Saray Arin Saserdote a Mangunggona ed Amin a Totoo
“Sikayo so ‘pinilin kapolian, saray saserdote a manari, say masanton nasyon, totoo a magmaliw a kayarian na Dios.’”—1 PED. 2:9.
1. Akin et tatawagen met ya Memoryal so “pangdem na Katawan,” tan antoy gagala na satan?
DIAD samay labi na Nisan 14, 33 C.E., sinelebraan nen Jesu-Kristo tan na 12 apostol to so Judion Paskua diad sampot lan pankanawnawa. Kayarin pinaalis so traidor a si Judas Iscariote, inggapo nen Jesus so duman selebrasyon ya tinawag ed saginonor a “pangdem na Katawan.” (1 Cor. 11:20) Amiduan imbaga nen Jesus ya “itultuloy yon gawaen iya bilang pakanodnonotan ed siak.” Sayan okasyon et tinawag met ya Memoryal odino pakanodnonotan ed si Kristo tan ed impatey to. (1 Cor. 11:24, 25) Bilang katutulok ed sayan ganggan, tinaon a seselebraan na saray Tasi nen Jehova ed interon mundo so Memoryal. Diad sayan taon na 2012, say Nisan 14 ed Judion kalendaryo et onggapo kaselek na agew na Huebes, Abril 5.
2. Antoy imbaga nen Jesus nipaakar ed saray embleman inusar to?
2 Oniay simplin inkuan nen disipulon Lucas nipaakar ed ginawa tan imbaga nen Jesus ed satan ya okasyon: “Sikatoy angala na tinapay, akisalamat, pinisag to, insan inter to ed sikara, a kuan to: ‘Saya so mankabaliksay laman ko a nepeg ya iter parad sikayo. Itultuloy yon gawaen iya bilang pakanodnonotan ed siak.’ Ontan met so ginawa to ed kopa, a kayari na pangdem da et inkuan to: ‘Sayan kopa et mankabaliksay balon sipanan a pinaletan na dalak, a nepeg ya iyibung nisengeg ed sikayo.’” (Luc. 22:19, 20) Antoy impakatalos na saray apostol ed saya?
3. Antoy impakatalos na saray apostol ed imbaga nen Jesus nipaakar ed saray emblema?
3 Lapud Judio iray apostol, pamilyar irad panagbagat na ayep ya iyaapay na saray saserdote ed Dios diad templo ed Jerusalem. Gagawaen iyan panagbagat pian nagamoray panangabobon nen Jehova, tan maslak ed saraya et parad pakaperdona na kasalanan. (Lev. 1:4; 22:17-29) Kanian sanen imbaga nen Jesus ya say laman tan dala to et ‘iter tan iyibung nisengeg ed sikara,’ atalosan na saray apostol a say labay ton ibaga et iter toy mismon perpekton bilay to bilang bagat. Satan a bagat et mas makanakana nen saray bagat ya ayep.
4. Antoy labay ya ibaga nen Jesus sanen inkuan ton: “Sayan kopa et mankabaliksay balon sipanan a pinaletan na dalak”?
4 Antoy labay ya ibaga nen Jesus sanen inkuan ton: “Sayan kopa et mankabaliksay balon sipanan a pinaletan na dalak”? Amta na saray apostol imay propesiya nipaakar ed balon sipanan ya akarekord ed Jeremias 31:31-33. (Basaen.) Impanengneng na imbaga nen Jesus ya igapo to lay balon sipanan. Salatan na satan so Ganggan a sipanan ya inter nen Jehova ed Israel panamegley nen Moises. Kasin mankonektaan iratan ya sipanan?
5. Anton pribilehyo so iyoopresi ed Israel no tuloken day Ganggan a sipanan?
5 On, mankonektaan so gagala na saratan. Sanen inletneg nen Jehova so Ganggan a sipanan ed nasyon na Israel, oniay inkuan tod sikara: “No maalwar yon tuloken so boses ko tan sumpalen yo so sipanan ko, magmaliw kayon nikabkabiig a kayarian ko manlapud amin a totoo, lapud kayarian ko so interon dalin. Magmaliw kayon sakey a panarian na saray saserdote tan sakey a masanton nasyon a kayarian ko.” (Exo. 19:5, 6, NW) Antoy impakatalos na saray Israelita ed saya?
SARAY INSIPAN YA ARIN SASERDOTE
6. Anton sipan so asumpal lapud Ganggan a sipanan?
6 Amta na saray Israelita so terminon “sipanan” ta akisipanan si Jehova ed saray laki ran di Noe tan Abraham. (Gen. 6:18; 9:8-17; 15:18; 17:1-9) Oniay sakey ed saray insipan nen Jehova ed si Abraham: “Diad panamegley na binim, amin a nasyon ed dalin et nabendisyonan lapud dinengel moy boses ko.” (Gen. 22:18, NW) Pian nasumpal iya, ginawa nen Jehova so Ganggan a sipanan. Base ed sayan sipanan, nayarin magmaliw so Israel ya “nikabkabiig a kayarian [nen Jehova] manlapud amin a totoo.” Antoy gagala na saya? Pian magmaliw iran “sakey a panarian na saray saserdote” a parad si Jehova.
7. Antoy labay ya ibaga na balikas a “sakey a panarian na saray saserdote”?
7 Pamilyar iray Israelita ed arari tan saserdote. Balet nensaman, si Melquisedec labat so inaprobaan nen Jehova a nagmaliw ya parehon ari tan saserdote. (Gen. 14:18) Inyopresi nen Jehova ed nasyon na Israel so pankanawnawan mamawala na “sakey a panarian na saray saserdote.” Unong ya impatnag ed saginonor na Kasulatan, mankabaliksan iya a walay pankanawnawa ran mamawala na arari a magmaliw met a saserdote.—1 Ped. 2:9.
8. Anto so gagawaen na saray saserdoten tinuro na Dios?
8 Siempre, say sakey ya ari et manuuley. Balet antoy gagawaen na sakey a saserdote? Oniay impaliwawa na Hebreos 5:1: “Balang atagey a saserdote a pinili ed limog na totoo so aturon mangasikaso ed saray bengatlan nipaakar ed Dios nisengeg ed saray totoo, pian niyapay to iray regalo tan bagat parad saray kasalanan.” Kanian, say sakey a saserdoten tinuro nen Jehova so mangirerepresenta ed makasalanan a totoo panamegley na saray iyaapay, a mikakasi ed Dios parad sikara. Balet, irerepresenta met na sakey a saserdote si Jehova lapud ibabangat tod saray totoo so ganggan na Dios. (Lev. 10:8-11; Mal. 2:7) Diad ontan, ontutulong so saserdote pian makapipulangan so totoo ed Dios.
9. (a) Antoy kaukolan a gawaen na Israel pian makapangitarya na “sakey a panarian na saray saserdote”? (b) Akin et anuro si Jehova na saray saserdote diad limog na Israel? (c) Akin et abalang na Israel so pribilehyon mamawala na “sakey a panarian na saray saserdote”?
9 Say Ganggan a sipanan sirin so mangiiter ed saray Israelita na pankanawnawa a mamawala na saray arin saserdote a mangunggonad “amin a totoo.” Balet oniay kondisyon ed sayan marakdakep ya pribilehyo: “No maalwar yon tuloken so boses ko tan sumpalen yo so sipanan ko.” Kasin ‘maalwar a natulok na saray Israelita so boses nen Jehova’? On, balet aliwan perpekto. (Roma 3:19, 20) Lapud satan, anuro si Jehova na saray saserdote diad limog na Israel. Sikaray agnan-ari, noagta angiyapay ira na saray bagat ya ayep parad agginagalan kasalanan na saray Israelita. (Lev. 4:1–6:7) Kaiba met ed saya so kasalanan na saray saserdote. (Heb. 5:1-3; 8:3) Inawat nen Jehova iratan a bagat, balet agsigpot a nakal na saratan iray kasalanan na Israel, tinmakken tan inatey ni ran siansia. Agnagawaan na saray saserdoten sakop na Ganggan a sipanan so sigpot a pakapipulangan na saray Israelita ed Dios. Oniay inkuan nen apostol Pablo: “Say dala na saray baka tan saray kanding et agnayarin mangekal ed saray kasalanan.” (Heb. 10:1-4) Makapaermen, ag-inunor na saray Israelita so Ganggan kanian sikaray naayew. (Gal. 3:10) Lapud satan, agda nayarin panlingkoran so amin a totoo bilang arin saserdote.
10. Antoy gagala na Ganggan a sipanan?
10 Aglan balot kasi nagawa imay insipan nen Jehova ya mamawala ira na “sakey a panarian na saray saserdote”? Siempre nagawa. No masimoon iran ontulok, naikdan ni ran siansiay pankanawnawa, balet aliwa lan diad silong na Ganggan. Akin ey? (Basaen so Galacia 3:19-25.) Pian natalosan tayo, kaukolan tayon amtaen no antoy gagala na Ganggan a sipanan. Sinalimbengan na Ganggan iray Israelita manlapud palson panagdayew. Impamoria met na satan a makasalanan ira tan kaukolan day bagat a mas makana nen say iyaapay na atagey a saserdote ra. Satan so “manangibangat” ya mangiparaan ed sikaran mangawat ed Kristo odino Mesias, saray titulon mankabaliksan na “Say Nilanaan.” Balet, sano onsabi so Mesias, iletneg toy balon sipanan ya impasakbay nen Jeremias. Saramay mangawat ed si Kristo et imbitaan ya magmaliw a kabiangan na balon sipanan tan magmaliw ya “sakey a panarian na saray saserdote.” Panon? Nengnengen tayo.
NAGMALIW YA ARIN SASERDOTE IRAY MEMBRO NA BALON SIPANAN
11. Panon a nagmaliw ya pundasyon si Jesus na saray arin saserdote?
11 Nen 29 C.E., nagmaliw ya Mesias si Jesus a taga Nazaret. Sanen manga 30 años to, impresenta toy inkasikato a manumpal ed nikadkaduman pagagawa nen Jehova ed sikato panamegley na bautismo ed danum. Insan imbaga nen Jehova ed sikato: “Saya so Ana’ko, say inad-arok,” tan nilanaan To na masanton espiritu, aliwan na larak. (Mat. 3:13-17; Gawa 10:38) Nilanaan na Dios si Jesus pian magmaliw ya Atagey a Saserdote tan Ari parad amin a totoon manisia ed sikato. (Heb. 1:8, 9; 5:5, 6) Kanian si Jesus so magmaliw a pundasyon na saray peteg ya arin saserdote.
12. Antoy agawaan na bagat nen Jesus?
12 Bilang Atagey a Saserdote, anton bagat so nayarin iyapay nen Jesus a sigpot ya makapangekal ed atawir a kasalanan na saray mananisia? Unong ya impaimano to sanen inletneg to so Memoryal, say mismon perpekton bilay to bilang too so ibagat. (Basaen so Hebreos 9:11, 12.) Manlapud impanpabautismo to nen 29 C.E., si Jesus bilang Atagey a Saserdote, et dinmalan ed subsubok tan mabulos ya nampaibangat anggad impatey to. (Heb. 4:15; 5:7-10) Sanen apaoli, sikatoy sinmegep ed tawen tan impresenta toy balor na bagat to ed si Jehova. (Heb. 9:24) Kayari na saman, sarag la nen Jesus so mikasi ed si Jehova parad saramay manisia ed bagat to tan tulongan iran manlingkor ed Dios diad andi-angga. (Heb. 7:25) Pinaletan met na bagat to so balon sipanan.—Heb. 8:6; 9:15.
13. Antoy nailaloan na saray kabiangan na balon sipanan?
13 Saray kabiangan na balon sipanan et lanaan met na masanton espiritu. (2 Cor. 1:21) Kaibad saraya iray matoor ya Judio tan insan saray Gentil. (Efe. 3:5, 6) Antoy nailaloan na sarayan kabiangan na balon sipanan? Unona, naperdona iray kasalanan da. Insipan nen Jehova: “Perdonaen ko naani inkauges da, tan agko la naani nonoten so kasalanan da.” (Jer. 31:34) Komadua, lapud satan et sarag da lay magmaliw ya “sakey a panarian na saray saserdote.” Oniay insulat nen Pedro ed saray alanaan a Kristiano: “Sikayo so ‘pinilin kapolian, saray saserdote a manari, say masanton nasyon, totoo a magmaliw a kayarian na Dios, pian iyabawag yo ed amin a pasen iray alay abig a kualidad’ na samay anawag ed sikayo manlapud kabilungetan tan angawat ed sikayo ed makapakelaw a liwawa to.” (1 Ped. 2:9) Inaon nen Pedro ed saya imay imbaga nen Jehova ed Israel sanen inletneg To so Ganggan tan inyaplika to itan ed saray Kristiano a membro na balon sipanan.—Exo. 19:5, 6.
SARAY ARIN SASERDOTE A MANGUNGGONA ED AMIN A TOTOO
14. Iner so panlingkoran na saray arin saserdote?
14 Iner so panlingkoran na saray kabiangan na balon sipanan? Bilang grupo et manlingkor ira diad dalin bilang saserdote. Irepresenta ray Jehova ed saray totoo diad ‘pangiyabawag dad amin a pasen na alay abig iran kualidad to’ tan diad pangitarya ra na espiritual a naakan. (Mat. 24:45; 1 Ped. 2:4, 5) Kayari na ipatey tan kioli ra, sigpot dan sumpalen so kimey da bilang arari tan saserdote a kaibay Kristo diad tawen. (Luc. 22:29; 1 Ped. 1:3-5; Apo. 1:6) Bilang paneknek ed saya, anengneng nen apostol Juan ed pasingawey iray espiritun pinalsa ya asingger ed trono nen Jehova diad tawen. Tan angansion ira na “sakey a balon kanta” parad “Kordero”: “Diad panamegley na dalam et sinaliw mo iray totoon parad Dios manlapud balang tribu tan lenguahe tan rasa tan nasyon, tan ginawam iran sakey a panarian tan saserdote na Dios tayo, tan manuley ira bilang arari ed dalin.” (Apo. 5:8-10) Diad tinmumbok a pasingawey, oniay inkuan nen Juan ed sarayan manuley: “Magmaliw iran saserdote na Dios tan say Kristo, tan manuley ira bilang arari a kaiba to diad sanlibon taon.” (Apo. 20:6) Kaibay Kristo, sikaray manugyop ed saray arin saserdote a mangunggonad amin a totoo.
15, 16. Antoran gunggona so ipagamor ed totoo na saray arin saserdote?
15 Anto ran gunggona so ipagamor na 144,000 ed totoo? Deneskribe ira na Apocalipsis kapitulo 21 bilang mangatatawen a syudad, say Balon Jerusalem, a tinawag ya “asawa na Kordero.” (Apo. 21:9) Oniay inkuan na bersikulo 2 anggad 4: “Anengneng ko met so masanton syudad, say Balon Jerusalem, ya onleleksab manlapud tawen a kawalaan na Dios tan sikatoy akaparaan bilang sakey a nobya a kinawesan na marakep parad piasawaan to. Diad saman et walay nadngel kon maksil a boses manlapud trono, a kuan to: ‘Nia! Say tolda na Dios et walad katooan, tan sikatoy miayam ed sikara, tan magmaliw iran totoo to. Tan say Dios a mismo et niwala ed sikara. Tan punasen to so amin a lua ed kamataan da, tan anggapo lay ipapatey, tan anggapo met lay panermen tan pannangis tan ot-ot. Saray datin bengatla et linmabas la.’” Agaylay abig na sarayan bendisyon! No naandi lay ipapatey, anggapo met lay manunan sengegan na akis, ermen, pannangis tan ot-ot. Magmaliw lan perpekto so totoo tan sigpot la ran makapipulangan ed Dios.
16 Unong ed Apocalipsis 22:1, 2, wala ni kaaruman a bendisyon ya ipagamor na sarayan arin saserdote: “Impanengneng to ed siak so sakey ya ilog na danum na bilay, a malinlinew a singa kristal, ya onaagus manlapud trono na Dios tan trono na Kordero diad pegley na malapar a dalan na [Balon Jerusalem]. Tan diad biek tan biek na ilog et walaray kiew na bilay a labinduan danay a manbubunga ed kada taon, a binulan iratan a manbubunga. Tan saray bulong na saray kiew et pantambal ed saray nasyon.” Ipapanengneng na sayan pasingawey a say ag-inkaperpekton atawir na “saray nasyon,” odino katooan ed si Adan et sigpot a natambal. On, ‘saray datin bengatla et onlabas la.’
SUMPALEN NA SARAY ARIN SASERDOTE SO KIMEY DA
17. Anto so sumpalen na saray arin saserdote?
17 Diad sampot na 1,000 taon a panlingkor na saray arin saserdote, atulongan lay totoo a magmaliw a perpekto. Insan la ipresenta nen Kristo, say Atagey a Saserdote tan Ari, so perpekton katooan ed si Jehova. (Basaen so 1 Corinto 15:22-26.) Diad satan et sigpot lan asumpal na saray arin saserdote so kimey da.
18. Sano asumpal la na saray kaiba nen Kristo so kimey da, anto ni pangusaran nen Jehova ed sikara?
18 Kayari na satan, anto ni pangusaran nen Jehova ed saray apribilehyoan a kaiba nen Kristo? Unong ed Apocalipsis 22:5, “manuley ira lawas bilang arari ed andi-anggaan.” Diad siopa? Anggapoy ibabaga na Biblia. Balet, lapud impanbilay tan eksperiensya ran impanulong ed agperpekton totoo, sarasarag day mantultuloy a manari tan pausar ed si Jehova pian sumpalen so linawa to ed andi-angga.
19. Anto so nipanonot ed saray onatendi ed Memoryal?
19 Sano selebraan tayo so Memoryal na impatey nen Jesus no Huebes, Abril 5, 2012, nipanonot ed sikatayo irayan bangat na Biblia. Saray akeran alanaan a Kristiano a wadia nid dalin so mangan na andi-lebaduran tinapay tan oninum na ambalangan alak, a pakapatnagan ya kabiangan ira na balon sipanan. Sarayan simbolo na bagat nen Kristo so mangipanonot ed marakdakep a pribilehyo tan responsabilidad da diad agmanganggan gagala na Dios. Komon ta onatendi itayon amin ed Memoryal tan pisalsalamatan so intarya nen Jehova a Dios—saray arin saserdote a mangunggonad amin a totoo.
[Tepetepet Parad Panagaral]
[Litrato ed pahina 29]
Ipagamor na saray arin saserdote iray agmanganggan bendisyon ed totoo
