“Umui be ‘abia hidi besena, king gaukara umui karaia hahelaga taudia, bese helagana, bona Dirava ena taunimanima korikoridia.’”​—⁠1 PET. 2:9.

1. Dahaka dainai “Lohiabada ena anibou” ita gwauraia Memorial? Bona dahaka dainai ita karaia?

 NISAN 14, 33 C.E. hanuaboina ai, Iesu Keriso bona ena aposetolo taudia 12 be Pasova aria ginigabena idia karaia. Iesu ese ia do ia samania tauna, Iuda Iskariote ia siaia murinai, aria ta ia hamatamaia. Unai aria be gabeai idia gwauraia, “Lohiabada ena anibou.” (1 Kor. 11:20) Nega rua Iesu ia gwau: “Inai bamona do umui karaia noho lau umui laloatao totona.” Unai hebou ai, Iesu ena mase ita laloatao dainai, ita gwauraia Memorial. (1 Kor. 11:24, 25) Tanobada hegegemadai, Iehova ena Witnes taudia be Iesu ena hahegani idia badinaia bona lagani ta ta ai Memorial hebouna idia karaia. Lagani 2012 ai, Baibel ena kalenda hegeregerena, Nisan 14 be Thursday, April 5, dina ia diho murinai do ia matamaia.

2. Iesu ese paraoa bona wain be edena bamona ia herevalaia?

² Luka ese unai aria ia herevalaia, ia gwau: “Paraoa ia abia, Dirava ia tanikiu henia, ia makohia bona idia dekenai ia henia, ia gwau: ‘Inai be egu tauanina ia laulaulaia, umui totona do lau henia. Inai bamona do umui karaia noho lau umui laloatao totona.’ Unai hegeregerena, idia aniani murinai, kapusi danu ia abia bona ia gwau: ‘Inai kapusi ese kontraka matamatana ia laulaulaia, egu rara dainai ia vara bona umui totona do ia bubua.’” (Luka 22:19, 20) Aposetolo taudia be unai idia lalopararalaia, a?

3. Aposetolo taudia ese Iesu ena hereva be edena bamona idia lalopararalaia?

³ Aposetolo taudia be dubu helaga ai hahelaga taudia ese animal idia bouboulaia karana idia diba. Unai boubou gaudia momo be kara dika gwauatao totona, bona haida be Iehova ena lalonamo abia totona. (Lev. 1:4; 22:17-29) Unai dainai, Iesu ia gwau ena tauanina bona rara be idia totona do ia bouboulaia neganai, aposetolo taudia  idia diba Iesu be ena mauri goevadaena do ia bouboulaia. Iesu ena boubou gauna ese animal boubouna ia hereaia.

4. Inai hereva, “inai kapusi ese kontraka matamatana ia laulaulaia, egu rara dainai ia vara,” ena anina be dahaka?

⁴ Inai hereva, “inai kapusi ese kontraka matamatana ia laulaulaia, egu rara dainai ia vara,” ena anina be dahaka? Aposetolo taudia be Ieremia ese ia gwauraia gwauhamata taravatu (kontraka) matamatana idia diba. (Ieremia 31:31-33 duahia.) Iesu ena hereva ena anina be, ia ese kontraka matamatana ia hamatamaia, bona unai ese Taravatu kontraka gunana ena gabu ia abia. Kontraka matamatana bona Taravatu kontraka gunana be idia hegeregere, a?

5. Israela taudia be Taravatu kontraka gunana idia badinaia neganai, dahaka hahenamo do idia abia?

⁵ Kontraka matamatana bona Taravatu kontraka gunana be hegeregere, badina Iehova ena ura idia hahedinaraia. Iehova be Israela taudia dekenai Taravatu kontraka gunana ia henia neganai, ia gwau: “Lauegu hereva do umui kamonai henia, bona lauegu taravatu [o kontraka] do umui badinaia neganai, umui be lauegu bese korikori do umui lao. Tanobada besedia ibounai be lauegu, to bese ibounai edia huanai umui be lauegu abia hidi besena. [“Umui be king gaukara do umui karaia hahelaga taudia bona” NW] bese helagana do umui lao.” (Eso. 19:5, 6) Israela taudia be unai idia lalopararalaia, a?

KING BONA HAHELAGA TAUDIA ENA GWAUHAMATA

6. Taravatu kontraka gunana dainai edena gwauhamata ia guguru?

⁶ Iehova be guna Noa bona Aberahamo ida kontraka ia karaia dainai, Israela taudia be kontraka ena anina idia diba. (Gen. 6:18; 9:8-17; 15:18; 17:1-9) Iehova be Aberahamo dekenai ia gwau: “Oiemu garana dainai tanobada ena bese ibounai do lau hanamoa.” (Gen. 22:18, BHğ) Iehova ese Taravatu kontraka gunana ia karaia badina ia ura Aberahamo dekenai ia karaia gwauhamatana ia hagugurua. Unai dainai, Ia ese bese ibounai edia huanai amo Israela besena ia “abia hidi.” To, dahaka dainai idia ia abia hidi? King gaukara do idia karaia hahelaga taudia ai idia lao totona.

7. Taravatu kontraka gunana dainai Iehova be dahaka ia karaia diba?

⁷ Israela taudia idia diba king edia gaukara be idau, bona hahelaga taudia edia gaukara be idau. To, Melekisedeka sibona be king bona hahelaga gaukara ia karaia, bona Iehova ese ia dekenai gwaumaoro ia henia. (Gen. 14:18) Taravatu kontraka gunana dainai Iehova ese Israela besena amo ‘king gaukara do idia karaia hahelaga taudia’ ia abia hidi diba. Anina be idia ese king bona hahelaga gaukara do idia karaia.​—⁠1 Pet. 2:9.

8. Hahelaga taudia edia gaukara be dahaka?

⁸ King be taunimanima ia lohiaia, to hahelaga tauna ena gaukara be dahaka? Heberu 5:1 ia gwau: “Taunimanima huana amo hahelaga tauna badana idia abia hidi. Ia be Dirava ena hesiai gaukara amo taunimanima ia durua. Bona ia ese kara dika dainai, harihari gaudia bona boubou gaudia ia henia.” Iehova ese ia abia hidi hahelaga tauna be taunimanima totona gwaukau gaukarana ia karaia, boubou ia karaia, bona Iehova ia noia edia kara dika ia gwauatao totona. Danu, Dirava ena taravatu be taunimanima dekenai ia hadibaia. (Lev. 10:8-11; Mal. 2:7) Unai dala amo hahelaga tauna ese kara dika taudia ia durua Dirava ida maino ai idia noho totona.

9. (a) Israela taudia be ‘king gaukara do idia karaia hahelaga taudia’ ai idia lao totona, dahaka idia karaia be namo? (b) Dahaka dainai Iehova ese Israela taudia huanai hahelaga taudia haida ia abia hidi? (c) Dahaka dainai Israela taudia idia hegeregere lasi king bona hahelaga gaukarana idia karaia?

⁹ Taravatu kontraka gunana dainai Israela taudia be king bona hahelaga gaukara idia karaia diba, unai amo “bese ibounai”  dekenai hahenamo do idia mailaia. To, unai hahenamo idia abia totona, gau ta idia karaia be namo. Dirava ia gwau: “Lauegu hereva do umui kamonai henia, bona lauegu taravatu [o kontraka] do umui badinaia.” Israela taudia be Iehova ena hereva idia “kamonai henia,” a? Oibe idia kamonai, to idia badinaia goevagoeva lasi. (Roma 3:19, 20) Unai dainai, Iehova ese Israela taudia huanai hahelaga taudia haida ia abia hidi. To, unai hahelaga taudia be king gaukara idia karaia lasi. Idia ese animal idia bouboulaia, Dirava ese taunimanima edia dika ia gwauatao totona. (Lev. 4:1–6:7) Hahelaga tauna danu be ia sibona ena kara dika dainai boubou gaudia ia henia. (Heb. 5:1-3; 8:3) Ena be Iehova ese unai boubou gaudia ia abia dae, to kara dika ia kokia lasi, bona Israela taudia be Dirava ida maino ai idia noho lasi. Aposetolo Paulo ia gwau: “Boromakau bona nanigosi edia rara ese kara dika idia kokia diba lasi.” (Heb. 10:1-4) Taravatu ibounai idia badinaia diba lasi dainai, dika idia davaria. (Gal. 3:10) Unai dainai, Israela taudia idia hegeregere lasi bese ibounai totona king bona hahelaga gaukarana idia karaia.

10. Taravatu kontraka gunana ena badina be dahaka?

¹⁰ Iehova ena gwauhamata hegeregerena, Israela besena be ‘king gaukara idia karaia hahelaga taudia’ ai idia lao diba lasi, a? Unai gaukara idia karaia diba, bema Iehova ena hereva be mai edia kudouna ibounai ida idia badinaia. (Galatia 3:19-25 duahia.) Unai ita lalopararalaia totona, Taravatu kontraka gunana ena badina ita diba be namo. Unai Taravatu ese tomadiho koikoi amo Israela taudia ia gimaia. Danu, ia hadibadia hahelaga tauna badana ese ia karaia animal boubouna be edia dika ia kokia diba lasi. Unai Taravatu be “hakaua tauna” bamona Israela besena be Keriso, o Mesia a dekenai ia hakaudia lao. To, Mesia ia ginidae neganai, Ieremia ese ia perovetalaia kontraka matamatana ia haginia. Keriso idia abia dae taudia be unai kontraka matamatana lalonai idia noho bona ‘king gaukara do idia karaia hahelaga taudia’ ai do idia lao. Mani unai ita herevalaia.

KING BONA HAHELAGA TAUDIA ENA KONTRAKA MATAMATA

11. Edena dala ai Iesu ese ma haida be king bona hahelaga taudia ai ia halaodia?

¹¹ Lagani 29 C.E. ai, Iesu ena mauri lagani be 30 neganai, ia bapatiso bona Mesia ai ia lao. Ena bapatiso amo ia hahedinaraia mai ena kudouna ibounai ida Iehova ena ura do ia karaia. Iehova ese ia hanamoa ia gwau, “inai be egu Natuna, egu lalokau,” bona lauma helaga amo ia horoa. (Mat. 3:13-17; Kara 10:38) Dirava ese Iesu be Hahelaga Tauna Badana bona nega vaira ena King ai ia halaoa, bona ia idia abidadama henia taudia be hahenamo do idia abia. (Heb. 1:8, 9; 5:5, 6) Bona ma haida be king bona hahelaga taudia ai ia halaodia.

12. Iesu ena boubou gauna dainai dahaka hahenamo ita abia?

¹² Hahelaga Tauna Badana Iesu be dahaka ia bouboulaia, unai amo ia idia abidadama henia taudia edia dika ia gwauatao diba? Iena mase laloatao ariana ai ia gwauraia herevana ese ia hahedinaraia ia bouboulaia gauna be ena mauri goevadaena. (Heberu 9:11, 12 duahia.) Iesu ia bapatiso negana amo hahetoho bona hisihisi ia davaria, to ia haheauka ela bona ia mase. (Heb. 4:15; 5:7-10) Ia toreisi lou murinai, guba dekenai ia giroa lou bona ena boubou gauna be Iehova ia henia. (Heb. 9:24) Unai nega amo, iena boubou gauna idia abidadama henia taudia totona Iehova ia noia. Danu, ia durudia Dirava idia hesiai henia bona mauri hanaihanai idia abia totona.  (Heb. 7:25) Bona danu, iena boubou gauna ese kontraka matamatana ia hamomokania.​—⁠Heb. 8:6; 9:15.

13. Kontraka matamata taudia be dahaka hahenamo do idia abia?

¹³ Kontraka matamata taudia be Dirava ese lauma helaga amo ia horodia. (2 Kor. 1:21) Abidadama Iuda taudia bona Idau Bese taudia danu be unai kontraka lalonai idia noho. (Efe. 3:5, 6) Kontraka matamata taudia be dahaka hahenamo do idia abia? Iehova ese edia kara dika ibounai do ia gwauatao. Iehova ia gwauhamata: “Lau ese edia kara dika do lau gwauatao, bona edia kerere do lau laloa lou lasi.” (Ier. 31:34) Unai murinai, idia be ‘king gaukara idia karaia hahelaga taudia’ ai idia lao diba. Petero ese horoa Keristani taudia ia hamaorodia: “Umui be ‘abia hidi besena, king gaukara umui karaia hahelaga taudia, bese helagana, bona Dirava ena taunimanima korikoridia.’ Vadaeni dibura amo ena diari namo herea dekenai umui ia boiria tauna ena ‘kara hereadaedia be gabu ibounai dekenai umui gwauraia hedinarai be namo.’” (1 Pet. 2:9) Iehova ese Israela taudia dekenai Mose ena Taravatu ia henia neganai, ia gwauraia herevana be Petero ese kontraka matamata taudia dekenai ia gwauraia.​—⁠Eso. 19:5, 6.

HAHENAMO DO IA MAILAIA BESE HELAGANA

14. Bese helagana edia gaukara be edeseni do idia karaia?

¹⁴ Kontraka matamata taudia edia gaukara be edeseni do idia karaia? Edia gaukara be tanobada ai idia karaia. Idia be Iehova ena gwaukau taudia dainai, iena “kara hereadaedia” bona Baibel ena hereva momokani be taunimanima dekenai idia hadibaia. (Mat. 24:45; 1 Pet. 2:4, 5) Idia mase bona toreisi lou murinai, Keriso ida guba dekenai king bona hahelaga gaukara do idia karaia. (Luka 22:29; 1 Pet. 1:3-5; Apok. 1:6) Matahanai ta lalonai, aposetolo Ioane ese guba ai lauma taudia momo ia itaia. Idia be Iehova ena terona vairanai idia gini bona “Mamoe Natuna” totona “ane matamatana idia abia.” Idia gwau: “Oiemu rara amo iduhu, gado, kopina, bona bese idauidau taudia oi hoia, Dirava idia hesiai henia totona. Bona oi ese idia be iseda Dirava ena king bona hahelaga taudia ai oi halaoa, bona idia be tanobada do idia lohiaia.” (Apok. 5:8-10)  Matahanai ma ta lalonai, Ioane ia gwau: “Idia be Dirava bona Keriso edia hahelaga taudia bona lagani 1,000 lalonai Keriso ida do idia lohia.” (Apok. 20:6) Unai king taudia bona Keriso be bese helagana, bona taunimanima ibounai dekenai hahenamo momo do idia mailaia.

15, 16. Bese helagana ese dahaka hahenamo do ia mailaia?

¹⁵ Tanobada taudia dekenai 144,000 taudia ese dahaka hahenamo do idia mailaia? Apokalupo karoa 21 ia gwau idia be “Mamoe Natuna ena adavana” eiava Ierusalema Matamatana. (Apok. 21:9) Siri 2 ia lao 4 ia gwau: “Taoni helagana lau itaia, Ierusalema Matamatana unai, guba amo ia diho mai, Dirava dekena amo. Ia be headava matamata kekenina bamona, sibona ia hahairaia bona do ia adavaia tauna totona ia hegaegae. Vadaeni gado badana ta lau kamonai, terona amo ia mai, ia gwau: ‘Dirava ena palai rumana be taunimanima ida ia noho, bona ia be idia ida do ia noho, bona idia be ena taunimanima ai do idia lao. Bona Dirava be idia ida do ia noho. Bona ia ese mata ranu ibounai be edia matana amo do ia dahua oho, bona mase be do ia ore, bona lalohisihisi, taitai, bona hisihisi danu be do idia ore. Gau gunadia be idia ore vadaeni.’” Unai be hahenamo namodia! Mase be do ia ore dainai, lalohisihisi, taitai, bona daradoko do idia ore. Taunimanima be do idia goevadae bona Dirava ida maino ai do idia noho.

¹⁶ Bese helagana ese do ia mailaia hahenamo ma haida be Apokalupo 22:1, 2 ese ia herevalaia. Ia gwau: “Aneru ese mauri ranuna ena sinavai be lau dekenai ia hahedinaraia, ia be galasi bamona, bona Dirava bona Mamoe Natuna edia terona amo ia aru mai, bona taoni ena dala badana huanai ia aru lao. Sinavai ena kahana kahana dekenai mauri audia idia gini, unai mauri audia ese lagani ta ta ai huahua be nega 12 idia atoa, oibe, hua ta ta ibounai lalonai huahua idia atoa. Bona unai au edia raurau be bese idauidau hanamoa totona.” Unai siri ese ita ia hadibaia bese helagana ese tanobada besedia do ia durua bona Adamu amo idia abia kara dika do ia kokia. Oibe, gau gunadia be do idia ore.

BESE HELAGANA ENA GAUKARA IA ORE

17. Lagani 1,000 dokonai, bese helagana be dahaka gaukara do ia haorea?

¹⁷ Bese helagana ese taunimanima do ia durua ela bona lagani 1,000 dokonai idia ibounai be goevadae taudia ai do idia lao. Hahelaga Tauna Badana, King Iesu Keriso, ese goevadae taudia ibounai be Iehova dekenai do ia henia lou. (1 Korinto 15:22-26 duahia.) Unai nega ai, bese helagana ena gaukara do ia ore.

18. Bese helagana ena gaukara ia ore neganai, dahaka gaukara do ia karaia?

¹⁸ Unai murinai, bese helagana be dahaka gaukara do ia karaia? Apokalupo 22:5 ia gwau: “Idia be do idia lohia ela bona hanaihanai.” To, daidia do idia lohiaia? Baibel be unai ia herevalaia lasi. To, idia be mase diba lasi lauma tauanina idia abia, bona kara dika taudia durua dalana idia diba dainai, Dirava ese idia do ia gaukaralaia noho. King gaukara do idia karaia bona Iehova ena ura do idia karaia ela bona hanaihanai.

19. Memorial idia lao taudia be dahaka do idia laloatao?

¹⁹ Thursday, April 5, 2012 ai, Iesu ena mase laloatao ariana ita karaia neganai, unai hahediba herevadia do ita laloa lou. Tanobada ai horoa orena taudia be wain bona hatubua lasi paraoa idia abia neganai, idia hahedinaraia idia be kontraka matamatana taudia. Bona idia laloatao Dirava ena ura idia hagugurua totona, idia be mai edia maduna badana. Ita be Memorial dekenai ita lao neganai, ita hahedinaraia Iehova Dirava ese ia abia hidi bese helagana ena gaukara namona ita laloa bada.

[Footnote]

[Study Questions]

[Picture on page 29]

Bese helagana ese taunimanima dekenai hahenamo momo do ia mailaia