Buprisita Bwa Silena Bo Bu Ka Tusa Batu Kamukana
Buprisita Bwa Silena Bo Bu Ka Tusa Batu Kamukana
“Mu ‘lusika lo lu ketilwe, mu buprisita bwa silena, mu sicaba se si kenile, mu buswa bwa hae bo bu ipitezi.’”—1 PIT. 2:9.
KANA MWA KONA KU TALUSA?
Jehova naa kalile lili ku sepisa za buprisita bwa silena?
Tumelelano ye nca i tahisa cwañi buprisita bwa silena?
Buprisita bwa silena bu ka tusa cwañi batu?
1. Ki kabakalañi “mulalelo wa Mulena” ha u bizwa hape kuli Kupuzo, mi ki ufi mulelo wa ona?
KA Nisani 14 manzibwana mwa silimo sa 33 C.E., Jesu Kreste ni baapositola ba hae ba 12 ne ba ezize mukiti wa Sijuda wa Paseka lwa mafelelezo. Jesu ha sa lunduzi Judasi Isikariota ya naa tuha a mu beteka, a kalisa mukiti u sili, o ne u tilo bizwa “mulalelo wa Mulena.” (1 Makor. 11:20) Jesu naa bulezi habeli kuli: “Mu ezange cwalo kuli mu ni hupule.” Mukiti wo hape u bizwa Kupuzo. Ka nako ye ipitezi yeo, lu hupulanga za naa ezize Kreste, sihulu ku lu shwela. (1 Makor. 11:24, 25) Lipaki za Jehova mwa lifasi kaufela ba mamelanga taelo yeo ka ku eza Kupuzo silimo ni silimo. Mwa silimo sa 2012, Nisani 14 i ka kalisa la Bune manzibwana, ka la 5 April, ka ku ya ka kalenda ya Sijuda.
2. Jesu naa buleziñi ka za sinkwa ni veine?
2 Mulutiwa Luka u lu bulelela za naa ezize Jesu ni za naa bulezi ka nako yeo, u li: “A nga sinkwa, a fitisa buitumelo, a si komauna, mi a ba fa sona, a li: ‘Sinkwa se, si yemela mubili wa ka, o na ni ku fiwa bakeñisa mina. Mu ezange cwalo kuli mu ni hupule.’ Hape a eza nto ye swana kwa komoki ha se ba cile mulalelo, a li: ‘Komoki ye, i yemela tumelelano ye nca ye ezwa ka mali a ka, aa na ni ku sululelwa mina.’” (Luka 22:19, 20) Baapositola ne ba utwisisize cwañi manzwi ao?
3. Baapositola ne ba utwisisize cwañi manzwi a Jesu ka za sinkwa ni veine?
3 Baapositola ne ba ziba hande za matabelo a lifolofolo a ne ba ezezanga Mulimu baprisita kwa tempele mwa Jerusalema. Matabelo ao naa eziwanga kuli batu ba lumelelwe ki Jehova, mi a mañata ku ona naa eziwanga kuli ba swalelwe libi. (Liv. 1:4; 22:17-29) Kamukwaocwalo, baapositola ne ba utwisisize kuli Jesu ha naa ize mubili wa hae ne u ka ‘fiwa bakeñisa bona,’ ni kuli mali a hae naa ka ‘sululelwa bona,’ naa talusa kuli naa ka fa bupilo bwa hae bo bu petehile sina sitabelo. Sitabelo seo ne si ka ba sa butokwa hahulu ku fita matabelo a lifolofolo.
4. Jesu naa talusañi ha naa ize: “Komoki ye, i yemela tumelelano ye nca ye ezwa ka mali a ka”?
4 Jesu naa talusañi ha naa ize: “Komoki ye, i yemela tumelelano ye nca ye ezwa ka mali a ka”? Baapositola ne ba ziba bupolofita bwa Jeremia bo ne bu bulela za bulikani bo bunca, kamba tumelelano ye nca. (Mu bale Jeremia 31:31-33.) Manzwi a Jesu naa bonisa kuli naa kalisa tumelelano ye nca ye ne ka yola tumelelano ya Mulao ya naa ezize Jehova ni Isilaele ka Mushe. Kana litumelelano ze peli zeo ne li swalisana?
5. Tumelelano ya Mulao ne i file Maisilaele sepo mañi?
5 Milelo ya litumelelano zeo ne i swalisana hahulu. Jehova ha naa eza tumelelano ya Mulao ni Maisilaele, naa ba bulelezi kuli: “Haiba mu ka utwa Linzwi la ka luli, mwa mamela bulikani bwa ka, mu ka ba buswa bwa ka tota mwahalaa macaba a mañwi kaufela, kakuli lifasi kaufela ki la ka. Ku Na, mu ka ba mubuso wa baprisita, ni sicaba se si kenile.” (Ex. 19:5, 6) Maisilaele ne ba utwisisize cwañi manzwi ao?
BUPRISITA BWA SILENA BWA SEPISWA
6. Jehova naa ezize tumelelano ya Mulao kuli a taleleze sepiso ifi?
6 Maisilaele ne ba utwisisize linzwi la “bulikani,” kamba tumelelano, kakuli Jehova a kile a eza litumelelano ni Nuwe ni Abrahama. (Gen. 6:18; 9:8-17; 15:18; 17:1-9) Jehova ha naa ezize tumelelano ni Abrahama, naa sepisize kuli: “Macaba kamukana a lifasi a ka fiwa mbuyoti ka lusika lwa hao.” (Gen. 22:18) Jehova naa ezize tumelelano ya Mulao kuli a taleleze sepiso yeo. Kabakala tumelelano yeo, Isilaele naa kona ku ba “buswa bwa [Jehova] tota mwahalaa macaba a mañwi kaufela.” Isilaele naa ka ba buswa bwa Jehova ka mulelo ufi? Ka mulelo wa kuli a be “mubuso wa baprisita” ku Jehova.
7. Mañolo naa talusañi ha naa bulezi ka za “mubuso wa baprisita”?
7 Maisilaele ne ba banga ni malena ni baprisita, kono ne li feela Melekisedeke ya naa lumelelizwe ki Jehova ku ba mulena ni muprisita ka nako ye swana. (Gen. 14:18) Jehova naa file sicaba sa Isilaele kolo ya ku ba “mubuso wa baprisita.” Mañolo hasamulaho naa bonisize kuli sicaba seo ne si ka ba ni kolo ya ku tahisa batu ba ne ba ka ba malena ni baprisita ka nako ye swana.—1 Pit. 2:9.
8. Musebezi wa baprisita ba ba ketilwe ki Mulimu ki ufi?
8 Musebezi wa mulena ki ku busa. Kono musebezi wa muprisita ki ufi? Liñolo la Maheberu 5:1 li li: “Muprisita ya pahami kaufela ya ngiwa mwahalaa batu u ketelwa ku tusa batu mwa sebelezo ya Mulimu, kuli a kone ku fa limpo ni matabelo bakeñisa libi.” Muprisita ya ketilwe ki Jehova u yemelanga batu ku Mulimu. U kupanga Jehova kuli a swalele libi za batu ka ku ezeza Mulimu matabelo. Hape muprisita u yemelanga Jehova ka ku luta batu mulao wa Mulimu. (Liv. 10:8-11; Mala. 2:7) Kamukwaocwalo, muprisita u tusanga baezalibi ku kutela ku Mulimu.
9. (a) Maisilaele ne ba tokwa ku ezañi kuli ba kone ku ba “mubuso wa baprisita”? (b) Ki kabakalañi Jehova ha naa ketile baprisita mwahalaa Isilaele? (c) Ki kabakalañi Maisilaele ha ne ba palezwi ku ba “mubuso wa baprisita” mwatasaa tumelelano ya Mulao?
9 Tumelelano ya Mulao ne i file Maisilaele kolo ya kuli ba be malena ni baprisita ba ne ba ka tusa “macaba a mañwi kaufela.” Kono ku na ni nto ye ne ba swanela ku eza Maisilaele kuli ba be ni tohonolo yeo. Mulimu naa ize: “Haiba mu ka utwa Linzwi la ka luli, mwa mamela bulikani bwa ka.” Kana Maisilaele ne ba kona luli ku “utwa” Jehova? Eni, kono ne ba sa koni ku mu utwa ba sa fosi. (Maro. 3:19, 20) Ki lona libaka Jehova ha naa ketile baprisita mwahalaa Isilaele. Baprisita bao ne ba si malena. Ne ba ezanga matabelo a lifolofolo kuli libi za batu li swalelwe. (Liv. 4:1–6:7) Libi zeo ne li kopanyeleza ni libi za baprisita. (Maheb. 5:1-3; 8:3) Jehova naa amuhezi matabelo ao, kono matabelo ao naa sa koni ku felisa libi za Maisilaele ka ku tala. Nihaiba Maisilaele ba ba sepahala ne ba sa koni ku tusiwa ka ku tala ki baprisita ba ne ba li mwatasaa Mulao kuli ba kutele ku Mulimu. Ki zona za naa talusa muapositola Paulusi ha naa ize: “Ha ku konahali kuli mali a lipoho ni a lipuli a zwise libi.” (Maheb. 10:1-4) Bakeñisa kuli Maisilaele ne ba lobile Mulao, ne ba kutilwe. (Magal. 3:10) Kabakaleo, ne ba sa koni ku ba buprisita bwa silena bwa macaba a mañwi kaufela.
10. Mulelo wa tumelelano ya Mulao ne li ufi?
10 Taba yeo ha i talusi kuli Maisilaele ne ba sa koni ku ba “mubuso wa baprisita” sina mwa naa sepiselize Jehova. Kambe ne ba ikatalize ku utwa Jehova, ne ba ka ba ni tohonolo yeo, kono isi ka nako ye ne ba li mwatasaa Mulao. Ki kabakalañi? (Mu bale Magalata 3:19-25.) Mulao ne u tusize Maisilaele ba ne ba ikataza ku u mamela kuli ba bukeleze bulapeli bwa niti. Ne u ba tusize ku utwisisa kuli ne li baezalibi ni kuli ne ba tokwa sitabelo se situna se si fita matabelo a ne ba ezanga baprisita ba bona. Mulao ne u li “muuti” ya naa ka ba isa ku Kreste, kamba Mesia, ili manzwi a talusa “Ya Tozizwe.” Kono Mesia ha naa ka taha, naa ka kalisa tumelelano ye nca ye ne polofitilwe ki Jeremia. Batu ba ne ba amuhezi Kreste ne ba bile mwa tumelelano yeo mi ne ba ka ba “mubuso wa baprisita.” Ha lu boneñi mo ne i konahalezi taba yeo.
TUMELELANO YE NCA I TAHISA BUPRISITA BWA SILENA
11. Jesu naa bile cwañi mutomo wa buprisita bwa silena?
11 Ka 29 C.E., Jesu wa kwa Nazareta a ba Mesia. Naa na ni lilimo za buhulu ze bato eza 30 ha naa kolobezwa. Kolobezo ya hae ne i bonisa kuli naa lata ku eza za naa tokwa Jehova ku yena. Jehova naa bulezi ka za hae kuli: “Yo ki Mwanaka, ya latwa.” Mi Jehova naa mu tozize ka moya o kenile, isiñi ka oli. (Mat. 3:13-17; Lik. 10:38) Mulimu naa tozize Jesu kuli a be Muprisita ya Pahami ni Mulena wa kwapili ya naa ka tusa mañi ni mañi ya lumela ku yena. (Maheb. 1:8, 9; 5:5, 6) Ki yena ya naa ka ba mutomo wa buprisita bwa silena.
12. Sitabelo sa Jesu ne si konahalisizeñi?
12 Jesu ka ku ba Muprisita ya Pahami naa ka fa sitabelo se si cwañi kuli a kwahele sibi se ne ba yambuzi batu ba ba lumela? Za naa bulezi ha naa kalisize Kupuzo ya lifu la hae li lu tusa ku utwisisa kuli sitabelo sa naa ka fa ne li bupilo bwa hae bo bu petehile. (Mu bale Maheberu 9:11, 12.) Jesu ha sa tozizwe ka 29 C.E kuli a be Muprisita ya Pahami, naa lumezi ku likiwa ni ku lutiwa ku fitela lifu la hae. (Maheb. 4:15; 5:7-10) Ha sa zusizwe kwa bafu, naa kutezi kwa lihalimu kuli a yo fa Jehova tifo ya sitabelo sa hae. (Maheb. 9:24) Hamulaho, Jesu naa kona ku kupa Jehova kuli batu ba ba bonisa tumelo mwa sitabelo sa hae ba swalelwe libi, ni ku ba tusa ku sebeleza Mulimu kuli kwapili ba kone ku to fumana bupilo bo bu sa feli. (Maheb. 7:25) Hape sitabelo sa hae ne si tisize kuli tumelelano ye nca i sebeze.—Maheb. 8:6; 9:15.
13. Ki lika mañi ze ne ka ezahala ku ba ne ba ka ba mwa tumelelano ye nca?
13 Ba ba li mwa tumelelano ye nca ni bona ne ba ka toziwa ka moya o kenile. (2 Makor. 1:21) Majuda ba ba sepahala ne ba ka ba mwa tumelelano yeo mi hamulaho ni bamacaba ne ba ka kena mwateñi. (Maef. 3:5, 6) Ki lika mañi ze ne ka ezahala ku ba ne ba ka ba mwa tumelelano ye nca? Libi za bona ne li ka swalelwa ka ku tala. Jehova naa sepisize kuli: “Ni ka swalela bumaswe bwa bona, mi ha ni sa na ku hupula sibi sa bona.” (Jer. 31:34) Bakeñisa kuli Jehova naa ka swalela libi za bona, ne ba ka ba “mubuso wa baprisita.” Pitrosi naa bulelezi Bakreste ba ba tozizwe kuli: “Mu ‘lusika lo lu ketilwe, mu buprisita bwa silena, mu sicaba se si kenile, mu buswa bwa hae bo bu ipitezi, kuli mu shaele litaba ze nde kai ni kai’ za yena ya naa mi bizize ku zwa mwa lififi ni ku kena mwa liseli la hae le linde.” (1 Pit. 2:9) Pitrosi naa kutezi ku bulela manzwi a naa itusisize Jehova ha naa fa Maisilaele Mulao, mi ka nako yeo Pitrosi naa itusisa ona kwa Bakreste ba ne ba li mwa tumelelano ye nca.—Ex. 19:5, 6.
BUPRISITA BWA SILENA BU TUSA BATU KAMUKANA
14. Buprisita bwa silena ne bu ka sebeleza kai?
14 Batu ba ba li mwa tumelelano ye nca ne ba ka sebeleza kai? Ne ba ka sebeleza fa lifasi sina sikwata sa baprisita se si yemela Jehova ka ku ‘shaela litaba ze nde kai ni kai’ ni ku lukisa lico za kwa moya. (Mat. 24:45; 1 Pit. 2:4, 5) Ha se ba shwile ni ku zusiwa kwa bafu, ne ba ka yo eza musebezi wa silena ni wa buprisita hamoho ni Kreste mwa lihalimu. (Luka 22:29; 1 Pit. 1:3-5; Sin. 1:6) Mwa pono, muapositola Joani naa boni libupiwa za moya ze ñata ze ne li bukaufi ni lubona lwa Jehova mwa lihalimu. Libupiwa zeo li opelela “Ngunyana” “pina ye nca,” li li: “Ka mali a hao ne u lekezi Mulimu batu ba ba zwa mwa mishobo kaufela ni malimi ni batu ni sicaba, mi u ba ezize ku ba mubuso ni baprisita ku Mulimu wa luna, mi ba ka busa sina malena fahalimwaa lifasi.” (Sin. 5:8-10) Mwa pono ye ñwi, Joani u bulela cwana ka za malena bao, u li: “Ba ka ba baprisita ba Mulimu ni ba Kreste, mi ba ka busa sina malena hamoho ni yena ka lilimo ze 1,000.” (Sin. 20:6) Bona hamohocwalo ni Kreste ki bona buprisita bwa silena bo bu ka tusa batu kaufela.
15, 16. Buprisita bwa silena bu ka tisa limbuyoti ze cwañi kwa batu?
15 Ba 144,000 ba ka tusa cwañi batu ba ba li fa lifasi? Liñolo la Sinulo kauhanyo ya 21 li talusa baprisita bao kuli ki muleneñi wa kwa lihalimu, Jerusalema yo Munca, ya bizwa “musalaa Ngunyana.” (Sin. 21:9) Litimana za 2 ku isa 4 li li: “Na bona muleneñi o munca, Jerusalema yo Munca, a shetumuka ku zwa kwa lihalimu ku Mulimu mi u itukisize sina munyaliwa ya ikabiselize muunaa hae. Kiha ni utwa linzwi le lituna le li zwa kwa lubona, li li: ‘Bona! Tende ya Mulimu i inzi ni batu, mi u ka yaha ni bona, mi ba ka ba batu ba hae. Mi Mulimu yena ka sibili u ka ba ni bona. Mi u ka takula miyoko kaufela kwa meeto a bona, mi lifu ha li sa na ku ba teñi, nihaiba ku tahelwa ki maswabi kamba ku lila kamba ku utwa butuku. Za pili li felile.’” Zeo li ka ba limbuyoti ze nde hahulu! Ha ku na ku ba ni miyoko, maswabi, butuku, kamba sililo kakuli lifu ha li sa na ku ba teñi. Ka nako yeo batu ba ka petahala mi ba ka kutisezwa ku Mulimu ka ku tala.
16 Liñolo la Sinulo 22:1, 2 li lu bulelela ze ñata ka za limbuyoti ze ka tiswa ki buprisita bwa silena bo. Li li: “La ni bonisa nuka ya mezi a bupilo, ye li twaa sina kristale, ye buba ku zwa kwa lubona lwa Mulimu ni ku lwa Ngunyana ni ku pazula fahalaa likululu la [Jerusalema yo Munca]. Mi mwa buse bo buñwi ni bo buñwi bwa nuka ne ku na ni likota za bupilo ze beya miselo ha 12, li nze li buzwisa miselo ya zona kweli ni kweli. Mi matali a likota zeo ne li a ku folisa macaba.” Pono ye, i lu bonisa ka mo “macaba,” kamba mabasi kaufela fa lifasi, a ka foliselezwa kwa muinelo wa ku sa petahala o ba yambuzi ku Adama. Kaniti, ‘za pili li ka be li felile.’
BUPRISITA BWA SILENA BU FELELEZA MUSEBEZI WA BONA
17. Buprisita bwa silena bu ka be bu petileñi kwa mafelelezo a lilimo ze 1,000?
17 Kwa mafelelezo a lilimo ze 1,000, buprisita bwa silena bu ka be bu tusize batu kuli ba be ba ba petehile. Hamulaho, Jesu Kreste, yena Muprisita ya Pahami ni Mulena, u ka kutiseza batu ba ba petehile ku Jehova. (Mu bale 1 Makorinte 15:22-26.) Buprisita bwa silena bu ka be bu petile musebezi wa bona.
18. Jehova u ka itusisa cwañi baprisita ba ba li malena ha se ba petile musebezi wa bona?
18 Hasamulaho, Jehova u ka itusisa cwañi baprisita bao ba ba li malena? Liñolo la Sinulo 22:5 li li: “Ba ka busa sina malena kamita ni mita.” (Sin. 22:5) Ba ka busa bo mañi? Bibeli ha i buleli. Kono ba ka zwelapili ku ba ba butokwa ku Jehova. Ba ka ba ni bupilo bo bu sa shwi ni bo bu sa boli mi ba ka ba ni zibo ya mo ne ba tuselize batu ba ba si ka petahala. Kamukwaocwalo, ba ka zwelapili ku ba malena mi ba ka itusiswa ki Jehova ku peta mulelo wa hae ku ya ku ile.
19. Ba ba ka fumaneha kwa Kupuzo ba ka hupuliswa lika mañi?
19 Lu ka hupuliswa lituto zeo za mwa Bibele ha lu ka kopana ka nako ya Kupuzo ya lifu la Jesu ye ka eziwa la Bune, la 5 April, 2012. Bakreste ba ba tozizwe ba ba sa li teñi fa lifasi ba ka bonisa kuli ba mwa tumelelano ye nca ka ku ca sinkwa se si si na mumela ni ku nwa veine ye fubelu. Sinkwa ni veine zeo li ka ba hupulisa matohonolo a mande ni buikalabelo bo ba na ni bona mwa mulelo wa Mulimu wa ku ya ku ile. Kaufelaa luna ba ba ka fumaneha kwa Kupuzo lu swanela ku bonisa buitumelo bwa luna bo butuna kabakala buprisita bwa silena bwa ketile Jehova Mulimu kuli bu tuse batu kaufela.
[Lipuzo za Tuto]
[Siswaniso se si fa likepe 29]
Buprisita bwa silena bu ka tusa batu ku ya ku ile