat tassaavoq Israelikkuusup ajortuliorsimaguni ajortaaruteqqussummik taarsiissutissamilluunniit pilliuteqarnissaa. Taakkua pilliutigineqarnissaat piumasaqaatigineqarmat, kajumilluni taakkuninnga pilliuteqarnissaq illit sapernarsimassasoraajuk? (3 Mosesi 4:27, 28) Jehovamut attaveqarluartuarumagaanni sapernarnavianngilaq.

10. Ajortumik iliuuseqarsimagutta sunik ‘pilliuteqartariaqarsinnaavugut’?

¹⁰ Ullumikkut uagut piaarinata mianersuaalliorlutaluunniit qatanngutitta narrujuummissutigisaanik oqaaseqartoorsinnaavugut. Immaqaluunniit arlaannik ajortumik iliuuseqarsimanerput ilerasuutigisinnaavarput. Jehovamit ilumut iluarisaarusukkutta aaqqiiumalluta sapinngisarput tamaat iliuuseqassaagut. Imaassinnaavoq qatanngut narrujuummisitarput ilumoorluta utoqqatserfigisariaqaripput. Imaluunniit ingasattumik ajortuliorsimagutta utoqqaanertanut ikiortissarsiortariaqarpugut. (Matthæusi 5:23, 24; Jaaku 5:14, 15) Tassa qatanngummut Guutimulluunniit ajortuliorsimanitsinnik aaqqiiumalluta iliuuseqartariaqarpugut, pilliuteqarlutalusooq. Taamatut iliuuseqartarutta Jehovamut qatanngutitsinnullu attaveqarlualeqqissaagut, ilerasuutaarutissaagullu. Tamatuma kingunerisaanik Jehovap suut uagutsinnut pitsaanerunerannik ilisimanninnera qularutigiunnaassavarput.

11, 12. (a) Pilliutit nereqatigiissutissat suuppat? (b) Pilliutit nereqatigiissutissat sumik ilinniarfigisinnaavavut?

¹¹ Mosesip inatsisaani pilliutigeqquneqartut  allat tassaapput pilliutit nereqatigiissutissat. Taakku Jehovamik eqqisseqateqarnermut ersiutaasarput. Tamatuminnga pilliuteqartoq taassumalu ilaqutai uumasup pilliutigineqartup neqaanik nerissapput, immaqa naalaffiup nerisarfeeraasa ilaanni. Palasi uumasumik sassaassisoq palasillu naalaffimmi kiffartortut allat uumasup neqaata ilaanik tunineqartarput. (3 Mosesi 3:1; 7:31-33) Tamatuminnga pilliuteqartup pilliuteqarnerminut pissutigisarpaa Guutimut attaveqarluarusunnini. Pilliuteqartoq taassumalu ilaqutai, palasit Jehovalu nammineq nuannaarlutik eqqissillutillu nereqatigiittarpullusooq.

¹² Taamaattumik nereqatigiissutissamik pilliuteqarneq Jehovamik neriartoqqusinertullusooq ippoq. Israelikkuusumut ataqqinaataangaartarsimassaaq Jehova taamatut neriartoqquneqarnerminut akuersigaangat. Israelikkuusoq soorunami pigisami pitsaanersaannik Guutimut pilliuteqarusussaaq. Pilliutit nereqatigiissutissat sallusuissutip ersiutaanut Mosesip inatsisaaniittunut ilaapput, taakkunuunatigullu erserpoq Pinngortitsisiminnik eqqisseqateqarusuttut tamarmik Pinngortitsisertik eqqisseqatigisinnaagaat Jiisusip pilliutaa pingaaruteqarnerusoq aqqutigalugu. Ullumikkut uagut Jehovamut ikinngutaasinnaavugut pigisavut nukivullu taassumunnga kiffartornermi atortarutsigit, imaluunniit pilliutigisarutsigit.

PILLIUTIT GUUTIP ILUARINNGISAI

13, 14. Sooq Jehova kunngip Saulip pilliutigiumasaanik akuerinnikkumanngila?

¹³ Jehova inuup eqqortumik isiginnittaasillip pilliutaanik iluarinnittarpoq. Aammali pilliutit Guutip akuerinngisai Biibilimi allaatigineqarput. Sooq Guuti pilliutit ilaannik iluarinninngila? Pisimasut marluk misissoriartigit.

¹⁴ Pruffiitip Samuelip kunngi Sauli oqaluttuuppaa Jehovap Amalekikkunnik piuneerussinissaanut piffissanngorsimasoq. Sauli taakkuninnga tamanik taakkualu nersutaataannik toqoraaqquaa. Saulilli ajugaareerami sakkutuumi Agagimik, Amalekikkunnut kunngiusumik, inuuginnartitsinissaat akueraa. Aamma Saulip taakkua nersutaataasa pitsaanersaat toqoranngilai Jehovamut pilliutigiumallugit. (1 Samueli 15:2, 3, 21) Jehova qanoq piva? Sauli naalanngimmat Israelimut kunngiusussaajunnaarsippaa. (Atuakkit 1 Samueli 15:22, 23). Tamanna qanoq ilinniutigisinnaavarput? Tassa pilliutivut iluarineqassappata Guutip peqqussutai naalattariaqarivut.

15. Israelikkut pilliuteqartaraluarlutik ajortumik iliortuartarnermikkut suna ersersippaat?

¹⁵ Pilliutit Jehovap iluarinngisai allat Esajap allagaani allaatigineqarput. Israelikkut Esajap nalaani Jehovamut isumakkeerfigeqqullutik pilliuteqartaraluarlutik ajortorpassuarnik iliuuseqartuarput. Taamaammat Jehovap  taakkua pilliutaat akuerinngilai. Ima aperai: “Sussakka taakku pilliuterpassuasi?” Oqarfigai: “Avaakallaappakka savat angutivissat ikikkagassatut pilliutit nersutaatissilu puallarsakkat tunnui. Kajumiginngilara ussigit savaaqqallu savaasallu angutivissat aavat.” Imalu nangippoq: “Naatitanit pilliutissanik suussuseqanngitsunik aggiusseqqinnaveeritsi, tipigissaatilliineq maajugaara.” Sooq taakkua pilliutaat piumanngilai? Guuti ima oqarpoq: “Qanorluunniit qinutigigaluarussi tusassanngilassi. Assasi aammik ulikkaarput, uffarniaritsi, eqqiarniaritsi! Iluaatsuliasi isinnit peersigit, ajortumik iliussaaritsi.” — Esaja 1:11-16.

16. Pilliutit suut Guutimit akuerineqarsinnaappat?

¹⁶ Jehovap ajortumik iliortuartut pilliutaat iluarinngilai. Sapinngisartilli tamaat iliuuseqarlutik peqqussutiminut naalattut qinnutaat pilliutaallu akuerai. Taakkua sallusuissutip ersiutai Mosesip inatsisaaniittut aqqutigalugit paasivaat ajortiliullutik Jehovamillu isumakkeerfigineqartariaqarlutik. (Galatiamiut 3:19) Tamatuminnga paasinnittoq ajortuliaminik peqqissimissutiginningaartarpoq Jehovamillu isumakkeerfigineqarusuttarluni. Ullumikkut uaguttaaq eqqaamasariaqarparput taamaallaat Kristusip pilliutaatigut Jehovamit ajortitsinnik isumakkeerfigineqarsinnaalluta. Kristusip pilliutaata pingaaruteqassusia paasillugulu ilumoorluta qujamasuutigigutsigu Jehovap imminut kiffartornitsinni iliuuserisavut tamaasa ‘ilassiumassavai’. — Atuakkit Tussiaat 51:19, 21.

JIISUSIP PILLIUTAANIK UPPERINNINNERIT ERSERSIGUK!

17-19. (a) Jiisusip utertitsissutitut pilliutaanik qujamasuutiginninnerput Jehovamut qanoq ililluta ersersissinnaavarput? (b) Allaaserisami tulliuttumi suna sammissavarput?

¹⁷ Israelikkut Guutip siunertaata ‘tarraannai’ takugaat, uagut Guutip siunertaani pisussarpiaat takuavut. (Hebræerit 10:1) Israelikkut pilliutit pillugit inatsisinit paasivaat Guutimut attaveqarluarumallutik susariaqarnerlutik. Taassumunnga qujamasunnertik ersersittariaqarpaat, pigisamik pitsaanersaannik tuniumasariaqarlugu, paasisariaqarlugulu taassumannga isumakkeerfigineqartariaqarlutik. Ullumikkut Kristumiut Allagaataat Grækerisuut iluaqutigalugit paasivarput Jehova Jiisusip utertitsissutitut pilliutaa iluaqutigalugu ajortimik toqumillu suujunnaarsitsilluinnarumaartoq. Utertitsissut iluaqutigalugu Jehovap ajortitsinnik isumakkeerfigisinnaavaatigut maannangaaq ilerasuutissaqannginniassagatta. Utertitsissut Jehovamit tunissutaavoq nuanningaartoq! — Galatiamiut 3:13; Hebræerit 9:9, 14.

¹⁸ Utertitsissutitut pilliummik iluaqutiginnikkumalluta tamatuminnga paasinniinnarata iliuuseqartariaqarpugut. Paulusi ima allappoq: “Inatsisit perorsaasigaavut Kristusip tikiunnissaata tungaanut, uppernikkut iluartuutinneqaqqulluta.” (Galatiamiut 3:24) Uppernerput iliuutsitsigut ersersittariaqarparput. (Jaaku 2:26) Ukiuni hundredelinni siullerni kristumiut juutinik nagguillit Mosesip inatsisai nalunnginnamikkit sallusuissutip ersiutaanik paasinnipput. Paulusip taakku kajumissaarpai ilisimasaminnut tamakkununnga naapertuuttumik iliuuseqartaqqullugit. Taamaalillutik sallusuissummut allanut ilinniartitsissutigisaminnut naapertuuttumik inuussapput. — Atuakkit Romamiut 2:21-23, NV. *

¹⁹ Uagut Mosesip inatsisaanik maleruaasussaatitaanngikkaluarluta Jehovap iluarisaanik pilliuteqartariaqarpugut. Allaaserisami tulliuttumi qanoq ililluta taama iliorsinnaanersugut sammissavarput.

[Quppernerup ataani ilanngussaq]

[Atuaqqissaarnermi apeqqutit]

[Qupp. 19-mi issuagaq]

Jehovap kiffaminut piumasaqaatai tunngaviusut allanngujuitsuupput

[Qupp. 20-mi assiliartaq]

Ukua arlaat sorleq Jehovamut pilliutigissagaluarpiuk?

[Qupp. 21-mi assiliartaq]

Jehovap iluarisaanik pilliuteqartarutta taassumannga akuerisaasinnaavugut