Mapakgsinanin chu sacerdotes tiku kamakgtayakgo latamanin
Mapakgsinanin chu sacerdotes tiku kamakgtayakgo latamanin
«Wixin, xatalaksaknin [...], wa [sacerdotes] wixin nti xkilhtsukut reyes, chixkuwin xasantujlanin, wa nti lu wa xtapakgsin Dios wixin.» (1 PED. 2:9)
¿TLAN XMASTA XTAKGALHTIN?
¿Tukuya kilhtamaku wanka pi xʼama tawila akgtum tamapakgsin xla sacerdotes?
¿La tlawa kaʼanalh akgtum tamapakgsin xla sacerdotes xasasti talakkaxlan?
¿Tukuya tasikulunalin nakalimini latamanin tamapakgsin xla sacerdotes?
1. ¿Tuku xlakata kata kata lakapastakaw akxni tinilh Cristo?
KKATSISNI 14 xla nisán kata 33 Jesucristo chu kgalhkutiy xʼapóstoles tamakgstokgolh xlakata tlawakgolh xaʼawatiya Pascua nema xtlawakgo judíos. Akxni xwanikanitta Judas Iscariote tiku stamakgalh Jesús pi xtaxtulh, Jesús lakkaxwililh xasasti talakkaxlan, nema alistalh xwanika taway «xla kiMalanakan» (1 Cor. 11:20, NM). Akxni ama katsisni Jesús makgtiy kawanilh: «Ankgalhin natlawayatit yuma nakililakapastakatit» uma xasasti tuku litamakgstokgkan xlakata lilakapastakkan akxni tinilh Jesús (1 Cor. 11:24, 25). Chu xtatayananin Jehová kgalhakgaxmatkgo uma limapakgsin tamakgstokgkgo kxlikalanka Katiyatni kata kata chu lilakapastakkgo akxni tinilh Cristo. Kata 2012, 14 xla nisán xla calendario judío tsuku akxni tsankga Chichini jueves 5 xla abril.
2. ¿Tuku tiwa Jesús xlakata kaxtalanchu chu vino?
2 Lucas wan kʼakgtiy versículos tuku tiwa Jesús chu tuku titlawalh ama katsisni: «Ntitiyalh nkaxtalanchuj, chu xmastanitta mpaxkatsinit, lakgchakgalh, na maxkikgolh, wanikgolh: “Wa yuma [wamputun] nkintiyatliwa, wa ntu wixin mimpalakatakan natamastay. [...] Ankgalhin natlawayatit nakililakapastakatit”. Chuna litum ntitiyalh mpukgotnu, akxni mpi xwayankgonitta, xkilhwama: “Wa yuma [...] mpukgotnu [wamputun], wa yuma xasasti talakkaxlan wa ntu lilakkaxlay nkinkgalhni, wa ntu wixin mimpalakatakan nalistajtamakgan[”]» (Luc. 22:19, 20). ¿Tuku liʼakgatekgskgolh apóstoles umakgolh tachuwin?
3. ¿Tuku xkilhchanima vino chu kaxtalanchu nema maklakaskilh Jesús?
3 Xlakata judíos xwankgonit, lu liwana xkatsikgo xlakata tamakamastan xla animales nema xmakamaxkikgo Dios sacerdotes anta kxtemplo Jerusalén. Umakgolh tamakamastan xtatlawa xlakata Jehová tlan xkaʼakxilhli chu xmin kilhtamaku xlakata xkatapatilh xtalakgalhinkan (Lev. 1:4; 22:17-29). Wa xlakata akxni Jesús kawanilh xʼapóstoles pi xʼama masta xmakni chu xkgalhni xpalakatakan, xwamputun pi xʼama makamasta xlatamat nema ni xkgalhi talakgalhin. Tlakg lhuwa xtapalh xʼama wan nixawa animales nema xmakamastakan.
4. ¿Tuku xwamputun Jesús akxni wa: «yuma [...] mpukgotnu [wamputun], wa yuma xasasti talakkaxlan»?
4 Chu ¿tuku kilhchanima akxni Jesús wa «yuma [...] mpukgotnu [wamputun], wa yuma xasasti talakkaxlan»? Apóstoles xkatsikgo tuku xwankanit xlakata xasasti talakkaxlan nema wi kJeremías 31:31-33 (kalikgalhtawakga). Tuku wa Jesús limasiya pi tama kilhtamaku xtlawama xasasti talakkaxlan, nema xʼama tawila xlakgxokgo Limapakgsin nema Jehová xkatalakkaxlanit Israel. ¿Wi tuku lakxtum xwanit uma akgtiy talakkaxlan?
5. ¿Tuku tlan xkakitaxtunilh xlakata talakkaxlan nema timaxkika Israel?
5 Uma akgtiy talakkaxlan wi tuku na watiya xtlawaputunkgo. Akxni Jehová wililh talakkaxlan xla Limapakgsin, kawanilh israelitas: «Komo wixin liwana nakgalhakgaxpatatit kintachuwin chu namakgantaxtiyatit tuku kkatalakkaxlan, akit nakintapakgsiniyatit nixawa la makgapitsi kachikinin, xlakata akit kintapakgsini putum katiyatni. Chu wixin akgtum tamapakgsin xla sacerdotes nema kila nawanatit chu akgtum lanka kachikin xasantu nawanatit» (Éxo. 19:5, 6). ¿Tuku xkilhchanima uma tuku kawanika?
XKAWANIKANIT PI SACERDOTES XWANKGOLH
6. ¿Tukuya talakkaxlan tsukulh kgantaxtu xlakata Limapakgsin nema maxkika Moisés?
6 Israelitas xʼakgatekgskgo tuku xkilhchanima talakkaxlan, xlakata Jehová makglhuwata xkatatlawanit talakkaxlan nema lu xlakaskinka la Noé chu Abrahán (Gén. 6:18; 9:8-17; 15:18; 17:1-9). Talakkaxlan nema xtalakkaxlanit Abrahán, Jehová xwaninit: «Minkamanan natalisikulunatlawa putum kachikinin xalak kkatiyatni» (Gén. 22:18). Talakkaxlan xla Limapakgsin nema maxkika Moisés tlawalh pi xtsukulh kgantaxtu tuku xwanikanit Abrahán. Xlakata uma Jehová kawanilh Israel: «Akit nakintapakgsiniyatit nixawa la makgapitsi kachikinin». ¿Tuku xlakata? Xlakata Jehová kawanilh «akgtum tamapakgsin xla sacerdotes» nema xla xwa.
7. ¿Tuku xkilhchanima «akgtum tamapakgsin xla sacerdotes»?
7 Israelitas xkatsikgo xlakata mapakgsinanin chu sacerdotes, pero kaj wa Melquisedec mapakgsina chu sacerdote litaxtulh xlakata Jehová maxkilh talakaskin (Gén. 14:18). Akxni mastaka talakkaxlan Jehová xkawanima pi tlan «akgtum tamapakgsin xla sacerdotes» xlitaxtukgolh. Chuna la masiyakgolh tatsokgni nema Dios matsokgninalh uma xwamputun, pi mapakgsinanin xlitaxtukgolh chu sacerdotes xwankgolh (1 Ped. 2:9).
8. ¿Tukuya taskujut tlawakgo sacerdotes nema Dios kalaksaknit?
8 Chatum mapakgsina mapakgsinan. Chu ¿tuku xlitlawat sacerdote? Hebreos 5:1 wan: «Xlipaks xapuxku [sacerdote] nti xtalaksakkgonit kxlakgstipan chixkuwin, wa xliwilikgokanit [...] nchixkuwin kxlakatin Dios, lakimpi nalakgawiliy [tamakamastan], chu animal ntu namakgniy [...] xpuxokgo xpalakata ntalakgalhin». Chuna, chatum sacerdote tiku laksakkan xlakata nakapalakamasta chu nakapalakachuwinan lakgalhinanin kxlakatin Dios chu limaklakaskin tamakamastan nema xtaskin. Nachuna, palakachuwinan Jehová kxlakatin kachikin, chu kamasiyani xLimapakgsin Dios (Lev. 10:8-11; Mal. 2:7). Uma taskujut nema tlawakgo, sacerdotes tiku Dios kalaksaka, tlawakgo pi latamanin tlan natalalinkgo Dios.
9. 1) ¿Tuku xlitlawat xwanit Israel xlakata xkgalhilh «akgtum tamapakgsin xla sacerdotes»? 2) ¿Tuku xlakata Jehová lakkaxwililh pi Israel xkgalhikgolh sacerdotes? 3) ¿Tuku xlakata nila xkgalhikgolh «akgtum tamapakgsin xla sacerdotes» akxni xkamaxkikanit Limapakgsin?
9 Chuna, talakkaxlan xla Limapakgsin tlawalh pi Israel tlan xkgalhikgolh akgtum tamapakgsin xla sacerdotes xlakata tlan xkitaxtunilh putum «kachikinin». Pero uma tuku lu lilakgatit, chuna xkgantaxtulh komo xtlawakgolh uma tuku kawanika: «Komo wixin liwana nakgalhakgaxpatatit kintachuwin chu namakgantaxtiyatit tuku kkatalakkaxlan». ¿Tlan xmakgantaxtikgolh israelitas tuku Jehová xkalitalakkaxlanit? Max tsinu tuwa pero tlan xmakgantaxtikgolh. Pero ¿tlan nituku xmakgatsankgananikgolh? Ni (Rom. 3:19, 20). Wa xlakata, Jehová lakkaxwililh pi israelitas xkgalhikgolh sacerdotes chu nila mapakgsinanin xwankgolh xlakata tlan xmakamaxkikgolh Dios tamakamastan xpalakata xtalakgalhinkan nema xtlawakgolh putum kachikin (Lev. 4:1–6:7). Pero nachuna xpalakata xtalakgalhinkan sacerdotes (Heb. 5:1-3; 8:3). Jehová xmakgamakglhtinan umakgolh tamakamastan, pero umakgolh nila xmasputu putum xtalakgalhin tiku xmakamastakgo. Sacerdotes nema xwilakgolh akxni xwi xLimapakgsin Moisés, nila xtlawakgo pi lu tlan xtalalinkgolh Dios latamanin chu na nila xmakgtayakgo tiku ni xmakgxtakgkgo Dios. Chuna la wan apóstol Pablo: «Xkgalhni ntoro, chu xla tintsun, ni la mapanuy ntalakgalhin» (Heb. 10:1-4). Chu xlakata ni kgalhakgaxmatkgolh Limapakgsin, lu ni tlan kitaxtukgolh (Gál. 3:10). Akxni chuna xwilakgolh nila akgtum tamapakgsin xla sacerdotes xwankgolh nema xmakgtayakgolh putum latamanin.
10. ¿Tuku xlakata xmastakanit talakkaxlan xla Limapakgsin?
10 Wa xlakata, ¿kaj nitu litaxtulh tuku Jehová kawanilh israelitas pi xʼamakgolh kgalhikgo «akgtum tamapakgsin xla sacerdotes»? Ni. Komo xliskujkgolh xlakata xkgalhakgaxmatnankgolh, tlan xkgalhikgolh pero ni akxni xwijku Limapakgsin nema maxkika Moisés. ¿Tuku xlakata? (Kalikgalhtawakga Gálatas 3:19-25.) Tiku liwana xkgalhakgaxmatkgo Limapakgsin, kamakgtayalh ni xmakgtanukgolh knixaxlikana takanajla. Kamakgtayalh judíos xkatsikgolh pi xkgalhikgo talakgalhin chu xʼakgatekgskgolh pi xtalakaskin xmakamastaka tlakg tlan tamakamastan nixawa nema xmasta xapuxku sacerdote. Limapakgsin litaxtulh la chatum xkuentajtlawanakan nema kalilh kCristo o Mesías, uma tachuwin wamputun «xaTalaksakni». Pero akxni xchilh Mesías, xʼama katamaknu kxasasti talakkaxlan nema xlichuwinanit Jeremías. Tiku xmakgamakglhtinankgolh Cristo xkawanika xmakgtanukgolh kxasasti talakkaxlan chu xlikana xlitaxtukgolh «akgtum tamapakgsin xla sacerdotes». Kaʼakxilhwi la chuna xlalh.
XASASTI TALAKKAXLAN TLAWA KAʼANALH AKGTUM TAMAPAKGSIN XLA SACERDOTES
11. ¿La litaxtulh Jesús xapulana niku xlitsukulh akgtum tamapakgsin xla sacerdotes?
11 Kata 29 chilh Jesús xalak Nazaret chu wantiku litaxtulh Mesías. Akxni xkgalhi 30 kata tamunulh, xlakata xtsukulh tlawa lu xlakaskinka taskujut nema Jehová xlakgayawanit. Ama kilhtamaku Jehová wa: «Wa yuma nkinKam nti lu [...]kpaxkiy». Nachuna, ni lilaksakli aceite, wata lilaksakli espíritu santo (Mat. 3:13-17; Hech. 10:38). Akxni laksakka Jesús litaxtulh xaPuxku Sacerdote chu tiku xMapakgsina nawan putum tiku kanajlanikgo (Heb. 1:8, 9; 5:5, 6). Wa xapulana Sacerdote xla tamapakgsin xla sacerdotes.
12. ¿Tuku tlan tatlawalh xlakata xtamakamastan Jesús?
12 Xlakata Jesús xlitaxtulh xaPuxku Sacerdote, ¿tuku xmastalh nema tlan xlitapatika putum xtalakgalhinkan tiku xkanajlanikgo? Chuna la tiwa akxni lakkaxwilh pi xlakapastakka akxni nilh, makamastalh xlatamat nema ni xkgalhi talakgalhin (kalikgalhtawakga Hebreos 9:11, 12). Akxni tamunulh kata 29, lakgayawaka xaPuxku Sacerdote nawan, Jesús lhuwa tuku tuwa titaxtulh, chu uma makgtayalh xlakata tlan Sacerdote xwa asta akxni nilh (Heb. 4:15; 5:7-10). Akxni malakastakwanika, alh kʼakgapun chu maxkilh Jehová kxtapalh xtamakamastan (Heb. 9:24). Akxni ama kilhtamaku, Jesús tlan tsukulh kapalakachuwinan putum tiku kanajlanikgo xtamakamastan chu tlan xkamakgtayakgolh xlakata tlan naskujnanikgo Jehová chu nakgalhikgo latamat nema ni kgalhi xlisputni (Heb. 7:25). Nachuna, ama tamakamastan makgtayanalh xlakata xlitatlawalh xasasti talakkaxlan (Heb. 8:6; 9:15).
13. ¿Tuku tlan xmakgamakglhtinankgolh tiku kawanika pi tlan xmakgtapakgsikgolh kxasasti talakkaxlan?
13 Tiku kawanika pi na tlan xmakgtapakgsikgolh kxasasti talakkaxlan espíritu santo kalilaksakka (2 Cor. 1:21). Pulana katamaknuka wantiku judíos xwankgonit chu alistalh tiku ni judíos (Efe. 3:5, 6). ¿Tuku tlan xmakglhtinankgolh? Xkalimakgtaya tlan xkatapatika putum xtalakgalhinkan. Jehová xwanit: «Naktapati tuku nitlan tlawalh chu nialh naklakapastaka xtalakgalhin» (Jer. 31:34). Akxni putum xkatapatikanitta xtalakgalhinkan tlan «akgtum tamapakgsin xla sacerdotes» xlitaxtukgolh. Uma tuku kawanilh Pedro kstalaninanin Cristo tiku xkalaksakkanit: «Wixin, xatalaksaknin [sacerdotes] wixin nti xkilhtsukut reyes, chixkuwin xasantujlanin, wa nti lu wa xtapakgsin Dios wixin, lakimpi wixin naliʼakgchuwinanatit wa ntu xatlan ntlawanit wa nti yama nkatasaninitan ktapakglhtutit [o kapukswa], anta nkalimin lilakgatit kxkgakganat» (1 Ped. 2:9). Akxni, Pedro lichuwinalh tuku xkawaninit Jehová Israel akxni mastalh Limapakgsin chu kawanilh pi wa kstalaninanin Cristo tiku xkatatlawakanit xasasti talakkaxlan (Éxo. 19:5, 6).
MAPAKGSINANIN XLA SACERDOTES TIKU NAMAKGTAYAKGO PUTUM LATAMANIN
14. ¿Niku kskujkgolh tiku tapakgsikgo kʼakgtum tamapakgsin xla sacerdotes?
14 ¿Niku naskujkgo tiku tapakgsikgo xasasti talakkaxlan? Unu kKatiyatni, niku xputumkan sacerdotes litaxtukgo, chu palakachuwinankgo Jehová akxni lichuwinankgo la likatsi chu mastakgo tuku maklakaskinaw xlakata kintakanajlakan (Mat. 24:45; 1 Ped. 2:4, 5). Akxni nikgo chu lakastakwanankgo, alistalh nataskujkgo Cristo kʼakgapun mapakgsinanin chu sacerdotes litaxtukgo chu liwana tlawakgo xtaskujutkan (Luc. 22:29; 1 Ped. 1:3-5; Apo. 1:6). Uma liwana likatsiyaw xlakata apóstol Juan akxilhli makgapitsin ángeles kxlakatin xpumapakgsin Jehová kʼakgapun. «Xlitlimakgo akgtum ntatlin» kxlakatin «nkalhnilu [o borrego]» chu wankgo: «Na kinkalilakgmaxtunita minkgalhni lakimpi natapakgsiniyaw Dios, lantla xlipaks nkilhtsukut, chu ni ntipalit tachuwin nkgalhikgoy nchixkuwin nkani kawa xalanin [...], chu nti xalanin xlikatlanka nkatuxawat. Na xtapakgsin Dios nkinkalimaxtunita, chu [sacerdotes], na nakmapakgsinana kxokgspun nkatuxawat» (Apo. 5:8-10). Alistalh Juan lichuwinan tuku akxilhli xlakata umakgolh mapakgsinanin: «[Ksacerdotes] Dios nawankgoy, chu xla Cristo, na natamapakgsinankgoy akgtum mil kata» (Apo. 20:6). Cristo chu umakgolh tiku kalaksakkanit akgtum tamapakgsin xla sacerdotes nawankgo chu nakamakgtayakgo putum latamanin.
15, 16. ¿Tukuya tasikulunalin naliminkgo kKatiyatni tiku sacerdotes nalitaxtukgo?
15 ¿Tukuya tasikulunalin naliminkgo 144,000 kKatiyatni? Kcapítulo 21 xla Apocalipsis wan pi la akgtum xasanto kachikin, wanikan Xasasti Jerusalén, nema na lilakgapaskan «xpuskat nkalhniluj» (Apo. 21:9). Kversículos 2 asta 4 wan: «Nti nkukxilhli [kachikin] xasantujlani, wa Xasasti Jerusalén, wa cha ntu xtaktama nkakgapun kxmakan Dios, tlan xkaxya xtachuna nchatum ntsumat natatawila xlitatawilat. Na ktikgaxmatli [...] pixtlanka ntachuwin nkakgapun wa ntu xwan: “Uwi xputawilh Dios, anta wi kxlakgstipankan nchixkuwin; na wa natatawilakgo, chi nchu xlakan [xkachikin] nawankgoy, na watiya Dios xPuchinakan nawan. Na paks naxakanikgo Dios xlakgpixtajatkan; na nialh katianalh linin; chu na nialh katianalh ntalipuwan, ni mpala wa ntatasa, chu na ni mpala wa ntakatsanajwat; xampi wa xlipaks nkatuwaj, wa ntu xanan xakgasiyaj, paks lakgsputli”». ¡Lu lilakgatit amakgolh tasikulunalin! Akxni namasputukan linin, nasputa wantuku tlakg kinkamapatiniyan, talakgaputsit, talipuwan chu takatsanajwat. Chu tiku ni namakgxtakgkgo Dios nialh katikgalhikgolh talakgalhin, chu akxni Dios lu tlan nakaʼakxilha.
16 Apocalipsis 22:1, 2 liwana wan tasikulunalin nema nalimin tamapakgsin xla sacerdotes: «Na kintimasiyunilh xastalanka nkgalhtuchokgo nchuchut xla latamat lakgxkgakgay xtachuna walhtin, wa ntu xtaxtuy klaktawilh kxpumapakgsin Dios, chu xla kalhniluj, na anta xan kxlikitat xatlankati [Xasasti Jerusalén]; cha nchu kxlakgaputuy nkgalhtuchokgoj, xya nkiwi xla latamat, wa ntu ntipakutuy xatawakat mastay, na xliʼakgatunu papaʼ mastay xatawakat; chi nchu wa xatuwan nkiwi, wa nalipakskgoy lantla xlikatlanka nkatuxawat». Wa uma tuku limasiyakan pi lhuwa tasikulunalin natawila «xlikatlanka nkatuxawat», latamanin nakamakuchikan xlakata nialh katikgalhikgolh talakgalhin nema kamatitaxtinilh Adán. Putum tuku xʼanan titaxtunitta nawan.
TAMAPAKGSIN XLA SACERDOTES NAMAKGANTAXTIKGO XTASKUJUTKAN
17. ¿Tuku namakgantaxtikgo tamapakgsin xla sacerdotes?
17 Akxni natakgatsi akgtum mil kata tamapakgsin xla sacerdotes, natlawakgo pi tiku nakamapakgsikgo nialh katikgalhikgolh talakgalhin. Cristo namakamaxki Jehová putum latamanin nema nialh katikgalhikgolh talakgalhin xlakata wa xaPuxku Sacerdote chu Mapakgsina (kalikgalhtawakga 1 Corintios 15:22-26). Ama kilhtamaku tamapakgsin xla sacerdotes makgantaxtikgonitta nawan tuku kaliyawakanit.
18. Akxni tamapakgsin xla sacerdotes makgantaxtikgonit nawan tuku xkaliyawakanit, ¿la nakalimaklakaskin Jehová alistalh?
18 Ama kilhtamaku, ¿la nakamaklakaskin Jehová umakgolh tiku namakgtayakgo Cristo? Revelación (o Apocalipsis) 22:5 kBiblia Traducción del Nuevo Mundo masiya pi «nikxni katisputli xtamapakgsin». ¿Tiku nakamapakgsikgo? Biblia ni wan tiku nakamapakgsikgo. Xlakata nialh nanikgo chu nikxni katilaklakgolh chu xlakata tlan kamakgtayakgolh nawan tiku lakgalhinanin lu nakatsinikgo, wa xlakata chuntiya xlakaskinka tuku nakaliyawakan kxtamapakgsin Jehová.
19. ¿Tuku kililakapastakatkan akxni naʼanaw xlakata natalakapastaka akxni tinilh Cristo?
19 Akxni natamakgstokgaw xlakata nalakapastakaw akxni tinilh Cristo, 5 xla abril kata 2012, nalakapastakaw uma tamasiy xalak Biblia. Tiku kalaksakkanit xlakata naʼankgo kʼakgapun nema nialh lhuwa wilakgolh unu kKatiyatni nawakgo kaxtalanchu nema ni kgalhi levadura chu vino tinto, nema limasiyakgo pi tapakgsikgo kxasasti talakkaxlan. Umakgolh liʼakxilhtit xlakata xtamakamastan Cristo nakamalakapastaka lu lanka talakgalhaman chu taskujut nema lakgayakgolh xlakata namakgtayanankgo nakgantaxtu tuku Dios lakapastaknit natlawa. ¡Putum akinin akxni natalakapastaka akxni tinilh Cristo lu napaxtikatsiniyaw uma tuku Jehová kinkamaxkinitan, akgtum tamapakgsin xla sacerdotes nema nakamakgtayakgo latamanin!
[Takgalhskinin]
[Dibujo xla página 31]
Tamapakgsin xla sacerdotes nakaliminikgo latamanin tasikulunalin nema nikxni katisputli
