Harianong Pagkasaserdote nga Magdalag Kaayohan sa Katawhan
“Kamo maoy ‘usa ka piniling rasa, usa ka harianong pagkasaserdote, usa ka balaang nasod, usa ka katawhan alang sa linaing pagpanag-iya.’”—1 PED. 2:9.
1. Nganong ang “panihapon sa Ginoo” gitawag usab ug Memoryal, ug unsay katuyoan niini?
SA GABII sa Nisan 14, 33 K.P., gisaulog sa kataposang higayon ni Jesu-Kristo ug sa 12 ka apostoles ang Paskuwa. Human palakwa ang traydor nga si Judas Iskariote, gisugdan ni Jesus ang laing kasaulogan, nga gitawag sa ulahi ug “panihapon sa Ginoo.” (1 Cor. 11:20) Si Jesus kaduha miingon: “Ipadayon ninyo ang pagbuhat niini sa paghandom kanako.” Kini nga okasyon gitawag usab ug Memoryal, ang paghandom sa kamatayon ni Kristo. (1 Cor. 11:24, 25) Ang mga Saksi ni Jehova sa tibuok kalibotan nagsunod niini nga sugo pinaagi sa pagsaulog sa Memoryal kada tuig. Sa 2012, ang Nisan 14 magsugod sa pagsalop sa adlaw, sa Huwebes, Abril 5.
2. Unsay giingon ni Jesus bahin sa mga emblema nga iyang gigamit?
2 Gihubit ni Lucas ang gihimo ug gisulti ni Jesus sa maong okasyon: “Siya nagkuhag tinapay, nagpasalamat, nagpikaspikas niini, ug naghatag niini kanila, nga nag-ingon: ‘Kini nagkahulogan sa akong lawas nga igahatag alang kaninyo. Ipadayon ninyo ang pagbuhat niini sa paghandom kanako.’ Maingon man usab, ang kopa sa samang paagi human sila makapanihapon, siya nag-ingon: ‘Kini nga kopa nagkahulogan sa bag-ong pakigsaad tungod sa akong dugo, nga igabubo alang kaninyo.’” (Luc. 22:19, 20) Giunsa kini pagsabot sa mga apostoles?
3. Giunsa pagsabot sa mga apostoles ang kahulogan sa mga emblema?
3 Ang mga apostoles pamilyar na sa mga halad nga hayop nga gitanyag sa mga saserdote sa templo sa Jerusalem. Kadto gihimo aron maangkon ang pag-uyon ni Jehova, ug daghan niini maoy alang sa pagtabon sa sala. (Lev. 1:4; 22:17-29) Busa dihang si Jesus miingon nga ang iyang lawas ug dugo ‘igahatag ug igabubo alang kanila,’ nasabtan sa mga apostoles nga itanyag niya ang iyang hingpit nga kinabuhi ingong halad. Kini mas dakog bili kay sa mga halad nga hayop.
4. Unsay gipasabot ni Jesus dihang siya miingon: “Kini nga kopa nagkahulogan sa bag-ong pakigsaad tungod sa akong dugo”?
4 Komosta ang giingon ni Jesus nga “kini nga kopa nagkahulogan sa bag-ong pakigsaad tungod sa akong dugo”? Ang mga apostoles nahibalo sa tagna bahin sa bag-ong pakigsaad diha sa Jeremias 31:31-33. (Basaha.) Ang mga pulong ni Jesus nagpakita nga sugdan na niya kanang bag-ong pakigsaad, nga maoy mopuli sa pakigsaad sa Balaod nga gihimo ni Jehova uban sa Israel pinaagi ni Moises. May koneksiyon ba kining duha ka pakigsaad?
5. Unsang mga kahigayonan ang gihatag sa pakigsaad sa Balaod ngadto sa Israel?
5 Oo, ang mga katuyoan niini nalangkit pag-ayo sa usag usa. Dihang gipresentar ni Jehova ang pakigsaad sa Balaod ngadto sa Israel, siya miingon: “Kon kamo hugot nga magasugot sa akong tingog ug magatuman gayod sa akong pakigsaad, nan kamo tinong mahimong akong linaing katigayonan gikan sa tanang ubang mga katawhan, tungod kay ang tibuok yuta akoa man. Ug kamo mahimong usa ka gingharian sa mga saserdote ug usa ka balaan nga nasod alang kanako.” (Ex. 19:5, 6) Unsay kahulogan niini alang sa mga Israelinhon?
ANG SAAD BAHIN SA HARIANONG PAGKASASERDOTE
6. Unsang saad ang matuman sa tabang sa pakigsaad sa Balaod?
6 Ang mga Israelinhon nakasabot kon unsay “pakigsaad,” kay si Jehova mihimo niining seryosong mga kasabotan uban sa ilang katigulangang si Noe ug Abraham. (Gen. 6:18; 9:8-17; 15:18; 17:1-9) Ingong bahin sa iyang pakigsaad kang Abraham, si Jehova misaad: “Pinaagi sa imong binhi ang tanang nasod sa yuta tinong magapanalangin sa ilang kaugalingon.” (Gen. 22:18) Ang pakigsaad sa Balaod motabang sa pagtuman sa maong saad. Pinaagi niini, ang Israel mahimong “linaing katigayonan [ni Jehova] gikan sa tanang ubang mga katawhan.” Alang sa unsang katuyoan? Aron “mahimong usa ka gingharian sa mga saserdote” alang kang Jehova.
7. Unsay kahulogan sa ekspresyong “usa ka gingharian sa mga saserdote”?
7 Ang mga Israelinhon pamilyar na sa mga hari ug saserdote. Apan si Melquisedek lang ang gitugotan ni Jehova kaniadto nga makabaton nianang duha ka katungdanan sa samang higayon. (Gen. 14:18) Si Jehova karon naghatag sa Israel ug kahigayonan nga magpatunghag “usa ka gingharian sa mga saserdote.” Sa ulahi, ang Kasulatan naghisgot sa maong mga pinili ingong “usa ka harianong pagkasaserdote,” sa ato pa, mga hari kinsa mga saserdote usab.—1 Ped. 2:9.
8. Unsay buluhaton sa mga saserdote nga gitudlo sa Diyos?
8 Siyempre, ang hari magmando. Apan unsay buluhaton sa usa ka saserdote? Ang Hebreohanon 5:1 nagpatin-aw: “Ang matag hataas nga saserdote nga gikuha gikan sa mga tawo gitudlo alang sa mga tawo labot sa mga butang nga iya sa Diyos, aron siya makatanyag ug mga gasa ug mga halad alang sa mga sala.” Busa ang tinudlong saserdote maghawas sa makasasalang katawhan atubangan sa Diyos pinaagig mga halad, nga mangamuyo kang Jehova alang kanila. Sa laing bahin, siya usab ang maghawas kang Jehova atubangan sa katawhan pinaagi sa pagtudlo kanila sa balaod sa Diyos. (Lev. 10:8-11; Mal. 2:7) Niining paagiha, ang saserdote nagtabang sa katawhan nga mapasig-uli ngadto sa Diyos.
9. (a) Unsay kondisyon aron ang Israel makapatunghag “usa ka gingharian sa mga saserdote”? (b) Nganong nagtudlo si Jehova ug mga saserdote taliwala sa Israel? (c) Nganong ang mga Israelinhon dili mahimong “usa ka gingharian sa mga saserdote” ilalom sa pakigsaad sa Balaod?
9 Busa ang pakigsaad sa Balaod naghatag sa Israel ug kahigayonan nga magpatunghag usa ka harianong pagkasaserdote nga magdalag kaayohan sa “tanang ubang mga katawhan.” Apan kini ubos sa usa ka kondisyon: “Kon kamo hugot nga magasugot sa akong tingog ug magatuman gayod sa akong pakigsaad.” Matuman kaha sa mga Israelinhon ang maong kondisyon? Oo, apan dili sa bug-os. (Roma 3:19, 20) Tungod niana, si Jehova nagtudlog mga saserdote taliwala sa Israel. Sila dili mag-alagad ingong mga hari; sila maoy maghalad ug mga hayop alang sa mga sala sa katawhan. (Lev. 4:1–6:7) Kini naglakip sa sala sa mga saserdote mismo. (Heb. 5:1-3; 8:3) Bisag gidawat ni Jehova ang maong mga halad, kini dili bug-os makatabon sa sala sa mga Israelinhon. Ang pagkasaserdote ilalom sa pakigsaad sa Balaod dili bug-os makapasig-uli bisan sa sinserong mga Israelinhon ngadto sa Diyos. Kini ang giingon ni apostol Pablo: “Ang dugo sa torong mga baka ug mga kanding dili man makakuha sa mga sala.” (Heb. 10:1-4) Tungod sa paglapas sa Balaod, ang mga Israelinhon nailalom sa usa ka tunglo. (Gal. 3:10) Sa maong kahimtang, dili gayod sila makaalagad sa kalibotan ingong harianong mga saserdote.
10. Unsay katuyoan sa pakigsaad sa Balaod?
10 Kini wala magpasabot nga sila dili na mahimong “usa ka gingharian sa mga saserdote” sumala sa gisaad ni Jehova. Kon sila maningkamot sa pagsunod sa Diyos, sila makabaton niini nga kahigayonan—apan dili ilalom sa Balaod. Ngano? (Basaha ang Galacia 3:19-25.) Alang niadtong naningkamot sa pagsunod sa Balaod, kini nanalipod kanila gikan sa bakak nga pagsimba. Kini nakatabang sa mga Hudiyo sa pagsabot nga sila makasasala ug nagkinahanglag mas dakong halad kay sa nianang ikatanyag sa ilang hataas nga saserdote. Kini nagsilbing magtutudlo nga motultol kanila ngadto sa Kristo, o Mesiyas, nga nagkahulogang “Dinihogang Usa.” Apan pag-abot sa Mesiyas, iyang sugdan ang bag-ong pakigsaad nga gitagna ni Jeremias. Kadtong modawat kang Kristo gidapit nga mahimong bahin sa bag-ong pakigsaad ug mahimong “usa ka gingharian sa mga saserdote.” Sa unsang paagi?
ANG BAG-ONG PAKIGSAAD MAGPATUNGHAG HARIANONG PAGKASASERDOTE
11. Sa unsang paagi si Jesus nahimong pundasyon sa usa ka harianong pagkasaserdote?
11 Sa 29 K.P., si Jesus nga taga-Nasaret nahimong Mesiyas. Siya mga 30 anyos dihang gibawtismohan. Ang iyang bawtismo nagpakitang siya andam nang mobuhat sa linaing kabubut-on ni Jehova para kaniya. Si Jehova miila kaniya ingong “akong Anak, ang hinigugma,” nga nagdihog kaniya, dili pinaagig lana, apan pinaagi sa balaang espiritu. (Mat. 3:13-17; Buh. 10:38) Ang Diyos nagdihog kaniya aron mahimong Hataas nga Saserdote ug umaabot nga Hari alang niadtong motuo kaniya. (Heb. 1:8, 9; 5:5, 6) Siya ang mahimong pundasyon sa usa ka harianong pagkasaserdote.
12. Unsay gipaposible sa halad ni Jesus?
12 Ingong Hataas nga Saserdote, unsay ikahalad ni Jesus nga bug-os makatabon sa napanunod nga sala niadtong motuo kaniya? Ingon sa iyang gipaila dihang gisugdan niya ang Memoryal sa iyang kamatayon, ang iyang hingpit nga tawhanong lawas mao ang halad. (Basaha ang Hebreohanon 9:11, 12.) Sukad sa iyang bawtismo sa 29 K.P., si Jesus ingong Hataas nga Saserdote nagpailalom sa mga pagsulay ug pagbansay hangtod sa iyang kamatayon. (Heb. 4:15; 5:7-10) Human mabanhaw, siya misaka sa langit ug mipresentar sa bili sa iyang halad kang Jehova. (Heb. 9:24) Human niadto, si Jesus makapangamuyo kang Jehova alang niadtong nagpasundayag ug pagtuo sa iyang halad ug makatabang kanila sa pag-alagad sa Diyos uban ang paglaom nga mabuhing walay kataposan. (Heb. 7:25) Pinaagi sa iyang halad, nahimong balido ang bag-ong pakigsaad.—Heb. 8:6; 9:15.
13. Unsay palaaboton niadtong mahilakip sa bag-ong pakigsaad?
13 Kadtong mahilakip sa bag-ong pakigsaad dihogan usab sa balaang espiritu. (2 Cor. 1:21) Lakip kanila ang matinumanong mga Hudiyo ug dayon ang mga Hentil. ( Efe. 3:5, 6) Unsay palaaboton niadtong bahin sa bag-ong pakigsaad? Ang ilang mga sala bug-os mapasaylo. Si Jehova misaad: “Akong pasayloon ang ilang kasaypanan, ug dili ko na hinumdoman ang ilang sala.” (Jer. 31:34) Kay gipasaylo na sa ilang mga sala, sila pwede nang mahimong “usa ka gingharian sa mga saserdote.” Si Pedro miingon sa mga dinihogan: “Kamo maoy ‘usa ka piniling rasa, usa ka harianong pagkasaserdote, usa ka balaang nasod, usa ka katawhan alang sa linaing pagpanag-iya, aron kaylap ninyong ipahayag ang mga kahamili’ sa usa nga nagtawag kaninyo gikan sa kangitngit ngadto sa iyang katingalahang kahayag.” (1 Ped. 2:9) Dinhi, gikutlo ni Pedro ang mga pulong ni Jehova ngadto sa Israel dihang gihatag ang Balaod ug gipadapat kini ngadto sa mga Kristohanon diha sa bag-ong pakigsaad.—Ex. 19:5, 6.
HARIANONG PAGKASASERDOTE NGA MAGDALAG KAAYOHAN SA KATAWHAN
14. Asa mag-alagad ang harianong mga saserdote?
14 Asa mag-alagad kadtong sakop sa bag-ong pakigsaad? Dinhi sa yuta. Ingong usa ka grupo, sila mag-alagad ingong mga saserdote, nga maghawas kang Jehova ngadto sa katawhan pinaagi sa ‘pagpahayag sa iyang kahamili’ ug sa pagtaganag espirituwal nga pagkaon. (Mat. 24:45; 1 Ped. 2:4, 5) Human sa ilang kamatayon ug pagkabanhaw, sila mag-alagad ingong mga hari ug saserdote uban ni Kristo sa langit. (Luc. 22:29; 1 Ped. 1:3-5; Pin. 1:6) Sa usa ka panan-awon, nakita ni apostol Juan ang daghang espiritung linalang duol sa trono ni Jehova sa langit. Sa “usa ka bag-ong awit” para sa “Kordero,” sila miawit: “Sa imong dugo gipalit mo ang mga tawo alang sa Diyos gikan sa matag tribo ug pinulongan ug katawhan ug nasod, ug gihimo mo sila nga usa ka gingharian ug mga saserdote ngadto sa atong Diyos, ug sila magamando ingong mga hari ibabaw sa yuta.” (Pin. 5:8-10) Sa laing panan-awon, si Juan miingon bahin sa maong mga hari: “Sila mahimong mga saserdote sa Diyos ug sa Kristo, ug magamando ingong mga hari uban kaniya sulod sa usa ka libo ka tuig.” (Pin. 20:6) Uban ni Kristo, sila maglangkob sa harianong pagkasaserdote nga magdalag kaayohan sa katawhan.
15, 16. Unsang mga kaayohan ang dala sa harianong pagkasaserdote alang sa katawhan?
15 Unsang mga kaayohan ang dad-on sa 144,000 ngadto sa katawhan? Ang Pinadayag kapitulo 21 naghubit kanila ingong usa ka langitnong siyudad, ang Bag-ong Jerusalem, nga gitawag “ang asawa sa Kordero.” (Pin. 21:9) Ang bersikulo 2 hangtod 4 miingon: “Nakita ko usab ang balaang siyudad, ang Bag-ong Jerusalem, nga nanaog gikan sa langit gikan sa Diyos ug giandam ingong usa ka pangasaw-onon nga gidayandayanan alang sa iyang bana. Niana nadungog ko ang usa ka makusog nga tingog gikan sa trono nga nag-ingon: ‘Tan-awa! Ang tolda sa Diyos anaa uban sa mga tawo, ug siya mopuyo uban kanila, ug sila mahimong iyang mga katawhan. Ug ang Diyos makig-uban kanila. Ug iyang pagapahiran ang tanang luha gikan sa ilang mga mata, ug ang kamatayon mawala na, ni may pagbangotan ni pagtiyabaw ni may kasakit pa. Ang unang mga butang nangagi na.’” Pagkanindot nga mga panalangin! Ang pagkawala sa kamatayon magwagtang sa pangunang hinungdan sa paghilak, kaguol, ug kasakit. Dayon ang katawhan mamahingpit ug bug-os mapasig-uli ngadto sa Diyos.
16 Ang Pinadayag 22:1, 2 dugang naghubit sa mga kaayohan nga dala sa harianong pagkasaserdote: “Iyang gipakita kanako ang usa ka suba sa tubig sa kinabuhi, ingon katin-aw sa kristal, nga nagaagos gikan sa trono sa Diyos ug sa Kordero latas sa taliwala sa halapad nga dalan [sa Bag-ong Jerusalem]. Ug sa masigkadaplin sa suba dihay mga kahoy sa kinabuhi nga nagapatungha ug napulog-duha ka abot nga bunga, nga nagapamunga matag bulan. Ug ang mga dahon sa mga kahoy maoy tambal alang sa kanasoran.” Kini nga panan-awon nagpakita nga ang “kanasoran,” o tawhanong banay, bug-os mamaayo sa pagkadili-hingpit nga napanunod kang Adan. Oo, “ang unang mga butang nangagi na.”
MATUMAN SA HARIANONG PAGKASASERDOTE ANG ILANG BULUHATON
17. Unsay mapalampos sa harianong pagkasaserdote?
17 Human sa 1,000 ka tuig nga pag-alagad, natabangan na sa harianong pagkasaserdote ang katawhan nga mahimong hingpit. Dayon ingong Hataas nga Saserdote ug Hari, ipresentar ni Jesus ang hingpit nga katawhan kang Jehova. (Basaha ang 1 Corinto 15:22-26.) Nianang panahona, natuman na sa harianong pagkasaserdote ang ilang buluhaton.
18. Human malampos sa harianong mga saserdote ang ilang buluhaton, sa unsang paagi sila gamiton ni Jehova?
18 Human niana, sa unsang paagi gamiton ni Jehova ang harianong mga saserdote? Sumala sa Pinadayag 22:5, “sila magamando ingong mga hari hangtod sa kahangtoran.” Kinsay ilang mandoan? Walay giingon ang Bibliya. Sanglit nakabaton silag imortal nga kinabuhi ug may kasinatian sa pagtabang sa dili hingpit nga katawhan, sila padayong maghari ug gamiton ni Jehova sa pagtuman sa iyang mga katuyoan hangtod sa hangtod.
19. Kadtong motambong sa Memoryal mapahinumdoman sa unsa?
19 Dihang saulogon nato ang Memoryal sa kamatayon ni Jesus sa Huwebes, Abril 5, 2012, kita mapahinumdoman sa maong mga pagtulon-an sa Bibliya. Ang mga dinihogan nga ania pa sa yuta moambit sa tinapay nga walay lebadura ug pulang bino, nga magpaila nga sila maoy bahin sa bag-ong pakigsaad. Kini magpahinumdom kanila sa ilang talagsaong pribilehiyo ug responsabilidad sa walay kataposang katuyoan sa Diyos. Hinaot kitang tanan motambong uban ang lalom nga pagpabili sa gitagana ni Jehova nga harianong pagkasaserdote nga magdalag kaayohan sa katawhan.
[Mga Pangutana sa Pagtuon]
[Hulagway sa panid 29]
Ang harianong pagkasaserdote magdalag kaayohan sa katawhan hangtod sa hangtod
