‘Be Tiyo Tij Lendo Biro Nyalorena?’

TE piny mangima, nitie owete gi nyimine moketo ranyisi maber miwuoro mar dhi nyime gi tij lendo kata obedo ni gikedo gi midekre madongo. Achiel kuomgi en Dalia, modak e Vilnius ma en dala maduong’ mar piny Lithuania.

Dalia en nyaminwa ma nigi higini 30 gi wiye. Chakre nyuolne, osebedo kochandore nikech tuwo mar obwongo miluongo ni cerebral apoplexy. Tuwono oseweye kong’ol kendo ok onyal wuoyo maber. Nikech mano, joodgi kende ema nyalo winjo maber gik mowacho. Dalia odak gi Galina min mare, ma ema rite. Kata obedo ni ngima Dalia osebedo kopong’ gi chandruoge koda parruok, podi chunye ok onyosore. Ere kaka mano nyalorene?

Galina lero kama: “E higa 1999, nyaminwa moro ma tenge miluongo ni Apolonija ne obiro limowa. Ne waneno kaka Apolonija, ma ne en achiel kuom Joneno mag Jehova ne nigi lony maber kuom Muma, kendo Dalia nochako penje gik mang’eny. Mapiyo, ne ochak puonjruok mar Muma gi Dalia. Ne ajariwora kodgi e puonjruok margi kadichiel, mondo akony e loko weche ma Dalia ne wacho. Kata kamano, ne achako neno kaka gigo ma Dalia ne puonjore ne konye gadier. Mapiyo, an bende ne akwayo puonjruok mar Muma.”

Kaka Dalia nochako ng’eyo adiera mag Muma, penjo moro nochako chando chunye. Gikone nopenjo Apolonija: “Ere kaka ng’ato kaka an—ng’at mong’ol—biro nyalo tiyo tij lendo?” (Math. 28:19, 20) Apolonija nojiwo Dalia e yo mang’won kama: “Kik ibed maluor. Jehova biro konyi.” Kendo kuom adier, Jehova konyo.

Kare ere kaka Dalia tiyo tij lendo? E yore mopogore opogore. Nyimine ma Jokristo konye e iko barupe moting’o wach moro mar Muma. Mokwongo, Dalia hulo ne nyiminego weche manie pache. Bang’ mano, gindiko barua moting’o parogo. Dalia bende jalendo kokalo kuom oro ne ji ote machuok e simo mare. To sama kit yamo ber, jokanyakla hinyo tere oko mondo olend ne joma giromogo e kuonde yueyo koda e nderini.

Dalia kaachiel gi min mare osemedo timo dongruok e adiera. Giduto ne gichiwore ne Jehova, kendo ne obatisgi Novemba 2004. E Septemba 2008, ne ochak grup e Vilnius, kendo grubno tiyo gi dho Poland. To nikech jolendo mag Pinyruoth momedore ne dwarore e grubno, Dalia gi min mare ne oriwore gi grubno. Dalia wacho kama: “Nitie dweche moko ma ajabedo gi parruok ka ok adhi e tij lendo. Kata kamano, bang’ wuoyo gi Jehova e lamo, mapiyo ajaneno ka ng’ato timo chenro mar kawa mondo walend kode.” Chal mar Dalia nyaminwa mwageno, miyo owinjo nade? Owacho kama: “Midekre osemiyo denda ong’ol, kata kamano, pacha to ok ong’ol. Amor ahinya nimar anyalo wuoyo gi ji kendo nyisogi wach Jehova!”