Ɲanmiɛn ɲrun jranfuɛ mɔ be ti famiɛn’n be ti’n, klɔ sran’m bé dí ye
Ɲanmiɛn ɲrun jranfuɛ mɔ be ti famiɛn’n be ti’n, klɔ sran’m bé dí ye
“Amun liɛ’n, an ti ‘sran mɔ Ɲanmiɛn fali amun, an ti Famiɛn nin Ɲanmiɛn ɲrun jranfuɛ, an ti Ɲanmiɛn i nvle’n nun sran, yɛ an ti i liɛ mlɔnmlɔn.’”—1 PIƐ. 2:9, NW.
?WAFA SƐ YƐ AMÚN YÍYÍ NUN ƆN?
?Blɛ benin nun yɛ Zoova dun mmua kannin kɛ sran wie’m bé yó famiɛn nin Ɲanmiɛn ɲrun jranfuɛ ɔ?
?Wafa sɛ yɛ be nga Ɲanmiɛn nin be tra aenguɛ uflɛ’n be kaci famiɛn nin Ɲanmiɛn ɲrun jranfuɛ ɔ?
?Ye benin yɛ Ɲanmiɛn ɲrun jranfuɛ sɔ mɔ be ti famiɛn’n bé yó asiɛ’n sufuɛ mun ɔn?
1. ?Ngue ti yɛ be flɛ “e Min’n i aliɛ” i ekun kɛ E wla kpɛnlɛ cɛn’n niɔn? ?Ngue ti yɛ Zoova i Lalofuɛ’m be yo aɲia sɔ’n niɔn?
DELƐ CƐN kasiɛn nga Zezi Klist nin i akoto 12 be dili’n, be dili i afuɛ 33 Nisan anglo’n i le 14 i kɔnguɛ’n nun. Zezi seli Zidas Iskariɔti kɛ ɔ fite. I sin’n, ɔ kpɛli like uflɛ mɔ i waan i sɔnnzɔnfuɛ’m be yia be yo’n, i ba. Be flɛ i “e Min’n i aliɛ.” (1 Kor. 11:20) Zezi kɛnnin i kpɛ nɲɔn kɛ: “An yo i kɛ nga n yo i yɛ’n sa, maan amun wla kpɛn n su.” Like sɔ m’ɔ kpɛli i ba’n be flɛ i ekun kɛ E wla kpɛnlɛ cɛn. Yɛle kɛ, aɲia sɔ’n i bo’n, e wla kpɛn like nga Klist yoli’n su. Like cinnjinfuɛ nga e wla kpɛn su’n yɛle kɛ e dunman nun ti’n, ɔ fɛli i nguan’n mannin. (1 Kor. 11:24, 25) Afuɛ kwlaa nun’n, Zoova i Lalofuɛ’m be yo aɲia sɔ’n i mɛn wunmuan nun be fa kle kɛ mmla sɔ mɔ Zezi mannin be’n, be di su. Kɛ e nian Zuifu’m be kananndrie su’n, e wun i kɛ afuɛ’n, Nisan i le 14 ɔ bo i bo Avrili i le 5 kɛ sɛnzɛ ko tɔ’n. Ɔ ti Wue cɛn.
2. ?Kpaun nin nzan nga be fa yoli aɲia’n be su ndɛ benin yɛ Zezi kannin ɔn?
2 Ndɛ nga Zezi kɛnnin i aɲia sɔ’n bo’n, ɔ nin like nga ɔ yoli’n, i sɔnnzɔnfuɛ Liki boli i kpɔlɛ. Ɔ seli kɛ: “Ɔ fali kpaun, kɛ ɔ lali Nyanmiɛn ase’n, ɔ bubuli nun fa mannin be, ɔ seli kɛ: ‘Kpaun ng’ɔ o yɛ’n ti min wunnɛn i nzɔliɛ, amun ti yɛ n su fa man-an. An yo i kɛ nga ń yó i yɛ’n sa, maan amun wla kpɛn n su.’ Kɛ be wieli like’n di’n, ɔ fali klowa’n mannin be naan w’a se kɛ: ‘Like ng’ɔ o klowa nga nun’n, ɔ ti min mmoja, ɔ ti aenguɛ uflɛ nga Nyanmiɛn waan ɔ nin amún trá’n, i nzɔliɛ, amun ti yɛ be su wa guɛ i ase-ɔ.’” (Lik 22:19, 20) ?Wafa sɛ yɛ Zezi i akoto’m be wunnin ndɛ sɔ’m be wlɛ ɔ?
3. ?Zezi i wunnɛn’n nin i mmoja’n be su ndɛ ng’ɔ kannin’n, wafa sɛ yɛ akoto’m be wunnin i wlɛ ɔ?
3 Akoto’m be si kɛ Zerizalɛmu lɔ Ɲanmiɛn i sua’n nun’n, Ɲanmiɛn ɲrun jranfuɛ’m be fa nnɛn be yi tɛ. Sran’m be yi tɛ sɔ’m be nun sunman naan Zoova yaci be sa tɛ mun cɛ be. Be yi wie kusu naan Zoova klun jɔ be wun. (Sau. 1:4; 22:17-29) Ɔ maan kɛ Zezi seli i akoto’m be kɛ ‘be ti yɛ ɔ su fɛ i wunnɛn’n man’n’ naan ‘be ti yɛ be su wa guɛ i mmoja’n i ase’n’ e kwla se kɛ be wunnin i wlɛ. Be wunnin i wlɛ kɛ i, ɔ su wa fɛ i nguan mɔ fɔ nunman nun’n yí tɛ. Tɛ nga Zezi yí’n, ɔ́ ɲán ɲrun trá nga be fa nnɛn’m be yi’n fatifati.
4. ?Aenguɛ uflɛ’n i su ndɛ nga Zezi kannin’n kle sɛ?
4 Zezi seli kɛ: “Like ng’ɔ o klowa nga nun’n, ɔ ti min mmoja, ɔ ti aenguɛ uflɛ nga Nyanmiɛn waan ɔ nin amún trá’n, i nzɔliɛ.” ?Ngue ndɛ yɛ Zezi waan ɔ́ kán ɔn? Akoto’m be si aenguɛ uflɛ’n i su ndɛ nga be dun mmua be kɛnnin i Zeremi 31:31-33 nun’n. (An kanngan nun.) Ɔ maan siɛn’n, Zezi su kɛn i weinwein kɛ aenguɛ uflɛ sɔ’n su yɛ bé wá dí ɔ. Naan aenguɛ sɔ’n, ɔ́ káci nga Zoova sinnin Moizi i lika naan ɔ nin Izraɛlifuɛ’m b’a tra’n. ?Aenguɛ nɲɔn sɔ’m be kɔ likawlɛ?
5. ?Sɛ Izraɛlifuɛ’m be fa Mmla’n i nun ndɛ’m be su’n, i su mmlusuɛ benin yɛ bé ɲɛ́n i ɔ?
5 Aenguɛ nɲɔn sɔ’m be kɔ likawlɛ. Kɛ Zoova fali Mmla’n mannin Izraɛlifuɛ mun’n, ɔ seli be kɛ: “Siɛn liɛ’n, sɛ amun ti ndɛ nga n kan kle amun’n i kpa’n, sɛ amun nian aenguɛ nga e nin amun e tra’n su kpa’n, amún yó min nvle b’ɔ ti min liɛ klonglo nvle kun nga’m be afiɛn, afin asiɛ wunmuan’n ti min liɛ. Sanngɛ amun liɛ’n, amún wá yó min nyrun jranfuɛ’m be nvle. Amun nvle sɔ’n yó min liɛ klonglo.” (Tul. 19:5, 6) ?Wafa sɛ yɛ Izraɛlifuɛ’m be wunnin ndɛ sɔ’n i wlɛ ɔ?
FAMIƐN MƆ BE TI ƝANMIƐN ƝRUN JRANFUƐ MƆ ƝANMIƐN WAAN BÉ BÁ’N
6. ?Nda benin i su kpɛnlɛ ti yɛ Zoova nin Izraɛlifuɛ’m be trali aenguɛ ɔ?
6 Izraɛlifuɛ’m be si kɛ like nga be flɛ i “aenguɛ’n,” yɛle be wiengu nda talɛ. Afin Zoova nin Nowe nin Abraamu mɔ be ti Izraɛlifuɛ’m be nannannannan’n be trali wie. (Bob. 6:18; 9:8-17; 15:18; 17:1-9) Aenguɛ nga Abraamu nin Zoova be trali’n nun’n, ɔ seli kɛ: “Min nuan ndɛ bɔ a fali’n ti, ń sín wɔ anunman’m be nun ń yó asiɛ’n su nvle-nvle’m be kwlaa be ye.” (Bob. 22:18) Kɛ ɔ ko yo naan nda sɔ’n w’a kwla kpɛn su’n ti yɛ Zoova nin Izraɛlifuɛ’m be trali aenguɛ’n niɔn. Aenguɛ sɔ’n ti yɛ bé kwlá káci ‘nvle b’ɔ ti [Zoova] liɛ klonglo nvle kun nga’m be afiɛn ɔn.’ ?Ngue ti yɛ Zoova waan ɔ́ fá be yó i liɛ ɔ? I waan ɔ́ yó i sɔ naan nvle sɔ’n i nunfuɛ’m be kaci famiɛn mɔ be ti i ɲrun jranfuɛ’n.
7. ?Ngue yolɛ wun atin yɛ Zoova mannin Izraɛlifuɛ mun ɔn?
7 Kɛ be se kɛ sran di famiɛn annzɛ ɔ ti Ɲanmiɛn ɲrun jranfuɛ’n, Izraɛlifuɛ’m be wun i wlɛ. Sanngɛ lalafuɛ sran kunngba nga Zoova kplinnin su kɛ ɔ yo famiɛn naan i kunngba’n yo Ɲanmiɛn ɲrun jranfuɛ’n yɛle Mɛlkizedɛk. (Bob. 14:18) Siɛn’n, Zoova su man Izraɛlifuɛ’m be atin kɛ be kaci nvle kun mɔ i nunfuɛ’m be ti famiɛn mɔ be kunngba’n be ti Ɲanmiɛn ɲrun jranfuɛ’n. I sɔ yɛ kɛ i osu lali nun’n, be wa kɛnnin i Ɲanmiɛn Ndɛ’n nun ɔn.—1 Piɛ. 2:9.
8. ?Ngue yɛ Ɲanmiɛn ɲrun jranfuɛ’m be yo ɔ?
8 E si kɛ sran nga be sie i famiɛn’n, i junman’n yɛle sran’m be sielɛ. ?Sanngɛ ngue yɛ Ɲanmiɛn ɲrun jranfuɛ’n yo ɔ? Ebre Mun 5:1 se kɛ: “Nyanmiɛn nyrun jranfuɛ’m be su kpɛn kwlaa nga be fɛ i’n, be sie i kɛ ɔ jran sran’m be nuan Nyanmiɛn nyrun naan like nga sran’m be waan bé fá mɛ́n i’n, ɔ nin nnɛn nga bé fá sɔ́ i’n [yɛle kɛ bé fá yí tɛ’n], be fa mɛn i.” Ɔ maan, sran nga Zoova sie i Ɲanmiɛn ɲrun jranfuɛ’n, ɔ jran sran’m be nuan Ɲanmiɛn ɲrun. Asa ekun’n, ɔ yi tɛ man Zoova naan Zoova yaci sran’m be sa tɛ mun cɛ be. Asa kusu’n, ɔ jran Zoova ja nun fa Ɲanmiɛn mmla’n kle sran mun. (Sau. 10:8-11; Mal. 2:7) Junman sɔ mɔ Ɲanmiɛn ɲrun jranfuɛ’n di’n, ɔ yo maan sran’m be nin Ɲanmiɛn be afiɛn m’ɔ sacili’n, ɔ sɛ ekun.
9. (a) ?Ngue yɛ ɔ fata kɛ Izraɛlifuɛ’m be yo naan b’a kwla di famiɛn nin Ɲanmiɛn ɲrun jranlɛ junman’n niɔn? (b) ?Ngue ti yɛ Zoova sieli Izraɛlifuɛ wie mun kɛ be di Ɲanmiɛn ɲrun jranlɛ junman’n be man Izraɛlifuɛ onga mun ɔn? (c) ?Ngue ti yɛ Izraɛlifuɛ’m b’a kwlá diman Ɲanmiɛn ɲrun jranlɛ nin famiɛn junman’n b’a manman nvle kun nga mun ɔn?
9 Aenguɛ nga Izraɛli nvle’n nin Zoova be trali’n ti’n, Izraɛlifuɛ’m bé kwlá dí famiɛn nin Ɲanmiɛn ɲrun jranlɛ junman’n mán ‘nvle kun nga mun.’ Sanngɛ ‘sɛ be ti ndɛ nga [Zoova] kan kle be’n i kpa’n, sɛ be nian aenguɛ nga ɔ nin be tra’n su kpa’n,’ yɛ bé kwlá dí junman sɔ’n niɔn. ?Sanngɛ Izraɛlifuɛ’m be kwla ‘ti ndɛ nga Zoova kan kle be’n i kpa’? ?Yɛle be kwla fa su sɛsɛsɛ? Be kwla mian be ɲin kɛ bé yó sɔ, sanngɛ be kwlá yoman sɔ sɛsɛsɛ. (Rɔm. 3:19, 20) I ti yɛ Zoova sieli Izraɛlifuɛ wie mun Ɲanmiɛn ɲrun jranfuɛ naan be di junman man Izraɛlifuɛ onga mun ɔn. Ɲanmiɛn ɲrun jranfuɛ sɔ’m be liɛ’n be diman famiɛn. Sanngɛ be yi Izraɛlifuɛ’m be ti kpatalɛ tɛ. (Sau. 4:1—5:26) Tɛ nga be yi’n, ɔ ti be bɔbɔ be liɛ wie. (Ebr. 5:1-3; 8:3) Kannzɛ Zoova sɔli tɛ nga Ɲanmiɛn ɲrun jranfuɛ’m be yili be mɛnnin i’n nun’n, sanngɛ i sɔ’n kwlá nunnunman Izraɛlifuɛ’m be sa tɛ’n kwlaa. I sɔ’n ti’n, Izraɛlifuɛ nga be kunndɛli kɛ be nin Ɲanmiɛn be afiɛn sɛ kpa bɔbɔ’n, Ɲanmiɛn ɲrun jranfuɛ mɔ be di Moizi Mmla’n su’n, be kwlá ukaman be naan b’a yo i sɔ. I ti’n, akoto Pɔlu seli kɛ: “Nannin tola’n nin boli kpakpuɛ’m be mmoja’n ɔ kwla wie-man be wun sa’n.” (Ebr. 10:1-4) Kɛ mɔ Izraɛlifuɛ’m b’a kwlá faman Mmla’n i nun ndɛ’n kwlaa su sɛsɛsɛ’n ti’n, ɔ ti kɛ b’a bo be sannzan sa. (Gal. 3:10) I sɔ’n ti’n, be kwlá diman Ɲanmiɛn ɲrun jranlɛ nin famiɛn junman’n b’a manman nvle kun nga mun.
10. ?Ngue ti yɛ Ɲanmiɛn fali Moizi Mmla’n mannin Izraɛlifuɛ mun ɔn?
10 I sɔ’n kleman kɛ be nga bé yó famiɛn mɔ bé yó Ɲanmiɛn ɲrun jranfuɛ kɛ nga Zoova fa kannin’n sa’n, Izraɛlifuɛ wie fi su kwlá tranman be nun. Sɛ be ɲin yi Zoova kpa’n, bé kwlá ɲɛ́n i sɔ’n i wun atin. Sanngɛ nán blɛ mɔ be te di Moizi Mmla’n su’n, yɛ i sɔ’n yó ye ɔ. ?Ngue ti ɔ? (An kanngan Galasifuɛ Mun 3:19-25 nun.) Kɛ ɔ ko yo naan y’a wun i wlɛ’n, ɔ fata kɛ e si sa nga ti yɛ Ɲanmiɛn fali Moizi Mmla’n mannin be’n. Yɛle kɛ, sɛ Izraɛlifuɛ’m be nanti Mmla’n su’n, be su sɔman amuɛn. Mmla sɔ’n kle be ekun kɛ be ti sa tɛ yofuɛ naan ɔ fata kɛ sran kun yi tɛ mɔ i kpa tra nga be Ɲanmiɛn ɲrun jranfuɛ’m be su kpɛn’n yi’n. Asa ekun’n, Mmla’n kle be atin naan kɛ Klist annzɛ Mɛsi mɔ i bo’n yɛle “sran mɔ be kpɛli i sieli i ngunmin’n” ɔ́ bá’n, b’a sɔ i nun klanman. Sanngɛ kɛ Mɛsi’n wá bá’n, ɔ́ kɛ́n i weinwein kɛ aenguɛ uflɛ nga Zeremi kɛnnin i ndɛ lalafuɛ nun’n, i su yɛ be di siɛn’n niɔn. Ɔ maan be nga be fá ndɛ nga Mɛsi kán’n su’n, be nin Ɲanmiɛn bé kwlá trá aenguɛ uflɛ’n wie naan b’a kaci Ɲanmiɛn ɲrun jranfuɛ mɔ be ti famiɛn’n. Maan e kan wafa nga i sɔ’n kwla yo ye’n i ndɛ.
AENGUƐ UFLƐ’N TI’N SRAN WIE’M BÉ KÁCI FAMIƐN MƆ BE TI ƝANMIƐN ƝRUN JRANFUƐ’N
11. ?Ngue yɛ Ɲanmiɛn yoli naan Zezi w’a kaci famiɛn nin Ɲanmiɛn ɲrun jranfuɛ’m be su kpɛn ɔn?
11 Zezi m’ɔ fin Nazarɛti’n yoli Mɛsi afuɛ nga be flɛ i 29 nun. Kɛ ɔ́ wá ɲán afuɛ 30 yɛ be yoli i batɛmu ɔ. Ɔ yoli sɔ fa kleli Zoova kɛ w’a ba junman cinnjin nga i waan ɔ di’n i dilɛ. Kɛ ɔ yoli sɔ’n, Zoova kannin Zezi ndɛ’n seli kɛ: “Min anwlɛn su ba’n yɛ.” Naan w’a kpɛ i w’a sie i ngunmin. Nán ngo yɛ ɔ fa yoli sɔ ɔ. I wawɛ’n yɛ ɔ fa mɛnnin i ɔ. (Mat. 3:13-17; Yol. 10:38) I sɔ m’ɔ yoli maan Zezi kwla di Ɲanmiɛn ɲrun jranfuɛ’m be su kpɛn nin famiɛn junman man be kwlaa nga be lafi i su’n. (Ebr. 1:8, 9; 5:5, 6) Zezi dunman nun ti’n, sran uflɛ’m bé ɲán atin bé dí junman sɔ mun wie.
12. ?Tɛ nga Zezi yili’n, ɔ yo ngue ye?
12 Sran’m be nin sa tɛ yolɛ’n fin be nin klun. ?Ngue yɛ Zezi m’ɔ ti Ɲanmiɛn ɲrun jranfuɛ’m be su kpɛn’n, ɔ kwla fa yi tɛ naan be nga be lafi i su’n, Ɲanmiɛn w’a yaci i sɔ sa tɛ’n w’a cɛ be weiin ɔn? I nun nga Zezi kpɛ́ E wla kpɛnlɛ cɛn aɲia’n i ba’n, ndɛ ng’ɔ kannin’n maan e wun i wlɛ kɛ i nguan’n mɔ fɔ nunman nun’n yɛ ɔ́ fá yí tɛ’n niɔn. (An kanngan Ebre Mun 9:11, 12 nun.) Afuɛ nga be flɛ i 29 nun’n, kɛ be yoli Zezi i batɛmu mɔ Ɲanmiɛn sieli i i ɲrun jranfuɛ’m be su kpɛn’n, lele m’ɔ́ fá wú’n, ɔ loli i wun naan be kle i like. Yɛ ɔ kplinnin su kɛ sran’m be kle i ɲrɛnnɛn. (Ebr. 4:15; 5:7-10) Kɛ Ɲanmiɛn cɛnnin i’n, ɔ ɔli ɲanmiɛn su lɔ ɔ fɛli i nguan m’ɔ fa yili tɛ’n mannin Zoova. (Ebr. 9:24) Kɛ ɔ fɛ i lɛ’n, Zezi kwla kan be nga be lafi tɛ nga ɔ yili’n su’n, be ti ndɛ. Kpɛkun ɔ kwla uka be naan b’a su Ɲanmiɛn naan b’a lafi su kɛ cɛn wie lele’n, bé ɲán anannganman nguan. (Ebr. 7:25) Asa ekun’n, tɛ ng’ɔ yili’n kle kɛ kɛ ɔ fɛ i lɛ’n, aenguɛ uflɛ’n su yɛ ɔ fata kɛ i sɔnnzɔnfuɛ’m be di ɔ.—Ebr. 8:6; 9:15.
13. ?Be nga be nin Ɲanmiɛn be tra aenguɛ uflɛ’n, ngue yɛ be ɲɛn i ɔ?
13 Be nga be nin Ɲanmiɛn be tra aenguɛ uflɛ’n, Ɲanmiɛn fɛ i wawɛ’n kpa be sie be ngunmin. (2 Kor. 1:21) Zuifu nga b’a kpɔciman Ɲanmiɛn’n, yɛ i sin sran wie mɔ be timan Zuifu’n, be nin Ɲanmiɛn be wa trali aenguɛ’n sɔ’n wie. (Efɛ. 3:5, 6) ?Be nga be nin Ɲanmiɛn be tra aenguɛ uflɛ’n, ngue yɛ be ɲɛn i ɔ? Ɲanmiɛn yaci be wun sa’n kwlaa cɛ be weiin. Zoova tali be nda kɛ: “Sa nga be yoli min’n, ń yáci ń cɛ́ bé. N su bo-man be sa tɛ’n su di-man jɔlɛ kun.” (Zer. 31:34) Kɛ mɔ Zoova w’a yaci be wun sa w’a cɛ be weiin’n ti’n, be kwla kaci Ɲanmiɛn ɲrun jranfuɛ mɔ be ti famiɛn’n. Piɛli seli Klistfuɛ nga Ɲanmiɛn fɛli i wawɛ’n kpali be sieli be ngunmin’n be kɛ: “Amun liɛ’n, an ti ‘sran mɔ Ɲanmiɛn fali amun, an ti Famiɛn nin Ɲanmiɛn ɲrun jranfuɛ, an ti Ɲanmiɛn i nvle’n nun sran, yɛ an ti i liɛ mlɔnmlɔn. Ɔ fali amun kɛ an yi’ i m’ɔ flɛli amun kɛ an jao aosin nun bla lika ng’ɔ kpaja kpa nun’n i ayɛ.” (1 Piɛ. 2:9, NW) Kɛ Zoova fali Mmla’n mannin Izraɛlifuɛ mun’n, ndɛ ng’ɔ kannin’n yɛ Piɛli flannin nun lɛ ɔ. Piɛli kannin ndɛ sɔ’n mannin Klistfuɛ nga be nin Ɲanmiɛn b’a tra aenguɛ uflɛ’n.—Tul. 19:5, 6.
ƝANMIƐN ƝRUN JRANFUƐ MƆ BE TI FAMIƐN’N, BE YO KLƆ SRAN’M BE KWLAA BE YE
14. ?Nin yɛ be nga be nin Ɲanmiɛn be tra aenguɛ uflɛ’n, be di be junman’n niɔn?
14 ?Nin yɛ be nga Ɲanmiɛn nin be tra aenguɛ uflɛ’n, be di be junman’n niɔn? Kɛ be o asiɛ’n su wa’n, be ngba be di Ɲanmiɛn ɲrun jranlɛ junman. Yɛle kɛ, be jran Zoova nuan be ‘yi i ayɛ,’ be bo jasin fɛ’n yɛ be fa Ɲanmiɛn Ndɛ m’ɔ ti kɛ aliɛ sa’n be man sran mun blɛ ng’ɔ ti i nuan su’n i su. (Mat. 24:45; 1 Piɛ. 2:4, 5) Kɛ be ko wu mɔ be ko cɛn’n, be nin Klist be di Ɲanmiɛn ɲrun jranlɛ nin famiɛn junman ɲanmiɛn su lɔ. (Lik 22:29; 1 Piɛ. 1:3-5; Ngl. 1:6) Aolia nun’n, akoto Zan wunnin kɛ sran kpanngban be o Zoova i bia’n i wun lɛ. Be to “jue uflɛ uflɛ kun” be man “Bua Gbanflɛn’n,” be se kɛ: “Be kunnin wɔ, sran’m bɔ be fin nvle-nvle’n kwlaa nun’n, nin be bɔ be aniɛn’n ti wafa-wafa’n kwlaa’n, ɔ nin be nga be fin mɛnmɛn’n kwlaa nun, a fa ɔ wun toli be mannin Nyanmiɛn.” (Ngl. 5:8-13) Zan kannin famiɛn sɔ mɔ blɛ uflɛ nun ɔ wunnin be aolia nun’n be ndɛ kɛ: “Bé yó Nyanmiɛn nin Krist be nyrun jranfuɛ, be nin Krist yɛ bé dí famiɛn afuɛ akpi nin-ɔn.” (Ngl. 20:6) Ɔ maan be nin Klist bé káci Ɲanmiɛn ɲrun jranfuɛ mɔ be ti famiɛn’n. Yɛ bé yó klɔ sran’m be kwlaa be ye.
15, 16. ?Ye benin yɛ Ɲanmiɛn ɲrun jranfuɛ mɔ be ti famiɛn’n bé yó asiɛ’n sufuɛ mun ɔn?
15 ?Ye benin yɛ sran 144.000 bé yó asiɛ’n sufuɛ mun ɔn? Sa Nglo Yilɛ i ndɛ tre 21 waan be ti kɛ klɔ kun m’ɔ o ɲanmiɛn su lɔ’n sa. Klɔ sɔ’n yɛ be flɛ i Zerizalɛm uflɛ’n niɔn. Be flɛ i “Bua Gbanflɛn’n i yi’n.” (Ngl. 21:9) I ndɛ mma 2 lele 4 se kɛ: “N wunnin Nyanmiɛn klɔ’n, ɔ fin i wun lɔ ɔ su jra. Ɔ ti kɛ atɔnvlɛ bɔ w’a fɛfɛ i wun ɔ su minndɛ i wun’n sa. Klɔ sɔ’n yɛlɛ Zerizalɛm uflɛ’n. N tili sran kun nɛn kekle kpa bia’n wun lɔ, ɔ seli kɛ: ‘Siɛn’n Nyanmiɛn i tranwlɛ’n wo sran’m be afiɛn! Ɔ nin bé trán, bé yó i sran, yɛ i bɔbɔ yó be Nyanmiɛn. Ɔ́ núnnún be nyinmuɛn’n kwlaa, wie’n su tran-man lɛ kun. Be su yo-man sɛ kun, be su sun-man kun, be su wun-man nyrɛnnɛn kun, afin laa ninnge sɔ’m be su tran-man lɛ kun.’” Nanwlɛ, nga yɛ be flɛ i sran ye yolɛ’n niɔn! Sran’m be su sunman kun, be su yoman sɛ kun, be su wunman ɲrɛnnɛn kun afin wie’n su tranman lɛ kun. Fɔ’n w’a tu klɔ sran’m be nun i ti be nin Ɲanmiɛn be bo w’a yo kun.
16 Sa Nglo Yilɛ 22:1, 2 nun’n, be kannin ye nga Ɲanmiɛn ɲrun jranfuɛ mɔ be ti famiɛn’n bé yó sran mun’n, i ndɛ ekun. Ɔ se kɛ: “Ɔ kleli min nzue ba bɔ i nun nzue’n man nguan’n, ɔ ti nyannyannyan kɛ laglasi sa. Ɔ fin Nyanmiɛn nin Bua Gbanflɛn’n be bia’n nun yɛ ɔ fite-ɔ. Ɔ la klɔ’n [mɔ yɛle Zerizalɛm uflɛ’n] i gua’n i afiɛn. Waka b’ɔ man nguan’n be jinjin i bue nnyɔn’n su. Afuɛ kun nun be su kpɛ blu-nin-nnyɔn, anglo kwlaa be su. Be nnya’n yɛ maan nvle-nvlefuɛ’m be yo juejue-ɔ.” Fɔ mɔ Adam ti’n ɔ wo “nvle-nvlefuɛ” mun yɛle kɛ asiɛ’n sufuɛ’m be kwlaa be nun’n, like sɔ’n mɔ Ɲanmiɛn maan Zan wunnin i’n, ɔ kle wafa nga ɔ́ wíe’n. Nanwlɛ, ‘laa ninnge’m be su tran-man lɛ kun.’
ƝANMIƐN ƝRUN JRANFUƐ MƆ BE TI FAMIƐN’N, BÉ GÚAGÚA BE JUNMAN’N I BO
17. ?Kɛ afuɛ akpi’n fá wíe’n, nn junman benin yɛ Ɲanmiɛn ɲrun jranfuɛ mɔ be ti famiɛn’n b’a di ɔ?
17 Kɛ afuɛ 1.000 fá wíe’n, nn Ɲanmiɛn ɲrun jranfuɛ mɔ be ti famiɛn’n be ti’n, fɔ’n w’a tu klɔ sran’m be nun mlɔnmlɔn. I sin’n, Klist m’ɔ ti famiɛn nin Ɲanmiɛn ɲrun jranfuɛ’m be su kpɛn’n, ɔ́ fá klɔ sran mɔ fɔ’n nunman be nun kun’n, ɔ́ mán Zoova. (An kanngan 1 Korɛntfuɛ Mun 15:22-26 nun.) Kɛ ɔ ko yo sɔ’n nn Ɲanmiɛn ɲrun jranfuɛ mɔ be ti famiɛn’n, be junman’n w’a wie.
18. ?Sɛ Ɲanmiɛn ɲrun jranfuɛ mɔ be ti famiɛn’n be wie be junman’n di’n, junman benin ekun yɛ Zoova fá mán be ɔ?
18 ?Junman benin ekun yɛ Zoova fá mán Ɲanmiɛn ɲrun jranfuɛ mɔ be ti famiɛn’n mun ɔn? Sa Nglo Yilɛ 22:5 waan: “Bé dí famiɛn tititi.” ?Yɛ wan mun yɛ bé síe be ɔ? Biblu’n w’a tɛman su. Sanngɛ be te yo Zoova i nanndoliɛ sran. Be su kwlá wuman kun le. Asa kusu’n, b’a ɲan klɔ sran mɔ fɔ o be nun’n be ukalɛ’n i wun ngwlɛlɛ kpa. I ti’n, be kwla di famiɛn tititi yɛ Zoova kwla fa be di i junman tititi.
19. ?Ngue su yɛ be nga bé trán E wla kpɛnlɛ cɛn aɲia’n bo’n, be wla kpɛ́n ɔn?
19 Afuɛ’n, Avrili i le 5 su’n, kɛ é yó E wla kpɛnlɛ cɛn aɲia’n, bé fá e ɲin síe i Biblu’n nun ndɛ sɔ’m be su ekun. Aɲia sɔ’n bo’n, sran nga Ɲanmiɛn fɛli i wawɛ’n kpali be sieli be ngunmin mɔ be nun kaan sa be te o asiɛ’n su wa’n, bé dí kpaun nga b’a guaman nun kpaun are’n yɛ bé nɔ́n nzan’n wie. I sɔ’n kle kɛ be nin Ɲanmiɛn be trali aenguɛ uflɛ’n. I sɔ mɔ bé yó’n, maan be wla kpɛ́n junman nanndoliɛ nga bé dí naan like nga Ɲanmiɛn sunnzunnin i laa’n w’a kpɛn su’n, i su. Maan sran kwlaa nga bé trán aɲia sɔ’n i bo’n, be la Ɲanmiɛn Zoova i ase. Afin, ɔ fali ajalɛ kɛ sran wie’m be yo Ɲanmiɛn ɲrun jranfuɛ nin famiɛn naan asiɛ’n sufuɛ’m be kwlaa be di ye.
[Kosan mun]
[Foto, bue 31]
Ye nga Ɲanmiɛn ɲrun jranfuɛ mɔ be ti famiɛn’n bé yó sran mun’n, ɔ su wieman le.
