Boperisita bja Bogoši bjo bo Tlago go Hola Batho ka Moka
“Lena le ‘morafo wo o kgethilwego, boperisita bja bogoši, setšhaba se sekgethwa, batho ba e lego leruo le le kgethe-gilego.’”—1 PET. 2:9.
1. Ke ka baka la’ng “selalelo sa Morena” se bile se bitšwa Segopotšo, gomme morero wa sona ke ofe?
MANTŠIBOENG a Nisani 14 ngwageng wa 33 C.E., Jesu Kriste le baapostola ba gagwe ba 12 ba ile ba gopola Paseka ya Sejuda ka lekga la mafelelo. Ka morago ga gore Jesu a rake Judase Isikariote wa moeki, o ile a thoma segopotšo se se fapanego le seo, seo ka morago se ilego sa bitšwa “selalelo sa Morena.” (1 Bakor. 11:20) Jesu o boletše ka makga a mabedi gore: “Dulang le dira se e le go nkgopola.” Tiragalo ye e bile e tsebja e le Segopotšo, segopotšo sa Kriste seo se gatelelago kudu lehu la gagwe. (1 Bakor. 11:24, 25) Ka go latela taelo yeo, Dihlatse tša Jehofa lefaseng ka bophara di ba le Segopotšo ngwaga le ngwaga. Ka 2012, Nisani 14 go ya ka almanaka ya Beibele e tla thoma ka morago ga ge letšatši le sobetše ka Labone, April 5.
2. Ke’ng seo Jesu a se boletšego ka diswantšhetšo tšeo a di dirišitšego?
2 Ka ditemana tše pedi, morutiwa Luka o akaretša seo Jesu a se dirilego le go se bolela tiragalong yeo ge a re: “A tšea senkgwa, a leboga, a se ngwathaganya a ba nea sona, a re: ‘Se se bolela mmele wa ka wo o tlago go newa ka baka la lena. Dulang le dira se e le go nkgopola.’ A tšea le senwelo ka tsela e swanago ka morago ga go ja selalelo, a re: ‘Senwelo se se bolela kgwerano e mpsha ka baka la madi a ka ao a tlago go tšhollelwa lena.’” (Luka 22:19, 20) Baapostola ba swanetše go ba ba ile ba kwešiša bjang mantšu a?
3. Baapostola ba swanetše go ba ba kwešišitše bjang seo se bego se bolelwa ke diswantšhetšo?
3 Ka ge baapostola e be e le Bajuda, ba be ba tlwaelane gabotse le dihlabelo tša diphoofolo tšeo baperisita ba bego ba di neela Modimo tempeleng kua Jerusalema. Dibego tše bjalo di be di direlwa gore motho a amogelwe ke Jehofa, gomme tše dintši tša tšona e be e le tša go lefelela dibe. (Lef. 1:4; 22:17-29) Ka gona baapostola ba be ba ka kgona go kwešiša gore ge Jesu a be a re mmele wa gagwe le madi a gagwe di be di tla ‘newa le go tšhollwa ka baka la bona,’ o be a bolela gore o tla gafa bophelo bja gagwe bjo bo phethagetšego gore e be sehlabelo. E be e tla ba sehlabelo se se nago le mohola kudu go feta sa diphoofolo.
4. Jesu o be a e ra go re’ng ge a re: “Senwelo se se bolela kgwerano e mpsha ka baka la madi a ka”?
4 Go thwe’ng ka mantšu a Jesu a gore “senwelo se se bolela kgwerano e mpsha ka baka la madi a ka”? Baapostola ba be ba tseba ka boporofeta bja mabapi le kgwerano e mpsha, bjo bo begilwego go Jeremia 31:31-33. (Bala.) Mantšu a Jesu a be a bontšha gore ga bjale o be a hloma kgwerano yeo e mpsha, yeo e bego e tla tšea legato la kgwerano ya Molao yeo Jehofa a bego a e hlomile le Baisiraele a diriša Moshe. Na dikgwerano tšeo tše pedi di be di tswalana?
5. Kgwerano ya Molao e be e huparetše Isiraele eng?
5 Ee, merero ya tšona e be e tswalana kgauswi. Ge Jehofa a be a hloma kgwerano ya Molao, o boditše setšhaba sa Isiraele gore: “Ge e ba le ka kwa lentšu la ka e le ruri gomme la boloka kgwerano ya ka, gona le tla ba thoto ya ka e kgethegilego gare ga merafo e mengwe ka moka, ka gobane lefase ka moka ke la ka. Go nna le tla ba mmušo wa baperisita le setšhaba se sekgethwa.” (Ek. 19:5, 6) Mantšu ao a be a tla ra go re’ng go Baisiraele?
GO HOLOFETŠWA GA BOPERISITA BJA BOGOŠI
6. Kgwerano ya Molao e be e tšwetša pele kholofetšo efe?
6 Baisiraele ba be ba kwešiša seo se bolelwago ke lentšu “kgwerano,” ka gobane Jehofa o ile a dira ditumelelano tše bjalo tšeo di tlamago le borakgolokhukhu ba bona e lego Noa le Aborahama. (Gen. 6:18; 9:8-17; 15:18; 17:1-9) Karolong e nngwe ya kgwerano yeo a e dirilego le Aborahama, Jehofa o be a holofeditše gore: “Ditšhaba ka moka tša lefase di tla šegofatšwa ka peu ya gago.” (Gen. 22:18) Kgwerano ya Molao e be e tšwetša pele kholofetšo ye. Motheong wa yona, Isiraele e be e ka ba “thoto ya [Jehofa] e kgethegilego gare ga merafo e mengwe ka moka.” Ka morero ofe? Gore ‘e be mmušo wa baperisita go Jehofa.’
7. Ke’ng seo se bego se bolelwa ke polelwana e rego “mmušo wa baperisita”?
7 Baisiraele ba be tlwaelane le dikgoši le baperisita, eupša Melekitsedeke ke yena feela motho wa mehleng e fetilego yo a bilego maemong ao ka bobedi ka go dumelelwa ke Jehofa. (Gen. 14:18) Ga bjale Jehofa o be a nea setšhaba seo sebaka sa gore se tšweletše “mmušo wa baperisita.” Go etša ge ka morago mangwalo a buduletšwego a ile a bontšha, seo se be se bolela gore ba swanetše go tšweletša boperisita bja bogoši, dikgoši tšeo gape di bego di tla ba baperisita.—1 Pet. 2:9.
8. Baperisita bao ba kgethilwego ke Modimo ba phetha ditirelo dife?
8 Therešo ke gore kgoši e na le bao e ba bušago. Eupša ke eng seo se dirwago ke moperisita? Baheberu 5:1 e hlalosa gore: “Moperisita yo mongwe le yo mongwe yo a phagamego yo a tšerwego bathong o bewa ka baka la batho go laka dilo tše di lego mabapi le Modimo, gore a nee dimpho le go dira dihlabelo bakeng sa dibe.” Ka gona moperisita yo a kgethilwego ke Jehofa o emela batho ba nago le sebe pele ga Modimo ka go dira dihlabelo tše di nyakegago, a lopa Modimo legatong la bona. Le gona, moperisita o emela Jehofa pele ga batho, a ba ruta molao wa Modimo. (Lef. 10:8-11; Mal. 2:7) Ka tšona ditsela tše, moperisita yo a kgethilwego ke Modimo o šoma go boelanya batho le Modimo.
9. (a) Go ba ga Isiraele “mmušo wa baperisita” go be go ithekgile ka boemo bofe? (b) Ke ka baka la’ng Jehofa a ile a hloma boperisita Isiraeleng? (c) Ke’ng seo se paledišitšego Isiraele gore e be “mmušo wa baperisita” ka tlase ga kgwerano ya Molao?
9 Ka go re’alo kgwerano ya Molao e be e nea Isiraele sebaka sa gore e tšweletše boperisita bja bogoši bjo bo bego bo tla hola “merafo e mengwe ka moka.” Lega go le bjalo, go be go na le seo Baisiraele ba bego ba swanetše go se dira gore ba bulegelwe ke sebaka se sa go kgahliša. Modimo o itše: “Ge e ba le ka kwa lentšu la ka e le ruri gomme la boloka kgwerano ya ka.” Na Baisiraele ba be ‘ba ka kwa lentšu la Jehofa e le ruri’? Ee, ba be ba ka kgona go fihla bokgoleng bjo itšego. Na ba be ba ka dira seo ka tsela e phethagetšego? Aowa. (Baroma 3:19, 20) Ka baka leo, Jehofa o ile a tšwa a hlomile boperisita Isiraeleng, e le selo seo se fapanego le bogoši, e le gore bo neele dihlabelo tša diphoofolo bakeng sa dibe tšeo Baisiraele ba bego ba di dira ka baka la go ba ga bona le sebe. (Lef. 4:1–6:7) Dibe tše di be di akaretša tšeo di bego di dirwa ke baperisita ka bobona. (Baheb. 5:1-3; 8:3) Jehofa o ile a amogela dihlabelo tše bjalo, eupša di be di sa kgone go lefelela ka botlalo dibe tša bao ba bego ba neela dihlabelo. Boperisita ka tlase ga kgwerano ya Molao bo be bo ka se kgone go boelanya ka botlalo gaešita le Baisiraele bao ba bego ba botegela Modimo. Moapostola Paulo o bea taba ye ka tsela ye: “Ga go kgonege gore madi a dipoo le a dipudi a tloše dibe.” (Baheb. 10:1-4) Ka ge Baisiraele ba ile ba tshela Molao, ge e le gabotse ba ile ba rogakwa. (Bagal. 3:10) Ba be ba ka se kgone go hlankela lefase e le boperisita bja bogoši mola ba be ba le boemong bjo bjalo.
10. Kgwerano ya Molao e phethile morero ofe?
10 Ka gona, na kholofetšo ya Jehofa ya gore ba be ba ka ba “mmušo wa baperisita” e be e le ya lefeela? Le gatee. Ge e ba ba be ba ka leka go kwa e le ka kgonthe, ba be ba ka ba le sebaka seo—eupša e sego ka tlase ga Molao wa Moshe. Ke ka baka la’ng e be e ka se be ka tlase ga Molao woo? (Bala Bagalatia 3:19-25.) Go bao ba ilego ba katana ka potego gore ba latele Molao woo, o ile wa ba thuša gore ba dule borapeding bjo bo sekilego. O thušitše Bajuda gore ba lemoge melato ya bona le gore go nyakega sehlabelo se segolo go feta seo moperisita wa bona yo a phagamego a bego a ka se neela. E be e le moetetši yo a bego a tla ba lebiša go Kriste, goba Mesia, e lego direto tšeo di bolelago gore “Motlotšwa.” Lega go le bjalo, ge Mesia a fihla, o be a tla hloma kgwerano e mpsha yeo e bego e boletšwe e sa le pele ke Jeremia. Bao ba ilego ba amogela Kriste ba ile ba laletšwa gore e be karolo ya kgwerano e mpsha gomme ba feleletše ba le “mmušo wa baperisita.” Anke re boneng gore seo se be se tla kgonega bjang.
KGWERANO E MPSHA E TŠWELETŠA BOPERISITA BJA BOGOŠI
11. Go tlile bjang gore Jesu e be motheo wa boperisita bja bogoši?
11 Ka 29 C.E., Mesia o ile a tšwelela e le motho yo a bitšwago Jesu wa Natsaretha. Ge a be a na le nywaga e ka bago e 30, o ile a ineela go Jehofa gore a dire thato ya gagwe e kgethegilego, a bontšha seo ka gore a kolobetšwe ka meetseng. Jehofa o ile a mo amogela ka go bolela gore ke “Morwa wa ka, morategi,” a se mo tlotše ka makhura, eupša a mo tlotša ka moya o mokgethwa. (Mat. 3:13-17; Dit. 10:38) Go tlotšwa moo ga gagwe go ile gwa mo dira Moperisita yo a Phagamego go bao ba dumelago gare ga batho ka moka gomme gwa ba gwa mo dira gore e be Kgoši ya bona ya nakong e tlago. (Baheb. 1:8, 9; 5:5, 6) E be e tla ba motheo wa boperisita bja kgonthe bja bogoši.
12. Sehlabelo sa Jesu se thušitše gore go kgonege eng?
12 Ka ge Jesu e le Moperisita yo a Phagamego, ke sehlabelo sefe seo a bego a ka se neela gomme sa lefelela ka botlalo sebe sa leabela sa bao ba dumelago? Go etša ge a bontšhitše nakong ya ge a be a hloma Segopotšo sa lehu la gagwe, bophelo bja gagwe bjo bo phethagetšego e le motho e be e le sehlabelo seo. (Bala Baheberu 9:11, 12.) Go tloga nakong ya ge a be a kolobetšwa ka 29 C.E., Jesu ka ge e le Moperisita yo a Phagamego, o ile a lekwa gomme a newa tlwaetšo go fihlela nakong ya ge a bolawa. (Baheb. 4:15; 5:7-10) Ka morago ga gore a tsošwe, o ile a rotogela legodimong gomme a neela mohola wa sehlabelo sa gagwe go Jehofa ka go lebanya. (Baheb. 9:24) Ka morago ga moo, go bao ba bontšhago tumelo sehlabelong sa gagwe, Jesu o be a ka ba phophothela go Jehofa gomme a ba thuša gore ba hlankele Modimo ba na le kholofelo ya go phela ka mo go sa felego. (Baheb. 7:25) Le gona sehlabelo sa gagwe se ile sa thuša go tiišetša kgwerano e mpsha.—Baheb. 8:6; 9:15.
13. Ke’ng seo se bego se letetšwe ke bao ba laleditšwego go ba karolo ya kgwerano e mpsha?
13 Bao ba bego ba laletšwa go ba kgweranong e mpsha ba be ba bile ba swanetše go tlotšwa ka moya o mokgethwa. (2 Bakor. 1:21) Go ile gwa akaretšwa Bajuda ba botegago gomme ka morago gwa akaretšwa le Bantle. (Baef. 3:5, 6) Bao ba bego ba le kgweranong yeo e mpsha ba be ba ka letela’ng? Ba be ba tla lebalelwa dibe tša bona e le ka kgonthe. Jehofa o be a holofeditše gore: “Ke tla ba lebalela molato wa bona gomme nka se sa gopola sebe sa bona.” (Jer. 31:34) Ka ge dibe tša bona di tlošitšwe ka molao, ba be ba tla ba boemong bja go ba “mmušo wa baperisita.” Ge Petro a be a ngwalela Bakriste ba tloditšwego o itše: “Lena le ‘morafo wo o kgethilwego, boperisita bja bogoši, setšhaba se sekgethwa, batho ba e lego leruo le le kgethegilego, gore le bolele gohle mabothakga’ a yo a le biditšego leswiswing gomme a le biletša seetšeng sa gagwe se se makatšago.” (1 Pet. 2:9) Mo Petro o tsopola mantšu a Jehofa ao a a boditšego Baisiraele ge a be a ba nea Molao gomme o a dirišetša go šupa go Bakriste bao ba lego kgweranong e mpsha.—Ek. 19:5, 6.
BOPERISITA BJA BOGOŠI BO HOLA BATHO KA MOKA
14. Boperisita bja bogoši bo tla hlankela kae?
14 Bao ba lego kgweranong e mpsha ba be ba tla hlankela kae? Mo lefaseng ba be ba tla hlankela e le sehlopha sa baperisita, seo se emelago Jehofa go batho ka gore se ‘bolele gohle mabothakga a gagwe’ gomme se abe dijo tša moya. (Mat. 24:45; 1 Pet. 2:4, 5) Ka morago ga go hwa gomme ba tsošwa, ba tla hlankela le Kriste legodimong e le dikgoši le baperisita, ba phethagatša ka botlalo seo se bolelwago ke maemo ao ka bobedi. (Luka 22:29; 1 Pet. 1:3-5; Kut. 1:6) Go tiišetša se, moapostola Johane o bone ponong dibopiwa tše mmalwa tša moya di le kgauswi le sedulo sa bogoši sa Jehofa legodimong. Di opelela “Kwana” “kopelo e mpsha” di re: “Ka madi a gago o reketše Modimo batho go tšwa molokong o mongwe le o mongwe, lelemeng le lengwe le le lengwe, morafong o mongwe le o mongwe le setšhabeng se sengwe le se sengwe, o ba dirile gore e be mmušo le baperisita ba Modimo wa rena gomme ba tla buša e le dikgoši godimo ga lefase.” (Kut. 5:8-10) Ponong e nngwe ka morago ga moo, Johane o bolela ka babuši bao gore: “E tla ba baperisita ba Modimo le ba Kriste gomme ba tla buša le yena e le dikgoši ka nywaga e sekete.” (Kut. 20:6) Bona gotee le Kriste, ba bopa boperisita bja bogoši bjo bo tlago go hola batho ka moka.
15, 16. Boperisita bja bogoši bo tla tlišetša batho mehola efe?
15 Ba 144 000 ba tla tlišetša bao ba lego lefaseng mehola efe? Kutollo kgaolo 21 e ba swantšha le motse wa legodimong, Jerusalema o Mofsa, yeo e bitšwago “mosadi wa Kwana.” (Kut. 21:9) Ditemana 2 go ya go 4 di re: “Ka bona motse o mokgethwa, Jerusalema o Mofsa o theoga o etšwa legodimong go Modimo o itokišitše bjalo ka monyadiwa yo a ikgabišeditšego monna wa gagwe. Ke moka, ka kwa lentšu le le hlabošago le le tšwago sedulong sa bogoši le re: ‘Bonang! Tente ya Modimo e bathong, o tla dula le bona gomme e tla ba batho ba gagwe. Modimo ka noši o tla ba le bona. O tla phumola megokgo ka moka mahlong a bona gomme lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona. Dilo tša pele di fetile.’” A ditšhegofatšo tše di kgahlišago gakaakang! Go fedišwa ga lehu go tla tloša sebaki se segolo sa megokgo, manyami, sello le bohloko. Seo se tla bolela gore batho ba botegago ba tla dirwa ba phethagetšego, ba boelanywa ka mo go feletšego le Modimo.
16 Ge e hlalosa ditšhegofatšo tšeo boperisita bjo bja bogoši bo tlago go di tliša, Kutullo 22:1, 2 e re: “A mpontšha noka ya meetse a bophelo e sekilego bjalo ka legakabje, e elago e etšwa sedulong sa bogoši sa Modimo le sa Kwana e fologa bogareng bja tsela e kgolo ya motse [wa Jerusalema o Mofsa]. Ka mošono wa noka le ka mošola wa yona go be go na le dihlare tša bophelo tše di enywago dienywa ka makga a lesomepedi ngwaga le ngwaga, tše di enywago dienywa tša tšona ka kgwedi e nngwe le e nngwe. Le gona matlakala a dihlare tšeo e be e le a go alafa ditšhaba.” Ka ditokišetšo tše tša seswantšhetšo, “ditšhaba,” goba malapa a batho, di tla alafša ka mo go feletšego go se phethagaleng moo go abetšwego go Adama. Ruri ‘dilo tša pele di tla ba di fetile.’
BOPERISITA BJA BOGOŠI BO FETŠA MOŠOMO WA BJONA
17. Ke’ng seo boperisita bja bogoši bo tlago go se phethagatša mafelelong?
17 Mafelelong a nywaga e 1 000 ya tirelo yeo e holago batho, boperisita bja bogoši bo tla ba bo dirile gore balata ba bjona e be batho ba phethagetšego. Ka ge e le Moperisita yo a phagamego le Kgoši, Kriste o tla bušetša go Jehofa lapa la batho leo le tsošološitšwego ka botlalo. (Bala 1 Bakorinthe 15:22-26.) Boperisita bja bogoši bo tla ba bo phethagaditše ka botlalo morero wa bjona.
18. Ka morago ga gore boperisita bja bogoši bo phethe modiro wa bjona, Jehofa o tla diriša bjang bagwera ba Kriste?
18 Ka morago ga moo, Jehofa o tla diriša bjang bagwera ba ba Kriste bao ba nago le tokelo e kgolo? Go ya ka Kutullo 22:5, “ba tla buša e le dikgoši go iša mehleng ya neng le neng.” Ba tla buša bomang? Beibele ga e re botše. Eupša bophelo bjo bobotse bjoo ba nago le bjona gotee le phihlelo ya bona go thušeng lefase la batho ba sa phethagalago di tla ba hlamela go ba boemong bjo bo phagamego mererong ya Jehofa ka mo go sa felego.
19. Bao ba tlago go ba gona Segopotšong ba tla gopotšwa ka eng?
19 Ge re eba gona Segopotšong sa lehu la Jesu ka Labone, April 5, 2012, dithuto tše tša Beibele di tla ba di sa le ka dikgopolong tša rena. Mašaledi a sego kae a Bakriste ba tloditšwego ao a sa lego mo lefaseng a tla ja senkgwa seo se sa omelwago le go nwa beine e khwibidu, a bontšha gore ke karolo ya kgwerano e mpsha. Diswantšhetšo tše tša sehlabelo sa Kriste di tla ba gopotša ka ditokelo tša bona tše dikgolo le boikarabelo bja bona bjo bogolo morerong wa Modimo wa ka mo go sa felego. Anke ka moka ga rena re be gona Segopotšong re na le tebogo e kgolo ya go leboga tokišetšo ya Jehofa Modimo ya boperisita bja bogoši bjoo bo tlago go hola batho ka moka.
[Dipotšišo tša Thuto]
[Seswantšho go letlakala 29]
Boperisita bja bogoši bo tla tlišetša batho mehola ya ka mo go sa felego
