Asaa Naatu Ubbau Anjjuwaa Ehaana Kawo Qeeseta
Asaa Naatu Ubbau Anjjuwaa Ehaana Kawo Qeeseta
“Intte . . . doorettida zare; intte kawo qeeseta; geeshsha asanne Xoossaassi buzo asa.”—1 PHE. 2:9.
QONCCISSANA DANDDAYAY?
Kawo qeeseti deˈanaagaa Yihooway koyro qaalaa gelidoy awudee?
Ooratta maachay kawo qeeseta demissiyoy ayba ogiyaanee?
Kawo qeeseti asaa naatuyyo ayba anjjuwaa ehaanee?
1. ‘Godaa kahoy’ Hassayiyo Baalaa geetettiyoy aybissee, hegaa halchoy aybee?
NIISAANA 14, 33 M.Ln omarssi, Yesuusinne i kiittido 12ti Ayhuda Paasikaa baalaa wurssetta wodiyau bonchidosona. Yesuusi kaddida Yihudaa Asqqoroota kessi simmidi, guyyeppe “Godaa kahuwaa” geetettida hara baalaa essiis. (1 Qor. 11:20) Yesuusi naaˈˈutoo “hegan tana hassayite” yaagiis. He baalay Hassayiyo Baalaakka geetettees; he wode Kiristtoosa oosuwaa, ubba qassi a hayquwaa hassayoos. (1 Qor. 11:24, 25) Alame yuushuwan deˈiya Yihoowa Markkati ha azazuwaa azazettiyoogan, ha baalaa layttan layttan bonchoosona. Geeshsha Maxaafaa wodiyaa qoodan, Niisaana 14y Hamuusa, Hosppune 5, 2012n, away wulli simmin doommees.
2. Yesuusi oyttaanne woyniyaa xeelliyaagan woygidee?
2 Erissiyo ashkkaraa Luqaasi, he wode Yesuusi oottidobaanne giidobaa, naaˈˈu xiqisetun hagaadan giis: “Oittaa ekkidi, Xoossaa galatiis; he oittaa menttidi, etassi immidi, ‘Hagee intteyyo imettida ta ashuwaa; hagan tana hassayite’ yaagiis. Kahuwaa mirggidoogaappe guyye baggan, kaseegaadan burccukkuwaa etassi immidi, hagaadan yaagiis; ‘Hagee inttessi gukkiya ta suuttan maacettida ooratta maachchaa.’” (Luq. 22:19, 20) Kiitettidaageeti ha qofaa ayba ogiyan akeekidonaa?
3. Yesuusi oyttaanne woyniyaa xeelliyaagan yootidobaa kiitettidaageeti akeekidoy ayba ogiyaanee?
3 Kiitettidaageeti Ayhuda gidiyoogaadan, Yerusalaamen beeta maqidasiyan qeeseti Xoossau yarshshiyo mehiyaa yarshshuwaabaa loytti eroosona. He yarshshoti Yihoowan nashettanau shiishshiyoogeeta; hegeetuppe darota shiishshiyoy nagaraappe maarotettaa demmanaassa. (Wog. 1:4; 22:17-29) Yaatiyo gishshau, Kiitettidaageeti Yesuusi ba ashoynne ba suuttay ‘eta gishshau imettanaagaanne gukkanaagaa’ yootido wode, ba polo deˈuwaa yarshshanaagaa yootidoogaa akeekana danddayoosona. He yarshshoy demissiyoobay mehiyaa yarshshuwaagaappe keehi aadhees.
4. Yesuusi, ‘Ha burccukkoy inttessi gukkiya ta suuttan maacettida ooratta maachaa’ giido qofaa birshshettay aybee?
4 Yesuusi ‘ha burccukkoy inttessi gukkiya ta suuttan maacettida ooratta maachaa’ giido qofaa birshshettay aybee? Kiitettidaageeti Ermmaasa 31:31-33n (Nabbaba.) kasetidi odettida ooratta maachaabaa eroosona. Yesuusi yootido qofay, Yihooway Muuse baggaara Israaˈeelatuura maacettido Higgiyaa maachaa gishshaa maacettiyo ooratta maachaa he wode i erissidoogaa qonccissees. Ha naaˈˈu maachati issoy issuwaara gayttiyaabee?
5. Higgiyaa maachay Israaˈeelati ay demmanaagaa qonccissidee?
5 Ee, ha naaˈˈu maachatikka issoy issuwaara matattiyaabau halchettidosona. Higgiyaa maachaabaa Israaˈeela asau yootido wode Yihooway hagaadan giis: “Simmi ha77i intte taayyo kumetta azazettikkonne ta maachchaa naagikko, kawotetta ubbaa giddon intte taayyo buzo gidana. Kumetta sa7ai tabaa gidikkonne intte taayyo qeesetu kawotettanne geeshsha kawotetta gidana.” (Kes. 19:5, 6) Ha qofaa Israaˈeelati ayba ogiyan akeekidonaa?
KAWO QEESE GIDANAADAN GELIDO QAALAA
6. Higgiyaa maachay giigidoy Yihooway gelido ay qaalay polettanaadaanee?
6 Yihooway Israaˈeelatu mayzza aawa gidida Noheeranne Abrahaameera maachaa maacettido gishshau, Israaˈeelati “maacha” giya qaalaa akeekoosona. (Doo. 6:18; 9:8-17; 15:18; 17:1-9) Yihooway Abrahaamaara maacettido maachay, “Ha sa7aa kawotettati ubbai ne zerettaa baggaara anjjettana” yaagidi gelido qaalaa gujjees. (Doo. 22:18) Yihooway he qaalay polettanaadan Higgiyaa maachaa giigissiis. He maachaappe denddidaagan, “kawotetta ubbaa giddon [Israaˈeelati Yihoowayyo] buzo gidana” danddayoosona. Buzo gidiyoy ayba halchuwaa polanaassee? Yihoowayyo ‘qeesetu kawotetta gidanaadaana.’
7. ‘Qeesetu kawotettaa’ giyoogee woygiyoogee?
7 Israaˈeelati kawotanne qeeseta eriyaaba gidikkokka, beni wode Yihoowa ufayssiya ogiyan kawonne qeese gididay Malkki-Xedeqa xalaala. (Doo. 14:18) Yihooway Israaˈeelatuppe ‘qeesetu kawotettaa’ dooranaagaa yootiis. Geeshsha Maxaafay guyyeppe, he doorettida asati kawo qeeseta gidanaagaa qonccissiis.—1 PHe. 2:9.
8. Xoossay sunttido qeeseti ay ay oottiyoonaa?
8 Kawoy haariyoogee qoncce. SHin qeesee oottiyoobay aybee? Ibraawe 5:1y, “Qeese ubbatu halaqati huuphiyan huuphiyan ba asaa giddoppe doorettidi, he asaa gishshaa Xoossau oottanau, imuwaa immanaunne nagara yarshshuwaa yarshshanau sunttettidosona” yaagees. Yaatiyo gishshau, Yihooway sunttido qeesee nagarancha asaa gishshaa Xoossau yarshshuwaa shiishshees, eta gishshaa Yihoowakko woossees. Hegaadankka, qeesee Xoossaa higgiyaa asaa tamaarissiyoogan Yihoowa kalˈˈatees. (Wog. 10:8-11; Mil. 2:7) Hegaadan oottiyoogan, Xoossay sunttido qeesee asaa Xoossaara sigettees.
9. (a) Israaˈeelati ‘qeesetu kawotettaa’ demissana danddayiyoy ayba hanotaanee? (b) Yihooway Israaˈeelen qeeseta sunttidoy aybissee? (c) Israaˈeelati Higgiyaa maachan ‘qeesetu kawotettaa’ demissennaadan diggiday aybee?
9 Yaatiyo gishshau, Higgiyaa maachay ‘asa ubbaa’ goˈˈau kawo qeese gidiyaageeti Israaˈeelatuppe kiyana danddayiyoogaa qonccissiis. Gidikkokka, eti he maalaaliya anjjuwaa demmana danddayiyoy “kumetta azazettikkonne [a] maachchaa naagikko” gidiyoogaa Xoossay yootiis. Israaˈeelati Yihoowa ‘kumetta azazettana’ danddayiyoonaa? Ee, danddayoosona; shin polo hanotaana gidenna. (Roo. 3:19, 20) Hegaappe denddidaagan, Yihooway Israaˈeelati oottiyo nagarau mehiyaa yarshshuwaa shiishshiya qeeseta Israaˈeelen sunttiis; he qeeseti kawo gididi oottokkona. (Wog. 4:1–6:7) Yarshshuwaa shiishshiyo he nagaray qeesetuugaakka gujjees. (Ibr. 5:1-3; 8:3) Yihooway he yarshshuwaa ekkidaba gidikkokka, he yarshshoti eta nagaraa kumetta hanotan atto giissana danddayokkona. Higgiyaa maachan qeeseti oottiyoobay ashkke Israaˈeeletakka kumetta hanotan Xoossaara sigettana danddayibeenna. Kiitettida PHauloosi hagaadan giis: “Korima suuttinne deeshsha suutti nagara xaissanau mulekka danddayenna.” (Ibr. 10:1-4) Israaˈeelati Higgiyaa azazettibeenna gishshau, qanggettidaageeta gididosona. (Gal. 3:10) Hegaa mala hanotan eti asa ubbau kawo qeese gidana danddayokkona.
10. Higgiyaa maachaa immido halchoy aybee?
10 Yaatin, ‘qeesetu kawotettay’ etappe kiyanaagaa Yihooway coo mela qaalaa gelidee? Mule hegaadaana gidenna. Eti azazettanau wozanappe baaxetiyaaba gidikko, Higgiyaana gidana xayikkonne, he maataa demmana. Higgiyaana gidennay aybissee? (Galaatiyaa 3:19-25 nabbaba.) Ammanettiyaageeta gididi Higgiyaa naaganau wozanappe baaxetiyaageetussi, Higgee geeshsha goynoy naagettidi deˈanaadan oottiis. Higgee Ayhudati nagarancha gidiyoogaanne eta qeese ubbatu halaqay shiishshiyoogaappe aadhiya yarshshoy koshshiyoogaa eti akeekanaadan oottiis. Higgee eta naagiyaagaa; qassi Kiristtoosakko, woy Masiyaakko kaalettiyaagaa; Kiristtoosa woy Masiyaa giyoogee “Tiyettidaagaa” giyoogaa. SHin Masee yiyo wode, Ermmaasi kasetidi yootido ooratta maachaa qonccissana. Kiristtoosa ekkidaageeti Xoossaara ooratta maachaa maacettiyaageeta gidanaadan shoobettidosona; qassi eti ‘qeesetu kawotetta’ gidana. Hegee waanidi haniyaakko ane beˈoos.
OORATTA MAACHAY ASAA GIDDOPPE KAWO QEESETI KIYANAADAN OOTTEES
11. Yesuusi kawo qeesetuyyo baaso gididoy ayba ogiyaanee?
11 Naazireete Yesuusi 29 M.Ln Mase gididi qoncciis. Ayyo layttay 30 heera gidido wode, i oottanaadan Yihooway koyiyoobaa polanau giigidoogaa haattan xammaqettidi bessiis. Yihooway a zaytiyan gidennan geeshsha ayyaanan tiyidi, ‘taani siiqiyo ta naˈaa’ yaagiis. (Maa. 3:13-17; Oos. 10:38) Yesuusi ammaniya asaa naatu ubbaayyo Qeese Ubbatu Halaqa, qassi sinttappe Kawo gidanaadan Xoossay a tiyiis. (Ibr. 1:8, 9; 5:5, 6) I tumuppe kawo qeesetuyyo baaso gidees.
12. Yesuusa yarshshoy ay polidee?
12 Qeese Ubbatu Halaqa gidiyoogaadan, Yesuusi ammaniya asay laattido nagaraa muleera xayssiya ayba yarshsho shiishshana danddayii? I ba hayquwaa Hassayiyo Baalaa essido wode qonccissidoogaadan, he yarshshoy a polo deˈuwaa. (Ibraawe 9:11, 12 nabbaba.) Yesuusi Qeese Ubbatu Halaqaa gidiyoogaadan, 29 M.Ln xammaqettido wodiyaappe doommidi hayqqana gakkanaashin, paacettanaunne loohanau eeno giis. (Ibr. 4:15; 5:7-10) I hayquwaappe denddi saluwaa biidi, ba yarshshuwaa waagaa Yihoowayyo immiis. (Ibr. 9:24) Yesuusi he wodeppe simmin, a yarshshuwan ammaniyoogaa oosuwan bessiyaageetu gishshaa Yihoowa woossanau, qassi eti merinaa deˈuwaa hidootidi Xoossaayyo oottanaadan maaddanau danddayees. (Ibr. 7:25) A yarshshoy ooratta maachay oosuwan peˈanaadankka oottiis.—Ibr. 8:6; 9:15.
13. Ooratta maachaa Xoossaara maacettidaageeti ayba anjjo demmiyoonaa?
13 Ooratta maachaa Xoossaara maacettanaadan shoobettiyaageetikka geeshsha ayyaanan tiyettoosona. (2 Qor. 1:21) Ammanettida Ayhudatinne, qassi guyyeppe, Ayhuda gidennaageeti he maachaa maacettidosona. (Efi. 3:5, 6) Ooratta maachaa maacettidaageeti ayba anjjo demmiyoonaa? Eti bantta nagaraappe tumu maarotettaa demmoosona. Yihooway, “Taani eta naaquwaa atto gaana; eta nagaraakka naa77antto hassayikke” yaagidi qaalaa geliis. (Erm. 31:34) Eta nagaray atto geetettido gishshau, eti ‘qeese kawotetta’ gidana danddayoosona. PHeexiroosi ayyaanan tiyettida Kiristtaanetuyyo, “Xoossai xumaappe garamissiya ba poo7uwau inttena xeesiis; intte a ooratta oosuwaa yootanau doorettida zare; intte kawo qeeseta; geeshsha asanne Xoossaassi buzo asa” yaagidi xaafiis. (1 PHe. 2:9) PHeexiroosi ha sohuwan, Yihooway Israaˈeelatuyyo Higgiyaa immiyo wode giidobaa zaaretti yootidi, hegee ooratta maachaa maacettida Kiristtaanetu bolli polettiyoogaa qonccissiis.—Kes. 19:5, 6.
KAWO QEESETI ASAA NAATU UBBAU ANJJUWAA EHAANA
14. Kawo qeeseti awan oottanee?
14 Ooratta maachaa maacettidaageeti awan oottanee? Eti issi cita gididi Yihoowa kalˈˈatidi “a ooratta oosuwaa” asau yootiyoogaaninne ayyaana qumaa immiyoogan qeese gididi ha saˈan oottoosona. (Maa. 24:45; 1 PHe. 2:4, 5) Eti hayquwaappe denddidi, saluwan Kiristtoosaara kawonne qeese gididi, he naaˈˈu oosuwaakka kumetta hanotan oottana. (Luq. 22:30; 1 PHe. 1:3-5; Ajj. 1:6) Kiitettida Yohaannisi ajjuutan saluwan Yihoowa araataa matan ayyaana meretata darota beˈiis. Eti dorssau yexxido ‘ooratta mazamuriyan’ hagaadan giidosona: “Neeni qommo ubbaappe, dumma dumma biitta qaala ubbaappe, yara ubbaappenne zare ubbaappe ne suuttan Xoossaayyo asaa wozadasa. Nu Xoossaayyo oottana mala, eta neeni kawotettanne qeeseta oottadasa. Qassi eti sa7an haarana.” (Ajj. 5:8-10) Yohaannisi guyyeppe beˈido ajjuutan, “Eti Xoossaassinne Kiristtoosassi qeeseta gidana; eti aara issippe sha7u laittau haarana” yaagidi he haariyaageetubaa yootiis. (Ajj. 20:6) Eti Kiristtoosaara issippe asaa naatu ubbaayyo anjjuwaa demissiya kawo qeeseta gidana.
15, 16. Qeesetu kawotettay asaa naatuyyo ayba anjjuwaa ehaanee?
15 Saˈan deˈiyaageetuyyo 144,000ti ayba anjjo ehaanee? Ajjuutaa shemppo 21 eta “Dorssaa keettaayyiyo” geetettiya, saluwan deˈiya katama gidida Ooratta Yerusalaamo giidi qonccissees. (Ajj. 21:9) Paydo 2ppe 4 gakkanaashin hagaadan gees: “Geeshsha katamiyaa ooratta Yerusalaama, ba azinaayyo gixxa giigida bullashettiya maccaaseedan, giiga uttidaara saluwaappe Xoossaa matappe duge wodhdhiyaaro taani be7aas. Gita cenggurssai araataappe hagaadan yaagidi, haasayishin, taani siyaas; ‘Xoossaa keettai asaara de7ees; Xoossai asaara issippe de7ana. Eti a asa gidana; Xoossai ba huuphen etaara de7ana. I eta Xoossaa gidana. Xoossai eta aifiyaappe afutta ubbaa quccana. Hagaappe sinttanau haiqoinne kayyoi woi waasoinne sahoi de7enna. Aissi giikko, ceegabai xayiis.’” Hegee keehippe maalaaliya anjjo! Hayqoy xayiyo gishshau, afuttay, kayyoy, waasoynne sahoy deˈenna. Ammanettida asaa naati polo gidana; Xoossaara kumetta hanotan sigettana.
16 Ajjuutaa 22:1, 2y, kawo qeeseti ehiyo anjjuwaabaa gujjidikka hagaadan gees: “Kiitanchchai tana Xoossaa kawotaa araataappenne Dorssaa kawotaa araataappe goggiya birilledan phooliya de7o haattaa shaafaa bessiis. He shaafai [Ooratta Yerusalaami] ogiyaa gidduwaara duge goggees. SHaafaappe hefintta baggaaranne hafintta baggaara aginan issitoonne laittan tammanne naa77utoo aifiya de7o mittai de7ees. He mittaa bonccoi de7iyoogee, zare ubbaa harggiyaappe pattanaassa.” Ha ajjuutay ‘zare ubbay’ woykko asaa naati ubbay Addaameppe laattido polotettaa pacaappe muleera paxanaagaa bessees. Tumukka, ‘ceegabay xayana.’
KAWO QEESETI BANTTA OOSUWAA POLOOSONA
17. Kawo qeeseti wurssettan ay polanee?
17 Kawo qeeseti goˈˈiyaabaa oottiyo 1,000 layttaa wurssettan, saˈan he kawotettau haarettiya asaa polo oottana. Qeese Ubbatu Halaqanne Kawo gidiyoogaadan, Kiristtoosi polo gidida asaa naata Yihoowayyo sheedhana. (1 Qoronttoosa 15:22-26 nabbaba.) Kawo qeeseti bantta oosuwaa kumetta hanotan polana.
18. Kawo qeeseti bantta oosuwaa poli simmin, Kiristtoosaara haariyaageetuyyo Yihooway ayba ooso immanee?
18 Hegaappe simmin, Kiristtoosaara issippe oottiya, gita maatay imettido kawo qeesetuyyo Yihooway ayba ooso immanee? Ajjuutaa 22:5y yootiyoogaadan, “eti meri merinau kawotana.” O bolla kawotanee? Eti o bolla kawotanaakko Geeshsha Maxaafay yootenna. SHin eti demmido hayqqennanne musenna deˈoy, qassi polo gidenna asaa maaddiyoogan eti bantta deˈuwan demmidobay, Yihoowa halchuwan merinau kawo gidiyo maataa demmanaadan oottees.
19. Godaa Kahuwaa bonchanau shiiqiyaageeti ay hassayanee?
19 Hosppune 5, 2012n, Hamuusa gallassi Yesuusa hayquwaa Hassayiyo Baalaa nuuni bonchanau shiiqiyo wode, Geeshsha Maxaafay tamaarissiyo ha qofaa hassayana. Tiyettida Kiristtaanetuppe attida, ha saˈan deˈiya amaridaageeti ooratta maachaa maacettidaageeta gidiyoogaa bessiya, Yesuusa ashuwaanne suuttaa leemiso gidiya, irshshoy baynna oyttaappe moosona, qassi zoˈo woyniyaappe uyoosona. Kiristtoosa yarshshuwau leemiso gidida he oyttaynne woynee, eti Xoossaa merinaa halchuwan demmido gita maataanne aawatettaa hassayanaadan oottees. Xoossaa Yihooway asaa naata ubbaa goˈˈanau kawo qeeseta giigissidoogaa keehippe nashshiyoogan, nuuni ubbay he baalaa bonchiyaageeta gidoos.
[Oyshata]
[Sinttaa 31n deʼiya misiliyaa qonccissuwaa]
Kawo qeeseti asaa naatuyyo merinaa anjjuwaa ehaana
