„Unu na ’wan spesrutu grupu sma di Gado teki, iya, wan grupu priester di o tiri leki kownu, wan santa pipel, wan pipel di de wan spesrutu gudu.’”​—1 PETR. 2:9.

1. Fu san ede sma e kari „a neti-nyanyan fu Masra” a Memrefesa tu? Fu san ede a fesa disi e hori?

NA A neti fu 14 Nisan fu a yari 33, Yesus Krestes nanga den 12 apostel hori a Dyu Paskafesa fu a lasti leisi. Baka dati Yesus taigi Yudas Iskariot, di ben de fu tori en, fu gowe. Di Yudas gowe, Yesus seti wan tra fesa. Bakaten a fesa disi kisi a nen „a neti-nyanyan fu Masra” (1 Kor. 11:20). Tu leisi Yesus taki: „Tan du disi fu memre mi”. Sma e kari a fesa disi a Memrefesa tu, fu di a e hori fu memre a dede fu Krestes (1 Kor. 11:24, 25). Yehovah Kotoigi na heri grontapu e hori a Memrefesa ibri yari soleki fa Yesus taki. Na ini 2012, a dei 14 Nisan na tapu a Bijbel kalender e bigin te son e dongo na fodewroko 5 april.

2. San Yesus taki fu a brede nanga a win?

² A disipel Lukas fruteri krin san Yesus du èn san a taki na a okasi dati: „A teki wan brede . . . , a taki Gado tangi, a broko a brede, dan a gi den apostel èn a taki: ’Disi wani taki mi skin di mi o gi, so taki unu kan feni bun. Tan du disi fu memre mi.’ Na so a du tu nanga a kan, baka di den nyan a neti-nyanyan. A taki: ’A kan disi wani taki a nyun frubontu di o seti te mi brudu o kanti trowe, so taki unu kan feni bun’” (Luk. 22:19, 20). San den apostel frustan fu den sani disi di Yesus taki?

3. Fa den apostel ben e si a brede nanga a win?

³ Fu di den apostel ben de Dyu, meki den ben sabi sani fu den ofrandi di den priester ben e tyari gi Gado na ini a tempel na Yerusalem. Den ofrandi dati ben de fu meki sani kon bun baka nanga Yehovah èn furu fu den ben de fu tapu sondu tu (Lef. 1:4; 22:17-29). Sobun, di Yesus taki dati a ben o ’gi en skin nanga en brudu, so taki den kan feni bun’, den apostel ben e frustan taki na  ofrandi di a ben o gi ben de en eigi libi di no ben abi sondu. Na ofrandi disi ben o warti moro iniwan fu den meti di sma ben e tyari leki ofrandi.

4. San Yesus ben wani sori di a taki: „A kan disi wani taki a nyun frubontu di o seti te mi brudu o kanti trowe”?

⁴ Ma san Yesus ben abi na prakseri di a taki: „A kan disi wani taki a nyun frubontu di o seti te mi brudu o kanti trowe”? Den apostel ben sabi a profeititori fu a nyun frubontu di skrifi na Yeremia 31:31-33. (Leisi en.) Den sani di Yesus taki sori taki a ben e seti wan nyun frubontu di ben o kon na ini a presi fu a Wètfrubontu di Yehovah ben seti nanga Israel nanga yepi fu Moses. San den tu frubontu disi abi fu du nanga makandra?

5. Sortu okasi den Israelsma ben abi di Yehovah seti a Wètfrubontu?

⁵ We, den tu frubontu disi seti fu a srefi sortu sani ede. Di Yehovah seti a Wètfrubontu, a taigi a pipel: „Efu unu e du finifini san mi taigi unu èn unu e hori mi frubontu, dan unu sa tron wan spesrutu gudu gi mi na mindri ala tra pipel, bika heri grontapu na fu mi. Unu sa tron wan kownukondre fu priester èn wan santa pipel gi mi” (Eks. 19:5, 6). San disi ben wani taki gi den Israelsma?

A PRAMISI TAKI SMA KAN TRON KOWNU NANGA PRIESTER

6. Sortu pramisi ben o kon tru nanga yepi fu a Wètfrubontu?

⁶ Den Israelsma ben sabi san a wortu „frubontu” wani taki, fu di Yehovah ben seti den sortu seryusu kruderi disi nanga Noa èn nanga Abraham di ben de afo fu den (Gen. 6:18; 9:8-17; 15:18; 17:1-9). Na ini a frubontu nanga Abraham, Yehovah pramisi: „Na yu bakapikin o meki taki ala den pipel fu grontapu man kisi blesi trutru, fu di yu arki mi” (Gen. 22:18). A Wètfrubontu ben yepi fu meki a pramisi disi kon tru. A frubontu disi ben o meki den Israelsma tron „wan spesrutu gudu gi [Yehovah] na mindri ala tra pipel”. Fu san ede den ben o tron dati? Fu di den ben o ’tron wan kownukondre fu priester gi Yehovah’.

7. San den wortu „wan kownukondre fu priester” wani taki?

⁷ Den Israelsma ben abi kownu nanga priester, ma nowan fu den ben du ala tu wroko na a srefi ten. A wan-enkri man na ini owruten di Yehovah ben gi pasi fu abi ala tu wroko na a srefi ten, ben de Melkiseidek (Gen. 14:18). Nanga yepi fu a Wètfrubontu Yehovah ben gi den Israelsma na okasi fu tron „wan kownukondre fu priester”. Bijbel buku di skrifi bakaten e sori taki den wortu disi wani taki dati sonwan fu den Israelsma ben o kisi na okasi fu de kownu nanga priester na a srefi ten.​—1 Petr. 2:9.

8. San wan priester di e wroko gi Gado e du?

⁸ A no de fu taki dati wan kownu e tiri. Ma san wan priester e du? Hebrewsma 5:1 e taki: „Ibri granpriester di den teki na mindri libisma, poti na wroko fu du a wroko fu Gado fu yepi libisma, so taki a priester disi kan tyari presenti nanga srakti-ofrandi fu tapu den sondu fu sma.” Sobun, wan priester di e wroko gi Yehovah e teki presi gi a pipel na fesi Gado. A e tyari ofrandi gi Yehovah fu begi en meki a gi a pipel pardon fu sondu. Boiti dati, wan priester e leri a pipel Gado wèt, fu di a e teki presi gi Yehovah na fesi a pipel (Lef. 10:8-11; Mal. 2:7). Na so wan priester di e wroko gi Yehovah e yepi a pipel fu kon bun baka nanga Gado.

9. (a) San den Israelsma ben musu du efu den ben wani kisi na okasi fu tron „wan kownukondre fu priester”? (b) Fu san ede Yehovah ben poti priester na ini Israel? (c) Fu san ede den Israelsma no ben kan tron „wan kownukondre fu priester” nanga yepi fu a Wètfrubontu?

⁹ Soleki fa wi si, dan a Wètfrubontu ben gi den Israelsma na okasi fu de kownu nanga priester di ben o tyari blesi kon gi „ala tra pipel”. Ma fu man kisi a bigi grani disi,  den ben musu du wan sani. Gado taigi den taki den ben musu ’du finifini san a taigi den’ èn den ben musu ’hori en frubontu’. Ma den Israelsma ben o man ’du finifini san Yehovah taigi den’? Iya, ma toku den ben e sondu ete (Rom. 3:19, 20). Fu dati ede Yehovah ben poti priester na ini Israel. Den priester no ben kan de kownu. Den ben e tyari ofrandi fu tapu den sondu di den Israelsma ben e du (Lef. 4:1–6:7). Den ben musu tyari ofrandi gi densrefi tu, fu di den ben e sondu tu (Hebr. 5:1-3; 8:3). Yehovah ben feni den ofrandi disi bun, ma nowan fu den ben kan puru sondu gi a pipel. Awinsi wan Israelsma ben e dini Gado nanga en heri ati, toku den sma di tron priester nanga yepi fu a Wètfrubontu, no ben man meki so wan sma kon bun dorodoro nanga Gado. Na apostel Paulus ben taki en so: „A brudu fu mankaw nanga bokoboko no man puru sondu” (Hebr. 10:1-4). Fu taki en leti, fluku ben kon na den Israelsma tapu srefi, fu di den no ben e gi yesi ala ten na a Wèt (Gal. 3:10). Sobun, den no ben kan de kownu nanga priester gi ala sma na grontapu.

10. Fu san ede a Wètfrubontu ben seti?

¹⁰ Ma disi wani taki dati na fu soso Yehovah pramisi taki den ben o tron „wan kownukondre fu priester”? Nôno. Efu den ben e du muiti nanga den heri ati fu gi yesi na en, den ben kan kisi na okasi disi ete, ma a no ben o de nanga yepi fu a Wètfrubontu. Fu san ede? (Leisi Galasiasma 3:19-25.) Fu man frustan disi wi musu sabi fu san ede a Wètfrubontu seti. A Wèt ben e yepi den Israelsma fu no anbegi falsi gado. A ben yepi den tu fu frustan taki den na sondusma èn taki den ben abi wan ofrandi fanowdu di ben warti moro leki den wan di a granpriester fu den ben e tyari. A Wèt ben de fu sreka den gi a Krestes, noso a Mesias di ben o kon. Krestes nanga Mesias wani taki „Salfuwan”. Te a Mesias ben kon kaba, a ben o seti wan nyun frubontu soleki fa Yeremia ben taki na fesi. Den sma di ben teki a Krestes ben kisi a kari fu de na ini a nyun frubontu, èn na den sma disi ben o tron „wan kownukondre fu priester”. Meki wi luku fa disi ben o pasa.

SMA FU A NYUN FRUBONTU O TRON KOWNU NANGA PRIESTER

11. Fa Yesus tron a fosiwan fu den sma di o tiri leki kownu nanga priester?

¹¹ Na ini a yari 29, Yesus fu Nasaret kon leki a Mesias. Na a ten dati a ben abi sowan 30 yari. A teki dopu na ini watra fu sori taki a ben de klariklari fu du den spesrutu sani di Yehovah ben wani en fu du. Yehovah ben taki dati Yesus na ’en lobi Manpikin’, dan a salfu en. A no salfu en nanga oli, ma nanga santa yeye (Mat. 3:13-17; Tori 10:38). Gado salfu Yesus so taki a ben kan de Granpriester èn Kownu na ini a ten di ben o kon. Na so a ben o man du bun gi iniwan sma di ben o bribi na ini en (Hebr. 1:8, 9; 5:5, 6). En ben o de a fosiwan fu a trutru grupu fu sma di ben o tiri leki kownu nanga priester.

12. San pasa fu di Yesus gi en libi leki ofrandi?

¹² Sortu ofrandi Yesus ben o man tyari leki Granpriester fu puru ala sondu fu den wan di e bribi na ini en? Soleki fa Yesus sori di a seti a Memrefesa fu a dede fu en, dan na ofrandi di a ben o tyari ben de en libisma libi di no ben abi sondu. (Leisi Hebrewsma 9:11, 12.) Sensi a dopu fu en na ini a yari 29, Granpriester Yesus gi pasi taki tesi miti en èn a teki leri te na a dede fu en (Hebr. 4:15; 5:7-10). Baka di a kisi wan opobaka èn a go na hemel, a go na fesi Yehovah èn a gi En a waarde fu na ofrandi di a tyari (Hebr. 9:24). Sensi a ten dati, Yesus kan taki nanga Yehovah gi den sma di e bribi na ini en ofrandi èn a kan yepi den fu dini Gado nanga a howpu fu libi fu têgo (Hebr. 7:25). Nanga yepi fu na ofrandi  fu en, a nyun frubontu seti tu.​—Hebr. 8:6; 9:15.

13. San ben o pasa nanga den sma di de na ini a nyun frubontu?

¹³ Den sma di kisi wan kari fu de na ini a nyun frubontu ben o salfu nanga santa yeye tu (2 Kor. 1:21). Den sma disi na den Dyu di tan dini Gado èn tra sma di no de Dyu (Ef. 3:5, 6). San ben o pasa nanga den sma di de na ini a nyun frubontu? Den ben o kisi pardon dorodoro fu ala den sondu fu den. Yehovah ben pramisi den: „Mi o gi den pardon fu den ogri sani di den du, èn mi no o memre den sondu fu den moro” (Yer. 31:34). Sobun, Yehovah ben o gi den pardon fu ala den sondu èn na so den ben o man tron „wan kownukondre fu priester”. Petrus ben skrifi gi den salfu Kresten: „Unu na ’wan spesrutu grupu sma di Gado teki, iya, wan grupu priester di o tiri leki kownu, wan santa pipel, wan pipel di de wan spesrutu gudu. Na so fasi unu kan fruteri na ala sei fu den kefalek moi fasi’ fu a sma di kari unu komoto na ini a dungru fu kon na ini en tumusi moi leti” (1 Petr. 2:9). Dyaso Petrus e taki san Yehovah ben taigi den Israelsma di a gi den a Wèt, èn a e gebroiki den wortu disi gi den Kresten di de na ini a nyun frubontu.​—Eks. 19:5, 6.

DEN SMA DI O DE KOWNU NANGA PRIESTER E TYARI BLESI KON GI ALA LIBISMA

14. Pe den sma di o tiri leki kownu nanga priester o du a wroko fu den?

¹⁴ Pe den sma fu a nyun frubontu o du a wroko fu den? Na grontapu den e wroko leki priester. Leki wan grupu den e teki presi gi Yehovah na fesi ala sma, fu di den e ’fruteri na ala sei fu den kefalek moi fasi fu en’ èn den e gi leri fu Bijbel di de leki nyanyan gi libisma (Mat. 24:45; 1 Petr. 2:4, 5). Baka a dede èn na opobaka fu den, den o de nanga Krestes na hemel èn den o du ala san kownu nanga priester musu du (Luk. 22:29; 1 Petr. 1:3-5; Openb. 1:6). Na apostel Yohanes sori taki disi de so, fu di a ben si dati na ini wan fisyun. A ben si wan tu yeye krosibei fu a kownusturu fu Yehovah na hemel. Na ini „wan nyun singi” den e taigi „a Pikin Skapu”: „Nanga yu brudu yu bai sma gi Gado, komopo fu ibri lo, tongo, pipel, nanga kondre. Na yu meki den tron wan Kownukondre èn yu meki den tron priester gi wi Gado èn den o tiri grontapu  leki kownu” (Openb. 5:8-10). Bakaten Yohanes kisi wan tra fisyun èn a taki fu den sma di o tiri leki kownu: „Den o de priester fu Gado èn fu Krestes, èn na ini den wán dusun yari, den o tiri leki kownu makandra nanga en” (Openb. 20:6). Makandra nanga Krestes den o tiri leki kownu nanga priester èn den o tyari blesi kon gi ala libisma.

15, 16. Sortu blesi den kownu nanga priester o tyari kon?

¹⁵ Sortu blesi den 144.000 kownu nanga priester o tyari kon gi sma na grontapu? Openbaring kapitel 21 e taki fu den leki den de wan foto na hemel di nen a Nyun Yerusalem èn a e kari den „a wefi fu a Pikin Skapu” (Openb. 21:9). Vers 2 te go miti vers 4 e taki: „Mi si a santa foto, a Nyun Yerusalem. A ben saka komopo fu Gado na ini hemel. Den ben sreka en leki wan trowmisi di ben meki ensrefi moi gi a man di ben o tron en masra. Ne mi yere wan tranga sten e komoto fu a kownusturu. A taki: ’Luku, a tenti fu Gado de na libisma. Gado o tan nanga den èn den o de en pipel. Gado srefi o de nanga den. A o figi ala watra puru na den ai èn dede no o de moro. Nowan sari, noso krei, noso pen no o de moro. Den fositen sani pasa kaba.’” Dati na moi blesi fu tru! Nowan watra-ai, sari, krei, nanga pen o de moro fu di dede no o de moro. Dan libisma no o abi sondu moro èn na so den o de bun dorodoro nanga Gado.

¹⁶ Openbaring 22:1, 2 e taki fu tra blesi di den kownu nanga priester disi o tyari kon: „A sori mi wan liba di ben abi watra di e gi libi. A watra ben krin leki dyamanti. A liba ben e lon komoto fu a kownusturu fu Gado èn fu a Pikin Skapu. A watra ben e lon leti na mindri a bradi strati fu a foto. Na ala tu sei fu a liba yu ben abi bon di e gi libi. Den bon disi ben e meki froktu twarfu tron wan yari, iya, den ben e gi froktu ibri mun. Den wiwiri fu den bon ben de fu dresi den pipel.” A fisyun disi e sori fa „den pipel” noso den difrenti grupu fu sma na grontapu o dresi dorodoro fu iniwan sani di a sondu fu Adam tyari kon gi den. Iya, na a ten dati „den fositen sani pasa kaba”.

DEN KOWNU NANGA PRIESTER O KLARI A WROKO FU DEN

17. San den kownu nanga priester o du te fu kaba?

¹⁷ Na a kaba fu den 1000 yari te den kownu nanga priester tyari blesi kon gi libisma, dan den libisma na grontapu no o abi sondu moro. Leki Granpriester nanga Kownu, Krestes o gi Yehovah den sma disi di no abi sondu. (Leisi 1 Korentesma 15:22-26.) Na a ten dati, den kownu nanga priester du ala san den ben musu du.

18. Fa Yehovah o gebroiki den kownu nanga priester baka te den du ala san den musu du?

¹⁸ Ma san Yehovah o du nanga den kownu nanga priester baka dati dan? Openbaring 22:5 e taki: „Den o tiri leki kownu fu têgo, iya, fu ala ten.” Ma suma den o tiri? Bijbel no e taki suma. Ma Yehovah o gebroiki den bun. Den o abi têgo libi, den no o man dede, èn den o abi ondrofeni fa fu yepi sondu libisma. Sobun, den o tan kownu èn Yehovah o tan gebroiki den fu têgo fu du san a abi na prakseri fu du.

19. San den sma di e kon na a Memrefesa musu hori na prakseri?

¹⁹ Te wi e kon makandra na a Memrefesa fu a dede fu Yesus na fodewroko 5 april 2012, dan meki wi hori den leri disi fu Bijbel na prakseri. A pikin grupu fu salfu Kresten di de na grontapu ete o nyan fu a brede èn den o dringi fu a win. Disi o sori taki den de na ini a nyun frubontu. A o memre den sortu bigi grani den abi èn sortu frantwortu den abi na ini ala san Gado o du fu têgo. Meki wi alamala go na a Memrefesa nanga furu warderi gi den kownu nanga priester di Yehovah Gado teki fu tyari blesi kon gi ala libisma.

[Aksi fu a tori disi]

[Prenki na tapu bladzijde 29]

Fu têgo den kownu nanga priester o tyari blesi kon gi libisma