‘Kọ Ẹvẹ Mẹ te Sae rọ Ta Usiuwoma?’

Evaọ akpọ na soso, inievo buobu e riẹ nọ e be daoma ta usiuwoma dede nọ a bi lele eyao egaga muabọ. Omọvo rai jọ họ Dalia, ọnọ o be rria obọ Vilnius, okpẹwho-esuo Lithuania.

Dalia yọ oniọvo-ọmọtẹ nọ ọ vrẹ ikpe 30 no. No emaha ze okie o ro kie ei. Fiki ẹyao na, ọ rẹ sae kparoma no oria ruọ oria ha yọ ọ rẹ sae ta ẹme gba ha. Fikiere, ahwo uviuwou riẹ ọvo a rẹ sai wo otoriẹ eme riẹ. Dalia avọ Galina oni riẹ a gbẹ rrọ uwou, yọ oni riẹ họ ọnọ ọ be rẹro tei. Dede nọ ẹyao Dalia na ọ be kẹe idhọvẹ jẹ lẹliẹe ruawa, ọ be daoma wereva ghele. Kọ eme ọ be kẹe evawere?

Galina, oni riẹ, ọ ta nọ: “Evaọ ukpe 1999, ọmọ oniọvo mẹ nọ a re se Apolonija o te weze bru omai ze. Ma muẹrohọ nọ Apolonija, ọnọ ọ rrọ omọvo Isẹri Jihova, ọ riẹ Ebaibol na ziezi, kẹsena Dalia ọ tẹ jẹ nọe enọ buobu. U kri hi, Apolonija o te muọ Ebaibol họ ewuhrẹ kugbe Dalia. Mẹ jẹ hai kuomagbe ewuhrẹ na ẹsejọ re mẹ wariẹ eme nọ Dalia ọ be ta kẹ Apolonija. Me muẹrohọ inọ eware kpobi nọ a bi wuhrẹ iẹe e be kẹe erere. Mẹ tẹ ta nọ jọ Apolonija o wuhrẹ Ebaibol kugbe omẹ re.”

Nọ Dalia o bi wo ẹnyaharo evaọ uwuhrẹ na, oware jọ o tẹ be kẹe uye. Ẹdẹjọ ọ tẹ nọ Apolonija inọ: “Whaọ mẹ be sai n’oria ruọ oria ha, kọ ẹvẹ mẹ te sae rọ ta usiuwoma?” (Mat. 28:19, 20) Apolonija ọ tẹ tuduhọ Dalia awọ inọ: “Ajọ ozọ u mu owhẹ hẹ. Jihova o ti fi obọ họ k’owhẹ.” Yọ Jihova o gine fi obọ họ kẹe.

Kọ ẹvẹ Dalia ọ jẹ sae rọ ta usiuwoma? Evaọ idhere sa-sa. Inievo-emetẹ nọ e rrọ ukoko riẹ a jẹ hai fi obọ họ kẹe kere ileta nọ a fi eme Ebaibol họ. Orọ ọsosuọ, Dalia ọ rẹ ta oware nọ o rrọ eva riẹ kẹ inievo na. Kẹsena a ve kere eme nọ ọ ta na fihọ ileta. Dalia ọ rẹ jẹ rọ ifonu ta usiuwoma ẹkwoma ifonu nọ o re ro vi uwou se ahwo. Ẹdẹ nọ ovao ehru na o tẹ sasa, inievo nọ e rrọ ukoko riẹ a rẹ whae lele oma kpohọ usiuwoma re ọ sae ta usiuwoma evaọ oria nọ ahwo a rẹ jọ serihọ gbe evaọ iyẹrẹ.

Dalia avọ oni riẹ a te ti wo ẹnyaharo ziezi evaọ ukoko na. Aimava a tẹ roma mudhe kẹ Jihova, a tẹ họ-ame evaọ amara Akpegbọvo, ukpe 2004. Evaọ amara Azie ọrọ ukpe 2008, a rehọ ukoko okpokpọ mu evaọ Vilnius, ẹwho nọ amọ Dalia a be rria na. Iwhowho-uvie nọ e rrọ ukoko na i bu tere he, fikiere Dalia avọ oni riẹ a te kuomagbe ai. Dalia ọ ta nọ: “Nọ amara o te bi re no yọ me ri kpohọ usiuwoma ha, o rẹ kẹ omẹ uye. Rekọ nọ mẹ tẹ lẹ se Jihova no, u re kri hi, oniọvo jọ ọ rẹ fialoma via re o lele omẹ kpohọ usiuwoma.” Kọ ẹvẹ Dalia o rri ẹbẹbẹ na? Ọ ta nọ: “Dede nọ ẹyao na ọ ko omẹ fihọ otọ, ọ whaha omẹ Ọghẹnẹ ọgọ họ. Eva e be were omẹ inọ mẹ be sae ta usiuwoma kẹ amọfa kpahe Jihova.”