“Qankunaqa Diospa ajllakusqan ayllu kankichej [...] [reyes, sacerdotestaq, NM] juchamanta tʼaqasqa nación, Diospa rantikusqan ayllu.” (1 PED. 2:9.)

1. ¿Imaraykú “Señorpa Cenan[ta]”, Jesuspa Wañuyninta Yuyarinapaq tantakuy sutiwan riqsikullantaq?

JESUCRISTO, discipulosninwan 14 nisán 33 watapi judío Pascuata chay kutillataña ruwarqanku. Payqa, wasanchaq Judas Iscarioteta kachapuytawan, musuq ruwayta rikhurichirqa. Chaytataq “Señorpa Cenan[...]” sutiwan riqsikun (1 Cor. 11:20). Chay chʼisipi Jesús iskay kutita nirqa: “Kaytataj ruwaychej noqamanta yuyarikunaykichejpaj”, nispa. Chay musuq ruwayqa, Jesuspa Wañuyninta Yuyarinapaq tantakuy sutikullantaq (1 Cor. 11:24, 25). Jehovamanta sutʼinchaqkunaqa, Jesuspa kamachisqanta kasukuspa, sapa wata chayta ruwanku. Kay 2012 watapi Bibliap calendarionmanjina 14 nisán pʼunchayqa, jueves 5 abril pʼunchaypi inti yaykupusqantawan qallarinqa.

2. ¿Imatataq Jesús tʼantamanta, vinomanta ima nirqa?

² Jesús chay kuti imatachus ruwasqanta, nisqanta ima, Lucas iskay versiculospi jinata nin: “Tʼantatañataj oqharispa, Dios Tatanman graciasta qorqa, partispataj paykunaman jaywarqa. Pay nerqa: Kayqa cuerpoymin, qankunarayku qosqa. Kayta ruwaychej noqamanta yuyarikuspa, nispa. Jinallatataj, cenaytawankama copata oqharispa, nerqa: Kay copaqa yawarniypi mosoj tratomin, qankunarayku jichʼasqa” (Luc. 22:19, 20). ¿Imatá apóstoles chay nisqanmanta entiendenkuman karqa?

3. Tʼanta, vino ima imachus ninayasqanmanta, ¿imatá apóstoles entienderqanku?

³ Apóstoles judíos kasqankurayku, sacerdotes Jerusalenpa templopi uywa qʼulachinasta Diosman qusqankuta riqsirqanku. Chaykunataqa, Dioswan allinpaq qhawasqa kayta munaspa, achkha kutispitaq juchamanta perdonta mañakunankupaq quq kanku (Lev. 1:4; 22:17-29). Chayrayku apostolesqa, Jesús cuerponta qunanta, yawarnintataq paykunarayku jichʼananta  nispa, juntʼa runa kawsayninta jaywanatajina qunanta nichkasqanta entienderqanku. Chaytaq uywa wañuchisqa qʼulachinasmanta aswan valorniyuq kanan karqa.

4. ¿Imatá Jesús niyta munarqa “kay copaqa yawarniypi mosoj tratomin”, nispa?

⁴ ¿Ima nisunmantaq Jesús “kay copaqa yawarniypi mosoj tratomin” nisqanmanta? Apostolesqa musuq tratomanta profeciata riqsirqanku. Chaytaq rikhurin Jeremías 31:31-33 (leey). Jesuspa nisqanqa, chay kutipi musuq tratota rikhurichisqanta rikuchin. Chaytaq, Jehová Moisesniqta israelitaswan Leypa tratonta ruwasqanpa cuentanmanta yaykurqa. ¿Imapitaq chay iskay tratos rikchʼakurqanku?

5. ¿Imatataq Israel llaqta Leypa tratonniqta tarinman karqa?

⁵ Chay iskay tratosqa imapaqchus ruwasqa kasqankupi rikchʼakurqanku. Jehovaqa, Leypa tratonta rikhurichichkaspa israelitasman nirqa: “Sichus tratoymanta nisqasniyta uyarinkichej, kasunkichejtaj chayqa, noqapaj uj sumaj ayllu kankichej, tukuy ayllusmanta aswan sumaj, imaraykuchus noqajtamin tukuy jallpʼasqa. Tukuy qankunaqa kapuwankichej uj sumaj llimphuchasqa sacerdote aylluy” (Éxo. 19:5, 6). ¿Imataq chay rimaykuna israelitaspaq ninayarqa?

REYESTAQ SACERDOTESTAQ KANANKUTA NIKURQA

6. ¿Ima juntʼakunanpaqtaq Leypa traton yanaparqa?

⁶ Israelitasqa trato rimay imachus ninayasqanta entienderqanku. Imaptinchus Jehovaqa ñawpa tatasninku Noewan, Abrahanwan tratosta ruwarqaña (Gén. 6:18; 9:8-17; 15:18; 17:1-9). Jehová, Abrahanwan tratota ruwachkaspa nirqa: “Tukuy naciones kay pachapi kajkuna paykunanejta bendecisqa kanqanku”, nispa (Gén. 22:18). Leypa tratontaq chay nisqan juntʼakunanpaq yanaparqa. Chay tratopi nisqanmanjinaqa Israel llaqta Jehovapaq “uj sumaj ayllu[man tukunkuman karqa], tukuy ayllusmanta aswan sumaj”. ¿Imapaq? Jehovapaq “reyes, sacerdotestaq” kanankupaq.

7. ¿Imataq “reyes, sacerdotestaq” rimay niyta munarqa?

⁷ Israelitasqa reyesniyuq, sacerdotesniyuq ima karqanku. Chaywanpis Melquisedeclla Jehová saqisqanrayku chay tiempopi reytaq, sacerdotetaq karqa (Gén. 14:18). Kunantaq Jehovaqa, llaqtanman “reyes, sacerdotestaq” kayta atisqankuta nichkarqa. Qhipaman Diospa yuyaychasqan qillqasqas nisqankumanjinaqa, kayta niyta munarqa: reyestaq, sacerdotestaq kanankuta (1 Ped. 2:9).

8. ¿Imatá Diospa churasqan sacerdotes ruwanku?

⁸ Juk reyqa kamachinanpaq churasqa. Sacerdoterí, ¿imatataq ruwan? Hebreos 5:1 sutʼinchan: “Sapa kuraj kaj sacerdoteqa runas ukhumanta ajllasqa kaspa, churasqa kashan runaspa sutimpi ima ruwana kajta ruwanapaj. Payqa jaywanasta sutinkupi jaywan, jinallataj jucharayku uywa wañuchisqa qʼolachinastapis”. Kaypi ninjina, Jehovap churasqan sacerdoteqa juchasapa runaspa sutinpi Diospa ñawpaqinpi churakun, Leymanjina jaywanasniqtataq paykunapaq mañapun. Chantá Jehovap sutinpi llaqtap ñawpaqinpi sayan, Leyninmanta yachachispa. (Lev. 10:8-11; Mal. 2:7). Diospa churasqan sacerdotesqa, ruwasqankuniqta runasta Dioswan allinyachiyta maskʼanku.

9. a) Israel llaqta “reyes, sacerdotestaq” kanankupaq, ¿imatá ruwanan karqa? b) ¿Imaraykutaq Jehová Israel ukhupi sacerdotesta churarqa? c) ¿Imaraykutaq Israel llaqta Leypa traton ukhupi mana “reyes, sacerdotestaq” kayta atirqachu?

⁹ Leypa tratonqa, Israel llaqta reyes, sacerdotestaq kayta atisqankuta rikuchirqa, “tukuy ayllusmanta” kaqkunap allinninkupaq. Chayta taripanankupaqtaq Jehová kayta juntʼanankuta nirqa: “Sichus  tratoymanta nisqasniyta uyarinkichej, kasunkichejtaj chayqa”, nispa. Israelitas Jehovap nisqanta kasuyta, ¿atinkumanchu karqa? Arí, chaywanpis mana tukuy imapichu (Rom. 3:19, 20). Chaykamataq Jehovaqa Israel ukhupi sacerdotesta churarqa, mana kamachinankupaqchu, manaqa uywa wañuchisqa qʼulachinasta israelitaspa juchasninkurayku jaywanankupaq (Lev. 4:1–6:7). Sacerdotespa juchasninkumantawan jaywananku karqa (Heb. 5:1-3; 8:3). Jehovaqa chay jaywanasta allinpaq qhawaq, chaywanpis jaywaqkunap juchasninkuta mana chinkachinmanchu karqa. Leypa tratonpi kaq sacerdotesqa runasta, chiqa sunqu Israelitasta ima, Dioswan mana tukuy imapi allinyachiyta atirqankuchu. Pablo sutʼincharqajina “torospa, chivospa yawarninkoqa manapuni atinchu runaspa juchanta pampachayta” (Heb. 10:1-4). Astawanpis israelitas Leyta pʼakisqankurayku maldecisqas karqanku (Gál. 3:10). Ajinapi rikukuspa, runasta yanapanankupaq mana reyes, sacerdotestaq kayta atinkumanchu karqa.

10. ¿Imapaqtaq Leypa traton karqa?

¹⁰ Chantá Jehová israelitasmanta “reyes, sacerdotestaq” rikhurinanta nisqan, ¿qhasillachu karqa? Mana. Kasukunankupaq tukuy sunqu kallpachakuspaqa, atinkuman karqa, chaywanpis mana Ley ukhupichu. ¿Imaraykú? (Gálatas 3:19-25 leey). Leyqa, tukuy sunqu kasukuq israelitasta llulla yupaychaymanta jarkʼarqa. Chantapis judíos juchasninkumanta reparakunankupaq, kuraq kaq sacerdote jaywanasta qusqanmanta, aswan sumaq jaywanata necesitasqankuta entiendenankupaq ima yanaparqa. Chantá Cristoman chayri Mesiasman pusananpaq uywaqinku karqa, chay rimaykunataq “Akllasqa” niyta munan. Chaywanpis Mesías chayamuptinqa, Jeremías nirqajina musuq tratoman paykunata yaykuchinman karqa. Cristopi creeqkunaqa, musuq tratomanta kanankupaq waqyasqa kankuman karqa, ajinamantataq “reyes, sacerdotestaq” kankuman karqa. Qhawarina imaynatachus.

MUSUQ TRATO REYESTA, SACERDOTESTA IMA RIKHURICHIN

11. ¿Imaynamantá reyes, sacerdotes ima Jesuspi sayachisqa kananku karqa?

¹¹ Nazaretmanta Jesusqa 29 watapi Mesiasman tukurqa. Payqa 30 watasniyuqjina kachkaspa yakupi bautizakurqa. Chaywantaq imatachus Dios ruwananta munarqa chayta juntʼayta munasqanta rikuchirqa. Chaypi Jehová paymanta nirqa: “Kaymin ancha munasqa Chureyqa”, nispa. Chantapis mana aceitewanchu jawirqa, manaqa espíritu santowan akllarqa (Mat. 3:13-17; Hech. 10:38). Jesús ajina akllasqa kasqanrayku, paypi creeqkunapaq, Kuraq Kaq Sacerdote, Rey ima kanan karqa (Heb. 1:8, 9; 5:5, 6). Reyes, sacerdotes ima paypi sayachisqa kananku karqa.

12. ¿Imatataq Jesuspa wañuyninwan tarikun?

¹² Kuraq Kaq Sacerdote kaspa, ¿imatataq creeqkuna juchata herenciatajina japʼisqankuta chinkachinanpaq jaywanman karqa? Wañuyninta yuyarinankupaq kamachichkaptin payllataq juntʼa kawsayninta jaywananta nirqa (Hebreos 9:11, 12 leey). Jesusqa, 29 watapi bautizakusqanmantapacha Kuraq Kaq Sacerdotejina churasqa kaspa, juchaman tanqasqa, wañuyninkamataq wakichisqa karqa (Heb. 4:15; 5:7-10). Kawsarimuytawan, janaqpachaman kutispa, Jehovap ñawpaqinpi wañuyninpa valorninta rikuchirqa (Heb. 9:24). Chaymantapacha Jesusqa, Jehovap ñawpaqinpi wañuyninpi creeqkunap sutinpi parlayta, Diosta sirvispa wiñay kawsayta tarinankupaqtaq yanapayta atirqa (Heb. 7:25). Astawanpis wañuyninwan musuq tratota valechirqa (Heb. 8:6; 9:15).

13. ¿Imatá musuq tratoman waqyasqa kaqkuna suyarqanku?

¹³ Musuq tratomanta kanankupaq waqyasqa  kaqkunapis, espíritu santollawantaq akllasqas karqanku (2 Cor. 1:21). Ñawpaqta, chiqa sunqu judiostaraq japʼikurqa, chantá mana judío kaqkunata (Efe. 3:5, 6). ¿Imatá paykuna suyarqanku? Tukuy juchasninku pampachasqa kananta. Jehová kayta nirqaña: “Sajra ruwasqankuta pampachasaj, manañataj jaykʼajpis juchasninkumanta yuyarikusajchu”, nispa (Jer. 31:34). Jehová, juchasninkuta pampachasqanrayku “reyes, sacerdotestaq” kayta atirqanku. Pedro akllasqa cristianosman nirqa: “Qankunaqa ajllasqa ayllu kankichej, [...] [reyes, sacerdotestaq, NM], juchamanta tʼaqasqas, Diospa rantisqan ayllu, willanaykichejpaj paypa atiyninta; pichus laqhamanta wajyasorqachej sumaj kʼanchayninman”, nispa (1 Ped. 2:9). Chay kutipi Pedroqa, Jehová Leyta rikhurichichkaspa nisqanta nichkarqa. Chaytaqa musuq tratomanta cristianosmanña nirqa (Éxo. 19:5, 6).

REYES, SACERDOTES IMA TUKUY RUNASTA YANAPANQANKU

14. ¿Maypitaq reyes, sacerdotes ima sirvinku?

¹⁴ ¿Maypitaq musuq tratomanta kaqkuna sirvinku? Jallpʼapi, maypichus qutujina, Jehovap sutinpi sacerdotesjina runaspa ñawpaqinpi tʼukuna ruwasqasninmanta willanku, sumaq yuyaychaykunatataq mikhunatajina qunku (Mat. 24:45; 1 Ped. 2:4, 5). Wañupuspa kawsarimusqankutawanqa, Cristowan janaqpachapi reyesjina, sacerdotesjina ima sirvispa, iskaynin ruwanasninkuta allinta juntʼanku (Luc. 22:29; 1 Ped. 1:3-5; Apo. 1:6). Apóstol Juan musquypijina janaqpachapi Jehovap kamachina tiyanan qayllapi kawsaqkunata rikusqan, ajina kasqanta rikuchin. Chantá “Corderoj ñawpaqempi” juk “mosoj takiy[pi]” jinata takinku: “Yawarniykiwantaj Diospaj runasta ranterqanki tukuy ayllusmanta, tukuy laya parlaykunamanta, tukuy laya runamanta, tukuy nacionesmanta ima. Jinallataj paykunamanta uj reinota ruwarqanki, sacerdotestataj paykunata churarqanki Diosniykuta sirvinankupaj, kay pacha[ta]taj kamachenqanku”, nispa (Apo. 5:8-10). Juan wak musquypijina rikusqanpi chay kamachiqkunamanta nirqa: “Paykunaqa Diospata Cristojtawan sacerdotesninku kanqanku, paywantaj waranqa watasta kamachenqanku”, nispa (Apo. 20:6). Paykunaqa, tukuy runasta yanapanankupaq,  Cristowan khuska reyes, sacerdotes ima kanku.

15, 16. ¿Ima bendicionestá reyes, sacerdotestaq runaspaq apamunqanku?

¹⁵ ¿Ima bendicionestá 144.000 Jallpʼapi kawsaqkunaman apamunqanku? Apocalipsis capítulo 21 Musuq Jerusalenta, janaqpacha llaqtatajina rikuchin. Paykunataqa “Corderoj warminta[jina]” riqsikun (Apo. 21:9). Versículos 2–4 nin: “Rikullarqanitaj Diospa kachamusqan santo kaj llajtata, mosoj Jerusalenta, janaj pachamanta uraykʼamushajta, novia jina noviompaj kʼachanchasqatataj. Jinapi kamachina tiyanamanta sinchʼita qhaparejta uyarerqani: Kunanqa Diospa tiyakuynin runas ukhupi kashan, paytaj paykunawan khuska tiyakonqa. Runasqa paypa ayllun kanqanku, Diostaj paykunaj Diosninku kanqa. Payqa tukuy waqayta ñawisninkumanta pichanqa, manañataj wañuy kanqachu, nitaj waqaypis, nitaj qhapariypis, nitaj nanaypis, imaraykuchus ñawpaj kaj imasqa manaña kanqachu”, nispa. ¡Chaymá sumaq bendicionesqa! Wañuy chinkaptinqa, manaña waqay kanqachu, nitaq qhapariypis, nitaq nanaypis. Chiqa sunqu runastaq juntʼa runasman tukuchisqa kanqanku, tukuy imapi Dioswan allinyakuspa.

¹⁶ Apocalipsis 22:1, 2 reyes, sacerdotestaq, ima bendicionestachus apamunanmanta nin: “Kausaj yakuyoj chʼuwa mayuta rikuchiwarqa, cristal jina lliphipejta, Diospa trononmanta. Corderojmantawan llojsimushajta. Llajtaj plazan chaupipi [Musuq Jerusalenmanta], mayoj puraj chimpampitaj kausaj sachʼa kasharqa chunka iskayniyoj poqoyta qoj, sapa killa ujta. Sachʼaj laqhesnintaj nacionesta thañichinankupaj karqanku”. Juan musquypijina rikusqanqa, “naciones” chayri runamanta familias, Adanpa juchanta herenciatajina japʼisqankuta chinkasqata chinkachinanta rikuchin. Arí, ñawpaq kaq imasqa manaña kanqachu.

REYES, SACERDOTESTAQ RUWANANKUTA JUNTʼANQANKU

17. ¿Imatá reyes, sacerdotestaq juntʼanqanku?

¹⁷ Waranqa watasta sirvisqankutawan reyes, sacerdotestaq, runasta juntʼa runasman tukuchinqanku. Cristoqa Kuraq Kaq Sacerdotejina, Reyjina ima, chay juntʼa runasta Jehovaman jaywapunqa (1 Corintios 15:22-26 leey). Ajinamanta reyes, sacerdotestaq ruwanankuta juntʼanqanku.

18. Reyes, sacerdotestaq ruwanankuta juntʼasqankutawan, ¿imapaqtaq Jehová paykunata apaykachallanqapuni?

¹⁸ Chaymantapacha, ¿imata ruwanankupaqtaq Cristowan khuska llamkʼaqkunata Jehová apaykachanqa? Apocalipsis 22:5 nin: “Paykunaqa kamachenqanku wiñaypa wiñaynintimpaj”, nispa. ¿Pikunatá? Bibliaqa mana sutʼinchanchu. Chaywanpis ni jaykʼaq wañunankupaq kawsayta tarisqankurayku, chay tiempopi juchasapa runasta yanapaspa mayta yachakusqankurayku ima, munayninta ruwanankupaq Jehová wiñaypaq apaykachallanqapuni.

19. ¿Imapí Jesuspa Wañuyninta Yuyarinapaq tantakuchkaspa yuyasunchik?

¹⁹ Kay jueves 5 abril 2012 watapi Jesuspa Wañuyninta Yuyarinapaq tantakuchkaptinchik, kay Bibliap yachachiykunasninpi yuyasunchik. Jallpʼapi puchuq akllasqa cristianosqa, mana levadurayuq tʼantata mikhunqanku, vinotapis ukyanqanku. Chaytaq musuq tratomanta kasqankuta rikuchin. Chantá Cristop wañuyninwan ninakuq tʼanta, vino ima, Diospa wiñay munayninpi achkha ruwanasniyuq kasqankuta yuyarichinqa. Jehová reyesta, sacerdotesta ima tukuy runasta yanapanankupaq churasqanmanta, mayta agradecekusqanchikta rikuchinapaq, tukuyninchik Jesuspa Wañuyninta Yuyarinapaq tantakuyman rina.

[Tapuykuna]

[29 paginapi dibujo/foto]

Reyes, sacerdotestaq runaspaq wiñay bendicionesta apamunqanku