Grupo nin mga Saserdoteng Hade Para sa Kapakinabangan nin Katawohan
“Kamo an kapagarakian na pinili, sa hadeng pagkasacerdote, banal na nacion, banuaan na sadiri nin Dios.” —1 PED. 2:9.
1. Taano ta an “pamanguihan nin Kagurangnan” inaapod man na Memorial, asin ano an katuyohan kaiyan?
KAN banggi nin Nisan 14, 33 C.E., isinelebrar ni Jesu-Cristo asin kan 12 apostol nia an Judiong Paskua sa huring pagkakataon. Pakapahalea sa traydor na si Judas Iscariote, iinintrodusir ni Jesus an sarong laen na selebrasyon, na inapod kan huri na “pamanguihan nin Kagurangnan.” (1 Cor. 11:20) Duwang beses na sinabi ni Jesus: “Guiboha nindo ini sa pagguiromdom sako.” Inaapod man an okasyon na ini na Memorial, sarong paggirumdom ki Cristo na tinatawan nin importansia an saiyang kagadanan. (1 Cor. 11:24, 25) Bilang pagkuyog sa pagboot na ini, an Memorial taon-taon na sineselebrar kan mga Saksi ni Jehova sa bilog na kinaban. Sa taon na ini, an Nisan 14 sa Judiong kalendaryo mapoon sa pagsolnop kan saldang sa Huebes, Abril 5.
2. Ano an sinabi ni Jesus dapit sa mga emblemang ginamit nia?
2 Sinumaryo ni disipulo Lucas sa duwang bersikulo an ginibo asin sinabi ni Jesus sa okasyon na idto: “Sia nagkua nin tinapay, asin pakapagpasalamat, binaraak nia iyan, asin itinao sainda, na an sabi, Ini iyo an hawak ko na itinatao manogñod saindo: guiboha nindo ini sa pagguiromdom sa sako. Asin siring man sia nagkua nin copa, pakapamangui, na an sabi, Ining copa iyo an bagong tipan sa [“puersa kan,” NW] sakong dugo na pinapabolos manogñod saindo.” (Luc. 22:19, 20) Paano ini sinabot kan mga apostol?
3. Paano sinabot kan mga apostol an kahulogan kan mga emblema?
3 Bilang mga Judio, pamilyar na marhay an mga apostol sa mga atang na hayop na idinodolot kan mga saserdote sa Dios sa templo sa Jerusalem. Ginigibo an siring na mga pag-atang tanganing makamit an pag-oyon ni Jehova, asin an dakol kaiyan nagserbing pantahob sa kasalan. (Lev. 1:4; 22:17-29) Kaya, kan sabihon ni Jesus na an saiyang hawak asin dugo ‘itatao asin papaboloson manongod sa sainda,’ nasabotan kan mga apostol na an boot niang sabihon itatao nia an saiyang sangkap na buhay bilang atang. An halaga kan atang na iyan orog nanggad kisa kan sa mga atang na hayop.
4. Ano an boot sabihon ni Jesus kan sabihon nia: ‘Ining kopa iyo an bagong tipan sa puersa kan sakong dugo’?
4 Kumusta man an mga tataramon ni Jesus na, ‘ining kopa iyo an bagong tipan sa puersa kan sakong dugo’? Aram kan mga apostol an hula manongod sa bagong tipan, na yaon sa Jeremias 31:31-33. (Basahon.) Ipinarisa kan mga tataramon ni Jesus na iiniintrodusir na nia an bagong tipan na iyan, na masalida sa tipan na Ley na ipinakipagtipan ni Jehova sa Israel paagi ki Moises. Magkakonektar daw an duwang tipan na iyan?
5. Anong mga oportunidad an itinao sa Israel kan tipan na Ley?
5 Iyo, magkakonektar nanggad an mga katuyohan kaiyan. Kan iiniintrodusir an tipan na Ley, sinabihan ni Jehova an nasyon: “Kun estrikto nindong kukuyogon an sakong tingog asin ootobon nanggad an sakong tipan, dangan kamo siertong magigin sakong espesyal na rogaring hale sa gabos na ibang banwaan, huli ta sadiri ko an bilog na daga. Asin kamo mismo magigin kahadean nin mga saserdote asin banal na nasyon para sa sako.” (Ex. 19:5, 6, NW) Paano sinabot kan mga Israelita an mga tataramon na ini?
AN PANUGA DAPIT SA GRUPO NIN MGA SASERDOTENG HADE
6. Sa kaotoban nin anong panuga nakatabang an tipan na Ley?
6 Aram kan mga Israelita kun ano an “tipan,” huling nakipagtipan si Jehova nin siring na pormal na mga kasundoan sa saindang mga apoon na si Noe asin Abraham. (Gen. 6:18; 9:8-17; 15:18; 17:1-9) Bilang kabtang kan pakipagtipan ni Jehova ki Abraham, nanuga sia na paagi sa banhi kaini an gabos na nasyon sa daga magbebendisyon nanggad sa saindang sadiri. (Gen. 22:18) An tipan na Ley nakatabang sa kaotoban kan panugang ini. Basado sa tipan na iyan, an Israel puedeng magin “espesyal na rogaring [ni Jehova] hale sa gabos na ibang banwaan.” Sa anong katuyohan? Tanganing magin “kahadean nin mga saserdote” para ki Jehova.
7. Ano an boot sabihon kan mga tataramon na “kahadean nin mga saserdote”?
7 Pamilyar an mga Israelita sa mga hade asin saserdote, alagad si Melchisedec an solamenteng tawo kan nakaagi na inoyonan ni Jehova na sabay na kapotan an duwang katongdan na iyan. (Gen. 14:18) Tinawan na ni Jehova nin oportunidad an nasyon na maggikan sa sainda an “kahadean nin mga saserdote.” Kan huri, ipinarisa kan ipinasabong na Kasuratan na nangangahulogan ini nin oportunidad na maggikan sa sainda an grupo nin mga saserdoteng hade.—1 Ped. 2:9.
8. Anong mga paglilingkod an ginigibo kan mga saserdoteng ninombrahan nin Dios?
8 Siempre, an sarong hade namamahala. Alagad ano an ginigibo nin saserdote? An Hebreo 5:1 nagpapaliwanag: ‘An gabos na halangkaw na saserdote na kinua hale sa mga tawo ibinubugtak para sa mga tawo sa mga bagay na manongod sa Dios, tanganing sia makapagdolot nin mga balaog asin atang para sa mga kasalan.’ Kaya, irinerepresentar nin saserdoteng ninombrahan ni Jehova an makasalan na mga tawo sa atubangan nin Dios paagi sa ipinagboot na mga dolot, na nakikimaherak sa Saiya sa kapakanan ninda. Siring man, irinerepresentar nin saserdote si Jehova sa atubangan nin mga tawo, na tinotokdoan sinda sa ley nin Dios. (Lev. 10:8-11; Mal. 2:7) Sa mga paaging ini, an saserdoteng ninombrahan nin Dios nagtatabang sa mga tawo na makipag-ulian sa Dios.
9. (a) Sa anong kondisyon makakamtan kan Israel an kaotoban kan panuga na sa sainda maggikan an “kahadean nin mga saserdote”? (b) Taano ta nagnombra si Jehova nin mga saserdote para sa mga Israelita? (c) Taano ta bako sa Israel magikan an “kahadean nin mga saserdote” sa irarom kan tipan na Ley?
9 Huli kaini, an tipan na Ley nagtao nin oportunidad sa Israel na sa sainda maggikan an sarong grupo nin mga saserdoteng hade na matao nin pakinabang sa “gabos na ibang banwaan.” Minsan siring, an marahayon na oportunidad na ini may kaibang kondisyon: “Kun estrikto nindong kukuyogon an sakong tingog asin ootobon nanggad an sakong tipan.” Kaya daw kan mga Israelita na ‘estriktong kuyogon an tingog ni Jehova’? Iyo, alagad bakong sa perpektong paagi. (Roma 3:19, 20) Sa dahelan na iyan, nagnombra nguna si Jehova nin mga saserdote para sa mga Israelita, na laen man an katongdan sa mga hade, tanganing magdolot nin mga atang na hayop para sa mga kasalan na dai malilikayan na magibo kan mga Israelita. (Lev. 4:1–6:7) Kaiba sa mga kasalan na ini an mga kasalan mismo kan mga saserdote. (Heb. 5:1-3; 8:3) Inako ni Jehova an siring na mga atang, alagad dai kaiyan lubos na matatahoban an mga kasalan kan mga nagdodolot. Dai magigibo kan grupo nin mga saserdote sa irarom kan tipan na Ley na lubos na ipakipag-uli sa Dios dawa an sinserong mga Israelita. Arog kaini an pagkasabi ni apostol Pablo: “Dai mahihimo na an dugo nin magña mangsad [“toro,” NW] asin magña kanding makahale nin magña kasalan.” (Heb. 10:1-4) Huli sa paglapas ninda sa Ley, an mga Israelita isinumpa. (Gal. 3:10) Sa siring na kamugtakan, dai nanggad ninda mapaglilingkodan an kinaban bilang grupo nin mga saserdoteng hade.
10. Ano an katuyohan kan tipan na Ley?
10 Kun siring, mayo daw nin saysay an panuga ni Jehova na sa sainda magikan an “kahadean nin mga saserdote”? Dai man. Kun sinsero sindang nagmaigot na kumuyog, igwa kutana sinda kan oportunidad na ini—alagad bakong sa irarom kan Ley. Taano? (Basahon an Galacia 3:19-25.) Para sa mga maimbod na naghingoang otobon an Ley, naingatan kaiyan an dalisay na pagsamba. Nakatabang iyan sa mga Judio na marealisar na may mga paglapas sinda asin na kaipuhan ninda nin atang na mas dakula kisa sa ikakaatang kan saindang halangkaw na saserdote. Iyan sarong paratokdo na magiya sa sainda pasiring sa Cristo, o Mesiyas, mga titulo na nangangahulogan “Linahidan.” Minsan siring, kun mag-abot na an Mesiyas, iiintrodusir nia an bagong tipan na ihinula ni Jeremias. An mga nag-ako sa Cristo inimbitaran na magin kabtang kan bagong tipan asin magigin nanggad “kahadean nin mga saserdote.” Helingon niato kun paano.
GRUPO NIN MGA SASERDOTENG HADE PAAGI SA BAGONG TIPAN
11. Paano si Jesus nagin an pundasyon nin tunay na grupo nin mga saserdoteng hade?
11 Kan 29 C.E., si Jesus na taga Nazaret nagin an Mesiyas. Mga 30 anyos sia kan ipresentar nia an saiyang sadiri na gibohon an espesyal na kabotan ni Jehova para sa saiya, na sinimbolisaran ini paagi sa pagpabautismo sa tubig. Inapod sia ni Jehova na “namomotan kong Aki” asin linahidan sia, bako nin lana, kundi nin banal na espiritu. (Mat. 3:13-17; Gui. 10:38) Sa paglahid na idto, sia nagin nombradong Halangkaw na Saserdote kan mga minatubod sa saiya hale sa bilog na pamilya nin tawo asin Hade ninda sa maabot na panahon. (Heb. 1:8, 9; 5:5, 6) Tunay nanggad, sia an magigin pundasyon nin grupo nin mga saserdoteng hade.
12. Ano an pinagin posible kan atang ni Jesus?
12 Bilang Halangkaw na Saserdote, ano an ikakaatang ni Jesus na lubos na makakatahob sa namanang kasalan kan mga minatubod sa saiya? Arog kan ipinarisa nia kan iintrodusir nia an Memorial kan saiyang kagadanan, an mismong perpektong buhay nia bilang tawo iyo an atang. (Basahon an Hebreo 9:11, 12.) Poon kan bautismo nia kan 29 C.E., bilang Halangkaw na Saserdote, itinogot ni Jesus na umagi sia nin mga pagbalo asin pagsasanay sagkod sa aktuwal na kagadanan nia. (Heb. 4:15; 5:7-10) Pagkabuhaya liwat sa saiya, suminakat sia sa langit asin iprinesentar ki Jehova mismo an halaga kan saiyang atang. (Heb. 9:24) Pagkatapos kaiyan, si Jesus puede nang makimaherak ki Jehova sa kapakanan kan mga minatubod sa saiyang atang asin makatabang sa sainda na maglingkod sa Dios na may paglaom na mabuhay na daing katapusan. (Heb. 7:25) Ginibong balido man kan saiyang atang an bagong tipan.—Heb. 8:6; 9:15.
13. Ano an mga oportunidad kan mga magigin kabtang kan bagong tipan?
13 An mga magigin kabtang kan bagong tipan kaipuhan man na lahidan nin banal na espiritu. (2 Cor. 1:21) Kaiba dian an maimbod na mga Judio dangan mga Gentil. (Efe. 3:5, 6) Ano an mga oportunidad kan mga kabtang kan bagong tipan? Lubos na papatawadon an saindang mga kasalan. Si Jehova nanuga: “Ipapatauad ko an saindang karatan, asin dai na ako magroromdom kan saindang kasalan.” (Jer. 31:34) Huling pinatawad na an saindang mga kasalan, nasa kamugtakan na sindang magin “kahadean nin mga saserdote.” Sinabihan ni Pedro an linahidan na mga Kristiano: “Kamo an kapagarakian na pinili, sa hadeng pagkasacerdote, banal na nacion, banuaan na sadiri nin Dios, tagñaning ikapahayag nindo an magña kalangkawan kaidtong nagapod saindo hale sa kadikloman pasiring sa makagñagñalas niang ilao.” (1 Ped. 2:9) Kinotar nia digdi an mga tataramon ni Jehova sa Israel kan iiniintrodusir Nia an Ley, asin iinaplikar ini ni Pedro sa mga Kristiano na kabtang kan bagong tipan.—Ex. 19:5, 6.
GRUPO NIN MGA SASERDOTENG HADE NA NAGTATAONG PAKINABANG SA KATAWOHAN
14. Saen maglilingkod an grupo nin mga saserdoteng hade?
14 Saen maglilingkod an mga kabtang kan bagong tipan? Maglilingkod sinda sa daga bilang sarong grupo nin mga saserdote, na irinerepresentar si Jehova sa mga tawo paagi sa mahiwas na ‘pagpahayag kan mga kalangkawan’ o kamurawayan Nia asin pagtao nin espirituwal na kakanon. (Mat. 24:45; 1 Ped. 2:4, 5) Pagkagadan asin pagkabuhaya liwat sa sainda, maglilingkod sinda kaiba ni Cristo sa langit bilang mga hade asin saserdote, na lubos na ginigibo an duwang katongdan na iyan. (Luc. 22:29; 1 Ped. 1:3-5; Kap. 1:6) Sa pagkompirmar kaini, naheling ni apostol Juan sa bisyon an dakol na espiritung linalang na harani sa trono ni Jehova sa langit. Sinda nagkakanta nin “bagong awit” para sa “Cordero”: “Paagi kan saimong dugo nagbakal ka nin mga tawo para sa Dios hale sa lambang tribo asin lenguahe asin banwaan patin nasyon, asin ginibo mo sindang sarong kahadean asin mga saserdote para sa satong Dios, asin pamamahalaan ninda bilang mga hade an daga.” (Kap. 5:8-10, NW) Sa sarong bisyon kan huri, si Juan nagtaram dapit sa mga tagapamahalang ini: “Sinda maguiguin magña sacerdote nin Dios asin ni Cristo, patin maghahade sa kaibahan nia sa laog nin sangribong taon.” (Kap. 20:6) Kaiba ni Cristo, sinda an minakompuesto sa grupo nin mga saserdoteng hade para sa kapakinabangan nin bilog na katawohan.
15, 16. Anong mga pakinabang an itatao kan grupo nin mga saserdoteng hade sa katawohan?
15 Anong mga pakinabang an itatao kan 144,000 sa mga nasa daga? Ilinaladawan sinda sa Kapahayagan kapitulo 21 bilang langitnon na siudad, Bagong Jerusalem, na inaapod na “agom kan Cordero.” (Kap. 21:9) An bersikulo 2 sagkod 4 nagsasabi: ‘Asin naheling ko an mahal na siudad, an bagong Jerusalem, na naghihilig hale sa langit hale sa Dios, na inandam siring sa nobya na sinamnohan manongod sa saiyang agom. Asin ako nakadangog nin halangkaw na tingog hale sa trono, na an sabi: “Uya! An tabernakulo nin Dios nasa mga tawo, asin sia mag-eerok kaibahan ninda, asin sinda magigin saiyang mga banwaan, asin an Dios man sana masasa kaibahan ninda, asin manini Dios ninda. Asin papahidon nia an gabos na luha sa saindang mga mata; asin an kagadanan madadai na, dai na sagkod magkakaigwa nin pagmondo ni pagtangis ni kolog. An mga enot na bagay nakalihis na.”’ Marahayon nanggad na mga bendisyon! Huling hahaleon na an kagadanan, mawawara na an pangenot na dahelan nin pagluha, pagmondo, pagtangis, asin kolog. Nangangahulogan ini na gigibohon nang perpekto an maimbod na mga tawo, na lubos sindang ipinapakipag-uli sa Dios.
16 Sa paglaladawan pa sa mga bendisyon na itatao kan grupong ini nin mga saserdoteng hade, an Kapahayagan 22:1, 2 nagsasabi: ‘Sia nagpahayag sako nin salog kan tubig nin buhay, makintab siring sa kristal, na nagluluwas sa trono nin Dios asin kan Kordero, sa tahaw kan lansangan kaiyan. Asin sa mag-ibong kan salog may mga kahoy nin buhay, na igwa nin kagduwang manlaenlaen na bunga, na nagbubunga bulan-bulan. Asin an mga dahon kan kahoy manongod sa kaomayan kan mga nasyon.’ Huli sa simbolikong mga probisyon na ini, an ‘mga nasyon,’ o gabos na pamilya nin katawohan, lubos na maoomayan sa pagkabakong perpekto na namana ki Adan. Tunay nanggad, ‘an enot na mga bagay malihis na.’
TINATAPOS KAN GRUPO NIN MGA SASERDOTENG HADE AN GIBOHON KAIYAN
17. Ano an maootob kan grupo nin mga saserdoteng hade pag-abot nin panahon?
17 Sa katapusan kan 1,000 taon nin kapakipakinabang na paglilingkod, natabangan na kan grupo nin mga saserdoteng hade an daganon na mga sakop kaiyan na magin perpekto. Dangan, bilang Halangkaw na Saserdote asin Hade, ipepresentar ni Cristo ki Jehova an perpektong pamilya nin tawo. (Basahon an 1 Corinto 15:22-26.) Sa panahon na iyan, lubos nang naotob kan grupo nin mga saserdoteng hade an katuyohan kaiyan.
18. Pagkatapos na maotob kan grupo nin mga saserdoteng hade an gibohon kaiyan, paano gagamiton ni Jehova an kairiba ni Cristo?
18 Pagkatapos kaiyan, paano gagamiton ni Jehova an mga may dakulang pribilehio na kairiba ni Cristo? Segun sa Kapahayagan 22:5, “sinda maghahade sagkod lamang.” Sairisay an paghahadean ninda? Dai iyan sinasabi sa Biblia. Alagad, huli sa klase nin buhay na igwa sinda asin sa eksperyensia ninda sa pagtabang sa kinaban nin bakong perpektong mga tawo, padagos sindang maghahade para sa mga katuyohan ni Jehova sagkod lamang.
19. Ano an ipapagirumdom sa mga maatender sa Memorial?
19 Sa Memorial kan kagadanan ni Jesus sa Huebes, Abril 5, 2012, ipapagirumdom sa sato an mga katokdoan na ini kan Biblia. An dikit na natatada kan linahidan na mga Kristiano na yaon pa sa daga makikikabtang sa mga emblema na tinapay na daing lebadura asin pulang arak, na nangangahulogan na sinda kabtang kan bagong tipan. Ipapagirumdom kaini sa sainda an saindang marahayon na mga pribilehio asin paninimbagan sa daing sagkod na katuyohan nin Dios. Logod gabos kita mag-atender na may dakulang pagpapahalaga sa probisyon ni Jehova Dios na grupo nin mga saserdoteng hade para sa kapakinabangan nin katawohan.
[Mga Hapot Para sa Pag-adal]
[Ritrato sa pahina 29]
An grupo nin mga saserdoteng hade matao nin daing sagkod na mga pakinabang sa katawohan
