Eü Mwichen Samolfel Fän Iten Feiöchün Aramas Meinisin
Eü Mwichen Samolfel Fän Iten Feiöchün Aramas Meinisin
“Nge ämi eu ainang mi fil, eu mwichen souasor än ewe king, eu mwün aramas mi pin, nöün Kot kewe aramas.”—1 PET. 2:9.
KA TONGENI ÄWEWEEI?
Ineet Jiowa a kerän äeüin pwonei pwe epwe wor eü mwichen samolfel mi tekia?
Ifa usun chokkewe mi kapachelong lon ewe pwon sefö ra wiliiti eü mwichen samolfel mi tekia?
Ifa usun ewe mwichen samolfel mi tekia epwe efeiöchü chon fönüfan?
1. Pwata ewe fääfen ach Samol a pwal iteni Ächechchemenien Mäloon Jises? Met popun sia föfföri ena Ächechchem?
LEKUNIOLUN Nisan 14 lon ewe ier 33, ina säingoon än Jises Kraist fiti nöün kewe 12 aposel lon ar föri än chon Jus Pasofer. Iwe mwirin, Jises a ereni Jutas Iskariot, ewe epwele afangemä i, pwe epwe lo seniir. Mwirin, Jises a poputääni pwal eü ächechchem, ewe epwap iteni ewe fääfen ach samol. (1 Kor. 11:20) Jises a apasa fän ruu, ‘Oupwe foffori ei pwe oupwe chechchemeniei.’ Ena fansoun a pwal iteni Ächechchemenien Mäloon Jises. Ina atun sia chechchemeni met Kraist a föri, äkkäeüin, an mälo fän äsengesich. (1 Kor. 11:24, 25) Chon Pwäraatä Jiowa woon unusen fönüfan ra äkkälleasochisi ena allük ren ar föfföri ewe Ächechchem iteiten ier. Lon 2012, me ren ewe pwinin maram mi alongolong woon Paipel, Nisan 14 epwe poputä letuputiwen ewe akkar lon Arüänü, April 5.
2. Met Jises a apasa usun ewe pilawa me wain?
2 Ewe chon käeö Lük a äweweei met Jises a föri lon ena fansoun: “A angei eföü pilawa o a iotekin kilisou ngeni Kot won, a kini o ineti ngeniir o apasa, ‘Iei inisi üa fangela fän itemi. Oupwe föri ei pwe oupwe chechemeniei.’ Pwal ina chök usun, a ngeniir ewe kap mürin ar mongö o apasa, ‘Ei kap än Kot we pwon mi fö mi fis ren chai a niiniilo fän itemi.’” (Luk 22:19, 20) A ifa usun än ekkewe aposel weweiti alon na?
3. A ifa usun än ekkewe aposel weweiti alon Jises usun ewe pilawa me wain?
3 Ekkewe aposel ra silei usun ekkewe asorun man ekkewe samolfel ra mwe ngeni Kot lon ewe imwenfel lon Jerusalem. Aramas ra eäni ekkena asor fän iten ar repwe küna än Jiowa chen me omusomusen ar kewe tipis. (Lif. 1:4; 22:17-29) Ina minne, lupwen Jises a apasa pwe epwe asoresini inisin me chchaan fän äsengesiir, ekkewe aposel ra weweiti pwe epwe eäni asor manauan we mi unusöch. An asor epwe fokkun aüchea seni asorun man.
4. Met weween alon Jises lupwen a apasa pwe “Ei kap än Kot we pwon mi fö mi fis ren chai a niiniilo fän itemi”?
4 Ifa weween alon Jises lupwen a apasa pwe “Ei kap än Kot we pwon mi fö mi fis ren chai a niiniilo fän itemi”? Ekkewe aposel ra silei än Jeremaia we oesini usun ewe pwon sefö mi mak lon Jeremaia 31:31-33. (Älleani.) Alon Jises a affata pwe a kerän poputääni ena pwon sefö, ewe a siwili ewe pwon mi alongolong woon ewe Allükün Moses Jiowa a föraatiw lefiler me Israel ren Moses. Ekkena ruu pwon ra ririfengen?
5. Met sokkun äpilükülük a suuk ngeni Israel ren ewe Allükün Moses?
5 Ewer, ra wesewesen ririfengen pokiten populapen ar ra fförütä. Lupwen Jiowa a kerän atoura ngeni Israel ewe pwon mi alongolong woon ewe Allükün Moses, iei alon: “Iei mine ika oupwe aleasochisi aloi o apwönüeta ai we pwon, mürin oupwe wesewesen nei aramas. Inamwo ika unusen fanüfan ai, nge üa filikemiitä me lein aramas meinisin, pwe oupwe eu mwichen souasor me eu mwu mi pin fan itei.” (Eks. 19:5, 6) Ifa usun än chon Israel weweiti alon na?
EWE PWON FÄN ITEN EÜ MWICHEN SAMOLFEL MI TEKIA
6. Ewe Allükün Moses a älisaatä pwönütään menni pwon?
6 Chon Israel ra silei weween eü ‘pwon,’ are etipeeü, pun Jiowa a föraatiw ekkoch pwon me mwan ren Noa me Eperiam. (Ken. 6:18; 9:8-17; 15:18; 17:1-9) Lon an we etipeeü ngeni Eperiam, Jiowa a pwonei: “Chon ekewe mwü won unusen fanüfan repwe feiöch me ren mwirimwirum kana.” (Ken. 22:18) Jiowa a föraatiw ewe Allükün Moses pwe epwe apwönüetä ena pwon. Israel epwe tongeni wiliiti ‘wesewesen nöün aramas me lein aramas meinisin.’ Met popun? Fän iten ar repwe wiliiti ‘eu mwuun souasor’ ngeni Jiowa.
7. Met weween än Paipel kapas usun “eü mwuun samolfel”?
7 Chon Israel ra silei usun king me samolfel, nge Melkisetek chök a wisepökü ekkewe wis king me samolfel, me Jiowa a tipeeü ngeni. (Ken. 14:18) Ren ewe Allükün Moses, Jiowa a atufichi pwe “eü mwuun samolfel” epwe kefilitä seni ewe mwuun Israel. Ewe Paipel epwap eita ngeni ekkena chon kefilitä ‘eü mwichen samolfel mi tekia,’ weween, eü mwichen king mi wisepökü ekkewe wis king me samolfel.—1 Pit. 2:9.
8. Met wisen ekkewe samolfel mi seikitä me ren Kot?
8 Pwüngün pwe emön king a wisen nemenem. Nge met wisen emön samolfel? Ipru 5:1 a äweweei: “Iwe, iteiten souasor mi lap a kefilitä me lein aramasan, a angei wisan an epwe angang ngeni Kot fän iten ekewe aramas, pwe epwe föri angangen asor o föri ekewe asoren tipis.” Emön samolfel mi seikitä a tupuni aramas mwen mesen Jiowa. A tingorei Jiowa omusomusen tipisin ekkena aramas ren an awora asor ngeni. Ewe samolfel a pwal tupuni Jiowa mwen mesen ekkewe aramas ren an äiti ngeniir an kewe allük. (Lif. 10:8-11; Mal. 2:7) A ina usun än ewe samolfel äkkälisi aramas mi tipis ar repwe chäsefäl ngeni Kot, weween, ar repwe chiechisefäl ngeni.
9. (a) Met chon Israel repwe föri ren ar repwe tufichin wiliiti ‘eü mwuun samolfel’? (b) Pwata Jiowa a seikaatä ekkoch lon Israel pwe repwe wisen samolfel? (c) Pwata chon Israel resap tongeni wiliiti ‘eü mwuun samolfel’ fän ewe Allükün Moses?
9 Ewe Allükün Moses a suuki ewe al fän iten chon Israel ar repwe tufichin wiliiti king me samolfel pwe repwe efeiöchü “aramas meinisin.” Nge Kot a ereniir epwe tufich ena, “ika oupwe aleasochisi aloi o apwönüeta ai we pwon.” Itä repwe tongeni ‘älleasochisi alon’ Jiowa? Ewer, nge sap minne epwe unusöch ar älleasochisi i. (Rom 3:19, 20) Ina ewe popun Jiowa a seikaatä ekkoch pwe repwe wisen samolfel lon Israel. Ekkena samolfel rese wiseni ewe wis king. Ra föri asorun man fän iten tipisin aramas. (Lif. 4:1–6:7) Ra pwal eäni asor fän iten pwisin tipisiir. (Ipru 5:1-3; 8:3) Inaamwo ika Jiowa a etiwa ekkena asor, nge rese tongeni unusen amoielo tipisin chon Israel. Ewe kokkotun samolfel fän ewe Allükün Moses esap tongeni unusen achäsefäli ngeni Kot pwal mwo nge chon Israel mi enletin aier. Ewe aposel Paul a makkeei: “Chaan ekewe ätemwänin kow me chaan ekewe kuuch resap fokun tongeni amorala tipis.” (Ipru 10:1-4) Chon Israel ra anümamaü pun rese unusen älleasochisi ewe Allükün Moses. (Kal. 3:10) Iwe, pokiten ena, resap tongeni angang fän iten aramas meinisin lon ewe wis samolfel mi tekia.
10. Met popun a wor ewe etipeeü mi alongolong woon ewe Allükün Moses?
10 Esap weween pwe chon Israel resap fokkun tongeni kapachelong lon ‘eü mwuun samolfel’ usun Jiowa a pwonei. Ika repwe älleasochisi Jiowa seni wesewesen letiper, epwe suuk ngeniir ena wis, nge esap le atun ar nom fän ewe Allükün Moses. Pwata? (Älleani Kalesia 3:19-25.) Ren ach sipwe tufichin weweiti ena, a lamot ach sipwe silei met popun a fförütä ewe etipeeü mi alongolong woon ewe Allükün Moses. Ewe Allükün Moses a tümünü chon Israel mi älleasochis seni fel mi chofona. A pwal älisiir le weweiti pwe iir chon tipis me a lamot ngeniir eü asor mi lap seni minne ar we samolfel mi lapalap epwe tongeni awora. Ewe Allükün Moses a usun emön sense are chon emmwen mi ammolneeretä pwe repwe etiwa ewe Kraist, are Messaia. Ekkena itelap ra wewe ngeni “Chon Kepit.” Iwe nge, lupwen ewe Messaia epwe war, epwe poputääni ewe pwon sefö Jeremaia a oesini usun. Chokkewe mi etiwa are lükü ewe Kraist repwe kapachelong lon ewe pwon sefö me wiliiti ‘eü mwuun samolfel.’ Sipwele käeö ifa usun.
CHON EWE PWON SEFÖ RA WILIITI EÜ MWICHEN SAMOLFEL
11. Ifa usun Jises a wiliiti longolongun eü mwichen samolfel mi tekia?
11 Lon ewe ier 29, Jises seni Nasaret a wiliiti ewe Messaia. Ina epwe 30 ierin lupwen a papatais. An papatais a affata pwe a tipeni an epwe föri letipen Jiowa ngeni i, ewe mi sokkolo aüchean. Iwe, iei alon Jiowa usun i: “Iei i nei mi achengicheng.” Iwe, Jiowa a epiti ngeni i an we manaman mi fel, nge esap lö. (Mt. 3:13-17; Fof. 10:38) Kot a epiti Jises pwe epwe wisen Samolfel mi Lap me King lon fansoun epwe feito fän iten feiöchün chokkewe meinisin mi lükü i. (Ipru 1:8, 9; 5:5, 6) Iwe mwirin, epwe atufichi pwal fitemön ar repwe kapachelong lon eü mwichen samolfel mi enletin tekia.
12. Met än Jises we asor a atufichi?
12 Lon wisan we, wisen Samolfel mi Lapalap, menni asor Jises epwe tongeni awora fän iten an epwe unusen musolo ewe tipisin achööchö mi nom ren chokkewe mi lükü i? Minne Jises a apasa lupwen a poputääni Ächechchemenien an mälo a älisikich le weweiti pwe ena asor, ina pwisin manauan we mi unusöch. (Älleani Ipru 9:11, 12.) Mwirin än Jises kepit fän iten ewe wis Samolfel mi Lap, a tipeeü ngeni an epwe küna sossot me minen emirit tori an mälo. (Ipru 4:15; 5:7-10) Mwirin an manausefäl, a feitä läng, iwe, a mwe ngeni Jiowa aüchean an asor. (Ipru 9:24) Seni ena fansoun feffeilo, Jises a tongeni tittingor ngeni Jiowa fän äsengesin chokkewe mi anganga ar lükü an we asor. A pwal tongeni älisiir le angang ngeni Kot me eäni äpilükülükün manau esemuch. (Ipru 7:25) An asor a pwal apwüngaalo ewe pwon sefö.—Ipru 8:6; 9:15.
13. Met epwe fis ngeni chokkewe mi kapachelong lon ewe pwon sefö?
13 Chokkewe mi kapachelong lon ewe pwon sefö repwe pwal kepit ren än Kot we manaman mi fel. (2 Kor. 1:21) Akkomw, chon Jus mi tuppwöl ra kapachelong, iwe mwirin, chon Jentail. (Ef. 3:5, 6) Met epwe fis ngeni chokkewe mi kapachelong lon ewe pwon sefö? Epwe unusen musolo ar kewe tipis. Jiowa a pwonei: “Upwe amusala ar foforingau, nge usap chuen chechemeni ar tipis.” (Jer. 31:34) Oruuan, pokiten Jiowa a fen omusaalo ar kewe tipis, ra tongeni wiliiti ‘eü mwuun samolfel.’ Iei alon Piter ngeni chon Kraist mi kepit: “Nge ämi eu ainang mi fil, eu mwichen souasor än ewe king, eu mwün aramas mi pin, nöün Kot kewe aramas, oua fil pwe oupwe arongafeili än Kot kewe föför mi manaman, i ewe mi körikemiwu seni rochopwak, pwe oupwe tolong lon an saram mi amwarar.” (1 Pit. 2:9) Aposel Piter a aloni alon Jiowa atun a atoura ngeni Israel ewe Allükün Moses me a erä pwe a weneiti Chon Kraist mi kapachelong lon ewe pwon sefö.—Eks. 19:5, 6.
EÜ MWICHEN SAMOLFEL MI EFEIÖCHÜ ARAMAS MEINISIN
14. Ia ewe mwichen samolfel mi tekia a angang ie?
14 Ia chokkewe mi kapachelong lon ewe pwon sefö repwe angang ie? Repwe eü mwichen samolfel mi akkangang woon fönüfan le tupuni Jiowa mwen mesen aramas ren ar ‘arongafeili än Jiowa kewe föfför mi manaman’ me ar akkawora möngö are emmwen mi alongolong woon Paipel. (Mt. 24:45; 1 Pit. 2:4, 5) Mwirin ar mälo me manausefäl, repwe wisepökü wisen king me samolfel fiti Kraist lon läng. (Luk 22:29; 1 Pit. 1: 3- 5; Pwar. 1:6) Lon eü längipwi, aposel Jon a küna chommong chonläng arap ngeni än Jiowa leenien motun nemenem lon läng. Ra eäni “echö köl mi fö” ngeni “ewe Lam.” Ra kölü: “Ka isetiu chaom pwe penmanauen aramas seni einang meinisin, o sokkun aramas meinisin, o pwal mu meinisin. O ka fen fori ir pwe eu mu pwal samol-fel ngeni ach Kot, o repwe wisen samoluni fonufan.” (Pwar. 5:8-10, TF) Lon pwal eü längipwi, iei alon Jon usun ekkena king: “Repwe nöün Kot me nöün Kraist souasor, repwe pwal eti Jesus le nemenem lon ükükün engeröü ier.” (Pwar. 20:6) Chokkana, fitifengen me Kraist, ra wewe ngeni eü mwichen samolfel mi tekia, ewe epwe efeiöchü chon fönüfan meinisin.
15, 16. Ifa usun ewe mwichen samolfel mi tekia epwe efeiöchü chon fönüfan?
15 Ifa usun ekkewe 144,000 repwe efeiöchü aramas woon fönüfan? Pwarata sopwun 21 a apasa pwe ekkena samolfel ra wewe ngeni eü telinimw lon läng, ewe Jerusalem mi fö, a pwal iteni “pwülüen ewe Lam.” (Pwar. 21:9) Wokisin 2 ngeni 4 ra apasa: “Iwe, üa küna ewe Telinimw mi Pin, ewe Jerusalem mi fö, a feitiu me läng seni Kot, a molotä usun eman fin apwüpwülu söfö a tolong lon foutan pwe epwe apwüpwülü ngeni pwülüan. Iwe, üa rong mwelien eman mi leüömong a kapasowu seni ewe lenien motun king, ‘Nengeni, imwen Kot a nom lein aramas! Iwe, Kot epwe nonom lefiler o ir repwe aramasan, nge püsin Kot epwe etiir pwe epwe ar Kot. Epwe talüpwasei chönün mas seni won meser meinisin. Esap chüen wor mäla ika letipeta ika kechü ika cheuch, pun ekewe mettochun lom ra morola.’” A ifa me echipwörün ekkena feiöch! Esap chüen wor kechiw, riäfföw, cheuch, are püchörün letipeta pun esap chüen wor mälo. Aramas repwe unusöch me unusen chäsefäl ngeni Kot.
16 Pwarata 22:1, 2 ra pwal erenikich usun ekkewe feiöch ena mwichen samolfel mi tekia repwe eselipaato. A apasa: “Mürin ewe chon läng a pwal aküna ngeniei ewe chanpupun kolukun manau, a kurufat usun ewe fau itan kristal, a pupu seni fän än Kot me än ewe Lam lenien motun king o a putiu lukalapen alen ewe telinimw [Jerusalem mi fö]. Iwe, lepekin ewe chanpupu me rüepek a wor irän manau ra ua fän engol me ruu lon eu ier, fän eu lon eu me eu maram, chör kewe ra tufichin apöchöküla chon ekewe mwü.” Ena längipwi a affata ifa usun “ekkewe mwu,” are einangen aramas, repwe unusen chikaretä seni ewe manau mi tipis ra älemwiri seni Atam. Enlet, ekkewe mettochun loom repwe mworolo.
EWE MWICHEN SAMOLFEL A ÄSOPWÖCHÜOLO AN ANGANG
17. Le sopwoloon ekkewe 1,000 ier, met ewe mwichen samolfel mi tekia epwe fen apwönüetä?
17 Mwirin ekkewe 1,000 ierin an angang, ewe mwichen samolfel mi tekia epwe fen älisi aramas pwe repwe unusöch. Ewe Samolfel mi Lap me King, Jises Kraist, epwe mwe ngeni Jiowa ewe familien aramas mi fen unusöchülo. (Älleani 1 Korint 15:22-26.) Lon ena atun, ewe mwichen samolfel mi tekia epwe fen äwesöchüolo an angang.
18. Mwirin än ewe mwichen samolfel äwesöchüolo an angang, ifa usun Jiowa epwe nöünöü iir?
18 Ifa usun Jiowa epwe nöünöü chon ena mwichen samolfel mwirin ena fansoun? Iei alon Pwarata 22:5: “Repwe nemenem usun king tori feilfeilachök.” Nge repwe nemenem woon iö? Ewe Paipel ese affata. Nge repwe chüen fokkun aüchea ngeni Jiowa. Epwe nom rer ewe sokkun manau esap tongeni talo are ngawolo me pwal watteen tipachem pokiten ra fen älisi aramas mi apwangapwangen tipis. Ina minne, repwe chüen wiseni ewe wis king, me Jiowa epwe nöünöü iir le apwönüetä minne a akkota seni le poputään tori feilfeilo.
19. Met Ächechchemenien mäloon Jises we epwe ächema ngeni meinisin chon fiti?
19 Ika sipwe fiti Ächechchemenien mäloon Jises lon pwinin Arüänü, April 5, 2012, epwe ächema ngenikich ekkena afalafal seni Paipel. Chon Kraist mi kepit mi chüen nom woon fönüfan repwe pwäraatä pwe ra kapachelong lon ewe pwon sefö ren ar äni ewe pilawa ese lefen me ünümi ewe wain mi par. Epwe ächema ngeniir usun wiser kewe me ar kewe angang mi fokkun aüchea lon än Kot we akkot esemuch. Mi lamot ngeni meinisin mi fiti ena mwich ar repwe pwäraatä ar kilisou mi alollool ren ewe mwichen samolfel mi tekia Jiowa Kot a filaatä fän iten an epwe efeiöchü aramas meinisin.
[Sasing lon pekin taropwe 31]
Ewe mwichen samolfel mi tekia epwe efeiöchü chon fönüfan tori feilfeilo
