“Tassaavusi eqqarleriit qinikkat, palaseqatigiit kunngikkormiuusut, inuit illernartut, innuttassarsiat.” — 1 PETRUSI 2:9.

1. Sooq ‘Naalakkap unnukkorsiortitsinera’ aamma eqqaaniaanermik taaneqartarpa, nalliuttorsiornerullu suna siunertaraa?

UKIUMI 33-mi nisanip ulluisa 14-ianni unnukkut Jiisusip Kristusip apustiliisalu aqqaneq-marluk juutit poorskiat kingullermik nalliuttorsiutigaat. Jiisusip Judasi Iskarioti, imminik killuussisoq, aneqqoreeramiuk nalliuttorsiornermik allamik pilersitsivoq. Nalliuttorsiorneq tamanna kingusinnerusukkut ‘Naalakkap unnukkorsiortitsineranik’ taaneqarpoq. (1 Korinthimiut 11:20, NV) Jiisusi marloriarluni oqarpoq: “Taamaaliortaritsi . . . eqqaaniarlunga.” Nalliuttorsiorneq tamanna aamma eqqaaniaanermik taaneqartarpoq. Tassa Kristusip uagutsinnut iliuusii, ingammik uagut pilluta toqunera, immikkut ittumik eqqaaniartarpavut. (1 Korinthimiut 11:24, 25) Jehovap Nalunaajaasuisa peqqussut tamanna naalappaat ukiut tamaasa eqqaaniaallutik nalliuttorsiortarnermikkut. 2012-imi juutit qaammatisiutaat naapertorlugu nisanip 14-iat aallartissaaq seqernup tarrinnerata kingorna sisamanngornermi apriilip tallimaanni.

2. Timiusaq viinnilu pillugit Jiisusi qanoq oqarpa?

² Jiisusip qanoq iliornera qanorlu oqarnera ajoqersukkap Lukasip paasiuminartumik ima allaatigaa: “[Timiusaq] tiguaa, qujallunilu aggorpaa, taakkununngalu tunniullugu oqarpoq: ‘Tassa timiga ilissi pillusi tunniunneqartoq. Taamaaliortaritsi uanga eqqaaniarlunga!’ Taamattaaq nerereeramik ermuseq tiguaa oqarlunilu: ‘Ermuseq manna tassa angerusisaaq uanga aakkut pillusi kuineqartukkut.’” (Lukasi 22:19, 20) Apustilit oqaatsit taakku qanoq paasivaat?

3. Apustilit Jiisusip timiusaq viinnilu pillugit oqaasii qanoq paasivaat?

³ Apustilit ilisimalluarpaat palasit naalaffimmi Jerusalemimiittumi Guutimut uumasunik pilliisarnerat. Taamatut pilliuteqartarput Guutimit iluarineqarumallutik, pilliutillu amerlasuut ajortit isumakkeerfigineqaqqullugit pilliutaasarput. (3 Mosesi 1:4; 22:17-29) Taamaattumik Jiisusi oqarmat timini taakku pillugit tunniunneqarumaartoq aannilu taakku pillugit kuineqarumaartoq apustilit paasivaat inuunini  naammalluinnartoq pilliutitut tunniutissagaa. Pilliutaa uumasunik pilliutinit naleqarnerungaassaaq.

4. Jiisusip oqaasii: “Ermuseq manna tassa angerusisaaq”, qanoq paasisariaqarpat?

⁴ Jiisusip oqaasii: “Ermuseq manna tassa angerusisaaq”, qanoq paasisariaqarpat? Apustilit ilisimavaat Jeremiap angerusisaamik, imaluunniit angerutsimik nutaamik, siulittuutaa. (Atuakkit Jeremia 31:31-33). Jiisusip oqaasiinit erserpoq angeruseq nutaaq pilersikkaa. Inatsisit tunngavigalugit angeruseq Jehovap Mosesi aqqutigalugu Israelikkunnut angerfigeqatigiissutaa angerutsimit nutaamit taarserneqassaaq. Angerutsit taakku marluk imminnut attuumassuteqarpat?

5. Inatsisit tunngavigalugit angeruseq pissutigalugu Israelikkut qanoq periarfissaqarpat?

⁵ Aap, angerutsinut taakkununnga marlunnut siunertaasut assigiipajaarput. Jehovap Israelikkunnut Inatsisit tunngavigalugit angeruseq pilersikkamiuk ima oqarpoq: “Naalakkussinga angeruseralu aalajangiullugu inuiaqatigiinnit tamanit immikkoortillusi pigisassarsiariumaarpassi, nunarsuaq tamaat uanga pigigakku. Uannut tassaalissaasi kunngeqarfik palaseqatigiinnik innuttalik inuiaqatigiillu illernartut.” (2 Mosesi 19:5, 6) Israelikkut oqaatsit taakku qanoq paasivaat?

‘PALASEQATIGIINNIK KUNNGIKKORMIUUSUNIK’ NERIORSUUT

6. Inatsisit tunngavigalugit angeruseq neriorsuummik sumik eqquutitseqataava?

⁶ Israelikkut angeruseq, imaluunniit isumaqatigiissut pingaarutilik, suunersoq ilisimalluarpaat Jehovap Noa Aaperaallu angerfigeqatigisimammagit. (1 Mosesi 6:18; 9:8-17; 15:18; 17:1-9) Jehovap Aaperaamut angerutsimini neriorsuutaasa ilaat imaappoq: “[Illit] kinguaassakkut nunarsuarmi inuiaat tamarmik pilluaqqunarsissapput.” (1 Mosesi 22:18) Jehovap neriorsuut tamanna eqquutitikkumallugu Inatsisit tunngavigalugit angeruseq pilersippaa. Angeruseq tamanna iluaqutigalugu Israelikkut ‘inuiaqatigiinnit tamanit immikkoortinneqarsinnaapput Jehovamillu pigisassarsiarineqarsinnaallutik’. Suna siunertaralugu Israelikkut immikkoortinneqassappat? Jehovamut tassaalissapput “kunngeqarfik palaseqatigiinnik innuttalik”.

7. ‘Kunngeqarfiup palaseqatigiinnik innuttallip’ Biibilimi allaatigineqarnera qanoq paasisariaqarpa?

⁷ Israelikkut kunngeqarneq palaseqarnerlu qanoq isumaqarnersut ilisimavaat. Itsarli Melkisedeki kisimi Jehovamit iluarisaalluni kunngiuinnarani aammali palasiuvoq. (1 Mosesi 14:18) Inatsisit tunngavigalugit angeruseq iluaqutigalugu Jehovap Israelikkut periarfissippai ‘kunngeqarfiulernissaannik palaseqatigiinnik innuttalik’. Taakku Petrusip kingusinnerusukkut allaatigai ‘palaseqatigiittut kunngikkormiuusutut’, tassa kunngit aamma palasiusussat. — 1 Petrusi 2:9.

8. Palasit Guutimit toqqarneqartut susarpat?

⁸ Kunngi soorunami aqutsisarpoq. Palasili sunik suliaqartarpa? Hebræerit 5:1-imi ima nassuiarneqarpoq: “[Palasiuneq] inoqatimi akornanni qinigaasoq kinaluunniit atorfimminut ivertinneqartarpoq inoqatini sinnerlugit Guutimut kiffartortunngorluni taakkua ajortaat pillugit tunissutinik pilliutinillu toqutassanik sassaassisuusarluni.” Palasi Jehovamit toqqarneqartoq inuit sinnerlugit Guutimut sassartarpoq. Palasip Jehova inuit ajortaannik isumakkeerfiginneqqullugu qinnuigisarpaa Jehovamut pilliisarnermigut. Aamma palasi Jehova sinnerlugu inunnut sassartarpoq Guutip inatsisaanik ilinniartitsisarnermigut. (3 Mosesi 10:8-11; Malaki 2:7) Taamaaliornermigut palasip inuit ajortillit Guutimit saammaanneqarnissaannut ikiortarpai.

9. (a) Israelikkut kunnginngussagunik palasinngussagunillu susariaqarpat? (b) Sooq Jehova Israelimi palaseqatigiinnik pilersitsiva? (c) Sooq Israelikkut Inatsisit tunngavigalugit angerutsip atuunnerata nalaani palasiusinnaanatillu kunngiusinnaanngillat?

⁹ Inatsisit tunngavigalugit angeruseq iluaqutigalugu Israelikkut ‘inuiaqatigiinnut tamanut’ kunnginngornissaminnut palasinngornissaminnullu periarfissaqarput. Israelikkulli periarfissaq nuannersoq tamanna atorluassagunikku piumasaqaatinik eqqortitseqqaartariaqarput. Tassa Guutip piumaffigai naalassasut angerutsinilu aalajangiutissagaat.  Israelikkut Jehovamut naalassinnaappat? Aap, naalassinnaapput, naalalluinnarsinnaanngillalli. (Romamiut 3:19, 20) Tamanna pissutigalugu Jehova Israelikkunnik isumassuisussanik palasinngortitsivoq. Palasit taakku kunngiunngillat, Israelikkullu ajortuliaat pillugit uumasunik pilliisarput. (3 Mosesi 4:1–5:26) Ajortuliat tamakku ilaat palasit namminneq ajortuliaraat. (Hebræerit 5:1-3; 8:3) Jehovap pilliutit akuerigaluarai Israelikkut suli ajortiliupput. Inatsisit tunngavigalugit angerutsip atuunnerata nalaani palaseqatigiit Israelikkunnik eqqortuliorusukkaluartunik Guutimut tamakkiisumik saammaannartitsisinnaanngillat. Paulusip oqaasii uku ilumoorput: “Ussigimmi angutivissat savaasallu angutivissat aavata ajortuliat piiarsinnaanngilluinnarpaat.” (Hebræerit 10:1-4) Israelikkut Mosesip inatsisai naalalluinnarsinnaannginnamikkit perloqqusaapput. (Galatiamiut 3:10) Taamaattumik inunnut tamanut palasiusinnaanatillu kunngiusinnaanngillat.

10. Inatsisit tunngavigalugit angerutsimut suna siunertaava?

¹⁰ Tamannali ima paasisariaqanngilaq Israelikkut ‘kunngeqarfimmut palaseqatigiinnik innuttalimmut’ Jehovap neriorsuutigisimasaanut ilaasinnaanngitsut. Ilumoorlutik Jehovamut naalanniartuarunik palasinngorlutillu kunnginngornissaminnut periarfissaqarput, aatsaalli Mosesip inatsisai atuukkunnaarpata. Sooq? (Atuakkit Galatiamiut 3:19-25). Tamanna paasiumallugu Inatsisit tunngavigalugit angerutsimut siunertaasoq paaseqqaartariaqarparput. Israelikkut aalajaatsut Inatsisit iluaqutigalugit eqqunngitsumik pallorfiginninnermut illersorneqarput. Aamma ajortuliortuunerminnik palasiunerullu pilliutaanit pilliummik naleqarnerusumik pisariaqartitsinerminnik paasinninnissaminnut Inatsisit iluaqutigaat. Inatsisit ‘perorsaataapput’ Israelikkut Kristusimik, imaluunniit Missiarsimik, akuerinninnissaannut piareersaatitut. Kristusi aamma Missiarsi taaguutaapput isumaqartut “tanitaq”. Missiarsilli tikiukkuni angeruseq nutaaq Jeremiap siulittuutigisaa pilersittussaavaa. Kristusimik akuerinnittut angerutsimut nutaamut ilaalissapput, aamma tassaalissapput “kunngeqarfik palaseqatigiinnik innuttalik”. Sammilaariartigu angeruseq nutaaq ‘kunngeqarfimmik palaseqatigiinnik innuttalimmik’ qanoq pilersitsisinnaanersoq.

ANGERUSEQ NUTAAQ PALASEQATIGIINNIK KUNNGIKKORMIUUSUNIK PILERSITSISUSSAQ

11. Jiisusi palaseqatigiinnut kunngikkormiuusunut qanoq tunngaviua?

¹¹ Ukiumi 29-mi Jiisusi Nazaretimioq Missiarsinngorpoq. 30-t missaanik ukioqarluni kuisikkami ersersippaa Jehovap imminut piumasaa immikkut ittoq iliuuseriumallugu. Jehova Jiisusi pillugu ima oqarpoq: “Tassa ernera asasara, nuannarisara.” Jehovap uuliamiunngitsoq anersaamilli illernartumik tanippaa. (Matthæusi 3:13-17; Apustilit Suliaat 10:38) Guutip palasiunerusussatut kunnginngortussatullu tanippaa taassuminnga upperinnittut kikkulluunniit iluaqutissaannut. (Hebræerit 1:8, 9; 5:5, 6) Taava Jiisusip inuit allat palaseqatigiinnut kunngikkormiuusunut ilaalernissaannut periarfississavai.

12. Jiisusip pilliuteqarnera qanoq iluaqutigineqarsinnaava?

¹² Jiisusip palasiunerugami imminik upperinnittut ajorti kingornussaat isumakkeerfigineqaqqullugu suna pilliutigisinnaavaa? Jiisusip toqunini pillugu eqqaaniaalluni nalliuttorsiortarneq pilersikkamiuk oqaasiinit paasisinnaavarput nammineq inuunini naammalluinnartoq pilliutiginiaraa. (Atuakkit Hebræerit 9:11, 12). Jiisusi palasiuninngortinneqarnermi kingorna toqussi tikillugu misilinneqarlunilu ‘ilinniarpoq’. (Hebræerit 4:15; 5:7-10) Makitinneqarnermi kingorna qilaliarpoq pilliutimilu nalinga Jehovamut sassaallugu. (Hebræerit 9:24) Tamatuma kingorna Jiisusip pilliutiminik upperinnittut Jehovamut qinnussinnaavai, ikiorsinnaallugillu inuunermik naassaanngitsumik neriuuteqarlutik Guutimut kiffartorsinnaaqqullugit. (Hebræerit 7:25) Aamma pilliuteqarnermigut angeruseq nutaaq atortuulersippaa. — Hebræerit 8:6; 9:15.

13. Angerutsimut nutaamut ilaasut suna qilanaarisinnaavaat?

¹³ Angerutsimut nutaamut ilaasut aamma  anersaamik illernartumik taninneqassapput. (2 Korinthimiut 1:21) Juutit aalajaatsut kingusinnerusukkullu juutiunngitsut angerutsimut nutaamut ilaanissaminnut qaaqquneqarput. (Efesosimiut 3:5, 6) Angerutsimut nutaamut ilaasut suna qilanaarisinnaavaat? Ajortuliaat isumakkeerfigineqarluinnassapput. Jehova ima neriorsuivoq: “Iluanngitsuliaannik isumakkeerfigissagakkit ajortuliaallu eqqaaqqinnagit.” (Jeremia 31:34) Jehovap ajortuliatik isumakkeerfigippagit taakku tassaalersinnaassapput “kunngeqarfik palaseqatigiinnik innuttalik”. Petrusip kristumiut tanitat ima allaffigai: “[Ilissi] tassaavusi eqqarleriit qinikkat, palaseqatigiit kunngikkormiuusut, inuit illernartut, innuttassarsiat, Guutip ilissinnik taartumit qaamasuminut tupinnaqisumut nooqqullusi qaaqqusisup pissaaneranik nalunaajaasussat.” (1 Petrusi 2:9) Tamatumani apustilip Petrusip kristumiut angerutsimut nutaamut ilaasut saaffigalugit Jehovap Israelikkunnut inatsisit tunniukkamigit oqaasii issuarpai. — 2 Mosesi 19:5, 6.

PALASEQATIGIIT KUNNGIKKORMIUUSUT INUIANNUT TAMANUT ILUAQUTAASUSSAT

14. Palaseqatigiit kunngikkormiuusut sumi kiffartussappat?

¹⁴ Angerutsimut nutaamut ilaasut sumi kiffartussappat? Nunarsuarmi palaseqatigiittut kiffartussapput. Jehova sinnerlugu ‘Guutip pissaanera’ inunnut nalunaajaassutigisarpaat anersaakkullu inuussutissanik pilersuisarlutik. (Matthæusi 24:45; 1 Petrusi 2:4, 5) Toqunermik makititaanermillu kingorna qilammi Kristusi peqatigalugu palasitut kunngitullu suliassartik naammassilluinnassavaat. (Lukasi 22:29; 1 Petrusi 1:3-5; Saqqummersitat 1:6) Apustilip Johannesip takorruukkakkut pinngortitarpassuit anersaajusut Jehovap qilammi issiavissaarsuata eqqaaniittut takuai. Taakkua “erinarsugassiaq nutaaq” atorlugu ‘Savaaraq’ ima erinarsorfigaat: “[Pisiaraatit] aannik inuit Guutip pigisassai naggueqatigiinnit immikkullu oqaasilinnit inuiannillu inuiaqatigiinnillu tamanit pisut, inuianngortikkakkit kunngikkormiuusut palasinngortillugillu Guutitsinnut, nunarsuarmilu kunngiussapput [nunamullu kunngiussapput, 1936].” (Saqqummersitat 5:8-10) Kingusinnerusukkut Johannesi takorruuisinneqaqqippoq, kunngillu taakku pillugit ima oqarpoq: “[Guutimut] Kristusimullu palasiussapput kunngioqatigissallugulu ukiuni taakkunani 1.000-ini.” (Saqqummersitat 20:6) Kunngit taakku Kristusi peqatigalugu tassaassapput palaseqatigiit  kunngikkormiuusut inuiannut tamanut iluaqutaasussat.

15, 16. Palaseqatigiit kunngikkormiuusut inuiannut qanoq iluaqutaassappat?

¹⁵ 144.000-it inunnut nunarsuarmiittunut qanoq iluaqutaassappat? Saqqummersitani kapitali 21-mi palaseqatigiit taakku illoqarfittut qilammiittutut, Jerusalemitut nutaatut, aamma ‘Savaaqqap nuliatut’ allaatigineqarput. (Saqqummersitat 21:9) Versi 2-miit 4 ilanngullugu ima allassimasoqarpoq: “[Illoqarfik] illernartoq, Jerusalemi nutaaq, takuara qilammit Guutimit aqqartoq nuliassatut uissaminut assukkersorsimasutut piareersimalluni. Tusarparalu nipi nipitoqisumik issiavissaarsuarmit tutsiuttoq: Guuti ineqarfeqalerpoq inunni, taakkunani ineqarumaarpoq, innuttarissavaalu, Guutilu nammineq taakkunaniikkumaarpoq. Qulliillu tamaasa isaannit allarterumaarpai, toqulu peerukkumaarpoq, aliasuttoqarunnaarlunilu nilliasoqarunnaarlunilu anniartoqarunnaassaaq siulliit peermata.” Pilluaqqussutit nuanningaaramik! Toqu atuukkunnaarpat qullilinerit, aliasuutit, anniaatit qianerillu aamma atuukkunnaarumaarput. Inuiaat naammalluinnartunngorumaarput Guutimullu saammaannarsilluinnarsimassallutik.

¹⁶ Aamma Saqqummersitat 22:1, 2-mi pilluaqqussutisiassat palaseqatigiinnit kunngikkormiuusunit pisut ima allaatigineqarput: “[Inngilip] uannut takutippaa kuussuaq imermik inuussutaasumik aligortut qaammaritsigisumik imilik Guutip Savaaqqallu issiavissaarsuannit puilasoq. Qeqqani, aqqusernup kuussuullu akornanni, ippoq orpik inuunartoq aqqaneq-marloriarluni inerititaqartartoq, qaammatit tamaasa inerititaqartarluni, orpiullu pilutai inuiaqatigiinnut katsorsaataapput.” Takorruukkami tamatumani takutinneqarpoq ‘inuiaqatigiit’, imaluunniit ilaqutariit tamarmik nunarsuarmiittut, ajortimit Adamimit kingornussaminnit ajorunnaarsinneqarluinnarsimassasut. Aap, pissutsit “siulliit” atuukkunnaarumaarput!

PALASEQATIGIIT KUNNGIKKORMIUUSUT SULIASSARTIK NAAMMASSISSAVAAT

17. Ukiut tusindit naappata palaseqatigiit kunngikkormiuusut suna naammassisimassavaat?

¹⁷ Palaseqatigiit kunngikkormiuusut ukiuni tusindini kiffartornerat naappat inuiaat naammalluinnartunngorsimassapput. Palasiunerup kunngillu, Jiisusip Kristusip, inuiaat naammalluinnartut Jehovamut sassaatissavai. (Atuakkit 1 Korinthimiut 15:22-26). Palaseqatigiit kunngikkormiuusut suliassartik naammassissavaat.

18. Palaseqatigiit kunngikkormiuusut suliassartik naammassigunikku Jehovamit qanoq atorneqassappat?

¹⁸ Tamatuma kingorna Jehovap palaseqatigiit kunngikkormiuusut qanoq atussavai? Saqqummersitat 22:5-imi ima allassimavoq: “Taakku kunngiussapput naassaanngilluinnartumik.” Kikkunnut kunngiussappat? Biibilimi tamatumunnga tunngasumik allassimasoqanngilaq. Taamaakkaluartorli Jehovap pingaartittuassavai. Taakku aserortussaanngitsumik anersaatut timeqarlutik toqujuitsuussapput, aamma inuiannik naammalluinnanngitsunik ikiuinermut tunngatillugu misilittagaqarluassapput. Taamaattumik naassaanngitsumut kunngiujuassapput Jehovamillu atorneqartuassallutik taassuma siunertai naammassiniarlugit.

19. Eqqaaniaalluni nalliuttorsiornermi najuuttut tamarmik sumik eqqaassinneqassappat?

¹⁹ Sisamanngornermi apriilip tallimaani 2012-imi Jiisusip toqunera pillugu eqqaaniaaneq nalliuttorsiutigalugu katersuukkutta allaaserisami matumani sammisavut eqqarsaatigisinnaavavut. Kristumiut tanitat suli nunarsuarmiittut angerutsimut nutaamut ilaanertik takutissavaat timiusamik seernarsaateqanngitsumik viinnimillu aappalaartumik ilangiinermikkut. Assersuutit taakkua pissutigalugit Guutip naassaanngitsumik siunertaani nuannersunik immikkut pisinnaatitaaffeqarnertik akisussaaffeqarnertillu eqqaassavaat. Nalliuttorsiornermi najuuttugut tamatta Jehovap Guutip palaseqatigiinnik kunngikkormiuusunik inuiannut tamanut iluaqutaasussatut toqqarsimasaanik qujamasuutiginningaarnerput ersersikkumavarput.

[Atuaqqissaarnermi apeqqutit]

[Qupp. 31-mi assiliartaq]

Palaseqatigiit kunngikkormiuusut inuiannut iluaqutaasunik naassaanngitsunik atuutilersitsissapput