“Dakayo ket ‘maysa a napili a puli, maysa a naarian a kinapadi, maysa a nasantuan a nasion, maysa nga ili nga agpaay a naisangsangayan a sanikua.’”​—1 PED. 2:9.

1. Apay a naawagan met iti Memorial ti “pangrabii ti Apo,” ken ania ti panggep dayta?

IDI rabii ti Nisan 14, 33 C.E., sinelebraran ni Jesu-Kristo ken ti 12 nga apostolna ti Paskua dagiti Judio iti maudi a gundaway. Kalpasan a napapanaw ti traidor a ni Judas Iscariote, inrugi ni Jesus ti naiduma a selebrasion a naawagan idi agangay kas “pangrabii ti Apo.” (1 Cor. 11:20) Namindua a kinuna ni Jesus: “Itultuloyyo nga aramiden daytoy kas panglaglagip kaniak.” Maawagan met dayta iti Memorial, maysa a pananglaglagip ken Kristo, nangruna ti ipapatayna. (1 Cor. 11:24, 25) Kas panagtulnog iti dayta a bilin, dagiti Saksi ni Jehova iti intero a lubong tinawen a selselebraranda ti Memorial. Iti daytoy a tawen, ti Nisan 14 iti kalendario dagiti Judio ket mangrugi iti ilelennek ti init inton Huebes, Abril 5.

2. Ania ti kinuna ni Jesus maipapan iti inusarna nga arak ken tinapay?

² Iti dua a bersikulo, insalaysay ni adalan a Lucas ti inaramid ken imbaga ni Jesus iti daydi nga okasion: “Nangala iti tinapay, nagyaman, pinispisina, ket intedna kadakuada, a kunkunana: ‘Daytoy kaipapananna ti bagik a maited maigapu kadakayo. Itultuloyyo nga aramiden daytoy kas panglaglagip kaniak.’ Kasta met, ti kopa iti isu met laeng a pamay-an kalpasan ti panangrabiida, a kunkunana: ‘Daytoy a kopa kaipapananna ti baro a tulag babaen ti bileg ti darak, a maiparukpok maigapu kadakayo.’” (Luc. 22:19, 20) Kasano ti panangtarus dagiti apostol kadagita a sasao?

3. Ania ti natarusan dagiti apostol iti sasao ni Jesus maipapan iti tinapay ken arak?

³ Kas Judio, pamiliar dagiti apostol kadagiti animal a sakripisio nga idatdaton dagiti papadi iti Dios iti templo idiay Jerusalem. Maaramid ti panagdaton tapno magun-od ti anamong ni Jehova, ken adu kadagita  a daton ti agserbi kas pangabbong kadagiti basol. (Lev. 1:4; 22:17-29) Isu nga idi imbaga ni Jesus a ti bagi ken darana ket ‘maited ken maiparukpok maigapu kadakuada,’ natarusan dagiti apostol nga itedna ti mismo a perpekto a biagna kas sakripisio. Maysa a sakripisio a napatpateg nga amang ngem kadagiti animal.

4. Ania ti kayat a sawen ni Jesus idi imbagana: “Daytoy a kopa kaipapananna ti baro a tulag babaen ti bileg ti darak”?

⁴ Ti ngay sasao ni Jesus a “daytoy a kopa kaipapananna ti baro a tulag babaen ti bileg ti darak”? Ammo dagiti apostol ti padto maipapan iti baro a tulag, a nairekord iti Jeremias 31:31-33. (Basaen.) Ipasimudaag dagiti sasao ni Jesus nga iyussuatnan dayta a baro a tulag, a mangsukat iti Linteg ti tulag nga inaramid ni Jehova iti Israel babaen ken Moises. Adda kadi pagnaigan ti dua a tulag?

5. Ania dagiti oportunidad a linuktan ti Linteg ti tulag iti Israel?

⁵ Wen, dakkel ti pagnaigan dagiti panggep ti dua a tulag. Idi impasdek ni Jehova ti Linteg ti tulag iti Israel, kinunana: “No siiinget nga agtulnogkayto iti timekko ket pudno a salimetmetanyonto ti tulagko, iti kasta sigurado nga agbalinkayto a naisangsangayan a sanikuak manipud iti amin a sabsabali nga ili, agsipud ta kukuak ti intero a daga. Ket dakayo agbalinkayto kaniak a maysa a pagarian ti papadi ken maysa a nasantuan a nasion.” (Ex. 19:5, 6) Ania ti natarusan dagiti Israelita kadagita a sasao?

TI KARI A NAARIAN A KINAPADI

6. Ania a kari ti maitungpal babaen ti Linteg ti tulag?

⁶ Maawatan dagiti Israelita ti termino a “tulag” ta nakitulag ni Jehova kadagiti kapuonanda a da Noe ken Abraham. (Gen. 6:18; 9:8-17; 15:18; 17:1-9) Kas paset ti tulagna ken Abraham, inkari ni Jehova: “Babaen ti bin-im pudno unay a dagiti amin a nasion iti daga bendisionandanto ti bagbagida.” (Gen. 22:18) Inaramid ni Jehova ti Linteg ti tulag tapno matungpal dayta a kari. Babaen iti dayta, makapagbalin ti Israel kas ‘naisangsangayan a sanikua ni Jehova manipud iti amin a sabsabali nga ili.’ Iti ania a panggep? Tapno ‘agbalinda a maysa a pagarian ti papadi’ para ken Jehova.

7. Ania ti kaipapanan ti sasao a “maysa a pagarian ti papadi”?

⁷ Pamiliar dagiti Israelita kadagiti ari ken papadi, ngem ti laeng nagkauna a tao a ni Melquisedec ti inanamongan ni Jehova a naggiddan a nangakem iti dayta a dua saad. (Gen. 14:18) Babaen ti Linteg ti tulag, inikkan ni Jehova ti Israel iti gundaway a mangpataud iti “maysa a pagarian ti papadi,” wenno kas ipakita dagiti naud-udi a naipaltiing a sursurat, “naarian a kinapadi,” kayatna a sawen, ar-ari ken papadi pay.​—1 Ped. 2:9.

8. Ania ti akem dagiti papadi a dinutokan ti Dios?

⁸ Siempre, ti ari ti mangituray. Ania ngarud ti akem ti padi? Kuna ti Hebreo 5:1: “Tunggal nangato a padi a maala kadagiti tattao madutokan maigapu kadagiti tattao iti bambanag maipapan iti Dios, tapno mangidaton kadagiti sagut ken kadagiti sakripisio maipaay iti basbasol.” Ti padi a dinutokan ni Jehova ti pannakabagi dagiti tattao iti imatang ti Dios. Ipakaasina ken Jehova a pakawanenna dagiti basol dagiti tattao babaen ti panagidatonna. Isu pay ti pannakabagi ni Jehova iti imatang dagiti tattao, nga isurona kadakuada dagiti linteg ti Dios. (Lev. 10:8-11; Mal. 2:7) Babaen kadagita, ikappiana dagiti tattao iti Dios.

9. (a) Ania ti masapul nga aramiden dagiti Israelita tapno maaddaanda iti gundaway nga agbalin a “maysa a pagarian ti papadi”? (b) Apay a nangdutok ni Jehova iti papadi iti mismo nga Israel? (c) Apay a saan a nakapataud ti Israel iti “maysa a pagarian ti papadi” iti sidong ti Linteg ti tulag?

⁹ Babaen ti Linteg ti tulag, naikkan ti Israel iti gundaway a mangpataud iti  naarian a kinapadi a pakagunggonaan ti “amin a sabsabali nga ili.” Ngem adda kondision dayta a nagsayaat nga oportunidad. Kuna ti Dios: “No siiinget nga agtulnogkayto iti timekko ket pudno a salimetmetanyonto ti tulagko.” ‘Makapagtulnogda ngata a siiinget ken Jehova’? Wen, ngem saan a naan-anay. (Roma 3:19, 20) Gapu iti dayta, nangdutok ni Jehova iti sumagmamano a papadi iti mismo nga Israel. Saanda nga agserbi kas ar-ari no di ket agidatonda kadagiti animal tapno mapakawan ti basol dagiti Israelita. (Lev. 4:1–6:7) Karaman kadagita ti basol dagiti papadi a mismo. (Heb. 5:1-3; 8:3) Nupay awaten ni Jehova dagita a sakripisio, dida naan-anay a maikkat ti basol dagiti Israelita. Ti kinapadi iti sidong ti Linteg ti tulag dina naan-anay a maikappia iti Dios uray dagiti nasingpet nga Israelita. Kas kinuna ni apostol Pablo: “Ti dara dagiti toro ken dagiti kalding saanna a mabalin nga ikkaten dagiti basol.” (Heb. 10:1-4) Gapu iti panagsukir dagiti Israelita iti Linteg, nailunodda. (Gal. 3:10) Isu a dida makapagserbi iti sangatauan kas naarian a papadi.

10. Ania ti panggep ti Linteg ti tulag?

¹⁰ Saan kadin a matungpal ti kari ni Jehova a mangpataud ti Israel iti “maysa a pagarian ti papadi”? Matungpal, no ikagumaanda ti agtulnog kenkuana ngem saan nga iti sidong ti Linteg. Apay? (Basaen ti Galacia 3:19-25.) Ti Linteg sinalaknibanna dagiti natulnog nga Israelita manipud iti ulbod a panagdayaw. Tinulonganna pay ida a mangbigbig a managbasolda ken kasapulanda ti dakdakkel a sakripisio ngem iti aniaman nga idaton ti nangato a padi. Ti Linteg ket maysa a manangisuro a mangiturong kadakuada ken Kristo, wenno Mesias, dagiti titulo a kaipapananna “Daydiay Napulotan.” Idi dimteng ti Mesias rinugianna ti baro a tulag nga impadto ni Jeremias. Dagidiay nangawat ken Kristo naawisda nga agbalin a paset ti baro a tulag ken agbalinto a “maysa a pagarian ti papadi.” Ammuentayo no kasano.

TI BARO A TULAG MANGPATAUD ITI NAARIAN A KINAPADI

11. Kasano a nagbalin ni Jesus a pundasion ti naarian a kinapadi?

¹¹ Idi 29 C.E., nagbalin a Mesias ni Jesus a taga-Nazaret. Idi agarup 30 ti tawenna, nagpabautisar kas panangipakita iti kinatulokna a mangaramid iti naisangsangayan a pagayatan ni Jehova para kenkuana. Isu ket binigbig ni Jehova kas ‘Anakna, a dungdungnguen’ ken pinulotanna, saan nga iti lana, no di ket iti nasantuan nga espiritu. (Mat. 3:13-17; Ara. 10:38) Dayta a pannakapulot ti namagbalin ken Jesus kas Nangato a Padi ken masanguanan nga Ari ti amin a tattao a mamati kenkuana. (Heb. 1:8, 9; 5:5, 6) Isu ti pundasion ti pudpudno a naarian a kinapadi.

12. Ania ti naaramidan ti daton ni Jesus?

¹² Kas Nangato a Padi, ania ti idaton ni Jesus tapno naan-anay a mapakawan ti natawid a basol dagiti mamati kenkuana? Isu ti natauan a perpekto a biagna, kas impasimudaagna idi inyussuatna ti Pananglaglagip iti ipapatayna. (Basaen ti Hebreo 9:11, 12.) Kas Nangato a Padi, nasubok ken nasanay ni Jesus manipud pannakabautisarna idi 29 C.E. agingga iti ipapatayna. (Heb. 4:15; 5:7-10) Kalpasan a napagungar, nagpalangit ken indatagna ken Jehova ti pateg ti datonna. (Heb. 9:24) Manipud idin, mabalinen ni Jesus ti agpakaasi ken Jehova para kadagidiay mangipakita iti pammati iti datonna ken matulonganna ida nga agserbi iti Dios nga addaan namnama nga agbiag iti agnanayon. (Heb. 7:25) Nagserbi met ti datonna a nangpatalged iti baro a tulag.​—Heb. 8:6; 9:15.

13. Ania ti namnama dagidiay karaman iti baro a tulag?

¹³ Napulotan met iti nasantuan nga espiritu dagidiay naawis nga agbalin a paset  ti baro a tulag. (2 Cor. 1:21) Karaman iti dayta dagiti matalek a Judio ken kalpasanna dagiti Gentil. (Efe. 3:5, 6) Ania ti namnama dagidiay karaman iti baro a tulag? Naan-anay a mapakawan dagiti basolda. Inkari ni Jehova: “Pakawanekto ti biddutda, ket ti basolda saankonton a lagipen.” (Jer. 31:34) Gapu ta napakawandan, addaandan iti gundaway nga agbalin a “maysa a pagarian ti papadi.” Kinuna ni Pedro kadagiti napulotan a Kristiano: “Dakayo ket ‘maysa a napili a puli, maysa a naarian a kinapadi, maysa a nasantuan a nasion, maysa nga ili nga agpaay a naisangsangayan a sanikua, tapno ideklarayo a sisasaknap dagiti kinatan-ok’ daydiay nangayab kadakayo manipud iti kinasipnget nga agturong iti nakaskasdaaw a lawagna.” (1 Ped. 2:9) Inadaw ditoy ni Pedro ti sasao ni Jehova iti Israel idi impasdekna ti Linteg ken inyaplikarna dagita kadagiti Kristiano a karaman iti baro a tulag.​—Ex. 19:5, 6.

TI NAARIAN A KINAPADI A PAKABENDISIONAN TI SANGATAUAN

14. Sadino ti pagserbian dagiti naarian a papadi?

¹⁴ Sadino ti pagserbian dagidiay karaman iti baro a tulag? Agserbida a papadi ditoy daga, kas maysa a grupo. Pannakabagi ida ni Jehova kadagiti tattao babaen ti ‘panangideklarada a sisasaknap kadagiti kinatan-okna’ ken panangipaayda iti naespirituan a taraon. (Mat. 24:45; 1 Ped. 2:4, 5) Kalpasan ti ipapatay ken panagungarda, naan-anay nga itungpalda ti akemda kas ar-ari ken papadi a kadua ni Kristo idiay langit. (Luc. 22:29; 1 Ped. 1:3-5; Apoc. 1:6) Pinatalgedan dayta ti nasirmata ni apostol Juan maipapan iti adu nga espiritu a parsua iti asideg ti trono ni Jehova idiay langit. Kankantaanda “ti Kordero” iti “baro a kanta”: “Babaen iti daram nanggatangka iti tattao maipaay iti Dios manipud iti tunggal tribu ken pagsasao ken ili ken nasion, ket pinagbalinmo ida a kas pagarian ken papadi iti Diostayo, ket agturayda a kas ar-ari iti daga.” (Apoc. 5:8-10) Iti sabali pay a sirmata, kinuna ni Juan maipapan kadagitoy nga ari: “Isudanto ti papadi ti Dios ken ni Kristo, ket makipagturaydanto kenkuana kas ar-ari iti sangaribu a tawen.” (Apoc. 20:6) Kaduada ni Kristo a mangbukel iti naarian a kinapadi a pakabendisionan ti sangatauan.

15, 16. Ania dagiti bendision nga ipaay ti naarian a kinapadi iti sangatauan?

 ¹⁵ Ania dagiti bendision nga ipaay ti 144,000 iti sangatauan? Ti Apocalipsis kapitulo 21 iladawanna ida kas nailangitan a siudad, ti Baro a Jerusalem, a maawagan iti “asawa ti Kordero.” (Apoc. 21:9) Kuna ti bersikulo 2 agingga iti 4: “Nakitak met ti nasantuan a siudad, ti Baro a Jerusalem, a bumabbaba nga aggapu idiay langit manipud iti Dios ket naisagana kas maysa a nobia a naarkosan maipaay iti asawana. Idin nangngegko ti maysa a natbag a timek manipud iti trono a kunana: ‘Adtoy! Ti tolda ti Dios adda iti sangatauan, ket isu makipagnaedto kadakuada, ket isudanto dagiti ilina. Ket ti Dios a mismo addanto kadakuada. Ket punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Ti immuna a bambanag naglabasdan.’” Anian a nagsayaat a bendision! Awanton ti lulua, panagleddaang, ut-ot, wenno panagsangit gapu ta awanton ni patay. Perpekto ken naan-anayton a maikappia ti sangatauan iti Dios.

¹⁶ Dakamaten ti Apocalipsis 22:1, 2 dagiti kanayonan a bendision nga ipaay ti naarian a kinapadi: “Impakitana kaniak ti maysa a karayan ti danum ti biag, nalitnaw a kas kristal, nga agay-ayus manipud iti trono ti Dios ken iti Kordero nga agpababa iti tengnga ti akaba a [dalan ti Baro a Jerusalem]. Ket iti daytoy nga igid ti karayan ken iti dayta nga igid adda kaykayo ti biag a mangpatpataud iti sangapulo ket dua nga apit a bunga, a mangipapaay kadagiti bungada iti tunggal bulan. Ket ti bulbulong dagiti kayo agpaayda iti pannakaagas dagiti nasion.” Babaen kadagita a simboliko a probision, “dagiti nasion,” wenno amin a pamilia ditoy daga, naan-anay a maikkatton ti natawidda ken Adan a kinaimperpekto. Pudno a ‘naglabaston ti immuna a bambanag.’

TI NAARIAN A KINAPADI ITUNGPALNA TI ANNONGENNA

17. Anianto ti maitungpal ti naarian a kinapadi?

¹⁷ Ti naarian a kinapadi napagbalinnanton a perpekto dagiti tattao inton agngudo ti 1,000 a tawen a panagserbina. Ni Kristo a Nangato a Padi ken Ari, idatagnanton ken Jehova ti perpekto a sangatauan. (Basaen ti 1 Corinto 15:22-26.) Naan-anay a maitungpalton ti naarian a kinapadi ti annongenna.

18. Inton maitungpal ti naarian a kinapadi ti panggepna, anianto ti pangusaran ni Jehova kadakuada?

¹⁸ Kalpasan ti 1,000 a tawen, anianto ti pangusaran ni Jehova kadagiti kameng ti naarian a kinapadi? Sigun iti Apocalipsis 22:5, “agturaydanto kas ar-ari iti agnanayon ken awan inggana.” Siasino ti iturayanda? Saan nga ibaga ti Biblia. Ngem gapu iti imortal a biag a tagtagiragsakenda ken iti kapadasanda a nangtulong kadagiti imperpekto a tattao, agtultuloy nga usaren ida ni Jehova kas ar-ari a mangitungpal kadagiti panggepna iti agnanayon.

19. Ania ti maipalagip kadagidiay tumabuno iti Memorial?

¹⁹ Iti pananglaglagiptayo iti ipapatay ni Jesus inton Huebes, Abril 5, 2012, dagiti kalkalpas a naadaltayo a pannursuro ti Biblia ti utobentayo. Dagiti natda a napulotan a Kristiano ditoy daga, manganda iti awan lebadurana a tinapay ken uminumda iti nalabaga nga arak, a mangipakita a karamanda iti baro a tulag. Dagita a simbolo ti daton ni Kristo ipalagipda kadakuada dagiti naisangsangayan a pribilehio ken akemda iti agnanayon a panggep ti Dios. Sapay koma ta tumabunotayo amin kas panangipakita iti nauneg nga apresasiontayo ken Jehova a Dios gapu iti probisionna a naarian a kinapadi a pakagunggonaan ti sangatauan.

[Salsaludsod]

[Ladawan iti panid 29]

Ti naarian a kinapadi mangyeg kadagiti manayon a bendision iti sangatauan