“Qankunan ichaqa ajllasqa ayllu kankichis, rey t’aqa sacerdotekuna, chuya runakuna, Diospaq rantisqa llaqta.” (1 PED. 2:9, Mosoq Rimanakuy [MR].)

1. ¿Imaraykun ‘Señorpa Cenanta’, Jesuspa Wañusqanta Yuyarina p’unchay nispa reqsikullantaq?

NISÁN killa 14 p’unchay 33 watapin, Jesucristo chunka iskayniyoq apostolninkunapiwan último kutita ruwarqan Pascua fiestata. Judas Iscariote ripusqan qhepatan huk mosoq celebracionta qallarichirqan, chaytan qhepaman reqsikurqan ‘Señorpa Cenan’ nispa (1 Cor. 11:20). Chay ch’isin iskay kutita Jesús nirqan: “Kaytan ruwankichis mikhuspa ñoqata yuyariwanaykichispaq”, nispa. Chay mosoq celebraciontan reqsillanchistaq Jesuspa Wañusqanta Yuyarina p’unchay nispa (1 Cor. 11:24, 25). Chayta kasukuspan Jehová Diospa Testigonkunaqa wañupusqanta sapa watan yuyarinku. 2012 watapiqa jueves 5 de abril Inti haykuytan, judiokunaq calendarionman hina 14 de nisán qallarin.

2. ¿Ima nirqanmi Jesús t’antamanta vinomantapas?

² Lucas pisillapi willan chay ch’isi Jesuspa rimasqanta ruwasqantapas, nirqanmi: “T’antata hap’ispataq, graciasta qospaña phasmirqan, hinaspan paykunaman qorqan: –Kayqa qankunarayku qosqa cuerpoymi [‘cuerpoytan representan’, NM], kaytan ruwankichis yuyariwanaykichispaq, nispa. Cenasqanmantañataqmi vinoyoq vasota hap’ispa nirqan: –Kay vinoyoq vasoqa yawarniywan cheqaqchasqa mosoq rimanakuymi, ñoqan yawarniyta qankunarayku hich’asaq”, nispa (Luc. 22:19, 20). ¿Imatan apostolninkuna chaywan entienderqanku?

3. ¿Imatan apostolkuna entienderqanku t’antapas vinopas imatachus representasqanmanta?

³ Jesuspa apostolninkunaqa judiotaq karqanku chayqa, yacharqankun sacerdotekuna Jerusalén templopi animalkunata sacrificasqankuta. Chay ofrendakunatan ruwaqku Diospa favorninta chaskinankupaq, huchankumanta pampachasqa kanankupaqwan (Lev. 1:4; 22:17-29). Chaymi Jesuspa cuerpon yawarninpas paykunarayku qosqa kananmanta uyarispa, apostolkunaqa entienderqanku kikin  ch’uya kawsayninta sacrificiopi qonanta. Chay ofrendaqa aswan valorniyoqmi kanan karqan, animalkuna haywasqanku sacrificiokunamantaqa.

4. ¿Imatan Jesús nisharqan: “Kay vinoyoq vasoqa yawarniywan cheqaqchasqa mosoq rimanakuymi”, nispa?

⁴ ¿Imatan Jesús nisharqan: “Kay vinoyoq vasoqa yawarniywan cheqaqchasqa mosoq rimanakuymi”, nispa? Apostolkunaqa yacharqankun Jeremías qelqapi tarikuq mosoq rimanakuymanta otaq mosoq contratomanta willaq profeciata (leey Jeremías 31:31-33). Jesuspa nisqanmi rikuchirqan mosoq contratota chay rato qallarichisqanta, chaytaq ñawpaq contratoq rantinpi kapurqan. Chaytan Dios ñawpaqpi Israel runakunawan ruwarqan Moiseswan kamachikuyninkunata qospa. ¿Hukllachasqachu kasharqanku chay iskaynin contratokuna?

5. ¿Imapaqmi ñawpaq contrato ruwakurqan?

⁵ Imapaqchus chay contratokuna ruwakusqanqa kaqllan karqan. Israel runakunawan contratota ruwaspan paykunata nirqan: “Kunanqa, kasuwaspaykichis rimanakusqaytapas hunt’ankichis chayqa, qankunan llapa llaqtakunamanta aswan chaniyoq llaqtay kankichis, ñoqaqmi lliw kay pachantinqa. Qankunan kamachinay [‘kamachiq’, NM] sacerdotekuna kankichis, ñoqapaq t’aqasqa llaqta”, nispa (Éxo. 19:5, 6). ¿Imatan chay simikunawan israelitakunata nisharqan?

REY T’AQA SACERDOTEKUNAMANTA PROMESA

6. ¿Ima promesa hunt’akunanpaqmi ñawpaq contrato yanaparqan?

⁶ Israelitakunaqa yacharqankuñan imachus huk contrato kasqanta, Jehová Diosqa ñan chhayna formal acuerdokunata ñawpaqpi Noewan Abrahamwan ruwasqaña (Gén. 6:18; 9:8-17; 15:18; 17:1-9). Abrahamwan rimanakuspan Jehová prometerqan: “Lliw kay pachapi suyukunataq mirayniykiwan saminchasqa kanqaku”, nispa (Gén. 22:18). Ñawpaq contratoqa yanaparqanmi chay hunt’akunanpaq. Chhaynapin Israel runakuna ‘llapa llaqtakunamanta aswan chaniyoq llaqtan kankuman’. ¿Iman chaymanta kanan karqan? Chay llaqtamantan Diospaq “kamachiq sacerdotekuna” paqarinan karqan.

7. ¿Ima ninanmi “kamachiq sacerdotekuna” nisqa simikuna?

⁷ Israelitakunaqa uyarirqankun reykunamanta sacerdotekunamantapas, ichaqa Melquisedecllan Diospa nisqanman hina, iskaynin ruwaypi llank’arqan (Gén. 14:18). Diosmi chay llaqtaman ofrecerqan paykunamanta “kamachiq sacerdotekuna” lloqsinanpaq. Qhepaman willaq qelqakunaq nisqanman hinaqa, chaywanmi nisharqan iskay ruwanayoq kanankuta, reytaq sacerdotetaq kanankumanta otaq “rey t’aqa sacerdotekuna” (1 Ped. 2:9, MR).

8. ¿Ima ruwaykunatan aparirqanku Diospa churasqan sacerdotekuna?

⁸ Huk reyqa kamachinanmi. Ichaqa, ¿imatan huk sacerdote ruwanan? Hebreos 5:1 willan: “Llapa uma sacerdotetaqa Diosmi runakuna ukhumanta akllaspa runakunaq rantinpi churan qayllanpi servinanpaq, ofrendakunatapas sacrificiokunatapas huchakunamanta haywananpaq”, nispa. Chhaynaqa, Diospa churasqan sacerdotekunaqa runakunaraykun Diosta rogakunku ofrendakunata haywaspa. Chaymantapas Diospa kamachikuyninkunatan llaqtaman yachachinku (Lev. 10:8-11; Mal. 2:7). Chaykunata ruwaspan sacerdotekunaqa runakunata Dioswan allipunachinku.

9. a) ¿Imatan israelitakuna ruwananku karqan paykuna ukhumanta “kamachiq sacerdotekuna” paqarinanpaq? b) ¿Imaraykun Dios Israel llaqtapi sacerdotekunata churarqan? c) ¿Iman hark’arqan Israel llaqtamanta “kamachiq sacerdotekuna” lloqsinanta?

⁹ Chhaynapin ñawpaq contratoqa Israel llaqtaman oportunidadta qorqan paykuna ukhumanta ‘llapa llaqtakunaq’ allinninpaq reykuna sacerdotekuna lloqsinanta. Ichaqa chay hunt’akunanpaqqa Diospa kay nisqantan  ruwananku karqan: “Kasuwaspaykichis rimanakusqaytapas hunt’ankichis chayqa”. ¿Atinkumanchu israelitakuna tukuypi Diospa kamachikuynin kasukuyta? Wakintaqa hunt’ankumanmi. Ichaqa manan llapantachu (Rom. 3:19, 20). Chayraykun Jehová Dios Israelitakunapaq sacerdotekunata churarqan, gobernante hina llank’aykunamanta sapaqchaspa. Chhaynapin israelitakunaq huchan pampachakunanpaq animalkunamanta sacrificiokunata haywarqanku (Lev. 4:1–6:7). Sacerdotekunaqa kikinkuq huchankumantawanmi haywananku karqan (Heb. 5:1-3; 8:3). Diosqa chaskirqanmi chay sacrificiokunata, ichaqa manan chayta haywaqkunaq huchanku llapanpiqa pampachakuyta atikurqanchu. Ñawpaq contratopi kaq sacerdotekunaqa manan Dioswan tukuypi allipunachiyta atirqankuchu ni hunt’aq sonqo israelitakunatapas. ¿Imarayku? Pabloq nisqan hina: “Torokunaq orqo cabrakunaq yawarnin huchankuta mana qechuyta atisqanrayku” (Heb. 10:1-4). Arí, Diospa kamachikuyninkuna p’akisqankuraykun israelitakunaqa ñakasqa karqanku (Gál. 3:10). Chhaynapi tarikushaspaqa manapunin kamachiq sacerdotekuna kayta atirqankuchu, ahinapi lliw runata yanapanankupaq.

10. ¿Ima ruwaytan hunt’arqan ñawpaq contrato?

¹⁰ Chhaynaqa, ¿yanqachu karqan Israel llaqtamanta “kamachiq sacerdotekuna” paqarinanta Diospa prometesqan? Manan. Kasukunankupaq kallpachakunkuman karqan chayqa, paykunapin chay promesa hunt’akunman karqan. Ichaqa manan Kamachikuy Simiwanchu chay ruwaytaqa atinkuman karqan. ¿Imarayku? (Leey Gálatas 3:19-25.) Tukuy sonqowan Kamachikuy Simita kasukuqkunapaqqa allinninkupaqmi karqan chay kamachikuykuna. Pantasqa yupaychayman urmanankutan hark’arqan, hinallataq huchallikuq kasqankuta reparachirqan, chayrayku uma sacerdoteq haywasqanmantaqa aswan allin sacrificio necesitasqankuta. kamachikuy simiqa wawa uywaq hinan karqan, chaytaq Cristoman otaq Mesiasman pusarqan, chay tituloqa “Akllasqa” ninanmi. Mesías chayamuspan ichaqa Jeremiaspa willasqan mosoq contratoman haykuchinan karqan. Cristota chaskiqkunaqa mosoq contratopi kanankupaqmi invitasqa kankuman. Chhaynapitaq ‘kamachiq sacerdotekunaman’ tukupunkuman karqan. ¿Imaynata? Qhawarisunchis.

¿IMATAN PAQARICHIN MOSOQ CONTRATO?

11. ¿Imaynatan Jesús qallarichirqan rey t’aqa sacerdotekunata?

¹¹ 29 watapin Nazaret llaqtayoq Jesús rikuchirqan Mesías kasqanta. 30 watayoq kashaspan Jesús unupi bautizakurqan Diospa munayninta hunt’ananpaq. Diosmi chay ruwasqanmanta nirqan: “Kaymi munakusqay Churiy”, nispa. Chaymantapas manan aceitewanchu hawirqan aswanpas santo espiritunwan hunt’aykuspan akllarqan (Mat. 3:13-17; Hech. 10:38). Diosqa Jesusta akllaspan Uma Sacerdote kananpaq churarqan, qhepamantaq kasukuq lliw runakunaq Reynin kananpaq (Heb. 1:8, 9; 5:5, 6). Chhaynapin Jesús qallarichirqan rey t’aqa sacerdotekunata.

12. ¿Ima ruwaytan atikurqan Jesuspa sacrificio qosqanwan?

¹² Uma Sacerdote kaspa, ¿ima sacrificiotan Jesús ruwanman kasukuq runakunaq huchan wiñaypaq pampachasqa kananpaq? Wañupusqan p’unchayta yuyarinankupaq Jesús kamachisqanpin nirqan ch’uya kawsaynin sacrificasqa kananpaq qosqanta (leey Hebreos 9:11, 12). 29 watapi bautizakuspa Uma Sacerdote kasqanmantapachan Jesusqa imaymana pruebakunapi tarikurqan, chhaynapin preparasqa karqan wañupunankama (Heb. 4:15; 5:7-10). Kawsarichisqa kaspataq hanaq pachaman ripuspa sacrificionpa valorninta Diospa ñawpaqenpi presentarqan (Heb. 9:24). Chaymantapachan Jesusqa Diospa ñawpanpi mañapuwanchis sacrificio ruwasqan iñiqkunarayku, yanapantaqmi wiñay kawsay suyakuyniyoq kaspa Diosta servinankupaq  (Heb. 7:25). Chaymantapas chay sacrificio ruwasqanmi mosoq contratota valechirqan (Heb. 8:6; 9:15).

13. ¿Imatan suyakurqanku mosoq contratopi kanankupaq invitasqa cristianokuna?

¹³ Mosoq contratopaq invitasqa kaqkunapas santo espiritunwanmi akllasqa karqanku (2 Cor. 1:21). Ñawpaqtan chay contratoman haykurqanku hunt’aq sonqo judiokuna, chaymantataq mana judiokuna (Efe. 3:5, 6). ¿Imatan suyakurqanku? Wiñaypaqmi huchankumanta pampachasqa kananku karqan. Diosmi prometerqan: “Ñoqan pampachasaq mana allin ruwasqankuta, manañataqmi yuyarisaqñachu huchankutapas”, nispa (Jer. 31:34). Chhaynata huchanku pampachasqa kaqtinmi paykunaqa “kamachiq sacerdotekuna” kapurqanku. Akllasqa cristianokunamanmi apóstol Pedro qelqarqan: “Qankunan ichaqa ajllasqa ayllu kankichis, rey t’aqa sacerdotekuna, ch’uya runakuna, Diospaq rantisqa llaqta, laqhayaqmanta sumaq kanchayninman waqyaqniykichispa musphay ruwasqankunata willanaykichispaq”, nispa (1 Ped. 2:9, MR). Chay kutipin Pedroqa willarqan israelitakunawan ñawpaq contratota ruwaspa Diospa rimasqan simikunata, chaytaq mosoq contratopi kaq cristianokunapi hunt’akusqanta (Éxo. 19:5, 6).

REYKUNA SACERDOTEKUNA LLIW RUNATA YANAPANQAKU

14. ¿Maypin servinkuman reykuna sacerdotekuna?

¹⁴ ¿Maypin servinkuman mosoq contratopi tarikuq cristianokuna? Kay pachapin, chaypin llapanku sacerdotekuna hina servinkuman runakunaq qayllanpi Diosta representaspa. Chhaynapin paymanta yachachinkuman espiritual mikhunatapas qonkuman (Mat. 24:45; 1 Ped. 2:4, 5). Wañupusqanku qhepaman kawsaripuspataq hanaq pachapi Cristowan kuska reykuna sacerdotekuna kashanku, chay iskaynin ruwayninkuta allinta hunt’aspa (Luc. 22:29; 1 Ped. 1:3-5; Apo. 1:6). Chaytan sut’inchan Diospa trononpi espíritu kawsayniyoqkunata hanaq pachapi Juanpa rikusqan. “Corderoq ñawpaqenpi” huk ‘mosoq takita takispan’ paykuna ninku: “Yawarniykiwanmi runakunata Diospaq rantirqanki lliw ayllumanta, rimaymanta, llaqtamanta, suyumantawan. Diosniykupaqmi paykunamanta qhapaqsuyuta ruwarqanki, sacerdotekunata churarqanki, chaymi kay pachapi  kamachikunqaku”, nispa (Apo. 5:8-10). Chay kamachikuqkunata huk rikhuriypi qhepaman rikusqanmantan Juan willan: “Diospa sacerdotenkunan Cristoq sacerdotenkunan kanqaku, Cristowantaqmi waranqa watata kamachikunqaku”, nispa (Apo. 20:6). Cristowan kuskan rey t’aqa sacerdotekunaqa lliw runata yanapamunqaku.

15, 16. ¿Ima bendicionkunatan reykuna sacerdotekuna apamunqaku?

¹⁵ ¿Ima bendicionkunatan kay pachaman apamunqaku 144.000 akllasqakuna? Apocalipsis 21 capitulon paykunata rikuchin mosoq ch’uya Jerusalén llaqtata hina, chaymantapas ‘Corderoq esposan’ nispan sutichan (Apo. 21:9). 2-4 versiculokunan nin: “Ñoqan rikurqani Diospa mosoq ch’uya Jerusalén llaqtanta Diospa qayllan hanaq pachamanta uraykamushaqta, casarakuqmasin waynapaq sumaq k’acha p’achasqa sipasta hina. Hinan kamachikuy tiyanamanta kunkayoq rimaqta uyarirqani: Kunanqa runakunawanñan Diosqa tiyan, paykunawantaqmi tiyanqapas. Paykunan llaqtan kanqaku, kikin Diostaqmi paykunawan kashanqa, Diosninkutaq kanqapas. Diosmi paykunaq ñawinkumanta tukuy weqeta pichanqa, manan wañuypas kanqañachu, manallataqmi llakikuypas, waqaypas, nanaypas kanqañachu, ñawpaqkaqkunaqa manaña kapusqanrayku”, nispa. ¡Ancha kusikunapaqmi chayqa! Wañuy manaña kapuqtinmi llakikuypas, waqaypas, nanaypas manaña kanqañachu. Kasukuq runakunataq Dioswan allipunaspa ch’uya kawsayman aypanqaku.

¹⁶ Apocalipsis 22:1, 2 texton astawan willan huk bendicionkuna apamunankumanta, ninmi: “Chaymantataq angelqa kawsay unuyoq mayuta rikuchiwarqan. Chaymi kasqa qespi hina sut’i illashaq, lloqsimushasqataq Diospa kamachikuy tiyananmanta Corderoq kamachikuy tiyananmantawan, llaqta hatun calle chawpinta. Mayuq ladopuranpitaq kawsay sach’a kashasqa, chay sach’an sapa killa ruruspa, chunka iskayniyoq kutita watapi rurusqa. Raphinkunataq suyukunaq qhaliyananpaq kasqa”, nispa. Kay rikch’anachiypi bendicionkunan ‘suyukunata’ otaq runakunata Adanpa saqesqan huchamanta qhaliyachiwasunchis. Arí, ñawpaqpi kaqkunaqa manañan kapunqañachu.

LLANK’AYNINKUTA HUNT’ANKU

17. ¿Ima ruwaytan qhepaman hunt’anqaku rey t’aqa sacerdotekuna?

¹⁷ Waranqa wata qhepatan rey t’aqa sacerdotekuna runakunata ch’uya kawsayman apaywan hunt’anqaku. Hinan Uma Sacerdote, Rey Cristo ch’uya kawsayniyoq runakunata Diosman qopunqa (leey 1 Corintios 15:22-26). Chhaynapin rey t’aqa sacerdotekunaqa llank’ayninkuwan tukunqaku.

18. Reykuna sacerdotekuna llank’ayninkuta hunt’asqanku qhepaman, ¿imapin paykunata Dios utilizanqa?

¹⁸ Chay qhepaman, ¿imapin Cristoq yanapaqninkunata Dios utilizanqa? Apocalipsis 22:5 texton nin: “Wiñay-wiñaypaqtaqmi kamachikunqaku”, nispa. ¿Pikunata? Bibliaqa manan willanchu. Ichaqa imayna kawsayniyoq kasqanku, huchayoq runakunata yanapaspa experienciayoq kasqanku iman allinpuni kanqa, paykunaqa chhayna allin puestopi kaspan Diospa munayninta hunt’ashallanqaku.

19. ¿Imapin yuyaykunanchis Jesuspa Wañusqanta Yuyarinapaq huñunakuyman rispa?

¹⁹ 2012 watapi Jesuspa Wañusqanta Yuyarinapaq huñunakuyman rispaqa chay yachachikuykunapi yuyaykusun. Kay pachapiraq kashaq akllasqa cristianokunaqa chay p’unchaymi mana levadurayoq t’antata mikhunqaku, vinotapas ukyanqaku, chaymi rikuchin mosoq contratopi kasqankuta. Jesuspa sacrificionmanta chay rikch’anachiykunan paykunata yuyarichinqa, Diospa munaynin hunt’akunanpaq sumaq llank’ay chaskisqankuta. Chhaynaqa, chay huñunakuyman risun lliw runaq allinninpaq rey t’aqa sacerdotekunata Dios qowasqanchismanta agradecekuspa.

[Tapuykuna]

[29 paginapi dibujo]

Rey t’aqa sacerdotekunan runakunapaq wiñay bendicionkunata apamunqaku