“¿Ti raba kukwe driere ño?”

Kä jökräbiti ja mräkätre kwati tä ja tuin bren tare ben akwa yebiti ta tätre kukwe driere jankunu. Ye erere Dalia nünanka Vilna juta Lituania yekänti tä nuainne.

Kä niena 35 Dalia yebiti. Niara därebare ye ngwane ja känenkäre tä ja tare nike bren jisaibätä ye kisete, yebätä niara tä nikraninkä kwekebe aune ñaka blite kwin. Meye Galina tä ngübare aune tä nüne ben bätä mräkätre nünanka bäre ye aibe ie niara kukwe ye nüke gare. Niara tä ja tare nike aune tä töbike krubäte akwa raba dre nuainne ye aibebätä töita. ¿Tä nemen bare ño ie?

Meye kwe tä niere: “Kä 1999 yete, ti etebakrä Apolonija rükaba basare nuen, niara testiko Jehovakwe. Niara ie kukwe Bibliabätä ye gare kwin rükaba gare nuen. Dalia kukwe ngwantariba krubäte ie aune ja tötika Bibliabätä ye kan ngäbitiba jötrö ngwarbe kwe. Ruäre ngwane ti nämä täke niara ken kukwe nie nämä ti ngängänkwe ye mikakäre gare kwin ie. Kukwebätä nämä ja tötike ye nämä dimike krubäte, yebätä tikwe ja tötika Bibliabätä käräba ja kräke arato”.

Kukwe Bibliabätä jatani nüke gare bäri kwin Dalia ie akwa kukwe keteiti nämä niara mike töbike krubäte, ye medenbätä kukwe ye ngwantariba kwe Apolonija ie: “Ti bren krubäte, ¿ti raba kukwe driere ño?” (Mat. 28:19, 20). Apolonija niara töi mikaba jäme: “Ñan kä jürä ngwan jabätä; Jehová mä dimikai”. Ye erere tä nemen bare niarabätä.

¿Niara tä kukwe driere ño? Niara tä tärä tike yebiti tä kukwe driere Bibliabätä ni madai. Ye nuainkäre ja ngwaitre merire kwati tä niara dimike, kukwe meden tikadre nieta niarakwe ye erere niaratre tä tike. Teléfono niarakwe yete tä kukwe tike biti juen yebiti tä kukwe driere arato. Kä tä nemen moren ye ngwane, ja mräkätre ruäre konkrekasionte tä niken niara ngwena kukwe driekäre parques aune ji ngrabare.

Dalia aune meye ye ririabare jankunu kukwe ja üaire yebiti aune noviembre kä 2004 yete ja ngökabare ñöte kwetre. Kä nikani ta ye bitikäre, septiembre kä 2008 ye ngwane juta Vilna yekänti nitre blite kukwe polaco yebiti braibe nämene ja ükökrö yekänti niaratre nikani dimikakäre. Ja ngwai merire ne tä niere: “Sö ruäre te ti ñaka kukwe driere ye ngwane tita nemen töbike krubäte. Akwa tita orare Jehovai aune käre ja mräkätre tä kite ti nübaire kukwe driere”. Niara tä ja tare nike ño bren kisete ye tä mike gare krörö: “Bren ye köböire ti ngrabare tä nikraninkä, akwa ti töi abokän tä kwin. Tita blite ni madabe Jehovabätä ye tä kä mike juto krubäte tibätä”.