Luker Ma Lulamdog Bikelo Adwogi Maber Bot Dano Ducu
Luker Ma Lulamdog Bikelo Adwogi Maber Bot Dano Ducu
“Wun wubedo rok ma giyero, [luker ma lulamdog NW], rok maleng, jo pa Lubanga kikome.”—1 PET. 2:9.
TIKA ITWERO TITONE?
Awene ma kimiyo cikke me acel pi luker ma lulamdog?
I yo ango ma gicikke manyen okelo kwede luker ma lulamdog?
Adwogi maber ango ma luker ma lulamdog gibikelone bot dano ducu?
1. Pingo “Cam pa Rwotwa” bene kilwongo ni kwer me Nipo, dok kikwero pingo?
IOTYENO me Nican 14, i mwaka 33 K.M., Yecu Kricito ki lukwenane gukwero pi tyen me agikki kwer me Kato pa Lujudaya. I nge ryemo Juda Iskariote ma odote, Yecu ocako kwer mo mapat, ma lacen kilwongo ni “Cam pa Rwotwa.” (1 Kor. 11:20) Yecu owaco tyen kiryo kulu ni: “Wutim kuman me po pira.” Kwer man bene kilwongo ni kwer me Nipo. Man poyo wiwa i kom Kricito ento tutwalle i tone. (1 Kor. 11:24, 25) Ma lubbe ki cik man, Lucaden pa Jehovah i wi lobo ducu gikwero kwer me Nipo mwaka ki mwaka. I mwaka 2012, Nican 14 bicakke i nge poto ceng, Ceng Angwen, April 5 ma lubbe ki kalenda me kare me Baibul.
2. Ngo ma Yecu owaco i kom mugati ki vino ca?
2 Lakwena Luka ocoyo i lok macek gin ma Yecu otimo i nino meno dok owaco i tyeng aryo magi ni: “Omako mugati, ka dong opwoyo, ci obaro iye, omiyogi kun wacci, ‘Man aye koma [ma gimiyo piwu, wutim kuman me po pira.’ Kumeno ka gucamo otum, otingo kikopo, kun wacci, ‘Kikopo man aye gicikke manyen i remona ma oo piwu.]’” (Luka 22:19, 20) Lukwena mono onongo gitwero niang lok magi nining?
3. Lukwena mono onongo gitwero niang tyen lok me mugati ki vino ca nining?
3 Macalo Lujudaya, lukwena onongo gingeyo lok madok i kom lee ma lulamdog gimiyo me gitum bot Lubanga i ote i Jerucalem. Kodi gitum magi onongo kitumugi me nongo cwak pa Jehovah, dok polle onongo tiyo calo lanyut me kwanyo bal. (Levi. 1:4; 22:17-29) Dong lukwena onongo guniang ni ka Yecu owaco ni ‘emi kome ki remone oo pigi,’ onongo en tye ka wacci en omyero emi kwone ma pe ki roc-ci macalo gitum. Meno obedo gitum ma welle malo mada ma loyo pa lee ma kimiyo me gitum.
4. Ngo ma Yecu onongo tye ka nyutone i kare ma en waco ni: “Kikopo man aye gicikke manyen i remona”?
4 Ento lok ma Yecu owaco ni “Kikopo man aye gicikke manyen i remona[-ni]” kono? Lukwena onongo gingeyo lok pa lanebi i kom gicikke manyen ma kicoyo i Jeremia 31:31-33. (Kwan.) Lok pa Yecu onyuto ni en onongo dong tye ka cako gicikke manyen ca, ma onongo bileyo gicikke macon ma Jehovah omoko ki jo Icrael kun tiyo ki Moses. Kubbe mono onongo tye i kin gicikke aryo magi?
5. Gicikke macon me Cik-ki onongo twero weko jo Icrael doko gin ango?
5 Kubbe tye, kubbe onongo tye i tyen lok ma omiyo kimoko gicikke magi. I kare ma Jehovah tye ka moko gicikke macon me Cik, en owaco bot jo Icrael ni: “Ka wubiworo doga, kun wumako gicikkena, ci wubibedo jona kikome i kin rok ducu; pien lobo ducu mera. Wubibedo ker ma lwakke [lulamdog NW] ma an aye aloyo, wubibedo rok maleng.” (Nia 19:5, 6) Man onongo tyen lokke ngo bot jo Icrael?
CIKKE ME DOKO LUKER MA LULAMDOG
6. Cikke mene ma gicikke me Cik obino macalo adwogine?
6 Jo Icrael guniang tyen lok ni “gicikke,” pien Jehovah onongo omoko kodi gicikke ma kit meno ki kwarogi Nua ki Abraim. (Acak. 6:18; 9:8-17; 15:18; 17:1-9) Macalo but gicikke ma en omoko ki Abraim, Jehovah ocikke ni: “Rok ducu ma i lobo gibilimo gumgi [motgi] ki i kom likwayi.” (Acak. 22:18) Gicikke me Cik obino macalo adwogi me cikke man. Pi gicikke meno, Icrael onongo gitwero doko jo pa Jehovah “kikome i kin rok ducu.” Pi tyen lok ango? Me ‘doko ker ma lwakke lulamdog.’
7. Lok ni ‘ker ma lwakke lulamdog’ onongo tere gonye ningo?
7 Lok kom kabaka ki lulamdog onongo pe obedo gin manyen bot Luicrael, ento Melkijedek keken aye yam obedo kabaka dok lalamdog lawang acel kun Jehovah cwako lok meno. (Acak. 14:18) Jehovah dong omiyo kare bot rok me Icrael me doko ‘ker ma lwakke lulamdog.’ Kit ma ginacoya onyuto kwede lacen, man onongo tere ni gitye ki kare me doko luker ma lwakke lulamdog, kabaka ma gibedo lulamdog.—1 Pet. 2:9.
8. Tic ango ma lulamdog ma Lubanga ocimo timo?
8 Ngene kene ni kabaka loyo loc. Ento ngo ma lalamdog timo? Jo Ibru 5:1 waco ni: “Pien [lalamdog NW] madit acel acel giyero ki i kin lwak, ka gikete me tiyo tic i nyim Lubanga ma kakagi, kun tyero mot ki gitum pi bal.” Dong lalamdog ma Jehovah oketo cung ma kaka jo ma lubal i nyim Lubanga kun tyero mot ma mitte dok kok Bote pigi. Kitungcel, lalamdog bene cung ma kaka Jehovah i nyim dano, kun pwonyogi cik pa Lubanga. (Levi. 10:8-11; Mal. 2:7) I yo ma kit man, lalamdog ma Lubanga ocimo tiyo me ribo wat i kin dano ki Lubanga.
9. (a) Wek Luicrael gudoko ‘ker ma lwakke lulamdog’ kit ma kiciko kwede-ni myero gutim gin ango? (b) Pingo Jehovah ocimo lulamdog i kin jo Icrael? (c) Ngo ma ogengo Luicrael me doko ‘ker ma lwakke lulamdog’ i te gicikke me Cik?
9 Gicikke me Cik omiyo kare bot jo Icrael me doko luker ma lulamdog ma bikelo adwogi maber bot “rok ducu.” Ento onongo tye gin mo ma myero Luicrael gutim wek gunong mot madit man. Lubanga owaco ni: “Ka wubiworo doga, kun wumako gicikkena.” Jo Icrael onongo tika gitwero ‘woro dog Jehovah’? Onongo gitwero, olo i rwom mo. Onongo tika gitwero woro En labongo bal mo? Pe. (Rom. 3:19, 20) Pi meno, pi tutunu Jehovah oketo lulamdog i Kin jo Icrael, mapat ki jo ma bedo kabaka, pi tyero lee me gitum pi bal ma jo Icrael gubitimo. (Levi. 4:1–6:7) Bal magi kwako wa bal pa lulamdog. (Ibru 5:1-3; 8:3) Jehovah onongo jolo kodi gitum ma kit meno, ento gitum magi onongo pe gitwero jwayo bal pa jo ma gityero-ni. Lulamdog i te gicikke me Cik pe onongo gitwero ribo maber adada jo Icrael ma cwinygi tye atir ki Lubanga. Lakwena Paulo ocoyo ni: “remo twoni ki remo dyegi pe twero kwanyo bal woko wacel.” (Ibru 10:1-4) Kiceno jo Icrael pi turo Cik. (Gal. 3:10) Pe onongo gitwero tic pi jo me wi lobo ducu macalo luker ma lulamdog kun nongo gitye kit meno.
10. Gicikke me Cik okonyo me timo gin ango?
10 Mono cikke pa Jehovah ni gin bidoko ‘ker ma lwakke lulamdog’ ca dong opoto nono? Pe wacel. Ka gutemme ki cwinygi ducu me lubone, ci bitwere, ento pe i te Cik. pingo? (Kwan Jo Galatia 3:19-25.) Pi jo ma biyelle me bedo lugen i lubone, Cik meno onongo tye ki teko me gwoko woro me ada. Oweko Lujudaya gungeyo balgi ki dong ni gitum ma pire tek kato ma lalamdog madit twero tyerone mitte. Cik onongo obedo calo lagwokgi ma twero telogi bot Kricito, nyo Meciya, nying dog tic ma tere ni “Ngat ma Kiwiro.” Ento, ka ngat ma kiwiro-ni obino, en bicako gicikke manyen ma Jeremia oloko pire con-ni. Jo ma guye Kricito kimiyo gudoko but jo ma gitye i gicikke manyen ma gibidoko ‘ker ma lwakke lulamdog.’ Kong dongo wanenu kit ma bibedo kwede.
GICIKKE MANYEN OKELO LUKER MA LULAMDOG
11. Yecu odoko te guti pa luker ma lulamdog nining?
11 I mwaka 29 K.M., ngat ma bibedo Meciya onen ka maleng ma en aye Yecu me Najaret. Ma dong en tye ki mwaka ma romo 30, en odyere me cobo mit pa Jehovah kun nyuto man ki nongo batija. Jehovah en kikome olok ni man “Woda ma amare,” Jehovah owiro Yecu ki cwiny maleng, ento pe ki mo. (Mat. 3:13-17; Tic. 10:38) Wire ni omiyo en ocako tic macalo Lalamdog Madit pi jo ducu muye dok macalo ngat ma bibedo Kabakagi i anyim. (Ibru 1:8, 9; 5:5, 6) En onongo bibedo te guti pa luker ma lwakke lulamdog me ada.
12. Gin ango ma gitum pa Yecu omiyo otwere?
12 Macalo Lalamdog Madit, kodi gitum ango ma Yecu onongo twero tyerone me jwayo bal alaka pa jo muye ducu? Kom Yecu ma pe ki roc-ci aye onongo tye gitum meno, kit ma en owaco kwede i kare ma tye ka cako kwer me Nipo-ni. (Kwan Jo Ibru 9:11, 12.) Nicakke i kare ma kibatija en i mwaka 29 K.M., Yecu, macalo Lalamdog Madit, oye ni kitem en nio wa i cawa me tone. (Ibru 4:15; 5:7-10) Inge cerre, en odok i polo ci omiyo wel me gitum ma mege bot Jehovah kikome. (Ibru 9:24) Pi meno, Yecu dong twero bako doge bot Jehovah pi jo ma giketo niyegi i gitumme dok konyogi me tic pi Lubanga kun gibedo ki gen me kwo naka. (Ibru 7:25) Gitumme bene otiyo me moko gicikke manyen-ni.—Ibru 8:6; 9:15.
13. Gen ango ma onongo tye pi jo ma kilwongogi me donyo i gicikke manyen-ni?
13 Jo ma kilwongogi me donyo i gicikke manyen-ni bene kiwirogi ki cwiny maleng. (2 Kor. 1:21) Lujudaya ma lugen kacel ki Lurok bene gitye iye. (Ep. 3:5, 6) Gen ango ma onongo tye pi jo ma gitye i gicikke manyen-ni? Gin onongo gibiweko balgi. Jehovah onongo ocikke ni: “Abiweko balgi, pe dok abibedo ka po i kom gin marac ma gubedo ka timone.” (Jer. 31:34) Ka dong kijwayo balgi woko, gin gitwero doko ‘ker ma lwakke lulamdog.’ I kare ma Petero tye ka lok ki Lukricitayo ma kiwirogi, en ocoyo ni: “Wun wubedo rok ma giyero, [luker ma lulamdog NW], rok maleng, jo pa Lubanga kikome, wek wutit pi tic me deyo pa ngat ma olwongowu nia ki i piny macol wek wudony i lengone me aura.” (1 Pet. 2:9) Kany Petero onongo tye ka tic ki lok pa Jehovah bot jo Icrael i kare ma tye ka miyo botgi Cik, ci otiyo kwede i kom Lukricitayo ma gitye i gicikke manyen.—Nia 19:5, 6.
LUKER MA LULAMDOG GIKELO ADWOGI MABER BOT DANO DUCU
14. Luker ma lulamdog gibitic kwene?
14 Jo ma gitye i gicikke manyen-ni gibitic kwene? I lobo kany, ka ma gin macalo gurup, gitiyo macalo lulamdog kun gicung pi Jehovah ki ‘tito pi tic me deyone’ ki dok miyo cam me cwiny. (Mat. 24:45; 1 Pet. 2:4, 5) I nge cerogi, gin bitic kacel ki Yecu i polo macalo luker ma lulamdog, gibitiyo tic aryo magi lawang acel. (Luka 22:29; 1 Pet. 1:3-5; Yabo. 1:6) Me moko lok man, lakwena Jon oneno i gin anyuta lwak cwec me cwiny ma gitye cok ki komker pa Jehovah i polo. I “wer manyen” ma kiwero bot “Latin romo,” gin guwero ni: ‘pi remoni ikoko dano pi Lubanga, ma gua ki i kaka mapol mapatpat, ki i leb ki rok mapatpat ducu, ilokogi gudoko lwak pa Lubanga ma en loyo, ma gin aye dong lulamdog ma gitiyo bote, gin bene gibiloyo lobo.’ (Yabo. 5:8-10) Lacen i gin anyuto mukene, Jon oloko i kom luloc magi ni: ‘gin dong gibibedo lulamdog pa Lubanga ki pa Yecu, dok bene gibibedo ka loc kacel kwede pi mwaka alip acel.’ (Yabo. 20:6) Kacel ki Kricito, gin bibedo luker ma lulamdog pi kelo adwogi maber bot dano ducu.
15, 16. Adwogi maber ango ma luker ma lulamdog gibikelo bot dano?
15 Adwogi maber ango ma jo 144,000 bikelone bot dano ma i lobo? Niyabo cura 21 loko i komgi macalo boma me polo, Jerucalem Manyen, ma kilwongo ni “dako pa Latin romo.” (Yabo. 21:9) Tyeng 2 nio i 4 waco ni: “Ci aneno gang maleng, Jerucalem manyen, kun oa ki i polo bot Lubanga bino piny, ma giyubo woko macalo nyako ger ma gideyo pi cware. Ci awinyo dwan mo malongo ma oa ki i komker kun wacci, ‘Nen, kabedo pa Lubanga dong tye bot dano. En bibedo kacel kwedgi, ci gin gibibedo jone. Lubanga kikome aye bibedo kwedgi, kun bene bedo Lubangagi. En bijwayo pig wanggi woko ducu. To bene dong bibedo pe, kadi kumo nyo koko, nyo arem, pien gin macon dong ducu gurwenyo woko matwal.’” Man pud dong bibedo twon mot madit atika! Jwayo to bikwanyo gin madit ma kelo pig wang, kumu, koko, ki arem. Man nyuto ni kibiweko jo ma lugen bedo labongo roc ma watgi ki Lubanga nongo oyubbe maber adada.
16 Niyabo 22:1, 2 medde ki tito mot ma luker ma lulamdog gibikelo kun waco ni: “Lamalaika dok onyutta kulu me pii me kwo, ma mil amila limakmak calo gweng ma mil, ma onongo mol kun a ki i komker pa Lubanga ki pa Latin romo, onongo mol lubo dye yo me gang meno. Dok bene i dog kulu ryoryo onongo yat me kwo tye iye, ma tye ki nyige mapatpat ma romo apar wiye aryo, onongo bene nyak dwe ki dwe. Pot yat meno onongo obedo yat me cango two pa jo me rok ducu.” Calo lanyut ma kiloko i komgi-ni, “rok ducu” nyo dano ducu gibicang ki i roc ma gulako ki bot Adam. Ada, ‘jami macon ducu nongo dong gurwenyo woko matwal.’
LUKER MA LULAMDOG GIBITYEKO TICGI
17. Gin ango ma luker ma lulamdog gibicobone?
17 I agikki me mwaka 1,000 me ticgi maber, luker ma lulamdog nongo dong guilo rwom pa jo ma gin loyo i lobo me bedo labongo roc. Macalo Lalamdog Madit ki dok Kabaka, Kricito bimiyo dano ducu ma dong gipe ki roc bot Jehovah. (Kwan 1 Jo Korint 15:22-26.) Luker ma lulamdog nongo dong gutyeko tic ducu.
18. Ka luker ma lulamdog magi gucobo ticgi, Jehovah bitic kwedgi nining?
18 I nge meno, Jehovah mono bitic ki luker ma lulamdog-gi nining? Ma lubbe ki Niyabo 22:5, “gibibedo ka loc nakanaka.” Gibiloyo angagi? Baibul pe otuco. Ento rwom me kwogi kacel ki tic ma gutimo me konyo dano ma luroc i lobo bimiyo gibedo luker i yub pa Jehovah pi naka.
19. Ngo ma jo ducu ma bibedo tye i nino me Nipo kibipoyo wigi iye?
19 Ka wagure me kwero kwer me Nipo me to pa Yecu i Ceng Angwen, nino dwe 5 me April, mwaka 2012, tamwa bibedo i kom pwony magi me Baibul. Udong jo pa Lukricitayo ma kiwiro ma pud gitye i lobo gibicamo mugati dok gimato vino ma tye calo lanyut-ti me nyuto ni gitye i gicikke manyen-ni. Jami magi ma gitye macalo lanyut me gitum pa Kricito-ni bipoyo wigi i kom mot me aura kacel ki tic madit ma gitye kwede i yub ma Lubanga tye kwede pi naka. Wageno ni wan ducu omyero wabedu tye i nino meno ki twon pwoc madit pi mic pa Lubanga ma luker ma lulamdog gibikelone, adwogi maber bot dano ducu.
[Peny me Kwan]
[Cal ma tye i pot karatac 31]
Luker ma lulamdog gibikelo adwogi marii matwal bot dano
