‘Ndi mua kuyisha mushindu kayi?’

Pa buloba bujima, tudi ne bilejilu bimpe bia bana betu ba balume ne ba bakaji badi bayisha ne lulamatu nansha mudibu batantamena masama makole. Tuangate tshilejilu tshia Dalia, udi musombele mu tshimenga tshia Vilnius, mu ditunga dia Lituanie.

Muanetu Dalia udi ne bidimu bitue ku 35. Katshia bamulela udi ne disama dia mashi apatuka mu buongo. Disama edi ndimushiye mulema ne kayi wakula bimpe to. Nunku, anu bena mu dîku diabu ke batu bumvua bimpe bidiye wamba. Dalia mmusombe pamue ne mamuende Galina udi umuambuluisha. Nansha mudi Dalia muikale mu nsombelu mukole ne wa kanyinganyinga, udi anu umona malu mu mushindu muimpe. Mmushindu kayi?

Galina udi wamba ne: “Mu 1999, Apolonija muana wa mamuanyi mukuabu wakalua kutuendela buenyi. Tuetu kumona ne: uvua mumanye Bible bimpe bualu uvua Ntemu wa Yehowa, ke Dalia kutuadija kumuela nkonko ya bungi. Mu matuku makese, Apolonija wakatuadija kulonga Bible ne Dalia. Mvua panyi mbuela mu dilonga imue misangu bua kukudimuna bivua Dalia wakula. Kadi ngakamona ne: malu onso avuaye ulonga avua mamuambuluishe bushuwa. Diakamue meme kumulomba panyi bua atuadije kundongesha Bible.”

Bu muvua Dalia mutuadije kumvua bimpe bulelela bua mu Bible, bualu kampanda buakatuadija kumuelesha meji. Ndekelu wa bionso wakakonka Apolonija ne: “Muntu mulema bu meme udi mua kuyisha mushindu kayi?” (Mat. 28:19, 20) Apolonija wakamujadikila ne lutulu luonso ne: “Kutshinyi to. Yehowa neakuambuluishe.” Bushuwa, Yehowa wakamuambuluisha.

Kadi Dalia udi uyisha mushindu kayi? Udi uyisha mu mishindu ya bungi. Bana betu ba bakaji batu bamuambuluisha bua kufunda mikanda welamu ne mêyi a mu Bible. Dalia udi wanji kuambila bana betu ba bakaji aba malu adiye nawu mu lungenyi. Pashishe bana betu aba badi bafunda ngenyi yende eyi mu mukanda. Dalia udi kabidi uyisha ku diambuluisha dia malu adiye ufundilangana ku telefone. Padi kulu kuimpe, bena mu tshisumbu badi bapatuka nende pambelu bua kuyisha bantu badibu batuilangana nabu miaba idi bantu ba bungi ne mu njila.

Dalia ne mamuende bakatungunuka anu ne kuya kumpala mu bulelela. Bakadilambula bonso kudi Yehowa ne kutambula mu ngondo wa dikumi ne umue mu 2004. Mu ngondo wa tshitema mu 2008, bakenza kasumbu ka bantu bavua bakula tshiena Pologne mu tshimenga tshia Vilnius. Bu muvua kasumbu aka dijinga ne bamanyishi, Dalia ne mamuende bakayamu. Dalia udi wamba ne: “Imue ngondo bivua bintonda bikole pamvua ndimona tshinyi muanji kuya mu buambi. Kadi pandi ndeja Yehowa bualu ebu mu disambila, diakamue muntu kampanda udi ulua bua tuye nende mu buambi.” Mmunyi mudi muanetu Dalia udiumvua bua nsombelu wende? Udi wamba ne: “Disama ndintekeshe mubidi, kadi ki nditekeshe lungenyi luanyi to. Ndi ne disanka dia bungi bua mundi ngambila bakuabu malu a Yehowa.”