“Walaan [kayo] na pakatalos ed manuna iran kabiangan na pikakabat tan katuaan a walad Ganggan.”​—ROMA 2:20.

1. Akin ya kaukolan tayon talosan so kaimportantian na Mosaikon Ganggan?

NO ALIWAN lapud pinuyanan ya sulat nen apostol Pablo, mairap tayon talosan so kaimportantian na dakel a kabiangan na Mosaikon Ganggan. Singa bilang, diad sulat to ed saray Hebreo, nilinew to no panon ya aminpinsan ya inyapay na “matoor ya atagey a saserdote,” si Jesus, so “bagat a manakbong” kanian nagmaliw a posible parad saramay mangipapanengneng na pananisia a nagamoray ‘andi-anggaan ya kililiktar.’ (Heb. 2:17; 9:11, 12) Impaliwawa nen Pablo a say tabernakulo et sakey labat a “mangiyaanino ed saray bengatlan mangatatawen” tan si Jesus so nagmaliw a Manamegley na sipanan a “magmaong” nen say samay sipanan a si Moises so manamegley. (Heb. 7:22; 8:1-5) Makanakana iratan ya eksplinasyon ed saray Kristiano diad panaon nen Pablo, tan angga nid natan. Baleg so nitulong na saratan pian mas natalosan tayoy kablian na saray probisyon na Dios ed sikatayo.

2. Antoy bentahan walad saray Judion Kristiano ya anggapod saray Gentil?

² Nen sinulat nen Pablo iray Kristiano ed Roma, say arum ya mensahe to et parad saray Judio ya membro na kongregasyon tan abangatan ed Mosaikon Ganggan. Imbaga to ya lapud kabisado day Ganggan na Dios, wala lad sikara so “manuna iran kabiangan na pikakabat tan katuaan” nipaakar ed si Jehova tan saray matunong ya prinsipyo to. Tan lapud atalosan tan pinabli day ‘manuna iran kabiangan na katuaan,’ singa saray matoor ya Judion akauna ed sikara et  sarag dan igiya, ibangat, tan liwawaan iramay agmakaamta ed inter nen Jehova ya Ganggan ed saray totoo to.​—Basaen so Roma 2:17-20.

SARAY ANGIYANINO ED BAGAT NEN JESUS

3. Panon itayon nagunggonaan diad panaral ed panagbagat na saray Judio nensaman?

³ Saray manunan kabiangan na katuaan ya tinukoy nen Pablo et makana nin siansia pian natalosan tayo iray gagala nen Jehova. Agnaandi so kaimportantian na saray prinsipyo ed Mosaikon Ganggan. Based saya, pantongtongan tayoy sakey ya aspekto na satan a Ganggan​—no panon ya intonton na nanduruman bagat tan apay iray mapaabeban Judio ed si Kristo tan no panon ya akatulong iratan pian natalosan da no antoy kakaukolanen na Dios ed sikara. Tan lapud agmanguuman iray manunan kakaukolanen nen Jehova ed saray lingkor to, nanengneng tayo met a saray ganggan na Dios ed saray Israelita nipaakar ed panagbagat tan panag-apay et makatulong pian nausisa tayoy kualidad na sagradon serbisyo tayo.​—Mal. 3:6.

4, 5. (a) Antoy impanonot na Mosaikon Ganggan ed saray totoo na Dios? (b) Antoy iyaanino na ganggan na Dios nipaakar ed panagbagat?

⁴ Dakel ed saray kabiangan na Mosaikon Ganggan so angipanonot ed saray Judio nensaman a makasalanan ira. Singa bilang, say siopaman ya aniwit na bangkay na too et kaukolan ya ondalan ed proseso na panaglinis. Pian nagawaan to itan, nepeg a sikatoy mangiyapay na anggapoy depekton ambalangan baka. Pateyen tan poolan itan na saserdote. Isinop so dapol na satan parad “danum a nipaakar ed inkarumsis,” ya iwalsik ed samay aniwit na bangkay diad komatlo tan komapiton agew kayari impakarutakan to. (Num. 19:1-13) Tan pian nipanonot ya amin et nianak ya agperpekto tan makasalanan, kaukolan a tumboken na sakey a nananak so ganggan nipaakar ed peryodo na karutakan, tan kayari na satan et sikatoy kaukolan a manbagat parad panakbong na kasalanan.​—Lev. 12:1-8.

⁵ Diad inagew-agew a bilay na saray Judio, dakel ni ray situasyon a kaukolan day mangibagat na ayayep pian nasakbongay kasalanan da. Amta da man odino andi, ‘inyanino’ na saratan a bagat tan saramay inyapay ed templo nen Jehova ed saginonor so ayadyarin bagat nen Jesus.​—Heb. 10:1-10.

DUGAN AWAWEY ED PANAGBAGAT

6, 7. (a) Antoray kaukolan ya nonoten na saray Israelita diad pampili day ibagat da, tan antoy iyaanino na saya? (b) Antoray nayarin itepet tayo ed sarili tayo?

⁶ Unong ed ganggan, saray ayayep ya ibagat ed si Jehova et kaukolan ya “nagnap”​—aliwan bulag, aputer, sikwel, odino mansasakit. (Lev. 22:20-22) No mangiyapay iray Israelita ed si Jehova na prutas odino bukebukel, kaukolan ya saratan et “unona a bungabunga” tan ‘sankamaongan’ ed saray inani da. (Num. 18:12, 29) Ag-awaten nen Jehova iray abeban klase ya apay. Say importantin kakaukolanen ed panagbagat na ayayep et inlitrato to a say bagat nen Jesus et andi-matik tan anggapoy pakabalawan, tan say ibagat nen Jehova et samay sankaabigan tan sankablian ed sikato pian dondoney katooan.​—1 Ped. 1:18, 19.

⁷ No say sakey a manbagat et talagan misalsalamat ed si Jehova lapud amin a kaabigan To, agta malikeliket ton pilien so sankaabigan  a walad sikato? Sikato so akauley a mandesisyon no anton klase so ibagat to. Balet, amta to ya agto napaliket so Dios no walay depekto na ibagat to lapud no ontan so gawaen to, ipapatnag ton say panagbagat et aliwan importante, pabelat ni ingen. (Basaen so Malaquias 1:6-8, 13.) Diad sikatayo met natan, kaukolan tayon ikonsidera so serbisyo tayod Dios: ‘Panoy panlilingkor kod si Jehova? Kaukolan ko kasin usisaen so kualidad na serbisyok tan say motibok ed panlilingkor kod sikato?’

8, 9. Antoy naaralan tayod awawey na saray Israelita diad panagbagat da?

⁸ No say sakey ya Israelita et boluntaryon manbagat pian ipanengneng so impapuson pisasalamat ed si Jehova odino onkerew na panangabobon panamegley na bagat a poolan, aliwan mairap parad sikato so pampili na maong a klase na ayep. Malikeliket ton iter ed si Jehova so sankaabigan. Saray Kristiano natan et agla literal ya manbabagat a singa samay walad Mosaikon Ganggan, balet manbabagat ira diad panguusar day panaon, biskeg, tan kaykayarian da pian lingkoray Jehova. Tinukoy nen apostol Pablo so ‘panangipakabat’ ed ilalo tayo tan say “panggawa na maabig tan say panginabang na saray bengatla ed arum” bilang bagat a makapaliket ed Dios. (Heb. 13:15, 16) Napatnagan ed awawey na saray lingkor nen Jehova sano mibibiang irad saratan ya aktibidad so kabaleg na pisasalamat tan apresasyon da ed amin ya inter nen Jehova ed sikara. Kanian singa saray manbabagat nensaman, kaukolan tayon usisaen so awawey tan motibo tayo diad panlilingkor ed Dios.

⁹ Panon to balet ed samay kakaukolanen na Mosaikon Ganggan ya apay parad kasalanan odino impakasumlang no walay lingon agawaan na sakey? Kasin lapud kakaukolanen itan na ganggan et mairap parad sakey ya Israelita so panbagat a mabulos? Nayari kasin singa napilitan labat so sakey a manggawad satan? (Lev. 4:27, 28) Andi, no talagan labay ton pansiansiaen so maabig ya relasyon tod si Jehova.

10. Antoran “panagbagat” so kaukolan tayon gawaen pian naapiger so aderal ya relasyon?

¹⁰ Ontan met natan, nayarin agmo ginagalan asakitay liknaan na sakey ya agi. Nayarin ibaga na konsiensiam ya walay agawaan mon lingo. No ipapapuso na sakey so panaglingkor tod si Jehova, agta gawaen toy anggaay nayarian to pian nipetek so lingo to? Kaukolan mo sirin so onkerew na impapuson dispensa ed asakitan mo, odino no seryosoy kasalanan mo, onkerew na espiritual ya tulong ed saray maaron elder ed kongregasyon. (Mat. 5:23, 24; Sant. 5:14, 15) Kanian kaukolan a walay gawaen tayo pian nipetek so kasalanan ed kaparan too odino diad Dios. Singa itan “panagbagat,” ya no mabulos tayon gawaen, nipawil  tayoy maabig a relasyon ed si Jehova tan ed agi tayo, tan nawalaan tayoy malinis a konsiensia. Diad ontan et napaneknekan tayo a say paraan nen Jehova so sankaabigan parad sikatayo.

11, 12. (a) Anto so bagat a pandurungoan? (b) Antoy kaimportantian na bagat a pandurungoan ed panagdayew tayo natan?

¹¹ Say sakey nin panagbagat a walad Mosaikon Ganggan et saray bagat a pandurungoan odino bagat a para kareenan. Ipapatnag na saraya so mareen ya siglaotan na sakey ed si Jehova. Say sakey a manggawa na ontan ya panangiyapay et midungo ed pamilya to diad pangan ed karne na imbagat ya ayep, nayarin diad sakey a pananganan ed templo. Iter so sakey a parte na imbagat ya ayep ed saserdoten angibagat, ontan met ed arum ni ran saserdote a manlilingkor ed templo. (Lev. 3:1; 7:31-33, Maung a Balita) Manbabagat so sakey a managdayew pian panggayagaan so maabig a relasyon ed Dios. Singa mandurungo so nambagat, pamilya to, saray saserdote, tan si Jehova a mismo ed sakey a maliket ya panangan tan walay kareenan.

¹² Wala ni kasi mas baleg a pribilehyo nen say pangimbita ed si Jehova ed ontan a pandurungo diad simbolikon paraan tan say pangawat tod satan? Natural ya gawaen na angimbita so anggaay nayarian to pian niparaan so sankaabigan parad importantin bisita to. Say bagat a pandurungoan et kaiba ed saray manunan kabiangan na katuaan a walad Mosaikon Ganggan. Ipapatnag na satan a diad panamegley na magmaong ya bagat nen Jesus et sarag na amin a malabay so nawalaan na maapit tan mareen a relasyon ed Manamalsa. Natan et nayarian tayoy magmaliw a kaaro nen Jehova no boluntaryo tayon iyaapay iray kaykayarian tan biskeg tayo diad panaglingkor ed sikato.

PASAKBAY NIPAAKAR ED PANAGBAGAT

13, 14. Akin ya ag-inawat nen Jehova so bagat nen Arin Saul?

¹³ Pian awaten nen Jehova iray bagat ya nidatak ed Mosaikon Ganggan, kaukolan ya dugay awawey tan motibo na manbagat. Balet diad Biblia et walaray alimbawa na impanbagat ya ag-inawat na Dios. Akin ya agto inawat iratan? Pantongtongan tayoy duaran inkagawa.

¹⁴ Imbaga nen propetan Samuel ed si Arin Saul ya asabi lay panaon na paneral nen Jehova ed saray Amalekita. Kaukolan sirin nen Saul ya pateyen so amin ed satan a nasyon pati saray ayayep da. Kayari balet na impanalo to, inabuloyan ton agpateyen na saray sundalo to si Agag, say ari na saray Amalekita. Kinawanan to met iray sankamaongan ed saray ayayep pian ibagat kuno ed si Jehova. (1 Sam. 15:2, 3, 21) Antoy  reaksion nen Jehova? Impulisay toy Saul lapud agtinmulok. (Basaen so 1 Samuel 15:22, 23.) Antoy naaralan tayod saya? Pian awaten na Dios so bagat tayo, kaukolan tayon unoren iray ganggan to.

15. Antoy ipapanengneng na mauges ya kagagawa na pigaran Israelita a nambagat ed panaon nen Isaias?

¹⁵ Wala met so miparan alimbawa diad libro na Isaias. Diad panaon nen Isaias, manbabagat iray Israelita parad panamerdona nen Jehova. Balet lapud mauges so kagagawa ra, anggapoy kana na saray bagat da. “Anto ta ed siak so karaklan na saray bagat yo? kuan nen Jehova. Wala ed siak so masarag ed saray bagat a pinoolan a karkarnero, tan say taba na saray pinataba ya ayep, et agak manliket ed dala na saray baka, ni saray kordero, ni saray kanding. . . . Agyo ak la iyaakaran na saray apa a patanir, say insenso sikato so makapadimla ed siak.” Antoy makapuy ed saraman? Inkuan na Dios ed sikara: “Sano manggawa kayo na dakel a pikakasi, agak ondengel. Saray lima yo napno ra na dala. Manuras kayo, manlinis kayo; iwaklit yo so mauges ed saray gawa yo a manlapu ed arap na saray matak; ontunda kayo a manggawa na mauges.”​—Isa. 1:11-16.

16. Antoran bagat so aawaten na Dios?

¹⁶ Ag-aliketan si Jehova ed bagat ya inyapay na saray agmagbabawin managkasalanan. Balet, inawat toy pikakasi tan apay na saramay nanggunaet a nambilay unong ed saray ganggan na Dios. Saray manunan kabiangan na Ganggan so angipaimano ed sikara ya makasalanan ira tan kaukolan day panamerdona. (Gal. 3:19) No namoria itan na sakey ya Israelita, sikatoy napakiwas a magbabawi. Ontan met natan, nepeg tayon aksobien ya nakaukolan tayoy bagat nen Kristo, say alenleneg a paraan pian naperdonay kasalanan tayo. No talosan tan pablien tayo iya, seguradon “napaliket” tayoy Jehova ed amin ya iyaapay tayod panlilingkor ed sikato.​—Basaen so Salmo 51:17, 19.

IPANENGNENG SO PANANISIA ED BAGAT NEN JESUS!

17-19. (a) Panon tayon nipanengneng a talagan misalsalamat itayo ed bagat nen Jesus? (b) Anto so aralen tayod onsublay ya artikulo?

¹⁷ Say anengneng labat na saray Israelita et samay ‘angiyanino’ ed saray gagala na Dios, balet anengneng tayoy kasumpalan na satan. (Heb. 10:1) Saray ganggan nipaakar ed panagbagat so amakiwas ed saray Judio a bayuboan iray awawey a nakaukolan pian nawalaay maong a relasyon ed Dios​—impapuson pisasalamat ed sikato, mabulos a pangiter na sankaabigan ed sikato, tan pangaksobi a nakaukolan so dondon. Misalamat tayo ed eksplinasyon a walad Kristianon Griegon Kasulatan ta atalosan tayo a diad panamegley na dondon et permanentin ekalen nen Jehova so amin ya epekto na kasalanan, tan natan ni labat et posible lan nawalaan itayo na malinis a konsiensia. Talagan alay abig ya probisyon so bagat nen Jesus!​—Gal. 3:13; Heb. 9:9, 14.

¹⁸ Siempre, agmagenap so basta pangamtad kabaliksan na dondon bagat pian minabang ed satan. Oniay insulat nen apostol Pablo: “Say Ganggan et nagmaliw a manangibangat tayo pian nitonton itayo ed si Kristo, ta pian niyabawag itayon matunong lapud pananisia.” (Gal. 3:24) Tan say ontan a pananisia et kaukolan ya ipanengneng ed saray gawa. (Sant. 2:26) Kanian, pinaseseg nen Pablo iray Kristiano nen inmunan siglo ya mikabisado ed saray manunan kabiangan na katuaan a walad Mosaikon Ganggan ya nepeg dan ipanengneng itan ed gawa. No gawaen da itan, nitunos day kondukta ra ed saray prinsipyo na Dios ya imbangat da.​—Basaen so Roma 2:21-23.

¹⁹ Anggaman agla kakaukolanen ed saray Kristiano natan so pangunor ed Mosaikon Ganggan, kaukolan da nin siansia so mangiyapay na saray bagat a makapaliket ed si Jehova. Aralen tayo no panon tayon nagawaan itan diad onsublay ya artikulo.

[Tepetepet Parad Panagaral]

[Blurb ed pahina 17]

Agmanguuman iray manunan kakaukolanen nen Jehova ed saray lingkor to

[Litrato ed pahina 18]

Dinan so pilien mon iyapay ed si Jehova?

[Litrato ed pahina 19]

Aabobonan nen Jehova iramay mangiyaapay ed sikato na sankaabigan da