Liurai no amlulik neʼebé lori bensaun ba ema hotu
“Imi mak suku ida neʼebé Maromak hili, imi amlulik raan liurai sira-nian, imi nasaun santu ida, Maromak nia povu rasik.”—1 PED 2:9.
1. Tanbasá mak ita bolu “Naʼi nia han-kalan” nuʼudar Memoriál? Tanbasá mak ita komemora ida-neʼe?
IHA kalan 14 Nisan, iha tinan 33, Jesus Kristu ho ninia apóstolu naʼin-12 selebra festa Páskua ema judeu nian ba dala ikus. Depois haruka tiha Judas Iscariotes sai, Jesus komesa hahú serimónia ida seluk neʼebé Bíblia bolu nuʼudar “Naʼi nia han-kalan”. (1 Kor 11:20) Jesus hatete dala rua ba sira: “Halo ida-neʼe hodi hanoin haʼu.” Ita mós bolu serimónia neʼe nuʼudar Memoriál, tanba ita hanoin filafali Jesus nia mate. (1 Kor 11:24, 25) Testemuña ba Jeová iha mundu tomak halo tuir Jesus nia mandamentu neʼe hodi komemora ninia mate iha tinan ida dala ida. Iha tinan 2012, loron 14 Nisan husi Bíblia nia kalendáriu komesa kuandu loro-matan monu iha loron-kinta, 5 Abríl.
2. Saida mak Jesus hatete kona-ba paun no tua-uvas?
2 Dixípulu Lucas hakerek kona-ba buat neʼebé Jesus halo no hatete iha tempu neʼebá, hodi dehan: “Kaer tiha paun hodi fó-agradese, nia silu hodi fahe ba sira dehan: ‘Neʼe haʼu-nia isin saran tanba imi; halo ida-neʼe hodi hanoin haʼu.’ Nuneʼe mós, han hotu tiha, nia halo hanesan ho kalis dehan: ‘Neʼe kalis moruk foun nian [“aliansa foun”, MF] iha haʼu-nia raan [neʼebé] nakfakar tanba imi.’” (Lc 22:19, 20) Oinsá mak apóstolu sira komprende Jesus nia liafuan sira-neʼe?
3. Oinsá mak apóstolu sira komprende Jesus nia liafuan kona-ba paun no tua-uvas?
3 Apóstolu sira hatene didiʼak ona kona-ba sakrifísiu animál nian neʼebé amlulik sira hasaʼe ba Maromak iha templu iha Jerusalém. Ema judeu sira hasaʼe sakrifísiu sira-neʼe tanba sira hakarak Jeová atu simu sira no fó perdua ba sira-nia sala. (Lev 1:4; 22:17-29) Tan neʼe, kuandu Jesus hatete katak ninia isin sei saran tanba sira, no ninia raan sei nakfakar tanba sira, apóstolu sira komprende katak Jesus sei fó ninia rasik nia moris neʼebé perfeitu nuʼudar sakrifísiu. Ninia sakrifísiu neʼe iha folin boot liu duké sakrifísiu animál nian.
4. Kuandu Jesus dehan: ‘Neʼe kalis aliansa foun nian iha haʼu-nia raan neʼebé nakfakar tanba imi’, liafuan neʼe katak sá?
4 Kuandu Jesus dehan: ‘Neʼe kalis aliansa foun nian iha haʼu-nia raan neʼebé nakfakar tanba imi’, liafuan neʼe katak sá? Apóstolu sira hatene liafuan neʼebé Jeremias fó-hatene nanis ona kona-ba aliansa foun neʼe. (Lee Jeremias 31:31, 33. *) Nuneʼe, Jesus nia liafuan hatudu katak agora aliansa foun neʼe sei troka ho aliansa Ukun-Fuan nian neʼebé Maromak halo ho povu Israel liuhusi Moisés. Entaun, aliansa Ukun-Fuan nian ho aliansa foun iha relasaun ruma ka lae?
5. Aliansa Ukun-Fuan nian fó oportunidade saida ba nasaun Israel?
5 Sin, aliansa rua neʼe atu kumpre buat neʼebé hanesan. Kuandu Jeová halo aliansa Ukun-Fuan nian ho nasaun Israel, nia hatete: “Se imi halo tuir ho loloos haʼu-nia liafuan no kaer metin ba haʼu-nia aliansa, imi sei sai duni povu neʼebé espesiál mai haʼu iha povu sira seluk nia leet, tanba mundu tomak haʼu-nian. No imi rasik sei sai reinu amlulik nian no nasaun neʼebé santu ba haʼu.” (Êx 19:5, 6) Oinsá mak ema Israel sira komprende liafuan sira-neʼe?
PROMESA KONA-BA REINU AMLULIK NIAN
6. Jeová halo aliansa Ukun-Fuan nian atu kumpre promesa saida?
6 Ema Israel sira hatene saida mak “aliansa”, tanba uluk Jeová halo ona aliansa ho Noé no mós ho Abraão. (Gên 6:18; 9:8-17; 15:18; 17:1-9) Nuʼudar parte husi aliansa ho Abraão, Jeová promete: “Liuhusi ó-nia bei-oan nasaun hotu iha rai sei hetan duni bensaun.” (Gên 22:18) Tan neʼe, Jeová halo aliansa Ukun-Fuan nian atu kumpre ninia promesa neʼe. Liuhusi aliansa neʼe, ema Israel bele sai Jeová nia ‘povu neʼebé espesiál iha povu sira seluk nia leet’. Tanbasá mak Jeová hakarak sira atu sai povu espesiál? Atu sira bele sai “reinu amlulik nian” ba Jeová.
7. Liafuan “reinu amlulik nian” katak sá?
7 Maski ema Israel hatene ona kona-ba liurai no amlulik sira, maibé sira hatene ema ida deʼit neʼebé Jeová simu nuʼudar liurai no mós amlulik iha tempu hanesan. Neʼe mak Melquisedec. (Gên 14:18) Liuhusi aliansa Ukun-Fuan nian, Jeová fó oportunidade espesiál ba ema Israel, neʼe mak atu hili ema husi nasaun Israel rasik atu sai “reinu amlulik nian”, katak atu serbí nuʼudar liurai no mós nuʼudar amlulik. Eskritura seluk mós koʼalia kona-ba ema sira neʼebé Jeová hili nuʼudar “amlulik raan liurai sira-nian”.—1 Ped 2:9.
8. Amlulik neʼebé Maromak hili halo serbisu saida?
8 Klaru katak liurai nia knaar mak atu ukun povu. Maibé, saida mak amlulik nia serbisu? Ebreu 5:1 esplika: “Amlulik boot ida-ida mai husi ema sira leet . . . atu hamriik iha ema sira-nia fatin iha Maromak futar oin, atu hasaʼe buat karan no sakrifísiu ba sala sira.” Ida-neʼe hatudu katak amlulik neʼebé Jeová hili, sira reprezenta povu iha Maromak nia oin hodi hasaʼe sakrifísiu atu husu Jeová fó perdua ba ema nia sala. Amlulik mós reprezenta Jeová iha povu nia oin hodi hanorin sira kona-ba Maromak nia ukun-fuan. (Lev 10:8-11; Mal 2:7) Iha dalan sira-neʼe, amlulik ajuda ema sala-naʼin atu bele hadame malu ho Maromak.
9. (a) Saida mak ema Israel presiza halo atu bele sai “reinu amlulik nian”? (b) Tanbasá mak Jeová hili ema balu atu sai amlulik iha povu Israel nia leet? (c) Tanbasá mak ema Israel la bele sai “reinu amlulik nian” iha aliansa Ukun-Fuan nia okos?
9 Aliansa Ukun-Fuan nian fó oportunidade ba ema Israel atu sai liurai no amlulik neʼebé lori bensaun ba “povu sira seluk”, ka nasaun sira seluk. Maibé atu ema Israel bele hetan oportunidade diʼak neʼe, sira presiza halo buat ruma. Jeová hatete: “Se imi halo tuir ho loloos haʼu-nia liafuan no kaer metin ba haʼu-nia aliansa.” Sira bele halo tuir Jeová “ho loloos” ka lae? Bele, maibé laʼós iha dalan neʼebé perfeitu. (Rom 3:19, 20) Tanba neʼe mak Jeová hili ema balu atu sai amlulik iha povu Israel nia leet. Amlulik sira-neʼe la serbí nuʼudar liurai, maibé sira hasaʼe sakrifísiu animál nian ba Jeová hodi husu perdua ba povu nia sala. (Lev 4:1–6:7) Sala neʼe inklui mós amlulik rasik nia sala. (Ebr 5:1-3; 8:3) Maski Jeová simu sakrifísiu sira-neʼe, maibé ida-neʼe la toʼo atu halakon ema Israel sira-nia sala. Tan neʼe, maski ema Israel balu serbí Jeová ho laran, maibé amlulik neʼebé iha aliansa Ukun-Fuan nia okos la bele ajuda sira atu hadame malu ho Jeová iha dalan neʼebé kompletu. Kona-ba ida-neʼe, apóstolu Paulo hatete: “Karau-aman no bibi-timur nia raan la bele kasu sala.” (Ebr 10:1-4) Tanba ema Israel la bele halo tuir buat hotu neʼebé Ukun-Fuan haruka, ida-neʼe sai hanesan malisan ba sira. (Gal 3:10) Iha situasaun hanesan neʼe, sira la bele duni serbí povu sira seluk iha mundu neʼe nuʼudar liurai no amlulik.
10. Oinsá mak aliansa Ukun-Fuan nian ajuda ema Israel?
10 Se nuneʼe, buat neʼebé Jeová promete ba ema Israel kona-ba “reinu amlulik nian”, ida-neʼe saugati deʼit ka lae? Lae, tanba se sira hakaʼas an atu halo tuir Jeová, sira bele sai parte husi “reinu amlulik nian”, maibé laʼós iha Ukun-Fuan nia okos. Tanbasá? (Lee Galasia 3:19-25.) Atu komprende kona-ba neʼe, ita presiza hatene oinsá mak aliansa Ukun-Fuan nian ajuda ema Israel. Ukun-Fuan neʼe ajuda ema Israel atu haketak an husi adorasaun neʼebé falsu. Ukun-Fuan mós ajuda sira atu rekoñese katak sira sala-naʼin no presiza sakrifísiu neʼebé diʼak liu fali sakrifísiu sira neʼebé amlulik boot hasaʼe. Ukun-Fuan nia serbisu mak ajuda sira atu simu Kristu, ka Mesias, katak “Ida neʼebé hetan kose-mina”. Maibé kuandu Mesias neʼe mosu mai, nia sei hahú aliansa foun neʼebé Jeremias fó-hatene nanis. Tan neʼe, ema neʼebé simu Kristu sei sai parte iha aliansa foun no sei sai “reinu amlulik nian”, ka ukun nuʼudar liurai no amlulik. Mai ita koʼalia kona-ba neʼe.
SAI LIURAI NO AMLULIK IHA ALIANSA FOUN
11. Oinsá mak Jesus loke dalan ba ema seluk atu sira mós bele serbí nuʼudar liurai no amlulik?
11 Iha tinan 29, Jesus husi Nazaré hetan batizmu no sai Mesias. Iha tempu neʼebá, nia maizumenus tinan 30. Jesus nia batizmu hatudu katak nia prontu atu halo tuir buat neʼebé Jeová hakarak ba nia. Kuandu Jesus hetan batizmu, Jeová hatete: “Ida-neʼe mak haʼu-nia Oan doben,” no kose mina ba Jesus ho espíritu santu. (Mt 3:13-17; Apos 10:38) Hodi nuneʼe, Jeová halo Jesus sai Amlulik Boot atu ajuda ema hotu neʼebé tau fiar ba nia, no Jeová mós fó knaar ba Jesus atu sai Liurai iha futuru. (Ebr 1:8, 9; 5:5, 6) Hodi hetan knaar sira-neʼe, Jesus loke dalan ba ema seluk atu sira mós bele serbí nuʼudar liurai no amlulik.
12. Jesus nia sakrifísiu lori buat diʼak saida deʼit?
12 Nuʼudar Amlulik Boot, sakrifísiu saida mak Jesus bele hasaʼe atu ema neʼebé tau fiar ba nia bele hetan perdua ba sala neʼebé sira hetan husi Adão? Hanesan Jesus rasik hatete kuandu nia hahú Memoriál atu komemora ninia mate, Jesus saran nia rasik nia moris neʼebé perfeitu. (Lee Ebreu 9:11, 12.) Husi tempu neʼebé Jesus sai Amlulik Boot kuandu nia hetan batizmu iha tinan 29, nia aprende buat barak no hetan babeur no terus oioin toʼo nia mate. (Ebr 4:15; 5:7-10) Depois nia moris hiʼas, nia saʼe ba lalehan no fó ninia sakrifísiu nia folin ba Jeová. (Ebr 9:24) Husi tempu neʼebá, Jesus bele “harohan” ba Jeová atu husu perdua ba ema neʼebé tau fiar iha ninia sakrifísiu, no bele mós ajuda sira atu serbí Maromak ho esperansa atu hetan moris ba nafatin. (Ebr 7:25) Jesus nia sakrifísiu mós halo aliansa foun sai folin duni.—Ebr 8:6; 9:15.
13. Saida mak akontese ba sira neʼebé hola parte iha aliansa foun?
13 Ema neʼebé hola parte iha aliansa foun, sira mós hetan kose-mina ho espíritu santu. (2 Kor 1:21, MF) Maski Jeová hili uluk ema judeu neʼebé laran-metin ba nia, maibé ikusmai nia mós hili ema husi nasaun seluk. (Ef 3:5, 6) Entaun, saida mak akontese ba sira neʼebé hola parte iha aliansa foun? Sira hetan perdua ba sira-nia sala iha dalan neʼebé kompletu. Jeová promete nanis kona-ba neʼe hodi dehan: “Haʼu sei perdua sira-nia sala, no haʼu sei la hanoin-hetan tan sira-nia sala.” (Jer 31:34) Tanba Jeová perdua ona sira-nia sala, sira bele sai “reinu amlulik nian”. Pedro hatete ba ema kristaun kose-mina sira: “Imi mak suku ida neʼebé Maromak hili, imi amlulik raan liurai sira-nian, imi nasaun santu ida, Maromak nia povu rasik, atu imi bele haklaken nia hahalok kmanek. Nia bolu imi husi nakukun laran ba roman nabilan.” (1 Ped 2:9) Iha eskritura neʼe, Pedro temi Jeová nia liafuan ba povu Israel kuandu Nia fó Ukun-Fuan ba sira hodi hatudu katak liafuan sira-neʼe kona-ba ema kristaun sira neʼebé hola parte iha aliansa foun.—Êx 19:5, 6.
LIURAI NO AMLULIK LORI BENSAUN BA EMA HOTU
14. Sira neʼebé hola parte iha aliansa foun halo serbisu iha neʼebé?
14 Sira neʼebé hola parte iha aliansa foun, sira halo serbisu iha neʼebé? Sira halo serbisu nuʼudar amlulik iha rai. Nuʼudar grupu ida, sira reprezenta Jeová atu haklaken ninia “hahalok kmanek” no fó ai-han espirituál ba ema. (Mt 24:45; 1 Ped 2:4, 5) Depois sira mate no moris hiʼas fali, sira halaʼo sira-nia serbisu hamutuk ho Kristu iha lalehan nuʼudar liurai no mós nuʼudar amlulik iha dalan neʼebé kompletu. (Lc 22:29; 1 Ped 1:3-5; Apok 1:6) Kona-ba ida-neʼe, apóstolu João haree vizaun ida neʼebé hatudu kriatura espíritu barak neʼebé serbí besik Jeová nia kadunan iha lalehan. Sira kanta “knananuk foun ida” ba “Bibi-Oan”, hodi dehan: “Ho Ita-Boot nia raan Ita-Boot sosa ema sira ba Maromak; husi rasa, lia, povu no nasaun sira hotu, hodi halo sira sai reinu no amlulik ba ita-nia Maromak no atu ukun raiklaran tomak.” (Apok 5:7-10) Kona-ba sira, João hatete iha vizaun seluk: “Sira sei sai Maromak no Kristu nia amlulik sira hodi ukun hamutuk ho nia ba tinan rihun ida.” (Apok 20:6) Sin, hamutuk ho Kristu, sira forma grupu ida neʼebé sei ukun nuʼudar liurai no serbí nuʼudar amlulik hodi lori bensaun ba ema hotu.
15, 16. Bensaun saida deʼit mak liurai no amlulik sira sei lori ba ema hotu iha rai?
15 Bensaun saida deʼit mak sira naʼin-144.000 sei lori ba ema hotu iha rai? Apokalipse kapítulu 21 koʼalia kona-ba sira nuʼudar sidade iha lalehan, naran Jerusalém Foun, neʼebé mós bolu “Bibi-Oan nia feen”. (Apok 21:9, MF) Iha versíkulu 2 toʼo 4 hatete: “Haʼu haree sidade santa, Jerusalém Foun, tun mai husi Maromak iha lalehan, furak hanesan noiva neʼebé hatais tiha ba nia laʼen. Haʼu rona lia makaʼas ida hakilar husi kadunan dehan, ‘Ó haree sidade neʼe? Neʼe mak Maromak nia horik-fatin iha ema sira leet. Nia sei halo nia uma iha sira leet; sira sei sai nia povu no nia sei hela ho sira no sai sira-nia Maromak. Nia sei hamaran sira-nia matabeen husi sira-nia matan; mate la iha ona, no ema sei la tanis tan eh laran-susar, basá sasán raiklaran uluk nian liu tiha ona.’” Bensaun sira-neʼe furak tebes! Ema sei la tanis tan ka laran-susar tanba mate sei la iha tan. Ida-neʼe katak ema sei sai perfeitu no hadame malu ho Maromak iha dalan neʼebé kompletu.
16 Apokalipse 22:1-3 mós esplika liután kona-ba bensaun sira neʼebé liurai no amlulik sei lori, hodi dehan: “Anju hatudu mai haʼu mota bee moris nian, nabilan hanesan vidru, sai husi Maromak no Bibi-Oan nia kadunan liuhusi dalan sidade nian nia klaran. Iha mota neʼe nia sorin rua iha ai-hun moris nian neʼebé fó fuan dala sanulu-resin-rua iha tinan ida nia laran, fuan oin ida ba fulan ida-ida, no nia tahan ai-moruk diʼak ba nasaun sira.” Vizaun neʼe hatudu oinsá “nasaun sira”, ka ema hotu, sei hetan kura husi sala neʼebé sira hetan husi Adão. Loos duni, buat neʼebé ‘uluk nian sei liu tiha’.
RAMATA SERBISU NUʼUDAR LIURAI NO AMLULIK
17. Liutiha tinan 1.000, sira neʼebé serbí nuʼudar liurai no amlulik sei ramata serbisu saida?
17 Kuandu tinan 1.000 liu tiha, sira neʼebé serbí nuʼudar liurai no amlulik sei ramata sira-nia serbisu atu ajuda ema sai perfeitu. Iha tempu neʼebá, Jesus Kristu nuʼudar Amlulik Boot no Liurai sei entrega fali ema perfeitu ba Jeová. (Lee 1 Korinto 15:22-26.) Nuneʼe, sira neʼebé serbí nuʼudar liurai no amlulik sei ramata sira-nia serbisu.
18. Kuandu liurai no amlulik sira-nia serbisu ramata ona, oinsá mak Jeová sei uza sira?
18 Kuandu liurai no amlulik sira-nia serbisu ramata ona, oinsá mak Jeová sei uza sira? Tuir Apokalipse 22:5, “sira sei ukun nafatin ba nafatin”. Sira sei ukun sé? Bíblia la fó-hatene kona-ba neʼe. Maibé sira sei kontinua halo serbisu ba Jeová. Tanba sira hetan moris neʼebé la bele mate no sira mós iha esperiénsia kona-ba ajuda ema sala-naʼin, sira sei serbí nafatin nuʼudar liurai no Jeová sei nafatin uza sira atu kumpre ninia hakarak.
19. Ema neʼebé tuir Memoriál sei hanoin fali kona-ba saida?
19 Iha loron-kinta, 5 Abríl 2012, kuandu ita halibur hamutuk atu komemora Jesus nia mate, ita sei hanoin fali buat neʼebé ita foin koʼalia husi Bíblia. Ema kristaun kose-mina neʼebé sei iha rai sei han paun no hemu tua-uvas hodi hatudu katak sira hola parte iha aliansa foun. Hodi halo nuneʼe, sira sei hanoin fali katak sira iha knaar neʼebé espesiál tebes no responsabilidade boot atu kumpre buat neʼebé Maromak hakarak husi uluk kedas. Nuneʼe, mai ita hotu tuir Memoriál hodi hatudu katak ita agradese ba Maromak Jeová tanba nia hili liurai no amlulik sira atu lori bensaun ba ema hotu.
[Nota–rodapé]
^ par. 4 Jeremias 31:31, 33: “31 ‘Haree! Loron sira sei mai,’ Jeová hatete, ‘no haʼu sei halo aliansa foun ho Israel nia umakain no Judá nia umakain; 33 . . . Haʼu sei tau haʼu-nia ukun-fuan iha sira-nia laran, no iha sira-nia fuan mak haʼu sei hakerek ukun-fuan neʼe. No haʼu sei sai sira-nia Maromak, no sira rasik sei sai haʼu-nia povu.’”
[Pergunta estudu nian]
[Dezeñu iha pájina 29]
Liurai no amlulik sei lori bensaun ba ema hotu ba nafatin
