‘Kasanoak a Makakasaba?’

Iti intero a lubong, adda dagiti mapagwadan a kakabsat a simamatalek a mangaskasaba iti laksid ti nakaro a sakit. Maysa kadakuada ni Dalia nga agnanaed idiay Vilnius, a kabesera ti Lithuania.

Ni Dalia ket maysa a kabsat nga agtawen iti agarup 35. Manipud pay pannakayanakna, sagsagabaennan dagiti epekto ti cerebral apoplexy. Gapu iti dayta, paralisado ken nakaro ti depekto ti panagsaona. Isu a dagiti laeng kapamiliana ti makatarus iti ibagbagana. Kabbalayna ni nanangna a Galina, a mangay-aywan kenkuana. Nupay marigrigatan ken maburburiboran ni Dalia, positibo latta. Apay?

Kuna ni Galina: “Idi 1999, sinarungkarannakami ti kabagianmi a ni Apolonija. Isu ket maysa a Saksi ni Jehova ken nadlawmi nga adu ti ammona iti Biblia. Adu ti saludsod ni Dalia kenkuana. Di nagbayag, inyadalanna iti Biblia ni Dalia. Pasaray makikaduaak iti panagadalda tapno ilawlawagko ti ibagbaga ni Dalia. Ngem idi nakitak a nasayaat ti epektona kenkuana ti amin a maad-adalna, nagpayadalak metten iti Biblia.”

Bayat a maaw-awatan ni Dalia dagiti kinapudno iti Biblia, adda maysa a saludsod a mangburburibor kenkuana. Naisaludsodna met laeng dayta ken Apolonija: “Kasano a makakasaba ti paralisado a kas kaniak?” (Mat. 28:19, 20) Sidudungngo nga impanamnama ni Apolonija: “Dika madanagan. Tulongannakanto ni Jehova.” Ket pudno a tinulongan ni Jehova.

Kasano ngarud a mangasaba ni Dalia? Iti nagduduma a pamay-an. Dagiti kakabsat a babbai tulonganda nga agaramid iti surat a naglaon iti mensahe ti Biblia. Iyebkasna nga umuna ti kayatna nga ibaga sada mangaramid iti surat. Mangasaba met babaen ti panagteks iti selponna. Ken no nasayaat ti paniempo, iruar dagiti kakongregasionna tapno makasaritana dagiti tattao kadagiti parke ken kalsada.

Nagtultuloy a rimmang-ay iti naespirituan ni Dalia ken ni nanangna. Indedikarda ti biagda ken ni Jehova ken nagpabautisarda idi Nobiembre 2004. Idi Setiembre 2008, nabuangay idiay Vilnius ti grupo a Polish ti pagsasaona. Gapu ta agkasapulan dayta iti ad-adu nga agibumbunannag iti Pagarian, immakarda ken nanangna. Kuna ni Dalia: “Adda dagiti bulan a madanaganak ta saanak pay a nakaruar iti ministerio. Ngem kalpasan nga ikararagko dayta ken Jehova, addan makitulag kaniak a mangasaba.” Ania ti panangmatmat ti ipatpategtayo a kabsat a ni Dalia iti kasasaadna? Kunana: “Gapu iti sakit, naparalisado ti bagik ngem saan a naparalisado ti isipko. Maragragsakanak ta mairanranudko iti sabsabali ti maipapan ken Jehova!”