‘Aweyi Ilenda Sadila e Salu kia Umbangi?’

Mu nza yawonso, muna ye mpangi zeto z’akala y’akento akwikizi bekuyivananga mu samuna nsangu zambote kana una vo benwananga ye mpasi za mayela. Tala e nona kia Dalia, ozingilanga kuna Vilnius mbanz’a Lituânia.

Dalia una ye tezo kia mvu 30, kimbevo kia apoplexia cerebral keyelanga tuka kawutukila. E kimbevo kiaki kiankitula se nkw’evola yo lembi toma vova. Muna kuma kiaki, yitu yandi kaka betoma bakulanga mana kevovanga. Dalia ozinganga yo Galina wa ngw’andi ona okunlunga-lunganga. Kana una vo zingu kia Dalia kiazala ye mpasi ye ntelamw’a moyo, ovwidi ngindu zasikila. Mu nkia mpila?

Galina wavova vo: “Muna mvu wa 1999, Apolonija wa mpangi ame, wayiza kutukingula. Twamona vo Apolonija una vo Mbangi a Yave watoma bakulanga Nkand’a Nzambi, Dalia wayantika kunyuvula yuvu yayingi. I bosi, bayantika longoka Nkand’a Nzambi. Ezak’e ntangwa, yakalanga vana ndambu muna sasila mvovo mia Dalia. Kansi, yamona vo mawonso kalongokanga kiese ye nluta miayingi mantwasilanga. Vana vau, mono mpe yayantika longoka Nkand’a Nzambi.”

Vava Dalia kayantika bakula ludi kia Nkand’a Nzambi, wayantika tokana mu kuma kia diambu dimosi. I bosi, wayuvula kwa Apolonija vo: “Wau vo i nkw’evola, aweyi ilenda sadila e salu kia umbangi?” (Mat. 28:19, 20) Apolonija wamvove sa vo: “Kutokani ko, Yave osinga kusadisa.” Elo, Yave wansadisa kikilu.

Aweyi Dalia kelendelanga samuna e nsangu zambote? Mpila zayingi kesadilanga. Mpangi z’akento muna nkutakani, bekunsadisanga mu sila umbangi muna nkanda. Entete, Dalia ozayisanga kwa mpangi z’akento e nsangu za Nkand’a Nzambi kazolele samuna kwa wantu. I bosi, besonekanga zo muna nkanda. Dalia osilanga mpe wantu o umbangi muna kubatwikila nsangu muna telefone andi. Vava e nsungi ikalanga yambote, ampangi muna nkutakani bevaikanga yandi muna nzila yamuna fulu ikalanga ndonga kimana basila umbangi kwa wantu.

Dalia ye ngw’andi bakwamanana nungunuka muna mwanda. Muna ngonde a Novemba ya mvu wa 2004, yau ewole bakiyekola kwa Yave yo vubwa. Muna ngonde a Setemba ya mvu wa 2008, ampangi muna mbanz’a Vilnius bakubika buka kia ndinga a Polish. Wau vo ateleki ayingi a Kintinu bavavwanga muna buka kiaki, Dalia ye ngw’andi bayikama e buka kiaki. Dalia wavova vo: “Kuna lubantiku yatokananga vava kiavaikanga muna salu kia umbangi ko. Kansi, vava yasamba kwa Yave mu kuma kia diambu diadi, mpangi mosi wasia nsilu wavaika yame mu salu kia umbangi.” Aweyi mpangi Dalia kebadikilanga zingu kiandi? Wavova vo: “Yavola muna nitu ame, kansi kiavola ko muna ngindu zame. Ngina ye kiese kiayingi wau vo ilendanga samuna oma ma Yave kw’akaka.”