Vhotshifhe Vha Vhuhosi Vhane Vha Ḓo Vhuyedza Vhathu Vhoṱhe
Vhotshifhe Vha Vhuhosi Vhane Vha Ḓo Vhuyedza Vhathu Vhoṱhe
“Huno inwi ni lushaka lwo nangwaho, ni vho-tshifhé vha vhuhosi, ni vhathu vhakhethwa, ni mbeu ye a tou ḓi-shumela.”—1 PET. 2:9.
NAA NI NGA ṰALUTSHEDZA?
Ndi lini he ha fulufhedziswa vhotshifhe vha vhuhosi lwa u tou thoma?
Mulanga muswa wo bveledza vhotshifhe vha vhuhosi nga nḓila-ḓe?
Ndi phaṱhutshedzo dzifhio dzine vhotshifhe vha vhuhosi vha ḓo dzi ḓisela vhathu?
1. Ndi ngani “tshilalelo tsha Murena” tshi tshi dovha tsha vhidzwa uri ndi Tshihumbudzo, nahone tshi itelwa mini?
NGA madekwana a ḽa 14 Nisan, nga ṅwaha wa 33 C.E., Yesu Kristo na vhaapostola vhawe vha 12 vho vha na Paseka ya Tshiyuda lwa u fhedza. Musi Yudasi Iskariote wa tshimbevha o no ṱuwa, Yesu o thoma vhuṅwe vhuṱambo he nga murahu ha vhidzwa uri ndi “tshilalelo tsha Murena.” (1 Vha-Kor. 11:20) Yesu o amba luvhili uri: “Ní ralo, ni tshi itela u ṋyelelwa.” Tshenetshi tshiitea tshi dovha tsha vhidzwa uri ndi Tshihumbudzo tsha lufu lwa Kristo. (1 Vha-Kor. 11:24, 25) Vha tshi thetshelesa yeneyi ndaela, Ṱhanzi dza Yehova shangoni ḽoṱhe vha ita Tshihumbudzo ṅwaha muṅwe na muṅwe. Uno ṅwaha, u ya nga khalenda ya Bivhili, ḽa 14 Nisan ḽi ḓo thoma nga Ḽavhuṋa, ḽa 5 April musi ḓuvha ḽo no kovhela.
2. Ndi mini zwe Yesu a zwi amba nga ha zwiga zwe a zwi shumisa?
2 Nga ndimana mbili fhedzi, mufunziwa Luka o amba nga ha zwe Yesu a zwi ita na u zwi amba kha tshenetsho tshiitea musi a tshi ri: “A dzhia tshinnkwa, a livhuha, a tshi ṅwatakanya, a vha ṋea a ri: Ndi muvhili wanga u ṋekedzwaho lufuni nga mulandu waṋu. Ni ite ngauralo, uri hu vhe u ṋyelelwa. A dzhia na tshinwelo, vhó no lalela, a ri: Ndi tshone tshinwelo tsha mulanga muswa wa malofha anga a shululwaho nga mulandu waṋu.” (Luka 22:19, 20) Vhaapostola vho vha vho fanela u pfesesa hani eneo maipfi?
3. Ndi mini zwe vhaapostola vha vha vha tshi zwi pfesesa nga ha zwiga?
3 Samusi vhaapostola vho vha vhe Vhayuda, vho vha vho ḓowela zwiṱhavhelo zwa zwifuwo zwe vhotshifhe vha vha vha tshi zwi ṋekedza Mudzimu thembeleni ngei Yerusalema. Zwenezwi zwiṱhavhelo zwo vha zwi tshi ṋekedzwa u itela uri muthu a takalelwe nga Yehova, nahone vhunzhi hazwo zwo vha zwi tshi ṋekedzwa u itela u hangwelwa zwivhi. (Lev. 1:4; 22:17-29) Nga zwenezwo, vhaapostola vho vha vha tshi pfesesa uri musi Yesu a tshi ri muvhili wawe na malofha awe zwi ḓo ‘ṋekedzwa na u shululwa nga mulandu wavho,’ o vha a tshi khou amba uri u ḓo ṋekedza vhutshilo hawe ho fhelelaho sa tshiṱhavhelo. Tsho vha tshi tshi ḓo vha tshiṱhavhelo tsha ndeme vhukuma u fhira tsha zwifuwo.
4. Yesu o vha a tshi khou amba mini musi a tshi ri: “Ndi tshone tshinwelo tsha mulanga muswa wa malofha anga”?
4 Maipfi a Yesu ane a ri, “ndi tshone tshinwelo tsha mulanga muswa wa malofha anga” a amba mini? Vhaapostola vho vha vha tshi ḓivha vhuporofita vhune ha amba nga ha mulanga muswa ho ṅwalwaho kha Yeremia 31:31-33. (Vhalani.) Maipfi a Yesu a sumbedza uri zwino o vha a tshi khou thoma mulanga muswa, we wa vha u tshi ḓo dzhiela vhudzulo mulanga wa Mulayo we Yehova a u vhofha na Vhaisiraele a tshi shumisa Mushe. Naa yeneyo milanga mivhili i a tshimbidzana?
5. Mulanga wa Mulayo wo ṋea Vhaisiraele zwibuli zwifhio?
5 Vhukuma, ndivho dza yeneyo milanga mivhili dzi a tshimbidzana. Musi Yehova a tshi thoma mulanga wa Mulayo o vhudza Vhaisiraele a ri: “Arali ná thetshelesa zwine nda amba, na khwaṱhisa mulanga we nda u vhofha na inwi, ndi hone ni tshi ḓo vha thakha yanga kha tshakha dzoṱhe; ngauri mashango oṱhe ndi anga. Inwi ni yo’ vha muvhuso wanga wa vho-tshifhé, lushaka lukhethwa.” (Ek. 19:5, 6) Enea maipfi o vha a tshi amba mini kha Vhaisiraele?
YEHOVA U FULUFHEDZISA VHOTSHIFHE VHA VHUHOSI
6. Mulanga wa Mulayo wo ḓadzisa fulufhedziso ḽifhio?
6 Vhaisiraele vho vha vha tshi pfesesa ipfi ḽine ḽa ri “mulanga” ngauri Yehova o vhofha milanga na vhomakhulukuku wavho Noaxe na Abrahamu. (Gen. 6:18; 9:8-17; 15:18; 17:1-9) Kha mulanga we a u vhofha na Abrahamu, Yehova o fulufhedzisa uri: “Dzitshakha dzoṱhe ndi ḓo dzi fhaṱutshedza nga vhana vhau.” (Gen. 22:18) Mulanga wa Mulayo wo vha u tshi ḓadzisa ḽeneḽi fulufhedziso. Wonoyo mulanga wo vha u tshi ḓo ita uri Vhaisiraele vha vhe “thakha [ya Yehova] kha tshaka dzoṱhe.” Ndi ngani zwo ralo? U itela uri vha vhe ‘muvhuso wa Yehova wa vhotshifhe.’
7. Mubulo une wa ri ‘muvhuso wa vhotshifhe’ u amba mini?
7 Vhaisiraele vho vha vha tshi ḓivha zwavhuḓi nga ha mahosi na vhotshifhe, fhedzi Melkitsedeke ndi ene muthu e eṱhe wa tshifhingani tsha kale we a vha e tshifhe a dovha a vha khosi nge a tendelwa nga Yehova. (Gen. 14:18) Zwino Yehova o vha a tshi khou ṋea lwonolwo lushaka tshibuli tsha u bveledza ‘muvhuso wa vhotshifhe.’ Samusi zwo sumbedzwa Maṅwaloni o hevhedzwaho, zwenezwi zwo vha zwi tshi amba uri vhotshifhe vha vhuhosi vha ḓo vha mahosi ane a dovha a vha vhotshifhe.—1 Pet. 2:9.
8. Vhotshifhe vho vhewaho nga Mudzimu vho vha vha tshi shuma mini?
8 Ndi zwone uri khosi i shuma u vhusa. Fhedzi tshifhe u shuma mini? Vha-Heberu 5:1 i ṱalutshedza uri: “Tshifhé-muhulu, ufhio na ufhio, o vha a tshi nangiwa kha vhathu, a vhewa uri a pfumelele vhathu ha Mudzimu, a kumedze zwifhiwa na zwidzimu a tshi itela zwivhi.” Nga zwenezwo, tshifhe we a vhewa nga Yehova u imela vhaitazwivhi phanḓa ha Mudzimu nga u ṋekedza zwiṱhavhelo u itela uri vha hangwelwe zwivhi. Kha ḽiṅwe sia, tshifhe o vha a tshi dovha a imela Yehova phanḓa ha vhathu, a tshi vha funza mulayo wa Mudzimu. (Lev. 10:8-11; Mal. 2:7) Nga yeneyi nḓila, tshifhe o nangwaho nga Mudzimu o vha a tshi pfumedzanya vhathu na Mudzimu.
9. (a) Ndi mini zwe Vhaisiraele vha vha vha tshi fanela u zwi ita uri vha vhe ‘muvhuso wa vhotshifhe’? (b) Ndi ngani Yehova o ita uri Isiraele hu vhe na vhotshifhe? (c) Ndi mini zwe zwa ita uri Isiraele hu si vhe na ‘muvhuso wa vhotshifhe’ nga fhasi ha mulanga wa Mulayo?
9 Nga zwenezwo, mulanga wa Mulayo wo ṋea Vhaisiraele tshibuli tsha u bveledza vhotshifhe vha vhuhosi vhane vha ḓo vhuyedza “tshakha dzoṱhe.” Fhedzi ho vha hu na zwiṅwe zwe vha vha vha tshi fanela u zwi ita: “Arali ná thetshelesa zwine nda amba, na khwaṱhisa mulanga we nda u vhofha na inwi.” Naa Vhaisiraele vho vha vha tshi ḓo ‘thetshelesa zwine Yehova a amba’? Vho vha vha tshi ḓo mu thetshelesa, fhedzi hu si tshifhinga tshoṱhe. (Vha-Roma 3:19, 20) Ndi ngazwo Yehova o vhea vhotshifhe kha ḽa Isiraele, vhe vha vha vhe si mahosi uri vha ṋekedze zwiṱhavhelo zwa zwifuwo u itela zwivhi zwa Vhaisiraele. (Lev. 4:1–6:7) Zwenezwo zwivhi zwo vha zwi tshi katela na zwa vhotshifhe. (Vha-Heb. 5:1-3; 8:3) Yehova o ṱanganedza zwenezwo zwiṱhavhelo, fhedzi zwo vha zwi sa phumuli lwa tshoṱhe zwivhi zwa vhe vha ṋekedza zwiṱhavhelo. Vhotshifhe vha re nga fhasi ha mulanga wa Mulayo vho vha vha sa koni u pfumedzanya nga ho fhelelaho Vhaisiraele vha fulufhedzeaho na Mudzimu. Muapostola Paulo o ri: “U ṱusa zwivhi a zwi konadzei nga malofha a ṋamana na a dzimbokoṱo.” (Vha-Heb. 10:1-4) Nga nṱhani ha u sa thetshelesa havho Mulayo, Vhaisiraele vho mbo ḓi semiwa. (Vha-Gal. 3:10) Vho vha vha sa ḓo kona u shumela shango sa vhotshifhe vha vhuhosi vhe kha vhuimo honoho.
10. Mulanga wa Mulayo wo vha u tshi shuma mini?
10 Naa fulufhedziso ḽa Yehova ḽa uri vha ḓo vha ‘muvhuso wa vhotshifhe’ ḽo vha ḽi si ḽa vhukuma? Na khathihi. Arali vho lingedza u thetshelesa zwi tshi bva mbiluni, vho vha vha tshi ḓo vha na tshenetshi tshibuli, fhedzi hu si nga fhasi ha Mulayo. Ndi ngani? (Vhalani Vha-Galata 3:19-25.) Kha vhe vha lwela u thetshelesa zwi tshi bva mbiluni, Mulayo wo ita uri vha vhe na vhurabeli ho kunaho. Wo ita uri Vhayuda vha kone u vhona zwivhi zwavho na uri vha ṱoḓa tshiṱhavhelo tshihulwane u fhira tshine tsha ṋekedzwa nga tshifhe wavho muhulwane. Wo vha u mudededzi u vha livhisaho kha Kristo kana Messia, zwine zwa amba uri “Muḓodzwa.” Naho zwo ralo, musi Messia a tshi swika o vha a tshi ḓo thoma mulanga muswa we wa dzula wo ambiwa nga Yeremia. Vhe vha ṱanganedza Kristo vho rambiwa uri vha vhe tshipiḓa tsha mulanga muswa nahone vho vha vha tshi ḓo vha ‘muvhuso wa vhotshifhe.’ Kha ri vhone uri nga nḓila-ḓe.
MULANGA MUSWA U BVELEDZA VHOTSHIFHE VHA VHUHOSI
11. Yesu o vha hani mutheo wa vhotshifhe vha vhuhosi?
11 Nga 29 C.E., Messia o bvelela sa Yesu wa Nazaretha. Musi e na miṅwaha i ṱoḓaho u vha 30, o ḓiṋekedzela u ita zwine Yehova a zwi funa, a sumbedza zwenezwo nga u lovhedzwa maḓini. Yehova o amba uri ndi “Murwa-mufunwa wanga,” a mu ḓodza nga muya mukhethwa, hu si nga mapfura. (Mat. 3:13-17; Mish. 10:38) U ḓodzwa honoho zwo ita uri a vhe Tshifhe Muhulu na Khosi ya tshifhingani tshi ḓaho ya vhatendi vhoṱhe. (Vha-Heb. 1:8, 9; 5:5, 6) O vha a tshi ḓo vha mutheo wa vhotshifhe vha vhuhosi vha vhukuma.
12. Ndi mini zwe tshiṱhavhelo tsha Yesu tsha ita uri zwi konadzee?
12 Sa Tshifhe Muhulu, ndi tshiṱhavhelo tshifhio tshe Yesu a vha a tshi nga tshi ṋekedza tshine tsha nga fukedza tshoṱhe tshivhi tshe vhatendi vha tshi mamela? Samusi o zwi sumbedza musi a tshi thoma Tshihumbudzo tsha lufu lwawe, o ṋekedza vhutshilo hawe ho fhelelaho sa tshiṱhavhelo. (Vhalani Vha-Heberu 9:11, 12.) U bva musi a tshi lovhedzwa nga 29 C.E., Yesu sa Tshifhe Muhulu, o sedzana na milingo u swikela a tshi fa. (Vha-Heb. 4:15; 5:7-10) Musi a tshi vuswa vhafuni, o gonya ṱaḓulu nahone a ṋekedza Yehova ndeme ya tshiṱhavhelo tshawe. (Vha-Heb. 9:24) Nga murahu ha zwenezwo, Yesu o vha a tshi nga pfumelela kha Yehova vhane vha sumbedza lutendo kha tshiṱhavhelo tshawe na u vha thusa uri vha shumele Mudzimu vhe na tshilavhelelwa tsha vhutshilo vhu sa fheli. (Vha-Heb. 7:25) Tshiṱhavhelo tshawe tsho dovha tsha ita uri mulanga muswa u shume.—Vha-Heb. 8:6; 9:15.
13. Vhathu vha re nga fhasi ha mulanga muswa vho vha vhe na zwilavhelelwa zwifhio?
13 Vhe vha rambiwa uri vha vhe kha mulanga muswa vho vha vha tshi ḓo dovha vha ḓodzwa nga muya mukhethwa. (2 Vha-Kor. 1:21) Ho thoma nga Vhayuda vha fulufhedzeaho ha tevhela Vhannḓa. (Vha-Ef. 3:5, 6) Vhathu vha re nga fhasi ha mulanga muswa vho vha vhe na zwilavhelelwa zwifhio? Vho vha vha tshi ḓo hangwelwa zwivhi zwavho. Yehova o fulufhedzisa uri: “Ndi ḓo vha hangwela mulandu wavho, na zwivhi zwavho a thi tsha ḓo zwi elelwa.” (Yer. 31:34) Musi zwivhi zwavho zwo no phumulwa, vho vha vha tshi ḓo fanelea u vha ‘muvhuso wa vhotshifhe.’ Musi a tshi amba na Vhakriste vho ḓodzwaho, Petro o ṅwala uri: “Inwi ni lushaka lwo nangwaho, ni vho-tshifhé vha vhuhosi, ni vhathu vhakhethwa, ni mbeu ye a tou ḓi-shumela, uri ni ḓivhadze vhugala ha we a ni vhidza ní swiswini, a ni vhidzela tshedzani tshawe tshi akhamadzaho.” (1 Pet. 2:9) Henefha Petro o redza maipfi e Yehova a a vhudza Vhaisiraele musi a tshi thoma Mulayo nahone a a shumisa kha Vhakriste vha re nga fhasi ha mulanga muswa.—Ek. 19:5, 6.
VHOTSHIFHE VHA VHUHOSI VHA VHUYEDZA VHATHU VHOṰHE
14. Vhotshifhe vha vhuhosi vha ḓo shuma ngafhi?
14 Vhane vha vha kha mulanga muswa vha ḓo shuma ngafhi? Vha ḓo shuma kha ḽifhasi, hune sa tshigwada vha ḓo vha vhotshifhe vhane vha imela Yehova kha vhathu nga u ‘ḓivhadza vhugala hawe’ na u ṋea zwiḽiwa zwa muya. (Mat. 24:45; 1 Pet. 2:4, 5) Musi vho no fa na u vuswa, vha ḓo shuma na Kristo ṱaḓulu sa mahosi na vhotshifhe nga vhuḓalo. (Luka 22:29; 1 Pet. 1:3-5; Ndzumb. 1:6) A tshi khwaṱhisedza zwenezwi, muapostola Yohane o vhona bono ḽa zwivhumbiwa zwinzhi zwa muya tsini na khuluṋoni ya Yehova ngei ṱaḓulu. Vha imbela “Ngwana” “luimbo luswá” lune lwa ri: “Nga malofha au wa rengululela Mudzimu vhathu vha tshakha dzoṱhe, vha ndimi dzoṱhe, vha hau na vhatsinda vhoṱhe. Wa vha ita mahosi na vho-tshifhé vha Mudzimu washu, luné vha ḓo vhusa fhano shangoni.” (Ndzumb. 5:8-10) Kha ḽiṅwe bono, Yohane o amba zwi tevhelaho nga ha vhenevho vhavhusi: “Tshavho ndi u ḓo vha vho-tshifhé vha Mudzimu na vha Kristo. Nahone vha ḓo vha dzikhosi nae’, vha fhedza miṅwaha ya ḽikhu̗lu.” (Ndzumb. 20:6) Vhenevho vhavhusi na Kristo vha vhumba vhotshifhe vha vhuhosi vhane vha ḓo vhuyedza vhathu vhoṱhe.
15, 16. Ndi phaṱhutshedzo dzifhio dzine vhotshifhe vha vhuhosi vha ḓo dzi ḓisela vhathu?
15 Ndi phaṱhutshedzo dzifhio dzine vha 144 000 vha ḓo dzi ḓisela vhathu vha re kha ḽifhasi? Ndzumbululo ndima ya 21 i vha sumbedza sa muḓi wa ṱaḓulu, Yerusalema Huswa, hune ha vhidzwa “musadzi wa Ngwana.” (Ndzumb. 21:9) Ndimana ya vhuvhili u ya kha ya vhuṋa i ri: “Nda vhona muḓi mukhethwa wa Yerusalema huswa u tshi tsa u tshi bva ṱaḓulu Mudzimuni, wó ṱamiwa sa muselwa ó tondelwa munna wawe. Nda pfa ipfi ḽihulu ḽi tshi bva kha khuluṋoni ḽi tshi ri: Asiyo, thumba ya Mudzimu vhukati ha vhathu! Ene u ḓo fhaṱa mushasha vhukati havho, vhone vha vha vhathu vhawe, huno ene nga eṱhé, Mudzimu, u ḓo vha kha vhone, Mudzimu wavho. U ḓo fhuluṱa maṱodzi oṱhe maṱoni avho, lufu a lu tsha ḓo vha hone, na vhuṱungu na zwililo na tshengelo a zwi tsha ḓo vha hone, ngauri zwa kale zwo fhela.” Dzenedzo ndi phaṱhutshedzo dzavhuḓi vhukuma! U fheliswa ha lufu zwi ḓo ita uri hu si tsha vha na maṱodzi, zwililo, vhuṱungu na tshengelo. Zwi ḓo ita uri vhathu vha fulufhedzeaho vha vhe vho fhelelaho, vho pfumedzanywaho na Mudzimu nga ho fhelelaho.
16 I tshi ṱalusa dziṅwe phaṱhutshedzo dzine vhotshifhe vha vhuhosi vha ḓo dzi ḓisa, Ndzumbululo 22:1, 2 i ri: “A ntsumbedza mulambo wa maḓi a vhutshilo u penyaho sa munyaka wo simuwaho kha khuluṋoni ya Mudzimu na ya Ngwana. Vhukati ha mikoto ya muḓi [Yerusalema Huswa], thungo na thungo ha mulambo, ho vha hu na muri wa vhutshilo u aṋwaho mitshelo ya fumi-na-mivhili une wa aṋwa vhana vhawo nga miṅwedzi yoṱhe, maṱari a wonoyo muri ḽa vha dzilafho ḽa dzitshakha.” Nga nṱhani ha dzenedzi ndugiselelo dza lwa pfanyisedzo, “dzitshakha” kana zwigwada zwa vhathu, a zwi tsha ḓo vha na u sa fhelela he ha mamelwa kha Adamu. Vhukuma, ‘zwa kale zwi ḓo vha zwo fhela.’
VHOTSHIFHE VHA VHUHOSI VHA KHUNYELEDZA MUSHUMO WAVHO
17. Ndi mini zwine vhotshifhe vha vhuhosi vha ḓo fhedzisela vho zwi khunyeledza?
17 Musi ho no fhela miṅwaha ya 1 000 ya tshumelo i vhuyedzaho, vhotshifhe vha vhuhosi vha ḓo vha vho no ita uri vhathu vha re kha ḽifhasi vha vhe vho fhelelaho. Sa Tshifhe Muhulu na Khosi, Kristo u ḓo kumedza vhathu vho fhelelaho kha Yehova. (Vhalani 1 Vha-Korinta 15:22-26.) Vhotshifhe vha vhuhosi vha ḓo vha vho khunyeledza mushumo wavho nga vhuḓalo.
18. Musi vhotshifhe vha vhuhosi vho no khunyeledza mushumo wavho, Yehova u ḓo shumisa hani khonani dza Kristo?
18 Nga murahu, Yehova u ḓo shumisa hani vhenevha vhathu vha re na ndugelo ya u vha khonani dza Kristo? U ya nga Ndzumbululo 22:5, “vha ḓo vha mahosi na lini na lini.” Vha ḓo vhusa vhonnyi? Bivhili a yo ngo amba tshithu nga hazwo. Fhedzi vhutshilo havho na tshenzhelo ya u thusa vhathu vha songo fhelelaho, zwi ḓo ita uri vha kone u vha na vhuimo ha ndeme kha ndivho dza Yehova nga hu sa fheli.
19. Ndi mini zwine zwa ḓo humbudzwa vho ḓaho Tshihumbudzoni?
19 Musi ri tshi kuvhangana Tshihumbudzoni tsha lufu lwa Yesu nga Ḽavhuṋa, ḽa 5 April, 2012, ri fanela u elekanya nga ha yeneyi pfunzo ya Bivhili. Masalela a Vhakriste vho ḓodzwaho vhane vha kha ḓi vha kha ḽifhasi, vha ḓo ḽa zwiga zwa tshinnkwa tshi si na dini na veine tswuku, zwine zwa sumbedza u vha tshipiḓa tsha mulanga muswa. Zwenezwi zwiga zwa tshiṱhavhelo tsha Kristo zwi ḓo vha humbudza nga ha ndugelo yavho ya ndeme na vhuḓifhinduleli vhune vha vha naho kha ndivho ya Mudzimu ya tshoṱhe. Zwi nga vha zwavhuḓi arali roṱhe ra vha hone u itela u livhuha ndugiselelo ya Yehova Mudzimu ya vhotshifhe vha vhuhosi vhane vha vhuyedza vhathu vhoṱhe.
[Mbudziso Dza Pfunzo]
[Tshifanyiso kha siaṱari 29]
Vhotshifhe vha vhuhosi vha ḓo ḓisela vhathu phaṱhutshedzo nga hu sa fheli