‘Oinsá mak haʼu bele haklaken?’

Iha mundu tomak, ita iha irmaun-irmán sira neʼebé halo serbisu haklaken ho laran-metin maski iha problema kona-ba saúde. Ezemplu ida mak irmán Dalia, neʼebé hela iha rai-Lituánia iha sidade kapitál naran Vilnius.

Irmán Dalia, maizumenus nia tinan 35. Husi moris mai, nia iha moras iha kakutak, no ida-neʼe halo nia isin-maten. Nia mós la bele koʼalia ho momoos, no ninia família deʼit mak komprende buat neʼebé nia koʼalia. Dalia hela hamutuk ho ninia inan naran Galina neʼebé tau matan ba nia. Maski irmán Dalia nia moris nakonu ho problema, maibé nia kontente nafatin. Oinsá?

Irmán Galina esplika: “Iha tinan 1999, haʼu-nia prima naran Apolonija mai vizita ami. Ami haree katak Apolonija, nuʼudar Testemuña ba Jeová, nia hatene didiʼak kona-ba Bíblia, no Dalia husu pergunta barak ba nia. Lakleur, Dalia komesa estuda Bíblia. Haʼu mós dala ruma tuir ninia estudu atu ajuda Dalia hodi koʼalia fali buat neʼebé nia hatete. Maibé, tanba haʼu haree katak buat neʼebé nia aprende diʼak tebes ba nia, lakleur haʼu mós husu atu estuda Bíblia.”

Kuandu Dalia komesa komprende lia-loos husi Bíblia, nia sai laran-susar ho pergunta ida, no ninia laran-susar neʼe aumenta ba beibeik. Ikusmai, Dalia husu ba irmán Apolonija: “Oinsá mak ema hanesan haʼu, neʼebé isin-maten, bele haklaken?” (Mt 28:19, 20) Ho kalma, Apolonija hatete ba Dalia: “Keta laran-susar. Jeová sei ajuda ó.” Sin, Jeová ajuda duni Dalia.

Entaun, oinsá mak Dalia bele haklaken? Liuhusi dalan oioin. Porezemplu, irmán sira ajuda nia atu hakerek karta ho mensajen husi Bíblia. Primeiru, Dalia fó-hatene ba irmán sira ninia hanoin, no depois, irmán sira hakerek fali iha karta. Dalia mós haklaken hodi haruka mensajen liuhusi telefone. Kuandu ladún malirin no la udan, irmaun-irmán sira iha kongregasaun mós lori nia ba liʼur hodi haklaken ba ema neʼebé laʼo iha jardín ka iha dalan.

Dalia ho ninia inan kontinua laʼo ba oin iha lia-loos. Ikusmai, sira naʼin-rua dedika sira-nia an ba Jeová no hetan batizmu iha Novembru 2004. Iha Setembru 2008, irmaun sira loke grupu ho língua polaku iha sidade Vilnius. Tanba grupu neʼe presiza haklaken-naʼin barak liután, Dalia ho ninia inan mós komesa hola parte iha grupu neʼe. Dalia hatete: “Dala ruma, kuandu haʼu seidauk bá haklaken iha fulan ida nia laran, haʼu sente laran-susar. Maibé kuandu haʼu halo orasaun ba Jeová kona-ba neʼe, lakleur, maluk ida halo arranju atu bá haklaken hamutuk ho haʼu.” Irmán Dalia sente oinsá kona-ba ninia situasaun? Nia hatete: “Moras halo haʼu-nia isin maten, maibé la halo haʼu-nia neon maten. Haʼu sente kontente tebes tanba haʼu bele haklaken ba ema seluk kona-ba Jeová!”