Ba Ulung i Pilung nge Prist ni Ngar Ayuweged e Girdi’
Ba Ulung i Pilung nge Prist ni Ngar Ayuweged e Girdi’
“Gimed ‘girdien fare nam ni ke mel’egmed Got, ni gimed e pilung nge prist, ni gimed ba nam nib thothup, ni gimed girdien Got.’”—1 PET. 2:9, NW.
RAYOG NI NGAM WELIY?
Wuin e som’on nni micheg ni bay boch e girdi’ ni yad ra mang pilung nge prist?
Uw rogon nra mang e piin ni yad bang ko fare m’ag nib beech u thilin Got nge girdi’ e pi pilung nge prist?
Mang angin e gagiyeg nra tay fapi pilung nge prist ngak e girdi’?
1. (a) Mang fan ni ku yima yog e Puguran ko fare “abich ni blayal’ rok Somol”? (b) Mang fan ni yima tay e re madnom ney?
NAP’AN ni ke blayal’ ko fare rran ni Nisan 14 ko duw ni 33 C.E., me madnomnag Jesus Kristus nge fa 12 i apostal rok fare madnom ko Paluk’af ni ma tay piyu Jew. Aram e yay ni tomur nra ted e re madnom nem. Tomuren ni yog Jesus ngak e en ni yognag ni nge chuw, ni aram Judas Iskariot, ma aram me tababnag reb e madnom ni yugu ba thil, ni munmun mi nog e “abich ni blayal’ rok Somol” ngay. (1 Kor. 11:20) L’agruw yay ni gaar Jesus: “Um rin’ed ni aray rogon ngi i pugurag ngomed.” Re madnom ney e ku yima yog e Puguran ngay, ni aram e yibe puguran e yam’ ni ke tay Kristus ni fan ngodad. (1 Kor. 11:24, 25) Bochan ni ma fol e Pi Mich Rok Jehovah u ga’ngin yang e fayleng ko re n’ey ni kan tay chilen ni ngaun rin’, ma aram fan ni yad ma madnomnag fare puguran ni gubin e duw. Re duw ney ko 2012 e tabab e Nisan 14 u nap’an ni ke aw e yal’ ko Aningeg Fen e Maruwel ko April 5, nrogon ni bay ko calendar ko Bible.
2. Mang e yog Jesus u murung’agen fare flowa nge wain?
2 I tamilangnag Luke e n’en ni rin’ Jesus nge n’en ni yog ko re madnom nem ni gaar: “Me fek fare flowa, me pining e magar riy ngak Got, me t’ar nge pi’ ngorad ni be gaar, ‘Ereray dowag ni kan pi’ ni bochmed. Um rin’ed e re n’ey ngi i pugurag ngomed.’ Ma ku aram rogon ni pi’ ngorad fare kap u tomren e abich ko blayal’, ni be gaar, ‘Re kap ney e bin nib beech e m’ag u thilin Got nge girdi’ ni rachaeg ni bay map’ nga but’ ni fan ngomed e ir e bayi micheg.’” (Luke 22:19, 20) Uw rogon ni nang fapi apostal fan e pi thin ney?
3. Uw rogon ni nang fapi apostal fan e n’en ni yog Jesus u murung’agen fare flowa nge wain?
3 Fapi apostal e yad e Jew. Ere yad manang fan fapi gamanman ni maligach ni ma pi’ e prist ngak Got ko tempel u Jerusalem. Pi maligach nem e yima pi’ ya nge felfelan’ Jehovah ngay, maku boor riy e yima pi’ ni nge n’ag Got fan e denen. (Lev. 1:4; 22:17-29) Aram fan nnap’an ni yog Jesus ngak fapi apostal nra pi’ downgin nge rachaen ni ‘fan ngorad,’ ma yad manang ni be yip’ fan ni nge pi’ e yafas rok nib flont ni maligach. Binem e maligach e kab gel e fel’ riy ko fapi gamanman ni un pi’ ni maligach.
4. Mang e be yip’ Jesus fan u nap’an ni gaar: “Re kap ney e bin nib beech e m’ag u thilin Got nge girdi’ ni rachaeg ni bay map’ nga but’ ni fan ngomed e ir e bayi micheg”?
4 Mang e be yip’ Jesus fan u nap’an ni gaar, “re kap ney e bin nib beech e m’ag u thilin Got nge girdi’ ni rachaeg ni bay map’ nga but’ ni fan ngomed e ir e bayi micheg”? Manang fapi apostal fare yiiy u murung’agen e bin nib beech e m’ag u thilin Got nge girdi’ ni bay ko Jeremiah 31:31-33. (Mu beeg.) Fapi thin ni yog Jesus e be dag ni aram e ka fini ngongliy e re m’ag nem, ni ir e ra yan nga lon fare m’ag ko Motochiyel ni ngongliy Jehovah u thilrad piyu Israel u daken Moses. Ere bay rogon e gal m’ag ney, fa?
5. Mang e ke bing fare m’ag ko Motochiyel kanawoen ngak piyu Israel?
5 Arrogon, ba chugur fan e gal m’ag ney. Nap’an ni pi’ Jehovah fare m’ag ko Motochiyel ngak piyu Israel, me gaar: “Faan gimed ra fol rog ngam ayuweged e m’ag rog, ma gimed ra par ni kam manged e girdi’ rog. Fayleng ni polo’ e ban’en rog, machane bay mpired ni gimed e girdi’ ni kug mel’egmed ni ngam manged girdieg. Bay mpired ni gimed girdien ba nam ni gimed be pigpig ngog ni kam manged pi prist, ma ke mus ni gag e ke mil suwmed ngog.” (Ex. 19:5, 6) Mang fan e pi thin ney ngak piyu Israel?
KAN MICHEG BOCH E GIRDI’ NI YAD RA MANG PILUNG NGE PRIST
6. Mang e kan micheg ni ir e ke ayuweg fare m’ag ko Motochiyel ni nge lebug?
6 Manang piyu Israel fan fare bugithin ni “m’ag,” ya aram e n’en ni ngongliy Jehovah u thilrow Noah nge Abraham. (Gen. 6:18; 9:8-17; 15:18; 17:1-9) Bang ko fare m’ag ni ngongliy Jehovah u thilrow Abraham e micheg riy ngak ni gaar: “Urngin e nam nu fayleng ni bay ra weniggad ngog ni nggu fal’eg waathrad ni bod rogon ni kug fal’eg waathan e piin ni owchem, ni bochan e kam fol ko tin ni ku gog ngom ni ngam rin’.” (Gen. 22:18) Fare m’ag ko Motochiyel ni ngongliy Jehovah e ir e ayuweg e re n’ey ni nge lebug. U daken e re m’ag nem e rayog ni nge par piyu Israel riy ni kar ‘manged girdien’ Jehovah ni ke mel’egrad u fithik’ girdien e pi nam. Ni mang fan? Ya nge yog nra manged ‘girdien ba nam ni yad be pigpig ngak Jehovah ni kar manged pi prist.’
7. Mang e be yip’ fan fare thin ni ‘girdien ba nam ni yad be pigpig ni kar manged pi prist’?
7 Manang piyu Israel murung’agen e pi pilung nge prist, machane kemus ni goo Melkizedek e pag Jehovah ni nge mang pilung nge prist u taabangiyal’. (Gen. 14:18) U daken fare m’ag ko Motochiyel e bing Jehovah e kanawo’ riy ngak piyu Israel ni ngar manged ‘girdien ba nam ni yad be pigpig ni kar manged pi prist.’ Ki tamilangnag boch e thin nu Bible nga tomuren nre n’ey e be yip’ fan nrayog ni ngar manged pilung nge prist.—1 Pet. 2:9.
8. Mang e ma rin’ e pi prist ni Got e ke mel’egrad?
8 Pilung e ma gagiyeg. Machane, mang e ma rin’ e prist? Be weliy e Hebrews 5:1 ni gaar: “Urngin e pi prist nib th’abi tolang e ra bagayad ma ni mel’eg u fithik’ e girdi’ ngan dugliy ni ir e ngi i pigpig ngak Got, ni aram e ir e ke mang owcherad ngak. Me tay nga daken e altar e tin ni ngan pi’ ngak Got, nge gamanman ni kan li’ ni aram e maligach ngak Got ni bochan e denen.” Ere, prist ni Jehovah e ke mel’eg e ma yan nga p’eowchen Got ni pa’ e girdi’ ni tadenen. Ma wenignag e denen ko girdi’ ngak Jehovah u daken e maligach ni ma pi’. Ku ir owchen Jehovah ngak e girdi’ ni ma fil e pi motochiyel rok Got ngorad. (Lev. 10:8-11; Mal. 2:7) Aray rogon ni ma ayuweg e prist e girdi’ ni tadenen ni nge fel’ thilrad Got.
9. (a) Mang e ba t’uf ni nge rin’ piyu Israel mfini yog ni ngar manged ‘girdien ba nam ni yad be pigpig ni kar manged pi prist’? (b) Mang fan ni mel’eg Jehovah boch e girdi’ ni ngar manged prist u fithik’ piyu Israel? (c) Mang fan nde yog ni nge mang piyu Israel ‘girdien ba nam ni yad be pigpig ni kar manged pi prist’ u tan fare m’ag ko Motochiyel?
9 Fare m’ag ko Motochiyel e ke bing e kanawo’ ngak piyu Israel ni ngar manged pilung nge prist ni fan ko “girdi’.” Machane, bay ban’en nib t’uf ni ngar rin’ed. I gaar Got: “Faan gimed ra fol rog ngam ayuweged e m’ag rog.” Gur, rayog ni nge ‘fol piyu Israel rok Jehovah’? Rayog, machane dabiyog ni ngar rin’ed ni bod be’ nib flont. (Rom. 3:19, 20) Aram fan ni mel’eg Jehovah boch e girdi’ u fithik’ piyu Israel nda ur manged pilung ni ngar manged prist ni ngaur pied e gamanman ni maligach ni fan ko denen rok piyu Israel. (Lev. 4:1–6:7) Pi denen ney e ba muun e denen ko pi prist ngay. (Heb. 5:1-3; 8:3) I m’agan’ Jehovah ko pi maligach ney, machane dabiyog ni nge chuweg e denen rok piyu Israel. Gubin e prist ni yad bay u tan fare m’ag ko Motochiyel e dabiyog ni ngar fal’eged e tha’ u thilin piyu Israel nge Got nge yan i aw ni kari fel’, ya bod ni yog apostal Paul ni gaar: “Rachaen e garbaw ni pumoon nge kaming e ri dabiyog ni nge fek e denen nge chuweg.” (Heb. 10:1-4) Bochan nde fol piyu Israel ko fare Motochiyel, ma aram fan ni kar pared nib buch waathrad. (Gal. 3:10) Faanra aram rogorad, ma dabiyog ni ngar pigpiggad ni yad e pilung nge prist.
10. Mang fan fare m’ag ko Motochiyel?
10 Gur, dariy e n’en nra rin’ me mang piyu Israel ‘girdien ba nam ni yad be pigpig ni kar manged pi prist’ ni bod rogon ni micheg Jehovah? Danga’, ya faan yad ra gay rogon ni ngaur folgad rok Jehovah, ma aram e rayog e re tow’ath nem ngorad, machane gathi ngiyal’ ni ka yad bay u tan fare Motochiyel. Mang fan? (Mu beeg e Galatia 3:19-25.) Fare Motochiyel e ma ayuweg piyu Israel ko bin riyul’ e liyor. Ku ma puguran ngorad ni yad bogi tadenen mab t’uf rorad reb e maligach ni kab gel e fel’ riy ko tin ni ma pi’ e en nth’abi tolang ko prist. Re Motochiyel nem e ir e mang sensey ngorad nge yan i mada’ ko ngiyal’ ni yib Kristus riy, ara fare Messiah. Gal ngachal ney e be yip’ fan e “En ni Kan Dugliy.” Machane, nap’an nra yib fare Messiah ma ir e ra yib i ognag e bin nib beech e m’ag u thilin Got nge girdi’ ni faani yiiynag Jeremiah murung’agen. Piin ni mich Kristus u wan’rad e ra manged bang ko fare m’ag nib beech u thilin Got nge girdi’, ma yad e yad ra mang ‘girdien ba nam ni yad be pigpig ni kar manged pi prist.’ Ngad guyed ko uw rogon nra buch e re n’ey.
PIIN NI YAD BANG KO FARE M’AG NIB BEECH E KAR MANGED PILUNG NGE PRIST
11. Uw rogon ni mang Jesus e def u ba ulung i pilung nge prist?
11 Nap’an e duw ni 29 C.E., me mang Jesus nu Nazareth fare Messiah. Ma sogonap’an 30 e duw rok, me pi’ ir ni nge rin’ e n’en nib m’agan’ Jehovah ngay ni nge rin’, me dag u daken e taufe ni un ngay. I yog Jehovah ni gaar: “Ereray Fakag nib t’uf rog.” Ma aram me dugliy nga gelngin nib thothup ma gathi gapgep. (Matt. 3:13-17; Acts 10:38) I dugliy Got Jesus nga gelngin nib thothup ya nge yog ni mang Prist nib Tolang rok e piin nra mich u wan’rad, miki mang Pilung rorad boch nga m’on. (Heb. 1:8, 9; 5:5, 6) Ir e ra mang def u ba ulung i pilung nge prist.
12. Fare maligach rok Jesus e bing e kanawo’ ko mang?
12 Mang maligach e rayog ni nge pi’ Jesus ni fare Prist Nth’abi Tolang ni nge upunguy e denen ni af ngak e piin ni ke michan’rad ngak? N’en ni yog Jesus u nap’an ni tababnag e Puguran ko yam’ nra tay e ke ayuwegdad kad nanged nre maligach nem e aram e yafas rok nib flont. (Mu beeg e Hebrews 9:11, 12.) Ka nap’an e ngiyal’ nni taufenag riy ko duw ni 29 C.E., ni ke mang Prist Nth’abi Tolang, e i mada’nag e skeng nge boch ban’en ni i ayuweg nge mada’ ko ngiyal’ ni yim’ riy. (Heb. 4:15; 5:7-10) Tomuren ni fas ko yam’, me sul nga tharmiy me yan i ognag ngak Jehovah fel’ngin e re maligach nem. (Heb. 9:24) Ma ka aram nap’an ni yog ni nge wenignag Jesus ngak Jehovah e piin ni yad be maruweliy e michan’ rorad ko fare maligach rok me ayuwegrad ni ngaur pigpiggad ngak Got ni yad be athapeg e yafas ni manemus. (Heb. 7:25) Maligach rok e ku ir e yibnag angin fa bin nib beech e m’ag u thilin Got nge girdi’.—Heb. 8:6; 9:15.
13. Mang e athap rok e piin ni yad bang ko fa bin nib beech e m’ag u thilin Got nge girdi’?
13 Piin ni yad bang ko fa bin nib beech e m’ag u thilin Got nge girdi’ e kun dugliyrad nga gelngin Got nib thothup. (2 Kor. 1:21) Pi Jew ni yad ba yul’yul’ e yad bang ko re m’ag nem, miki munmun me un e piin ni gathi yad e Jew ngay. (Efe. 3:5, 6) Mang e athap rok e piin ni yad bang ko re m’ag nib beech nem? Yira n’ag fan urngin e denen rorad. Ke micheg Jehovah ni gaar: “Bay gu n’ag fan e denen rorad u wan’ug ma dab ku gu lemnag e kireb ni kar ngongliyed.” (Jer. 31:34) Ma bochan ni kan n’ag fan e denen rorad, ma aram fan nrayog ni ngar manged ‘girdien ba nam ni yad be pigpig ni kar manged pi prist.’ I yog Peter ngak e pi Kristiano ni kan dugliyrad ni gaar: “Gimed ‘girdien fare nam ni ke mel’egmed Got, ni gimed e pilung nge prist, ni gimed ba nam nib thothup, ni gimed girdien Got, ni mel’egmed Got ni ngam wereged murung’agen e n’en nrib fel’ ni ke ngongliy Got, ni ir e piningmed u fithik’ e lumor ngam bad nga fithik’ e tamilang rok nrib fel’.” (1 Pet. 2:9) Pi thin ney ni yog Peter e be sul u daken e thin ni yog Jehovah ngak piyu Israel u nap’an ni pi’ fare Motochiyel ngorad, ma ke yog ni fan ngak e pi Kristiano ni yad bang ko fa bin nib beech e m’ag u thilin Got nge girdi’.—Ex. 19:5, 6.
BA ULUNG I PILUNG NGE PRIST NI YAD RA AYUWEG E GIRDI’
14. Uw e ra pigpig fapi pilung nge prist riy?
14 Uw e ra pigpig e piin ni yad bang ko fa bin nib beech e m’ag riy? Yad ra pigpig u fayleng ni yad be ulung i prist ni owchen Jehovah ni yad be wereg ‘murung’agen e n’en nrib fel’ ni ke ngongliy,’ ma yad be ayuweg e girdi’ ko tirok Got ban’en. (Matt. 24:45; 1 Pet. 2:4, 5) Tomuren ni kar m’ad min fasegrad ko yam’, ma aram e yad ra un ngak Kristus ko gagiyeg u tharmiy ni yad e pilung nge prist ni yad be rin’ e gal maruwel ney nib fel’ rogon. (Luke 22:29; 1 Pet. 1:3-5; Rev. 1:6) I pig e changar rok apostal John nge guy bogi ban’en nib fos ni yad bay ni yad ba chugur nga tagil’ Jehovah u tharmiy. Ma aram ma ron’ed reb e “tang nib beech” ni fan ngak “fare fak e saf” ni gaar: “Rachaem ni map’ u daken fare ley i gek’iy e ir e mu chuw’iy e girdi’ ngay ni ngar manged girdien Got, ni girdi’ u urngin e ganong, nge thin, nge gubin mit e girdi’, nge nam. Kam ngongliyrad kar manged ba nam i prist ni nguur pigpiggad ngak e Got rodad; ma bay ra gagiyegnaged e fayleng.” (Rev. 5:8-10, NW) Boch nga tomuren miki pig e changar rok John, me gaar: “Bay ra manged pi prist rok Got nge Kristus, ma bay ra uned ngak ko gagiyeg u lan bbiyu’ e duw.” (Rev. 20:6) Pi pilung ney e yad ra un ngak Kristus ngar manged ba ulung i pilung nge prist ni ngar ayuweged e girdi’.
15, 16. Mang angin e gagiyeg nra tay fapi pilung nge prist ngak e girdi’?
15 Mang angin e gagiyeg nra tay fare 144,000 ko girdi’ nu fayleng? Ka nog ko Revelation ko guruy ni 21 ni yad fa Bin nib Beech e Jerusalem ni fare mach ni bay u tharmiy ni ka nog e “ppin rok fare Fak e Saf” ngorad. (Rev. 21:9) Verse 2 nge mada’ ko 4 e be gaar: “Mu gguy fare Binaw nib Thothup, ni aram fa bin nib beech e Jerusalem ni be yib u tharmiy nga but’ ni ke yib rok Got, ni ke fal’eg rogon ni bod be’ ni ppin ni nge mabgol ni ke yin’ e mad rok nib fel’ ni nge yan ngar mada’gow e pumoon rok. Mu gu rung’ag ba lam ni ba ga’ ni be non u tagil’ Got ni be gaar, ‘Chiney e keb i par tafen Got nga fithik’ e girdi’! Bayi par rorad, ma bay ra manged girdien. Mi Got e bay i par rorad, mi ir e bayi mang Got rorad. Ma bayi n’ag urngin e lu’ u owcherad. Ma aram e dab ku unim’, ma dab ki i kireban’uy, ma dab ku un yor, ma dab ku un amith. Ya tin kakrom ban’en e ke chuw.’” Ireray e tow’ath nrib manigil! Ra taw ko ngiyal’ nem ma dab ki kireban’uy, ma dab ku un yor, ma dab ku un amith, ya dakuriy e yam’ ni ir e ma k’aring e pi n’ey. Ra flont gubin e girdi’, mar pared ni kar manged fager rok Got.
16 Ku be weliy e Revelation 22:1, 2 murung’agen boch e tow’ath nra yibnag e pi pilung nge prist ney ni gaar: “Mi ki dag fare engel ngog fare lul’ ni bay e ran ko yafos riy, ni be galgal ramaen ni bod e krystal, ni yib u tagil’ Got nge fare Fak e Saf, nge yan u lulukngun e kanawo’ ko fare binaw. Ma ra baraba’ fare lul’ ma ba’ e gek’iy ko yafos riy, ni ragag nge l’agruw yay ni ma k’uf u reb e duw, nra reb e pul ma taab yay; ma yuwan e ma chuweg e liliy rok e pi nam.” Re n’ey e be dag ngodad rogon nra chuw thibngin e denen ni af rok Adam ngak e “pi nam” ara girdi’ nu fayleng. Riyul’ ni ‘tin kakrom ban’en e ra chuw.’
NAP’AN NRA MU’NAG FAPI PILUNG NGE PRIST E MARUWEL RORAD
17. Ra taw nga tungun fare biyu’ i duw, ma mang e ke mu’ fapi pilung nge prist i rin’?
17 Ra taw nga tungun fare 1,000 i duw, ma ke ayuweg fapi pilung nge prist urngin e girdi’ kar flontgad. Ma aram e ra pi’rad Jesus Kristus ni ir e Pilung nge Prist Nth’abi Tolang ngak Jehovah. (Mu beeg e 1 Korinth 15:22-26.) Ma aram e ke m’ay e maruwel ko fapi pilung nge prist.
18. Tomuren ni ke mu’nag fapi pilung nge prist e maruwel rorad, ma mang e maruwel ni ka bay nra pi’ Jehovah ngorad?
18 Uw rogon nra maruwel Jehovah ko pi pilung nge prist nem u tomuren e re n’ey? Rogon ni be yog e Revelation 22:5 e, “bay ra pired ni kar manged pilung nguur gagiyeggad ndariy n’umngin nap’an.” Mini’ e yad ra gagiyegnag? Der yog e Bible. Machane, ka yad ra par nib ga’ farad u wan’ Jehovah. Yad ra par ndab kur m’ad ma ke yoor ban’en ni kar nanged u rogon ni ngan ayuweg e girdi’ ndawor ra flontgad. Ere ka yad ra par ni yad e pilung ni be fanayrad Jehovah ni ngar rin’ed e tin nib m’agan’ ngay ndariy n’umngin nap’an.
19. Mang e ra yib ngan’ urngin e piin ni yad ra un ko fare Puguran?
19 Ireray e pi n’en nra ud lemnaged u nap’an ni gad ra muulung nga taabang ko Aningeg Fen e Maruwel ko April 5, 2012 ni ngad madnomnaged e Puguran ko yam’ ni tay Jesus. Pi Kristiano ni kan dugliyrad ni ka yad bay u fayleng e yad ra kay fare flowa mar unumed e wain, ni aram e be yip’ fan ni yad bang ko fa bin nib beech e m’ag u thilin Got nge girdi’. Re n’ey e be puguran ngorad e tow’ath ni ke yog ngorad nge pi n’en ni ke milfan ngorad ko tin nib m’agan’ Got ngay. Ere manga yugu da uned ko re madnom nem ni gad be dag ni gad be pining e magar ko fapi pilung nge prist ni ke mel’egrad Jehovah ni ngar ayuweged e girdi’.
[Study Questions]
[Picture on page 31]
Fapi pilung nge prist e yad ra rin’ boch ban’en nra yib angin ko girdi’
