Mi Zawng Zawng Hlâwkpui Tûr Lal Puithiamho
Mi Zawng Zawng Hlâwkpui Tûr Lal Puithiamho
“Nangni zawng chi thlan, lal puithiamho, hnam thianghlim, Pathian mite ngei in ni si a.” —1 PET. 2:9.
KAN HRILHFIAH THEI EM?
Engtikah nge Jehova’n Lal puithiamho a din tûr thu a tiam ṭan?
Engtin nge thuthlung thar chuan lal puithiamho a hrin chhuah?
Lal puithiamho chuan mihringte tân eng hlâwknate nge an thlen dâwn?
1. Engvângin nge “Lalpa zanriah” chu Hriatrengna tiha koh a nih bawk a, chu chuan eng nge a tum?
ISUA Krista leh a tirhkoh 12-te chuan C.E. 33, Nisan ni 14 tlai chuan a tâwp ber atân Kalhlên Kût an hmangho va. Phatsantu Juda Iskariot-a a chhuahtîr hnuah, Isua chuan “Lalpa zanriah” tia kan hriat hi a hmanpui ta a ni. (1 Kor. 11:20) Isua chuan: “Mi hriat reng nân hei hi ti ṭhîn rawh u,” tiin vawi hnih ngawt a sawi a. He thilthleng hi Hriatrengna tia hriat a ni bawk a; chu chu a thihna nêna inkûngkaiha Krista hriatrengna hi a ni. (1 Kor. 11:24, 25) Chu thupêk chu zâwmin khawvêl puma Jehova Thuhretute chuan kum tin Hriatrengna hun chu an hmang ṭhîn a ni. Kum 2012-ah chuan Bible calender-a Nisan ni 14 chu April 5, Nilaithawhṭanni, ni tlâk rualin a inṭan a ni.
2. Isua’n Hriatrengna entîrnate chungchângah eng nge a sawi?
2 Chu mi ṭuma Isua thiltih leh sawite chu zirtîr Luka chuan heti hian a khaikhâwm a ni: “Chhang a la a, lâwmthu a sawi zawhin a phel a, an hnênah a pe a, ‘Hei hi ka taksa, in aia pêk tûra chu a ni; mi hriat reng nân hei hi ti ṭhîn rawh u,’ a ti a. Tin, zanriah ei zawhin chutiang bawkin no chu a la a, ‘He no hi ka thisena thuthlung thar chu a ni, in aia chhuak tûra chu,’” tiin. (Lk. 22:19, 20) Tirhkohte’n chûng thu chu engtin nge an hriat thiam ang?
3. Engtin nge tirhkohte chuan Hriatrengna entîrnate awmzia chu an hriatthiam?
3 Juda mi an nih angin, tirhkohte chuan Jerusalem biak ina puithiamte’n rana inthawina an hlan ṭhin thu chu an hre chiang hle a. Chûng thil hlante chu Jehova duhsak hlawh nâna tih a ni a, tam tak chu sual thawina atâna hlan a ni. (Lev. 1:4; 22:17-29) Chuvângin, Isua’n a taksa leh thisen ‘an aia a pêk tur’ thu a sawi khân a taksa ṭha famkim chu inthawi nân a hlân dâwn a tihna a ni tih tirhkohte chuan an hre thiam a. Chu chu rana inthawina aiin a hlu zâwk daih ang.
4. Isua’n, “He no hi ka thisena thuthlung thar chu a ni,” a tih khân eng a tihna nge?
4 Isua’n, “He no hi ka thisena thuthlung thar chu a ni,” a tih hi eng tihna nge ni ve thung? Tirhkohte chuan thuthlung thar chungchâng hrilh lâwkna Jeremia 31:31-33-a chhinchhiah chu an hria a. (Chhiar rawh.) Chu thuthlung thar—Mosia kal tlanga Israelte nêna Pathianin a lo thlun Dân thuthlung thlâkna tûr—chu a hmêlhriattîr ta tih Isua thusawi chuan a târ lang a ni. Chûng thuthlung pahnihte chuan inkûngkaihna an nei em?
5. Dân thupêk chuan Israelte tân eng beiseina nge a pêk?
5 Chûng thuthlung pahnihte thiltum chu a inhnaih hle a. Dân thuthlung a pêk lai khân, Jehova chuan Israelte hnênah heti hian a hrilh a ni: “Ka thu in ngaihthlâk tak zet a, ka thuthlung hi in pawm chuan khawvêl hnam zawng zawng zîngah hian ka tân ro thlan bîk in ni ang: khawvêl pum pui hi ka ta a ni si a: tichuan ka tân puithiam chi, hnam thianghlim in ni ang,” tiin. (Ex. 19:5, 6) Chûng thute chu Israelte’n engtin nge an hriatthiam?
LAL PUITHIAMHO PEK TIAMNA
6. Eng thutiam tihhlawhtlin nân nge Dân thuthlung chu siam a nih?
6 Israel mite chuan “thuthlung” tih thu mal chu an hre thiam a ni; an thlahtu Nova leh Abrahama chu Jehova’n intiamna urhsûn tak a lo neihpui tawh avângin. (Gen. 6:18; 9:8-17; 15:18; 17:1-9) Abrahama hnêna thu a thlunnaah, Jehova chuan: “I thlahah chuan khawvêla chi tin an la thawveng ang,” tih a tiam a ni. (Gen. 22:18) Chu thutiam tihhlawhtlin nân Dân thuthlung siam a ni a. Chu mi ṭanchhan chuan, Israelte chu ‘khawvêl hnam zawng zawng zîngah Jehova tân ro thlan bîk’ an ni thei a ni. Eng atân maw? ‘Jehova tâna puithiam chi’ ni tûrin.
7. “Puithiam chi” tih ṭawngkam hi eng tihna nge?
7 Israelte tân lal leh puithiam neih chu thil thar a ni lo; mahse, Melkisedeka chauh chu hun kal tawha Jehova pawmpui lal leh puithiam ni kawp awmchhun a ni a. (Gen. 14:18) Tûnah chuan Jehova’n Israel hnam chu “puithiam chi” hrin chhuah theihna hun remchâng a pe ta a ni. A hnua thlarauva thâwk khum thuziakte’n a târ lan angin, chu chu lal puithiamho nih theihna—lal leh puithiam nih kawp theihna—hun remchâng angin a sawi a ni.—1 Pet. 2:9.
8. Pathian ruat puithiamte chuan eng hna nge an thawh?
8 Lal chuan ro a rêl ṭhîn a. Puithiam chuan eng nge a thawh ve thung? Hebrai 5:1 chuan heti hian a hrilhfiah a ni: “Puithiam Lalber apiang, sualte avânga thilpêk leh inthawinate an hlan kawp theihna tûra mihring zînga mi lâk hrana lo awmin, Pathian lam thilahte chuan mihringte tân ruat an ni si ṭhîn,” tiin. Chuvângin, Jehova thlan puithiam chuan a ṭûl ang thilte hlanna hmangin, Pathian hmaah sual neite ai a awh a, an tân a ngensak ṭhîn. Chutih rualin, mipuite hnêna Pathian Jehova dân zirtîrin, an hmaah Pathian ai a awh bawk. (Lev. 10:8-11; Mal. 2:7) Hetiang kawng hian Pathian ruat puithiam chuan mite chu Pathian nêna inrem leh tûrin a ṭanpui a ni.
9. (a) Israelte’n “puithiam chi” an hrin chhuah theihna tûr chu eng thilah nge a innghah? (b) Engvângin nge Jehova’n Israel mite zînga ṭhenkhat puithiama a siam? (c) Engin nge Israel mite chu Dân thuthlung hnuaia “puithiam chi” hring chhuak thei lova awmtîr?
9 Chutiang chuan Dân thuthlung chuan Israelte chu “khawvêl hnam zawng zawng” hlâwkpui tûr lal puithiamho hrin chhuah theihna hun remchâng a pe a ni. Mahse, chu beiseina ropui tak chu thil pakhatah a innghat a ni: “Ka thu in ngaihthlâk tak zet a, ka thuthlung hi in pawm chuan,” tihah hian. Israelte chuan ‘Jehova thu chu an ngaithla tak zet’ thei em? Engemaw chen chu thei e. Sawisêl bovin an zâwm thei em? Thei lo. (Rom 3:19, 20) Chuvâng chuan a ni, lal puithiamho an hrin chhuah hmain Jehova’n Israel mite zînga ṭhenkhat chu puithiama a siam ni. Hêng puithiamte hi lal an ni lo va, mite sual thawi nân ran an hlân zâwk ṭhîn a ni. (Lev. 4:1–6:7) An sual thawiah hian puithiamte sualna ngei pawh a tel a. (Heb. 5:1-3; 8:3) Jehova chuan chûng inthawinate chu pawm mah se, a hlântute sualna chu a tibo ṭhak thei lo va. Dân thuthlung hnuaia puithiamho rawngbâwlna chuan Israel mi ṭha takte pawh Pathian nên a inrem pumhlûmtîr thei hek lo. Tirhkoh Paula sawi angin: “Bâwngpate leh kêlte thisen chuan sualte tibo thei rual a ni si lo.” (Heb. 10:1-4) Dân an bawhchhiat avângin Israelte chuan ânchhia an dawng a. (Gal. 3:10) Chutiang dinhmuna an din avângin, khawvêl pum atân lal puithiamho an ni thei lo a ni.
10. Dân thuthlungin a tum ber chu eng nge ni?
10 Chuti a nih chuan, “puithiam chi” hring chhuak tûra Israelte hnêna Jehova thutiam chu a thlâwn mai tihna a ni em? Ni lo ve. Tih tak zeta a thu zawm an tum phawt chuan chutiang hun remchâng chu an nei ang; mahse, Dân hnuaiah chuan a ni lo vang. Engvângin nge? (Galatia 3:19-25 chhiar rawh.) Rinawm taka zawm tumtute tân Dân thupêk chuan biakna dik humhim theihna a nei a. Judate chu sual nei an nihzia leh an puithiam lal hlan theih aia ṭha inthawina an mamawhzia a hriattîr bawk a. Tin, “Hriak Thiha,” tihna Krista, a nih loh leh Messia hnên lama hruaitu a ni bawk. Mahse, Messia a lo lan chuan, ani chuan Jeremia sawi lâwk thuthlung thar chu a rawn hmêlhriattîr ang a. Krista pawmtute chu thuthlung thar zînga mi ni a, “puithiam chi” ni tûra sâwm an ni ang. A nih dân i lo en ang u.
THUTHLUNG THAR CHUAN LAL PUITHIAMHO A HRING CHHUAK
11. Engtin nge Isua chu lal puithiamho lungphûm a lo nih?
11 C.E. 29-ah chuan Nazaret Isua chu Messia a lo ni a. Kum 30 vêl a nih chuan Jehova duhzâwng engemaw bîk tak ti tûrin a inpe a, chu chu tuia baptisma channa hmangin a lantîr a ni. Jehova chuan: “Ka Fapa duh tak,” tia sawiin a pawmzia a lantîr a, hriak tak tak ni lovin, thlarau thianghlimin hriak a thih a ni. (Mt. 3:13-17; Tirh. 10:38) Chutianga hriak thihna chuan rinna nei zawng zawngte tâna Puithiam Lalber leh nakina an Lal ni tûrin a nemnghet a. (Heb. 1:8, 9; 5:5, 6) Lal puithiam dik tak lungphûm a lo ni dâwn ta a ni.
12. Isua inthawinain eng nge awmtîr thei?
12 Puithiam Lalber a nih angin, Isua chuan rinna neite sual rochun khuh bo vek thei eng inthawina nge a hlan theih? A inthawina hlan chu a thih Hriatrengna a hmanpui ṭan laia a sawi ang khân, a taksa ṭha famkim hi a ni. (Hebrai 9:11, 12 chhiar rawh.) C.E. 29-a baptisma a chan aṭang khân, Puithiam Lalber a nih angin Isua chuan a thih thlengin fiahna tâwkin, zirtîrna a dawng a. (Heb. 4:15; 5:7-10) Kaihthawh a nih hnu chuan vânah a lâwn a, a inthawina hlutna chu Jehova hnênah ngei a hlân a ni. (Heb. 9:24) Chu mi hnuah, Isua chuan a inthawina chunga rinna lantîrtute tân Jehova hnênah a ngensak theiin, chatuan nunna beisei chunga Pathian rawng bâwl tûrin a ṭanpui thei a ni. (Heb. 7:25) Chu bâkah, a inthawina chuan thuthlung thar a nemnghet bawk.—Heb. 8:6; 9:15.
13. Thuthlung thara tel tûra sâwmte chuan eng beiseina nge an neih?
13 Chûng thuthlung thara tel tûra sâwmte chu thlarauva hriak thih an ni bawk a. (2 Kor. 1:21) Chutah chuan Juda mi rinawmte leh a hnuah Jentailte pawh an tel a ni. (Eph. 3:5, 6) Thuthlung thara mite chuan eng beiseina nge an neih? Anni chuan sual ngaihdamna dik tak an dawng ang. Jehova chuan heti hian a tiam a ni: “An bawhchhiatna chu ka ngaidam ang a, an sualna pawh ka hre reng dâwn tawh si lo,” tiin. (Jer. 31:33, 34) Dân ang taka an sualna thai bo a nih tâkah chuan, “puithiam chi” nih theihna dinhmunah an ding ta a ni. Hriak thih Kristiante hnênah Petera chuan: “Thim ata chhuaka, a êng mak taka lût tûra kotu che u ṭhatna chu in entîr theih nân nangni zawng chi thlan, lal puithiamho, hnam thianghlim, Pathian mite ngei in ni si a,” tiin a ziak a. (1 Pet. 2:9) Ani chuan Jehova’n Israel mite Dân a pêk laia a thusawi chu la chhâwngin, thuthlung thara awm Kristiante tân a hmang a ni.—Ex 19:5, 6.
LAL PUITHIAMHO CHUAN MI TINTE HLAWKNA AN THLEN
14. Khawiah nge lal puithiamho chuan rawng an bâwl ang?
14 Chûng thuthlung thara awmte chuan khawiah nge rawng an bâwl ang? Anni chuan he leia an awm lai chuan, a huhovin puithiam hna an thawk a, Jehova ‘ṭhatna entîr’ leh thlarau lam chaw pêkna hmangin mite hmaah Jehova ai an awh a ni. (Mt. 24:45; 1 Pet. 2:4, 5) An thih a, kaihthawh leh an nih hnu chuan lal leh puithiam hna thawk kawpin, vânah Isua nên tling takin rawng an bâwl ang. (Lk. 22:29; 1 Pet. 1:3-5; Thup. 1:6) Chu chu nemnghetin, tirhkoh Johana chuan vâna Jehova lalṭhutthlêng bula thlarau thil siam tam tak chu inlârnaah a hmu a ni. Anni chuan ‘Berâm No’ hnênah: “I thi a, i thisenin hnam tin, ṭawng tin, mi tin leh Jentail-te, Pathian tân i lei a; lalah te, kan Pathian tân puithiamahte i siam a. Lei chungah an lal ang,” tiin “hla thar” an sa a ni. (Thup. 5:8-10, C.L. Re-edited) A hnua inlârnaah Johana chuan chûng rorêltute chungchângah: “Pathian leh Krista puithiamte an ni ang a, amah nên kum sângkhat rorêlin an awm zâwk ang,” tiin a sawi. (Thup. 20:6) Anni chu Krista nên an zain mi tinte hlâwkpui tûr lal puithiamho an lo ni ta a ni.
15, 16. Lal puithiamho rawngbâwlnain mihringte tân eng hlâwkna nge a thlen ang?
15 Mi 1,44,000-te chuan leia awmte tân eng hlâwkna nge an rawn thlen dâwn? Thu Puan bung 21 chuan anni chu vân lam khawpui, Jerusalem Thar tiin a sawi a, chu chu “Berâm No nupui” tia koh a ni. (Thup. 21:9) Châng 2 aṭanga 4-na chuan: “Khaw thianghlim Jerusalem thar chu, mo a pasal ela a inchei anga peih diamin Pathian hnêna mi vân ata lo chhuk ka hmu bawk a. Tin, lalṭhutphah aṭangin aw ring takin, ‘Ngai te, Pathian bâwktê chu mihring zîngah a lo awm ta, ani chu an hnênah a awm ang a, anni chu a mite an ni ang a, Pathian ngei chu an hnênah a awm ang a, an Pathian a ni bawk ang; an mit ata mittui zawng zawng a hrufai ang a; thihna a awm leh thei tawh lo vang a, lungngaih te, ṭah te, nat te pawh a awm leh tawh hek lo vang; thil hmasate chu a ral ta,’ a tih ka hria,” tih a sawi a ni. Malsâwmna ropui a va ni tak êm! Thihna nuai bona chuan mittui tlâkna te, lungngaihna te, ṭahna te, leh natna te awmtîrtu ber chu a paih bo vang a. Mi rinawmte Pathian nêna inremtîr lehin, ṭha famkima hlânkaina a ni ang.
16 Lal puithiamho rawngbâwlnain malsâwmna a rawn thlen tûr chungchâng sawi belhin, Thu Puan 22:1, 2 chuan heti hian a ti: “Ani chuan [Jerusalem Thar] kawtlai lai taka nunna tui lui, krustal lung anga tle, Pathian leh Berâm No lalṭhutphaha lo chhuak mi entîr a. Tin, lui kam tuakah chuan Nunna Thing, chi hrang sâwm leh pahniha rah, thla kipa rah a awm a; chu thing hnahte chu hnam tin tihdamna tûr a ni,” tiin. Hêng entîr nei tui leh thingte hmang hian, “hnam tin,” a nih loh leh mihring zawng zawngte chu Adama hnên aṭanga an rochun ṭhat famkim lohna lak ata tihdam hlen hmak an ni ang. Ni e, ‘thil hmasate chu a ral’ ngei tawh dâwn a ni.
LAL PUITHIAMHO CHUAN AN HNA AN HLEN ANG
17. Lal puithiamho chuan a tâwpah eng nge an hlen chhuah ang?
17 Kum 1,000 tâwpah chuan lal puithiamho chuan an khua leh tuite chu ṭhat famkimnaah a hlângkai chho tawh ang a. Chu mi hnuah, Lal leh Puithiam Lalber a nih angin Krista chuan famkima a siam tawh mihringte chu Jehova kutah a hlân ang. (1 Korinth 15:22-26 chhiar rawh.) Chutih hunah chuan lal puithiamho chuan din an nih chhan chu an hlen chhuak tawh ang.
18. Lal puithiamhote’n an hna an hlen hnuah engtin nge Jehova’n anni chu a hman chhunzawm ang?
18 Chu mi hnuah chuan, engtin nge Jehova’n Krista rorêlpui, chanvo ropui tak neite chu a hman chhunzawm zêl ang? Thu Puan 22:5 sawi dânin, anni chuan lal angin “chatuanin ro an rêl ang.” Tute chungah nge ro an rêl ang? Chu chu Bible-in min hrilh lo. Mahse, thih theih lohna leh chhiat theih lohna nun an neihna leh khawvêl mihring ṭha famkim lote ṭanpuina kawnga an thiltawn chuan Jehova thiltumah chatuana dinhmun ropui tak a chelhtîr ang.
19. Hriatrengnaa telte chu eng nge hriatnawntîr an nih ang?
19 Kum 2012, April 5, Nilaithawhṭan nia Isua thih Hriatrengna hun hmang tûra kan kal khâwm hunah, hêng Bible zirtîrnate hi kan rilruah a awm ang a. Kristian hriak thih tlêm tê leia a la bângte chuan thuthlung tharah an tel tih lantîr nân chhang dawidim telh loh leh uain sen chu an eiin, an in ang. Chûng Krista inthawina entîrnate chuan anni chu Pathian chatuan thiltuma an chanvo leh mawhphurhna ropui tak chu a hriatnawntîr ang. Kan zain, mihringte hlâwkpui atâna Pathian Jehova ruahmanna siam, lal puithiamho ngaihhlutna nasa tak nei chungin Hriatrengnaah i tel ṭheuh vang u. (w12-E 01/15)
[Zirlai Atâna Zawhnate]
[Phêk 31-naa milem]
Lal puithiamho chuan mihringte tân chatuana hlâwkna an thlen ang
