Akunji Phala ku Kuatekesa Athu Oso ku Mundu
Akunji Phala ku Kuatekesa Athu Oso ku Mundu
‘Enu-phe mu muiji uo sole, mu akunji a sobha kifuxi kia zele, ku mundu ua-ngene ua Nzambi.’—1 PHE. 2:9.
1. Mukonda diahi ‘o fesa ia Ngana,’ a ixana ué Lembalasa ia kufuá kua Jezú,’ ni mukonda diahi ene mu kibhanga?
MU USUKU ku muvu ua 33 K.K., mu kizuua kia 14 kia mbeji ia Nisã, Jezú Kristu ua bhange o fesa ia Phasu ia Jijudé ni jipoxolo jê mu veji ia sukina. Kioso kia kaie Juda dia Kadiota, Jezú ua bhange fesa iéngi, o fesa íii, a ixana ué ‘o Fesa ia Ngana.’ (1 Kol. 11:20) Jezú, mu veji jiiadi uambe: “Mu bhanga jinga kien’iki mu ku [ngi lembalala] Eme.” O fesa íii, a ixana ué, lembalasa ia Kufuá kua Kristu, phala ku lembalala o kufuá kuê. (1 Kol. 11:24, 25) Phala ku belesela o kitumu kiki, o Jimbangi ja Jihova ku mundu uoso ene mu lembalala o ku kufuá kuê mivu joso. Ku muvu iú ua 2012, o kizuua kia 14 kia mbeji ia Nisã, mu kalendalu ka Bibidia, o kizuua kiki kia-nda mateka kioso kia-nda fua o dikumbi, kia Kinda mu kizuua kia 5 ku mbeji ia Kasamanu.
2. Ihi iambe Jezú ia lungu ni mbolo, ni vinhu?
2 O dixibulu Luka, ua jimbulula o ima ia bhange Jezú mu jivelusu jiiadi, uambe mu kithangana kiki: “Anga u katula o mbolo, u sakidila Nzambi, anga u i uana, u i bhana o maxibulu, uixi: ‘Iú uene o mukutu uami, [uo bhane mukonda dienu. Bhangenu jinga kienhiki mu ku ngi lembalala eme.’ Ni kopho ue kiene kimoxi, kia zubha o [ku inuá] uixi: ‘Dikáu didi, kiene o Kikutu kiobhe bhu kaxi ka Nzambi ni athu, kió kolese ni manhinga mami, manda ku bhubha mukonda dienu.]’” (Luk. 22:19, 20) Kiebhi o jipoxolo kia tendela o maka enhá?
3. Kiebhi o jipoxolo kia tendela o kijimbuete kia mbolo ni vinhu?
3 Mukonda dia ku kala Jijudé, o jipoxolo ejidile kiambote o jisata ja iama ja kexile mu bhana o akunji kua Nzambi mu tembulu mu Jeluzaleme. O ujitu iú, akexile mu u bhana phala o athu a kale ni ukamba ni Jihova, o jisata ja mukuá jexile kijimbuete phala ku futa o kituxi kia tele o muthu. (Iji. 1:4; 22:17-29) Kienhiki, o jipoxolo a ki tendela kuila, kioso Jezú kiambe kuma o mukutu uê ni manhinga mê a u bhane ‘mukonda dia ene,’ muéne ua kexile mu zuela kuma ua-nda mu bhana o muenhu uê ua iuka kála sata. Kiki kieji kala ni valolo ia dikota, o ia iama ndenge.
4. Ihi ia kexile mu zuela Jezú kioso kiambe: “Dikáu didi, kiene o Kikutu kiobhe bhu kaxi ka Nzambi ni athu, kió kolese ni manhinga mami?”
4 Ihi i tuamba ia lungu ni izuelu ia Jezú kioso kiambe: “Dikáu didi, kiene o Kikutu kiobhe bhu kaxi ka Nzambi ni athu, kió kolese ni manhinga mami?” O jipoxolo ejidile o kikanenu kia lungu ni kikutu kiobhe a ki tange mu divulu dia Jelemiia 31:31-33. (Tanga.) Mu kiki, Jezú ua kexile mu londekesa kuila muéne ua kexile mu bhanga kikutu kiobhe, kieji bhingana mu kikutu kia Kitumu kia bhanene Jihova ku akua Izalaiele mu kaxi ka Mozé. O kuila o ikutu iiadi íii iexile mu londekesa kima kimoxi?
5. Ujitu uahi ua tambula akua Izalaiele bhu kaxi ka kikutu kia Kitumu?
5 Kienhiki o kikanenu kiki, kia londekesele kima kimoxi ngó. Kioso kia bhana o kikutu kia Kitumu, Jihova uambela o mundu uê: “Kiki-phe, se mu tumaka muene dízui diami, se mu kuata kikutu kiami, mu kala mu athu ami angene, mua di tungula ku miji ioso; kuma ioso mu ngongo eme muene ia ngi tokala. Enu-phe mu ngi kala mu utuminu ua [akunji ami], mu mundu uami uazele.” (Mak. 19:5, 6) Ihi ia lombolola o izuelu íii ku akua Izalaiele?
O KIKANENU KIA AKUNJI A-NDA TUMINA
6. Kiebhi o kikanenu kia Kitumu kia kikutu?
6 Akua Izalaiele a tendela o kizuelu “kikutu,” mukonda Jihova ua bhangele o kikutu kiki ku jitata jâ, Noué ni Mbalahamu. (Dim. 6:18; 9:8-17; 15:18; 17:1-9) Mu kikutu kia bhangele ni Mbalahamu, Jihova ua kanene: “Ku mbutu ié kuene kua kà zediuila ifuxi ioso mu ngongo.” (Dim. 22:18) Jihova ua bhange o kikutu kia Kitumu phala ku kumbidila o kikanenu kia bhange. Mu kiki, akua Izalaiele eji kituka athu ‘angene a Jihova a di tungula ku miji ioso.’ Phala’hi? Phala ‘a kale akunji mu utuminu ua Jihova.’
7. Ihi ilombolola o kizuelu ‘akunji a utuminu?’
7 O akua Izalaiele ejidile kiambote o kikalakalu kia jisobha ni akunji, maji Melekizedeki ngó ua tambuile o ujitu iú kua Jihova. (Dim. 14:18) Mu kusuka-ku, Jihova ua bhanene ué o ujitu iú ku akua Izalaiele, phala bhu kaxi kâ, bhu kale ué ‘akunji a utuminu.’ O Mikanda Ikola ia londekesa kuila kiki kilombolola kuila muéne ua solo akunji, jisobha eji kala ué akunji.—1 Phe. 2:9.
8. Sidivisu iahi ia kexile mu bhanga o mukunji a mu solele kua Nzambi?
8 Tuejiia kuila o sobha u tumina. Maji ihi i bhanga o mukunji? O divulu dia Jihebeleu 5:1, dijimbulula: ‘O [Mukunji ua] Dikota, a mu sola mu’axaxi ka athu, anga a mu xinda ku kala ku pholo dia mundu ku ima ia tokala Nzambi. Muéne u bhana ujitu, ni jisata mukonda dia ituxi.’ Kienhiki, o mukunji a mu solo kua Jihova, u xinda o ituxi ia mundu bhu pholo ia Nzambi, bhu kaxi ka maujitu, mu ku diondela bhu pholo ia Nzambi phala ku besoala o athu. O mukunji ué muthu a mu solo Jihova phala ku longa o kitumu ku mundu uê. (Iji. 10:8-11; Mal. 2:7) Mu kiki, o mukunji a mu solo kua Nzambi, ua kexile mu kuatekesa o athu akua ituxi ku kuata ukamba ni Nzambi.
9. (a) Ihi ia tokalele o ku bhanga akua Izalaiele phala ku kala ‘akunji a utuminu?’ (b) Mukonda diahi Jihova ua bhange akunji ni akua Izalaiele? (c) Ihi ia fidisa akua Izalaiele ku kamba ku kala ‘akunji a utuminu’ kála kia londekesele o kikutu kia Kitumu?
9 O kikutu kia Kitumu kia kexile mu bhana ku akua Izalaiele o kithangana phala ku bhana akunji eji kuatekesa “o miji ioso.” O ujitu iú ua dikota, maji saí kima kia tokalele ku bhanga: “Se mu tumaka muene dízui diami, se mu kuata kikutu kiami.” O kuila akua Izalaiele ‘eji tumaka muene o dízui dia Jihova?’ Ene keji tumaka mu ukexilu uoso. O kuila ene eji tena ku tumaka sé ku lueza? Kana. (Lom. 3:19, 20) Mukonda dia kiki, Jihova ua bhange kikutu kia akunji ni akua Izalaiele, ene keji kala jisobha, phala ku bhana jisata ja iama phala ku futa o ituxi ieji ta akua Izalaiele. (Iji. 4:1–6:7) Ko ituxi ia mundu ngó, maji ni ituxi iâ. (Jihe. 5:1-3; 8:3) Jihova ua xikana o jisata jiji, maji ene keji tena ku zubha o ituxi ia athu, mukonda akexile hanji mu kuka, ni kufuá. O akunji bhu kaxi ka Kitumu kia kikutu, keji tena ku bhangesa akua Izalaiele ku kala dingi ni ukamba ni Nzambi. O poxolo Phaulu uambe: ‘O manhinga a jingombe, ni jihombo ka tena ku katula ituxi ia muthu.’ (Jihe. 10:1-4) Mukonda dia ku bhukumukina o Kitumu, akua Izalaiele exile abhika a kituxi. (Nga. 3:10) Ene keji tena ku sidivila ku mundu kála akunji, mu ukexilu iú.
10. O kikutu kia Kitumu kia sidivile phala ihi?
10 O kuila o ikanenu ia Jihova ia kuila ene eji kala ‘akunji a utuminu’ ia kexile kima kia hatu? Kana. Se ene a belesele mu ukexilu uoso, eji tambula o ujitu iú, keji kala abhika a Kitumu. Mukonda diahi? (Tanga Ngalásia 3:19-25.) Ió akexile mu belesela, o Kitumu kieji kuatekesa ku zelesa o ubhezelu ua kidi. Ia kuatekesele o Jijudé kuijiia o ituxi iâ, ni kuijiia kuila a tokalele ku bhana sata, o sata ieji bhana o mukunji ua kexile bhu pholo ndenge. Uexile kiledi kieji ku ambata katé kua Kristu, mba Mexiia, o majina a ujitu enhá, alombolola, ‘Muthu a mu Undu.’ Kienhiki, kioso kieji bhixila Mexiia, muéne ueji bhanga kikutu kiobhe, kála kia tange Jelemiia. Ió eji xikina Kristu, eji ku a sola phala ku tokala ku kikutu kiobhe, ni ku kituka ‘akunji a utuminu.’ Tua-nda di longa kiebhi ki kia bhiti.
O KIKUTU KIOBHE KIA BHEKA AKUNJI
11. Kiebhi Jezú kia kituka o muthu ua dianga ku ukunji?
11 Ku muvu ua 29 K.K., o Mexiia ua bhixila, Jezú dia Nazalé. Mu 30 a mivu, muéne ua dilondekesa phala ku bhanga o vondadi ia Jihova, mu ku di batizala. Jihova ua mu londekesa kioso kiambe, muenhú “Mon’ami a kazola” ka mu undu ni máji, maji ua mu undu ni nzumbi ikôla. (Mat. 3:13-17; Ika. 10:38) O muthu iú a mu undu, a mu solo phala ku kala Mukunji ua Dikota, bhu pholo ia athu oso a mu xikina, ia miji ioso, ni kuila ku hádia muéne ua-nda kala Sobha. (Jihe. 1:8, 9; 5:5, 6) Muéne ueji bhanga o kikutu kiobhe kia akunji.
12. Ihi ia bheka o sata ia Jezú?
12 Mukonda dia ku kala Mukunji ua Dikota, sata iahi ieji bhana phala ku futa o kituxi kia lundula ió a mu xikina? Kála kia kilondekesa kioso kia bhange o fesa ia Lembalasa ia kufuá kuê, o muenhu uê a u bhana mu sata. (Tanga Jihebeleu 9:11, 12.) Kioso kia mu batizala ku muvu ua 29 K.K., Jezú, o Mukunji ua Dikota, ua bhiti mu jipolova javulu katé kiafu. (Jihe. 4:15; 5:7-10) Kioso kia mu fukununa muéne ua bande ku diulu, iu ua londekesa o valolo ia sata iê kua Jihova. (Jihe. 9:24) Kienhiki, Jezú u tena ku bhingila o ituxi ia athu kua Jihova bhu kaxi ka sata iê, ni ku a kuatekesa ku sidivila Nzambi, phala ku kala ni muenhu ua kalelaku. (Jihe. 7:25) O sata iê i sidivila ué phala kulondekesa o kikutu kiobhe kia bhange.—Jihe. 8:6; 9:15.
13. Ihi ieji bhanga ió a tokalele mu kikutu kiobhe?
13 Ió a a solo phala ku bhanga mbandu ku kikutu kiobhe, a a undu ué ni nzumbi ikôla. (2 Kol. 1:21) O Jijudé ja fiiele, ni akua Matumbu a a undu uâ. (Efe. 3:5, 6) Ihi ieji bhanga ió a tokalele ku kikutu kiobhe? Ene a eji ku a loloka o ituxi iâ. Jihova ua a kanene: “Mukonda nga-nda kuloloka o ikuma iâ, o ituxi iâ ki nga kà i xinganeka dingi.” (Jel. 31:34) Mukonda dia ku a loloka o ituxi iâ, ene eji tena ku kala ‘akunji a utuminu.’ Ia lungu ni Jikidistá a a undu, Phetele ua soneka: “Enu-phe mu ‘muiji uosole, mu akunji a sobha, kifuxi kia zele, mu mundu uangene ua Nzambi muene. A mi tungula phala muende ni ku jimbulula o imbamba ia madiuanu iene mu bhanga Nzambi,’ ió ua mi katula muavundu iú ua mi bheka mu mukengeji uê u diuanesa.” (1 Phe. 2:9) Bhabha Phetele ua tumbula o izuelu ia Jihova kioso kia bhanene o Kitumu ku akua Izalaiele, iu ua ki kumbidila ku Jikidistá ja kikutu kiobhe.—Mak. 19:5, 6.
O AKUNJI A-NDA BHEKA MABESÁ KU MUNDU UOSO
14. Kuebhi kua-nda kalakala o akunji?
14 Kuebhi kua kalakala ió a bhanga mbandu mu kikutu kiobhe? A mu kalakala mu ixi, kála kibuka kimoxi, a kalakala kála akunji, mu ku ‘jimbulula o imbamba ia madiuanu iene mu bhanga Nzambi,’ ni ku bhana kúdia mu nzumbi mu kithangana kia tokala ku mundu ua Jihova. (Mat. 24:45; 1 Phe. 2:4, 5) Kioso kia fuá, ene a a fukununa, phala ku kalakala ni Kristu ku diulu, kála jisobha ni akunji, ni ku kumbidila o kikalakalu kia a bhana. (Luk. 22:29; 1 Phe. 1:3-5; Dij. 1:6) Phala kulondekesa o kidi kiki, o poxolo Nzuá ua mono mu kisuma kiê, muxinda ua athu mu nzumbi a zukama bhu kiandu kia Jihova ku diulu. Anga emba “muimbu uobhe,” bhu pholo ‘ia Mbudi,’ exi: “Mu kùfua kué Nzambi ua mu sumbila athu ku muiji ioso, ni ku madimi moso, ni ku madiembu moso, ni mu ifuxi ioso. Eie ua bhake ku usobha ni unganga ua Nzambi ietu, ene hinu à kala mù tumina mu ngongo.” (Dij. 5:8-10) Mu kisuma kia mukuá, Nzuá ua tumbula o jisobha jiji, kuila: “A [ka kala akunji a] Nzambi ni ja Kristu, a kala nê ku ungana midi ia mivu.” (Dij. 5:8-10) Kumoxi ni Kristu, ene a ka kala akunji phala ku kuatekesa athu oso ku mundu.
15, 16. Mbote iahi ia-nda bheka o akunji ku athu oso ku mundu?
15 Mbote iahi ia-nda bheka o 144.000 ku athu ala mu ixi? O divulu dia Dijingunuinu mu kibatulu 21, dizuela kuila ene, ‘mbanza ia diulu’ o Jeluzaleme iobhe a ixana, “Muhatu’a Kambudi.” (Dij. 21:9) O velusu 2 ndu 4 iamba: “Ngi mona o [mbanza ia diulu], Jeluzaleme iòbhe, iala mu tuluka ku diulu. Ia mu tunda kua Nzambi, ia di iudika kiambote, ia kembe [kála] dibhanga dia kembela kuia mu kutakanesa ni muadi uê. Anga ng’ívua dízui dia suina dia mu tunda bhu kiandu, dixi: ‘Talesa! Kindala o balaka ia Nzambi iala mu’axaxi ka athu! Nzambi muéne uenda jinga-nâ, u kala Nzambi iâ. Muéne u a kondona o masoxi moso ku mesu mâ! Ki ku kala dingi kufuá, né ngó mukôndo, mba kudila, mba kukata. Mukonda ima ia diangele-ku, ia bhiti.’” Mabesá a dikota! O ku bhuisa o kalunga, kua-nda zubha o masoxi moso, ni mukôndo. Kiki kilondekesa kuila athu oso a ka kala athu a iuka, ni ku kala ni ukamba ni Nzambi.
16 Mu kuzuela dingi o mabesá a bheka o akunji enhá ku athu, o divulu dia Dijingunuinu 22:1, 2, dizuela: “Anju anga u [ng’idikisa] ue o ngiji ia menha ma muenhu, mazele kala kidistalo, i fuafua bhu kiandu kia Nzambi ni kia Kambudi, Ia-lu kunguluka mu kaxi ka [Jeluzame iobhe]. Ku sàmbua ni sàmbua dia ngiji, ku kala ni mixi ia muenhu, iene mu kuima kuinhi dia ídifua ni kiiadi kia ibundu ku muvu, i bhana ibundu iê mbeji joso. O mafe mê ma uabhela o ku saka akua jixi.” Mu kaxi ka ima íii, “akua jixi,” mba athu oso ku mundu, a-nda ku a loloka o ituxi ia lundula kua Adá. Kidi muene, ‘o ima ia iibha ia lelu, ia-nda kala ima ia bhiti kiá.’
O AKUNJI A ZUBHA O KIKALAKALU KIÂ
17. Ihi ia-nda bhanga o akunji ku disukilu dia 1.000 ia mivu?
17 Ku disukilu dia 1.000 ia mivu ia kikalakalu, o akunji a-nda zubha o ituxi ioso ia lundula o athu. Mukonda dia ku kala Mukunji ua Dikota, Sobha, Kristu ua-nda bhana athu oso a iuka kua Jihova. (Tanga 1 Kolindo 15:22-26.) O akunji, a-nda zubha kiá o kikalakalu kiâ.
18. Kioso o akunji kia-nda zubha o kikalakalu kiâ, ihi ia-nda bhanga Jihova ni akunji a kalakala ni Kristu?
18 Maji-phe, ihi ia-nda bhanga Jihova ni akunji a kalakala ni Kristu? Kála ki tanga o divulu dia Dijingunuinu 22:5, “[ene a ka] kala ku ungana mu mivu ni mivu sè dizubhilu.” Phala ku tumina a nanhi? O Bibidia ki i tange. Maji o ukexilu ua muenhu uâ, ni uhete ua ku kuatekesa athu oso akua ituxi, ene a-nda kolokota ku bhanga o vondadi ia Jihova ku hádia ni hádia.
19. Ihi ia-nda lembalala ió a-nda kala mu kizuua kia Lembalasa ia kufuá kua Jezú?
19 Kioso ki tua-nda diongeka ku Lembalasa ia kufuá kua Jezú, kia Kinda, mu kizuua kia 5 kia mbeji ia Kasamanu, ku muvu iú ua 2012, o milongi íii ia Bibidia tua-nda i lembalala hanji. O kibuka kiofele kia Jikidistá a a undu ala hanji mu ixi, a-nda dia o mbolo sé felemendu, ni kúnua o vinhu phala kulondekesa kuila ene a bhanga mbandu ku kikutu kiobhe. O ijimbuete íii ia sata ia Kristu, ia-nda ku a lembalesa o ujitu ua dikota ua tambula, ni kikalakalu kiala nakiu mu kikanenu kia Nzambi. Kienhiki, etu enioso tu sakidila o ima ia bhange Jihova Nzambi, ia ku tu bhana akunji phala ku kuatekesa athu oso ku mundu.
U TENA KU JIMBULULA?
․․․․․
Kiebhi Jihova kia dianga ku kanena akunji a sobha?
․․․․․
Kiebhi o kikutu kiobhe kia bheka o akunji a sobha?
․․․․․
Mabesá ahi a-nda bheka o akunji a sobha ku athu oso ku mundu?
[Ibhuidisu ia ku dilonga]
[Foto ku mbandu 31]
O akunji a sobha a-nda bheka mabesá ku athu oso ku mundu
