“Intom ‘razza magħżula, saċerdozju rjali, ġens qaddis, poplu miksub bħala proprjetà speċjali.’”​—1 PT. 2:9.

TISTAʼ TISPJEGA?

Ġeħova meta wiegħed għall-​ewwel darba saċerdozju rjali?

Il-​patt il-​ġdid kif jipproduċi saċerdozju rjali?

Is-​saċerdozju rjali kif se jkun taʼ ġid għall-​umanità?

1. (a) “L-​ikla taʼ fil-​għaxija tal-​Mulej,” għala tissejjaħ ukoll it-​Tifkira? (b) X’inhu l-​iskop tagħha?

 FIL-​lejla tal-​14 taʼ Nisan, fis-​sena 33 E.K., Ġesù Kristu u t-​12-​il appostlu tiegħu osservaw il-​Qbiż Lhudi għall-​aħħar darba. Wara li qal lil Ġuda l-​Iskarjota, li kien se jittradih dalwaqt, biex jitlaq, Ġesù introduċa osservanza differenti li iktar tard ġiet imsejħa “l-​ikla taʼ fil-​għaxija tal-​Mulej.” (1 Kor. 11:20) Ġesù darbtejn qal: “Ibqgħu agħmlu dan b’tifkira tiegħi.” Din l-​osservanza hija magħrufa wkoll bħala t-​Tifkira. Din hi okkażjoni speċjali meta niftakru x’għamel Kristu, speċjalment għaliex miet għalina. (1 Kor. 11:24, 25) Biex jobdu dan il-​kmand, ix-​Xhieda taʼ Ġeħova madwar id-​dinja josservaw it-​Tifkira kull sena. Fl-​2012, l-​14 taʼ Nisan tal-​kalendarju Bibliku jibda fi nżul ix-​xemx, nhar il-​Ħamis, 5 t’April.

2. Ġesù x’qal dwar il-​ħobż u l-​inbid?

² Id-​dixxiplu Luqa jiġbor f’żewġ versi dak li għamel u qal Ġesù f’din l-​okkażjoni: “Ħa ħobża, radd ħajr, qasamha, tahielhom, u qal: ‘Dan il-​ħobż jirrappreżenta ġismi li se jingħata għalikom. Ibqgħu agħmlu dan b’tifkira tiegħi.’ Ukoll, bl-​istess mod ħa l-​kies wara l-​ikla taʼ fil-​għaxija u qal: ‘Dan il-​kies jirrappreżenta l-​patt il-​ġdid konfermat b’demmi li se jixxerred għalikom.’” (Lq. 22:19, 20) L-​appostli kif fehmuh dan il-​kliem?

3. L-​appostli kif fehmuh il-​kliem taʼ Ġesù dwar il-​ħobż u l-​inbid?

³ Bħala Lhud, l-​appostli kienu midħla sew tas-​sagrifiċċji tal-​annimali li l-​qassisin offrew lil Alla fit-​tempju f’Ġerusalemm. Offerti bħal dawn kienu jsiru biex tinkiseb l-​approvazzjoni taʼ Ġeħova, u ħafna minnhom kienu sagrifiċċji għall-​maħfra tad-​dnubiet.  (Lev. 1:4; 22:17-​29) Għalhekk, l-​appostli setgħu jifhmu li meta Ġesù qal li ġismu u demmu kienu ‘se jingħataw u jixxerrdu għalihom,’ hu ried ifisser li kellu jagħti l-​ħajja perfetta tiegħu stess bħala sagrifiċċju. Dan kellu jkun sagrifiċċju li jiswa ferm iktar minn dak tal-​annimali.

4. Ġesù x’ried ifisser meta qal: “Dan il-​kies jirrappreżenta l-​patt il-​ġdid konfermat b’demmi”?

⁴ Ġesù x’ried ifisser meta qal: “Dan il-​kies jirrappreżenta l-​patt il-​ġdid konfermat b’demmi”? L-​appostli kienu jafuha l-​profezija dwar il-​patt il-​ġdid li nsibuha f’​Ġeremija 31:31-​33. (Aqra.) Il-​kliem taʼ Ġesù wera li issa kien qed jintroduċi dan il-​patt il-​ġdid, li kien se jieħu post il-​patt tal-​Liġi li Ġeħova kien għamel maʼ Iżrael permezz taʼ Mosè. Kienu konnessi maʼ xulxin dawn iż-​żewġ pattijiet?

5. Il-​patt tal-​Liġi x’opportunitajiet tah lil Iżrael?

⁵ Iva, l-​iskopijiet tagħhom kienu konnessi mill-​qrib. Meta kien qed jintroduċi l-​patt tal-​Liġi, Ġeħova qal lill-​ġens: “Jekk tassew tobdu kliemi u tħarsu l-​patt tiegħi, imbagħad issiru l-​proprjetà speċjali tiegħi mill-​popli l-​oħrajn kollha, għax l-​art kollha hi tiegħi. U ssiru għalija saltna taʼ qassisin u ġens qaddis.” (Eżo. 19:5, 6) L-​Iżraelin kif fehmuh dan il-​kliem?

IL-​WEGĦDA TAʼ SAĊERDOZJU RJALI

6. Il-​patt tal-​Liġi liema wegħda għen biex titwettaq?

⁶ L-​Iżraelin kienu jafu x’kien “patt,” jew qbil serju, għaliex Ġeħova kien għamel xi pattijiet qabel maʼ Noè u Abraham. (Ġen. 6:18; 9:8-​17; 15:18; 17:1-​9) Bħala parti mill-​patt tiegħu maʼ Abraham, Ġeħova kien wiegħdu: “Permezz taʼ nislek il-​ġnus kollha taʼ l-​art se jitbierku.” (Ġen. 22:18) Ġeħova għamel il-​patt tal-​Liġi biex jgħin fit-​twettiq taʼ din il-​wegħda. Fuq il-​bażi tiegħu, Iżrael setaʼ jsir “il-​proprjetà speċjali [taʼ Ġeħova] mill-​popli l-​oħrajn kollha.” Għal liema skop? Biex ‘isiru għal Ġeħova saltna taʼ qassisin.’

7. L-​Iskrittura x’riedet tfisser bl-​espressjoni “saltna taʼ qassisin”?

⁷ L-​Iżraelin kienu familjari mas-​slaten u mal-​qassisin, imma Melkisedek kien l-​uniku raġel mill-​passat li kien kemm sultan u kemm qassis fl-​istess waqt bl-​approvazzjoni taʼ Ġeħova. (Ġen. 14:18) Permezz tal-​patt tal-​Liġi, Ġeħova lill-​Iżraelin tahom l-​opportunità li jkollhom “saltna taʼ qassisin” magħżula mill-​ġens tagħhom. L-​Iskrittura iktar tard titkellem dwar dawn il-​magħżulin bħala “saċerdozju rjali,” jiġifieri, slaten li kellhom ikunu wkoll qassisin.—1 Pt. 2:9.

8. Il-​qassisin maħturin minn Alla x’jagħmlu?

⁸ M’għandniex xi ngħidu, sultan jaħkem. Imma qassis x’jagħmel? Ebrej 5:1 jispjega: “Kull qassis il-​kbir li jittieħed minn fost il-​bnedmin jinħatar biex jagħti servizz lil Alla għan-​nom tal-​bnedmin, sabiex joffri għotjiet u sagrifiċċji għad-​dnubiet.” Għalhekk, qassis maħtur minn Ġeħova jirrappreżenta lin-​nies quddiem Alla. Hu jitlob bil-​ħrara lil Ġeħova biex jaħfer id-​dnubiet tan-​nies billi joffri xi sagrifiċċji lil Ġeħova. Ukoll, qassis jirrappreżenta lil Ġeħova quddiem in-​nies billi jgħallimhom il-​liġi t’Alla. (Lev. 10:8-​11; Mal. 2:7) B’dawn il-​modi, il-​qassis jgħin lin-​nies midinbin biex jiġu rikonċiljati m’Alla, jiġifieri, biex jerġgħu jkunu ħbieb m’Alla.

9. (a) L-​Iżraelin x’kellhom bżonn jagħmlu biex ikollhom l-​opportunità li jkunu “saltna taʼ qassisin”? (b) Ġeħova għala ħatar lil xi wħud bħala qassisin f’Iżrael? (ċ) L-​Iżraelin għala ma setgħux ikunu “saltna taʼ qassisin” taħt il-​patt tal-​Liġi?

⁹ Il-​patt tal-​Liġi ta lill-​Iżraelin l-​opportunità biex isiru slaten u qassisin għall-​ġid tal-​“popli l-​oħrajn kollha.” Imma  l-​Iżraelin kellhom bżonn jagħmlu xi ħaġa biex ikollhom din l-​opportunità meraviljuża. Alla qal: “Jekk tassew tobdu kliemi u tħarsu l-​patt tiegħi.” Setgħu l-​Iżraelin ‘tassew jobdu kliem Ġeħova’? Iva, sa ċertu punt. Setgħu jagħmlu dan perfettament? Le. (Rum. 3:19, 20) Huwa għal din ir-​raġuni li Ġeħova ħatar lil xi wħud bħala qassisin f’Iżrael. Dawn il-​qassisin ma qdewx bħala slaten. Huma għamlu sagrifiċċji tal-​annimali għad-​dnubiet tan-​nies. (Lev. 4:1–6:7) Dawn id-​dnubiet inkludew ukoll dawk tal-​qassisin stess. (Ebr. 5:1-​3; 8:3) Avolja Ġeħova aċċetta dawn is-​sagrifiċċji, ma setgħux ineħħu għalkollox id-​dnub mill-​Iżraelin. Is-​saċerdozju taħt il-​patt tal-​Liġi ma setax jirrikonċilja kompletament lill-​Iżraelin m’Alla, lanqas lil dawk sinċieri. Dan hu bħalma qal l-​appostlu Pawlu: “Hu impossibbli li d-​demm tal-​barrin u tal-​mogħoż ineħħi d-​dnubiet.” (Ebr. 10:1-​4) Minħabba li m’obdewx l-​affarijiet kollha fil-​Liġi, l-​Iżraelin ġew taħt saħta. (Gal. 3:10) F’din il-​kundizzjoni, huma ma setgħux jaqdu lill-​popli l-​oħrajn kollha bħala saċerdozju rjali.

10. X’kien l-​iskop tal-​patt tal-​Liġi?

¹⁰ Ifisser dan li l-​Iżraelin qatt ma setgħu jsiru parti minn “saltna taʼ qassisin” kif kien wiegħed Ġeħova? Xejn affattu. Kieku sinċerament ipprovaw jobdu, kien ikollhom din l-​opportunità—imma mhux taħt il-​Liġi. Għala le? (Aqra Galatin 3:19-​25.) Biex nifhmu dan, għandna bżonn inkunu nafu x’kien l-​iskop tal-​patt tal-​Liġi. Il-​Liġi pproteġiet lill-​Iżraelin ubbidjenti mill-​qima falza. Għenithom ukoll jifhmu li kienu midinbin u li kellhom bżonn sagrifiċċju akbar milli setaʼ joffri l-​qassis il-​kbir tagħhom. Il-​Liġi kienet ‘għalliema’ li kellha tippreparahom biex jaċċettaw il-​Kristu, jew Messija. Dawn it-​titli jfissru “Midluk.” Madankollu, meta wasal il-​Messija, hu kellu jintroduċi l-​patt il-​ġdid imbassar minn Ġeremija. Dawk li aċċettaw il-​Kristu ġew mistidnin biex isiru parti mill-​patt il-​ġdid u attwalment kellhom isiru “saltna taʼ qassisin.” Ejja naraw kif.

IL-​PATT IL-​ĠDID JIPPRODUĊI SAĊERDOZJU RJALI

11. Ġesù kif sar il-​pedament taʼ saċerdozju rjali?

¹¹ Fis-​sena 29 E.K., Ġesù taʼ Nazaret sar il-​Messija. Kellu madwar 30 sena meta tgħammed. Il-​magħmudija tiegħu wriet li hu kien lest li jagħmel ir-​rieda speċjali taʼ Ġeħova għalih. Ġeħova mbagħad qal dwaru: “Dan hu Ibni, il-​maħbub.” U Ġeħova ma dilkux biż-​żejt, imma bl-​ispirtu qaddis. (Mt. 3:13-​17; Atti 10:38) Alla dilek lil Ġesù sabiex dan ikun jistaʼ jsir Qassis il-​Kbir u Sultan fil-​futur għall-​ġid taʼ kull min jemmen fih. (Ebr. 1:8, 9; 5:5, 6) Hu kellu jkun il-​pedament taʼ saċerdozju verament irjali.

12. Is-​sagrifiċċju taʼ Ġesù x’għamel possibbli?

¹² Bħala Qassis il-​Kbir, Ġesù liema sagrifiċċju setaʼ joffri li jagħmilha possibbli biex id-​dnub li ntiret taʼ dawk li jemmnu fih jinħafer kompletament? Dak li qal Ġesù meta introduċa t-​Tifkira tal-​mewt tiegħu jgħinna nifhmu li s-​sagrifiċċju kien il-​ħajja umana u perfetta tiegħu stess. (Aqra Ebrej 9:11, 12.) Wara li Ġesù ġie midluk bħala Qassis il-​Kbir, ħalla lilu nnifsu jiġi provat u mħarreġ sakemm miet. (Ebr. 4:15; 5:7-​10) Wara li ġie rxoxtat, hu telaʼ fis-​sema u ppreżenta l-​valur tas-​sagrifiċċju tiegħu lil Ġeħova nnifsu. (Ebr. 9:24) Wara dan, Ġesù setaʼ jitlob bil-​ħniena lil Ġeħova għan-​nom taʼ dawk li jeżerċitaw il-​fidi fis-​sagrifiċċju tiegħu u jgħinhom jaqdu  lil Alla bit-​tama li jirċievu ħajja taʼ dejjem. (Ebr. 7:25) Is-​sagrifiċċju tiegħu għamel ukoll il-​patt il-​ġdid validu.—Ebr. 8:6; 9:15.

13. X’kienu l-​prospetti għal dawk mistidnin biex ikunu fil-​patt il-​ġdid?

¹³ Dawk li ġew mistidnin biex jidħlu fil-​patt il-​ġdid kellhom ukoll jiġu midlukin bl-​ispirtu qaddis. (2 Kor. 1:21) Dawn inkludew xi Lhud leali u mbagħad xi Ġentili. (Efes. 3:5, 6) X’kienu l-​prospetti għal dawk fil-​patt il-​ġdid? Dnubiethom kellhom jinħafru kompletament. Ġeħova kien wiegħed: “Naħfrilhom l-​iżball tagħhom, u dnubhom ma niftakrux iktar.” (Ġer. 31:34) Issa li Ġeħova kien ħafrilhom dnubiethom, huma setgħu jsiru “saltna taʼ qassisin.” Meta indirizza lill-​Kristjani midlukin, Pietru kiteb: “Intom ‘razza magħżula, saċerdozju rjali, ġens qaddis, poplu miksub bħala proprjetà speċjali, sabiex ixxandru maʼ kullimkien il-​kwalitajiet eċċellenti’ taʼ dak li sejħilkom mid-​dlam għal ġod-​dawl tiegħu taʼ l-​għaġeb.” (1 Pt. 2:9) Pietru hawnhekk jikkwota l-​kliem li Ġeħova qal lil Iżrael meta introduċa l-​Liġi u japplikah għall-​Kristjani fil-​patt il-​ġdid.—Eżo. 19:5, 6.

SAĊERDOZJU RJALI LI HU TAʼ ĠID GĦALL-​UMANITÀ KOLLHA

14. Is-​saċerdozju rjali fejn jaqdi?

¹⁴ Dawk li qegħdin fil-​patt il-​ġdid fejn kellhom jaqdu? Fuq l-​art, fejn, bħala grupp, kellhom jaqdu bħala saċerdozju, billi jirrappreżentaw lil Ġeħova quddiem in-​nies u ‘jxandru maʼ kullimkien il-​kwalitajiet eċċellenti tiegħu’ u jipprovdu ikel spiritwali. (Mt. 24:45; 1 Pt. 2:4, 5) Wara l-​mewt u l-​irxoxt tagħhom, huma kapaċi għalkollox biex jagħmlu x-​xogħol kemm taʼ slaten kif ukoll taʼ qassisin maʼ Kristu fis-​sema. (Lq. 22:29; 1 Pt. 1:3-​5; Riv. 1:6) Biex jikkonferma dan, l-​appostlu Ġwanni ra f’viżjoni għadd taʼ ħlejjaq spirti qrib it-​tron taʼ Ġeħova fis-​sema. F’“għanja ġdida” indirizzata lill-​“Ħaruf,” huma jkantaw: “B’demmek xtrajt għal Alla bnedmin minn kull tribù u lsien u poplu u ġens, u għamilthom saltna u qassisin għal Alla tagħna, u se jsaltnu għal fuq l-​art.” (Riv. 5:8-​10) F’viżjoni li seħħet iktar tard, Ġwanni  jgħid dwar dawn il-​ħakkiema: “Ikunu qassisin t’Alla u tal-​Kristu, u jsaltnu miegħu għall-​elf sena.” (Riv. 20:6) Dawn is-​slaten, flimkien maʼ Kristu, jifformaw saċerdozju rjali li se jkun taʼ ġid għall-​umanità kollha.

15, 16. Is-​saċerdozju rjali b’liema modi se jkun taʼ ġid għall-​umanità?

¹⁵ Il-​144,000 x’ġid se jġibulhom lil dawk fuq l-​art? Rivelazzjoni kapitlu 21 jiddeskrivihom bħala belt tas-​sema, Ġerusalemm il-​Ġdida, imsejħa “l-​mara tal-​Ħaruf.” (Riv. 21:9) Versi 2 sa 4 jgħidu: “Rajt ukoll il-​belt qaddisa, Ġerusalemm il-​Ġdida, nieżla mis-​sema mingħand Alla u mħejjija bħal għarusa mżejna għal żewġha. U smajt leħen għoli ġej mit-​tron u qal: ‘Ara! It-​tinda t’Alla hi mal-​bnedmin, u hu jgħammar magħhom, u huma jkunu l-​popli tiegħu. U Alla stess ikun magħhom. U jixxottalhom kull demgħa minn għajnejhom, u ma jkunx hemm iżjed mewt, u la niket u la għajat u lanqas uġigħ. L-​affarijiet taʼ qabel ikunu spiċċaw.’” X’barkiet meraviljużi! Mhux se jkun hemm iktar dmugħ, għali, uġigħ, jew għajjat taʼ niket għaliex il-​mewt mhix se tibqaʼ teżisti iktar. F’dak iż-​żmien, l-​umanità se ssir perfetta u tiġi rikonċiljata kompletament m’Alla.

¹⁶ Rivelazzjoni 22:1, 2 jgħidilna iktar dwar il-​barkiet li jiġu mingħand dan is-​saċerdozju rjali. Jgħid: “Urieni xmara taʼ ilma tal-​ħajja, ċar daqs il-​kristall, ħierġa mit-​tron t’Alla u tal-​Ħaruf, u nieżla min-​nofs it-​triq il-​prinċipali [taʼ Ġerusalemm il-​Ġdida]. U fuq kull naħa tax-​xmara kien hemm siġar tal-​ħajja li jipproduċu l-​frott tnax-​il darba fis-​sena, billi jagħtu l-​frott tagħhom kull xahar. U l-​weraq tas-​siġar kien għall-​fejqan tal-​ġnus.” Din il-​viżjoni turina kif il-​“ġnus,” jew il-​gruppi taʼ familji tal-​umanità, se jiġu mfejqin kompletament mill-​imperfezzjoni li ntirtet minn Adam. Verament, “l-​affarijiet taʼ qabel [se] jkunu spiċċaw.”

IS-​SAĊERDOZJU RJALI JLESTI XOGĦLU

17. Is-​saċerdozju rjali x’se jkun għamel sat-​tmiem tal-​1,000 sena?

¹⁷ Sat-​tmiem tal-​1,000 sena taʼ servizz, is-​saċerdozju rjali se jkun għen lill-​umanità biex issir perfetta. Il-​Qassis il-​Kbir u s-​Sultan, Ġesù Kristu, dakinhar lil Ġeħova se jippreżentalu l-​familja umana li tkun perfetta. (Aqra l-​1 Korintin 15:22-​26.) Is-​saċerdozju rjali se jkun wettaq bis-​sħiħ l-​iskop tiegħu.

18. Wara li l-​membri tas-​saċerdozju rjali jkunu lestew xogħolhom, Ġeħova kif se jużahom?

¹⁸ Wara dan, Ġeħova kif se juża l-​membri tas-​saċerdozju rjali? Skont Rivelazzjoni 22:5, se “jsaltnu għal dejjem taʼ dejjem.” Fuq min? Il-​Bibbja ma tgħidx. Imma se jkomplu jkollhom valur kbir quddiem Ġeħova. Se jkollhom ħajja immortali u esperjenza f’li jkunu għenu lill-​umanità imperfetta. Għalhekk, se jkomplu jkunu slaten u se jkunu użati minn Ġeħova biex iwettaq l-​iskopijiet tiegħu għal dejjem.

19. Dawk kollha li jattendu għat-​Tifkira fiex se jiġu mfakkrin?

¹⁹ Dan it-​tagħlim Bibliku se jkun f’moħħna meta ninġabru biex nosservaw it-​Tifkira tal-​mewt taʼ Ġesù nhar il-​Ħamis, 5 t’April, 2012. Il-​Kristjani midlukin li jkunu għadhom fuq l-​art se juru li huma parti mill-​patt il-​ġdid billi jieħdu mill-​ħobż bla ħmira u mill-​inbid aħmar. Dan se jfakkarhom fil-​privileġġi u r-​responsabbiltajiet meraviljużi tagħhom fl-​iskop etern t’Alla. Ilkoll kemm aħna li nattendu rridu nuru gratitudni profonda lejn is-​saċerdozju rjali li Alla Ġeħova għażel għall-​ġid tal-​umanità kollha.

[Mistoqsijiet taʼ Studju]

[Stampa f’paġna 29]

Is-​saċerdozju rjali se jkun taʼ ġid għall-​umanità għal dejjem