A Remlengilt el King el Mo Uchul a Klungiolel a Klechad

MORELII

A Remlengilt el King el Mo Uchul a Klungiolel a Klechad

“Ngdi kemiu a mlengilt el rasech, e king el priist, el chedaol renged, e chad el bereked ra Dios.”—1 PETRUS 2:9.

NGSEBECHEM EL MESAOD?

Ngoingerang e ngmlo er ngii a telbiil el kirel a cheldellir a remo king e prist?

Ngmekerang a beches el telbiil e toketekii a cheldellir a remo king e prist?

Tirka el king e prist te mo msang a klechad a ngera el klungiaol?

1. Ngera uchul me a “blsoil ra Rubak” a dirrek el okedongall el Chedaol el Blsoil, e ngerang a moktek er tia el tekoi?

NGAR sel kesus er a Nisan 14 er a rak er a 33, e a Jesus Kristus me tirke el 12 el apostol er ngii a milengedaol er a mlo ulebongel el Baskua er tir. Me a uriul er a lorael ngike el cheblad el Judas Iskariot, e a Jesus a ulechotii a ta er a ileakl el tekoi, el mle kirir el melemolem el meruul er ngii el okedongall el “blsoil ra Rubak.” (1 Korinth 11:20) A Jesus a mle eru el taem el lolekoi el kmo: “Me moruul el uaisei el kirel lomekltkiu er ngak.” E tiang a domekedong er ngii el Chedaol Blsoil, el ngii a omeltked el kirel a kodellel a Jesus. (1 Korinth 11:24, 25) Me ngoeak a blekongesenges er a Resioning er a Jehovah el kirel tia el omellach, e te meruul er a Chedaol el Blsoil er a bek el rak. Me ngngar er a rak er a 2012, e a doltirakl er a Nisan 14 er a kalender er a Biblia, e ngomuchel er a ngeltel a sils er a Ongeua el Ureor, el April 5.

2. Ngera ngdilu Jesus el kirel a klekedall el luluusbech?

² A disaiplo el Lukas a meketakl aike el tekoi el lurruul me a ledilung a Jesus el kmo: “E ngiluu a blauang, e oldanges e rukemii e mesterir ar Ubengkel, e dmu el kmo, ‘Tia bedengek el kiriu el kbeskemiu. Me ko mo meruul el uaisei el omekltkiu er ngak.’ E uriul ra blsoil e ngdirrek luleuaisei ra kob, e dmu el kmo, ‘Tial kob a beches el telbiil el krellii el oeak a rsechek, el mo moitel el kiriu.’” (Lukas 22:19, 20) Te milekerang a rechapostol e mo medengei a belkul aika el tekoi?

3. Nguleak a ngera el rolel e a rechapostol a mlo medengei a belkul aike el klekedall er a chedaol el blsoil?

³ A rechapostol a mle chad er a Judea a uchul me te mle medengelii a rolel a omelenget el charm el lurruul a reprist er a templo er a Dios el ngar er a Jerusalem. A chouaika el tenget a mileketmokl me bo el sebechir el nguu a kengei er a Jehovah, e a oumesingd er ngii a tenget el kirel el melubet a kngterir a rechad. (Levitikus 1:4; 22:17-29) Me a rechapostol a mle medengei el kmo sel taem er a lolekoi a Jesus el kmo a bedengel me a rsechel a lebesterir el ‘mo moitel el kirir,’ e ngbelkul a kmo ngmo tongetengii a cherrungel el klengar er ngii el mo tenget. Ngii el tenget a kmal mo klou a belkul, e diak a ngii di el charm el sebechel el mo mekesiur.

4. Ngera mle belkul a tekingel a Jesus er a ledu el kmo: “Tial kob a beches el telbiil el krellii el oeak a rsechek”?

⁴ E kuk mekerang a tekingel a Jesus el kmo “tial kob a beches el telbiil el krellii el oeak a rsechek?” A rechapostol a mle medengelii a ulaoch el kirel tia el beches el telbiil, el llechukl er a Jeremia 31:31-33. (Monguiu.) A tekingel a Jesus a mileketeklii el kmo ngmocha temel el olecholt er a beches el telbiil, el ngii a mo omtechei er a Llach er a telbiil el Jehovah a kiltmeklii el kirir a rechad er a Israel el ulekiu a Moses. Me aika el eru el telbiil ngmelisiich er a ta el tekoi?

5. Tia el Llach er a telbiil ngmilsterir a rechad er a Israel a ngera el techall?

⁵ Nguaisei, aika el eru el telbiil a melisiich er a ta el tekoi. Sera leketmeklii tia el Llach er a telbiil, e a Jehovah a dilu er a renged er a Israel el kmo: “A lsekum kom mo olengesenges er ngak e olab a telbilek, e kom mo meral chedak. A beluulchad el rokir a kloklek, e ngdi kemiu a mo ngellitel chedak. Kom mo chimol beluu el prist el mo mesiou er ngak, el cheledaol el di kirek.” (Exodus 19:5, 6) Me ngmlo ngera belkul aika el tekoi el kirir a rechad er a Israel?

A TELBIIL EL KIRIR A RE “KING EL PRIIST”

6. Ngera el telbiil a mle kirel a Llach el olengeseu el oltaut er ngii?

⁶ A rechad er a Israel a mle medengei el kmo ngngera belkul a “telbiil,” e le Jehovah a dirrek el mirruul a telbiil er a irechar el lobengkel a Noah me a Abraham. (Genesis 6:18; 9:8-17; 15:18; 17:1-9) Nguldimukl er sel telbiil el lekiltmeklii a Jehovah el mo er a Abraham, e ngtilbir el kmo: “Ngoeak a tane er kau e a rokui el renged er a beluulechad a mo mukngeltengat.” (Genesis 22:18, New World Translation) A Jehovah a kiltmeklii a Llach er a telbiil el kirel el olengeseu el mo oltaut er tia el telbilel. Me ngoeak ngii el telbiil, e a rechad er a Israel a mo ‘kloklel’ a Jehovah el ngellitel el chedal. Me ngngerang a moktek er tia el tekoi? Ngbelkul a kmo te mo “chimol beluu el prist” er a Jehovah.

7. Ngerang a mle belkul a tekoi el “chimol beluu el prist”?

⁷ A rechad er a Israel a mle medengei a tekoi er a kleking me a kleprist, engdi a Melkisedek a di mle ta el chad er a irechar el ullab aika el eru el deruchall er a osisiu el taem, el Jehovah a kilengei er ngii. (Genesis 14:18) Ngokiu a Llach er a telbiil, e a Jehovah a milsang a techellel a renged er a Israel el mo oltobed er a remo “chimol beluu el prist.” Me a Bades a mesaod el kirir tirka el ngellitel el kmo te mo ngmai a deruchellir el ua king e prist er a osisiu el taem.—1 Petrus 2:9.

8. Ngerang a ngerechelir a reprist el tir a mla metutk er a Dios?

⁸ A deruchellel ngike el chad el mo king a mo mengedereder er a renged. Engdi ngngerang a ngerechelel a prist? A Hebru 5:1 a smodii el kmo: “Ar bek el ngarbab el priist a mlengilt ra chelsir ar chad el meltutk el mo mesiou ra Dios el kirir ar chad, el kirir loldars a tenget ma tenget el charm el kirel a klengit.” Me a prist el bla lengiltii a Jehovah a kirel el omtechei er a rengar er a klengit el chad er medal a Dios el okiu sel loruul a tenget, e loluluuch el mo er a Dios el kirir. Ngdirrek el ngerechelel a prist el mengedecheduch er a Dios el kirir a rechad, e omekrael er tir el mo oltirakl a llechul a Dios. (Levitikus 10:8-11; Malakai 2:7) Me ngoeak aikaikid el rolel, e a prist el metutk er a Dios a mo olengeseu er a rechad me ngmo er ngii a ileakl el deleuill er tir el obengkel a Dios.

9. (a) Ngoeak a ngera el blekeradel, e ngmle sebechir a rechad er a Israel el mo medengelii a telbiil el kirel a “chimol beluu el prist”? (b) Ngera uchul me a Jehovah a miluchelii a kleprist er a chelsel a renged er a Israel? (c) Ngera sel milerrob er a rechad er a Israel me ngmo diak el sebechir el oltobed er a “chimol beluu el prist” el ngar er a cheungel a Llach er a telbiil?

⁹ A Llach er a telbiil a milsterir a rechad er a Israel a techellir el mo oltobed er a remo king e prist el mo uchul a klungiolel a “beluulchad el rokir.” Engdi ngmla er ngii a tekoi el kirir a rechad er a Israel el meruul er ngii, me bo el sebechir el nguu tia el kmal ileakl el techall. A Dios a dilu el kmo: “A lsekum kom mo olengesenges er ngak e olab a telbilek.” A rechad er a Israel ngmle sebechir el ‘olengesenges er [a Jehovah]’? Ngmle sebechir. Ngmle sebechir el cherrungel el olengesenges? Ngdimlak. (Rom 3:19, 20) Tiaikid a uchul me a Jehovah a tileketekii a cheldellir a reprist el mo mesiou er a rechad er a Israel. Tirka el prist a dimlak losiou el ua king. Te millenget a charm el kirel a kngterir a rechad. (Levitikus 4:1–6:7) E aika el klengit a dirrek el uldimukl er a kngterir a reprist. (Hebru 5:1-3; 8:3) Me a Jehovah a kilengei a chouaika el tenget, engdi ngdimlak el cherrungel el mengubet a kngterir a rokui el chad er a Israel. Me a kleprist el ngar er a cheungel a Llach er a telbiil a dimlak el sebechel el churrengelii a deleuill er a remelemalt a rengrir el chad er a Israel el mo obengkel a Dios. A apostol el Paulus a kmo: “Ele ngkmal diak el sebechel a rsechel a sechal karbou ma kaming el choroid a klengit.” (Hebru 10:1-4) Me tirka el chad er a Israel a millemall a Llach a uchul me te mildebeakl. (Galatia 3:10) Me ngoeak tiaikid el blekeradel e ngdiak el sebechir el mesiou el ua king e prist.

10. Me ngngerang a mle moktek er a Llach er a telbiil?

¹⁰ Tia diak el belkul a kmo a rechad er a Israel a dimlak a techellir el mo mengilt el mo “chimol beluu el prist” el ua letilbir a Jehovah. A lsekum te millemolem el olengesenges e ngmle sebechir el nguu tia el techall el dimlak lokiu a Llach. E ngera uchul? (Monguiu er a Galatia 3:19-25.) Me a bo dungil el medengelii a belkul tiang, e ngkired el mo medengelii a moktek er a Llach er a telbiil. A Llach a mle sebechel el omekerreu er a rebekongesenges el chad er a Israel er a ngii di el klsuul el omengull. Ngmle sebechel el rulleterir a Rechijudea el mo melechesiu a kngterir e bo lodengelii a klungel a ultutelel a lmuut el ngarbab el tenget er a ngii di el tenget el lolenget a reprist. E tiang a mle osisechakl el ulemekrael er tir el mo er a Kristus me a lechub a Messias, el ngii a dui el belkul a kmo “Ngike el Ngellitel.” Me nguaisei, engdi sel lemei a Messias e ngmo toketekii a beches el telbiil el lulemlaoch er ngii a Jeremia. Me tirke el kilengei el oltirakl er a Kristus a mo chedal sel beches el telbiil e dirrek el mo “chimol beluu el prist.” Ka me bo dosaod er ngii.

A RECHEDAL A BECHES EL TELBIIL A MO KING E PRIST

11. Ngmilekerang a Jesus e mo uchetemel sel cheldellir a reking e prist?

¹¹ Ngar er a rak er a 29, e a Jesus er a Nazareth a mlo Messias. Ngmle bekord el 30 a rekil, er sera lekengei el mo meruul a soal a Jehovah e bo letengetengii a klengar er ngii el okiu a techolb. A Jehovah a ulemekedong er ngii el “betik ra renguk el Ngelekek,” e chileltii el dimlak lousbech a cheluch e ngbai uleak a oureor el klisichel. (Matteus 3:13-17; Rellir 10:38) A Dios a chileltii a Jesus me ngmlo Ngarbab el Prist e dirrek el mo King er a ngar medad el klebesei el mo uchul a klungiolir tirke el rokui el oumerang er ngii. (Hebru 1:8, 9; 5:5, 6) Me ngmlo uchetemel sel cheldellir a reking e prist.

12. Ngera el tekoi a mlo sebechel el meketmokl el tengetengel a Jesus a uchul?

¹² Ngera el tenget a mle sebechel a Jesus el ngii a Ngarbab el Prist el mo kutmeklii me bo el ngebetii a blsel a klengit el kirir tirke el oumerang? A tekoi el ledilung a Jesus er sera longetmokl er a Chedaol el Blsoil el kirel a kodellel, a sebechel el ngosukid el mo medengei el kmo tia el cherrungel el klengar er ngii a mlo tenget. (Monguiu er a Hebru 9:11, 12.) Sera lemechilt el mo Ngarbab el Prist e ngkilengei el mo mukringel e measem el mo lmuut er a kodall. (Hebru 4:15; 5:7-10) Me a uriul er a lebekiis er a kodall, e ngmlo er a eanged el odersii a mekreos el tengetengel el mo er a Jehovah. (Hebru 9:24) Me ngulemuchel er sel taem, e a Jesus a mlo sebechel el “meluluuch” el mo er a Jehovah el kirir tirke el loumerang er a tengetengel. Me ngmlo sebechel el ngosuterir el mo mesiou er a Dios el oba omelatk el mo nguu a diak a ulebengelel el klengar. (Hebru 7:25) Me tia el tengetengel a dirrek el mlo smisichii tia el beches el telbiil.—Hebru 8:6; 9:15.

13. Ngera mo duubech el kirir tirke el teloi er a beches el telbiil?

¹³ Tirke el teloi er a beches el telbiil a dirrek el mechilt el okiu a oureor el klisichel a Dios. (2 Korinth 1:21) A reblak a rengrir el Rechijudea me a Rechisentael a dirrek el mle uldimukl er tir. (Efesus 3:5, 6) Me ngngera mo duubech el kirir tirke el teloi er a beches el telbiil? A kot, e te mo nguu a cherrungel el klausubes el kirel a kngterir. A Jehovah a tilbir el kmo: “Ak mo ousubes a kngterir e dikea bo kulatk a chelebirukel el le riruul.” (Jeremia 31:34) E a ongerung, e chelecha el bla lousubes a kngterir a Jehovah, e ngmocha sebechir el mo “chimol beluu el prist.” A Petrus a dilu er a rengellitel el Kristiano el kmo: “Kemiu a mlengilt el rasech, e king el priist, el chedaol renged, e chad el bereked ra Dios, el kirel me momerk a chetengel chomerellel ngikel milekedongemiu era ilkolk losisebemiu ra mengasireng el llemesel.” (1 Petrus 2:9) A apostol el Petrus a milluches aike el tekoi el luluusbech a Jehovah er sera leketmokl a Llach el mo er a rechad er a Israel. Ngar tiaikid e a Petrus a ulemelekl aika el tekoi el melutk el kirir a Rekristiano el tir a teloi er tia el beches el telbiil.—Exodus 19:5, 6.

A REKING E PRIST A MO UCHUL A KLUNGIOLEL A KLECHAD

14. Me tia el cheldellir a reking e prist ngmo omuchel el oureor er ker?

¹⁴ Me tia el cheldellir a reking e prist ngmo omuchel el oureor er ker? Ngar er tia el chutem, e te mo mesiou el ua prist el omtechei er a Jehovah er mederir a rechad, el oeak sel ‘lomerk a chetengel chomerellel,’ e dirrek el oltobed a suobel el kirel a klemedengei er a Dios. (Matteus 24:45; 1 Petrus 2:4, 5) E a uriul er a lemad e lebekiis er a kodall, e ngmocha sebechir el cherrungel el oureor el king e prist el obengkel a Kristus el ngar er a eanged. (Lukas 22:29; 1 Petrus 1:3-5; Chocholt 1:6) A ues el lilsang a Johanes a lmuut el osichii tia el tekoi e le ngulemes er a rebetok el anghel el kmeed er a bita er a kingellel a Jehovah el ngar er a eanged. Ngar er a “beches el chelitakl” el mo er a “Ngelekel a Sib,” e te milengitakl el kmo: “E ngila rsechem el ulemchar rar chad ra chelsel a bek el kebliil rar chad, ma chomelekoi, ma bliongel rar chad, ma renged el kirel a Dios, e rirelleterir el mo rengedel a king e priist el kirel a Dios er kemam, me te mo mengedereder ra belulechad.” (Chocholt 5:8-10) Ngar sel mlo uriul el ues el lilsang a Johanes, e ngmillekoi el kirir tirka el mengedereder el kmo: “Te bai mo priist ra Dios ma Kristus, e obengkel a Kristus el mengedereder era ikel tal telael rak.” (Chocholt 20:6) Sel bo lobengkel a Kristus, e te chudelii a cheldebechel er a reking me a reprist el mo uchul a klungiolel a klechad.

15, 16. Tirka el king e prist te mo msang a klechad a ngera el klungiaol?

¹⁵ Ngera el klungiaol a bo lengai tirke el 144,000 el mesterir tirke el ngar tia el chutem? A Chocholt er a 21 el bliongel a mesaod er tir el ua Beches el Jerusalem el mats el ngar er a eanged, el okedongall el “bechil a Ngelekel a Sib.” (Chocholt 21:9) A bades er a 2 el mo er a 4 a kmo: “E milsa chedaol mats, el Beches el Jerusalem el tilobed ra Dios e metengel ra eanged, el mle ua blsiochel hanayome el kldmokl el kirel a bechil; e rirengesii a kloul ngor el mlara kingall el melekoi el kmo, ‘Mesang, a blil a Dios chobenterir ar chad. Me ngii me ngmo obenterir el kiei, me te mo chad er ngii, ma Dios a di ngii el mo obenterir; e mo mesuld a bek el iuosech ra mederir, e mo diak a kodall, ma klengiterreng ma langel ma ringel me ngmo diak, ele ngmla nguemed a ikel dimla ngarngii.’ ” Ngkol ua ngera el klengeltengat! Me a okngemedel a kodall a mo uchul e ngmo diak a langel me a klengiterreng me a ringel. E tiang a belkul a kmo a rechad a mengubet er a klengit e mo cherrungel e mo er ngii a ungil el deleuill er tir el obengkel a Dios.

¹⁶ Me a lmuut el omesodel a klengeltengat el mei el okiu tia el cheldellir a reking e prist a losaod er ngii er a Chocholt 22:1, 2 el kmo: “E ngiil anghel a ulechotii er ngak chomoachel el ralm ra klengar, el mellomes el ua kristal, el omaoch el tuobed era kingall ra Dios ma Ngelekel a Sib, el merael ra blngel sel kloul rael ra mats [er a Beches el Jerusalem]; e cherebita er ngiil omoachel a ngarngii a kerrekar ra klengar el ourodech a truich ma cherul bedengel a rodech, e ngiil rodech a bek el buil lourodech; e a llel ngiil kerrekar chomekungil a bek el renged.” Tia el ues a ochotii a rolel e aika el “bek el renged,” me a lechub e ngtelungalek er a klechad, a mengubet er a blsel a klengit el lengiluu er a Adam me te mo cherrungel. Ngklemerang el tekoi, ‘ele ngmla nguemed a ikel dimla ngarngii.’

A REKING E PRIST A CHURRENGELII A UREOR

17. Ngera el ureor a dirk kirir a reking e prist el mo churrengelii?

¹⁷ Ngar er a ulebongel er a 1,000 el rak el loruul er tia el ureor, e a reking e prist a mla ngosuir a klechad el mo er a chelerrungel. Me ngika el Ngarbab el Prist e King el Kristus a mo odersii a mla mecherrungel el telungalek er a klechad el mo er a Jehovah. (Monguiu er a 1 Korinth 15:22-26.) Me ngngar tiaikid el taem, e a reking e prist a mera el mla churrengelii a moktek er a urerir.

18. A uriul er a lecherrengelii a urerir a reking e prist, e a Jehovah ngmo ousbech er tir el mekerang?

¹⁸ Me a uriul er tiang, e a Jehovah ngmo ousbech er a cheldellir a reking e prist el mo meruul a ngerang? A doltirakl er a Chocholt 22:5, e ngmelekoi el kmo “te mo mengedereder el mo cherechar.” Te mo mengedereder er a rua techang? A Biblia a diak lolekoi el kirel tiang. Engdi a blekerdelel a klengar el lobang me a tekoi el bla bo lechelebangel e le tir el ullengeseu er a rediak el mecherrungel el chad, a mo uchul e ngsebechir el melemolem el king el lousbech er tir a Jehovah el oltaut a moktek er ngii el mo cherechar.

19. Tirke el rokui el mo er a Chedaol el Blsoil, te muklatk el kirel a ngerang?

¹⁹ Me sel bo dedak el mengetmokl er a Chedaol el Blsoil el kirel a kodellel a Jesus er a Ongeua el Ureor er a April 5, 2012, e kede mo melatk aika el osisechakl er a Biblia. Tia el di kesai el medechel el cheldellir a rengellitel el Kristiano er tia el chutem, a mo melai aike el klekedall el diak a omkukel el blauang me a bilong, el olechotel a kmo te chedal tia el beches el telbiil. Aikaikid el okesiul a tengetengel a Kristus a mo omeklatk er tir el kirel sel kmal ileakl el techall me a dirrek el ngerachel el tir a olab el ngar sel diak a ulebengelel el moktek er a Dios. Me kid el rokui el mo teloi er tir, bo el sebeched el oba klou el omereng el saul el kirel tia el cheldellir a reking e prist el lullilt er tir a Jehovah el mo uchul a klungiolel a klechad.

[Aike el Ker er a Suobel]

[Siasing el ngar er a 31 el llel]

A reking e prist a mo uchul a diak a ulebengelel el klungiolel a klechad

A ONGKERONGEL