‘Me Er Nan Ve Me Pase Kwagha?’

Anmgbianev mba nomso man mba kasev mba kpishi sha tar, mba ve lu nôngon a ucôronmbauangev, kpa ve lu eren tom u pasen kwagh ne sha mimi yô. U tesen ikyav yô, nenge ase kwagh u anmgbian u kwase ugen u i yer un ér Dalia, u a lu ken gar u Vilnius, gartamen u tar u Lithuania la.

Dalia ka anmgbian u kwase, u a lu anyom 35 yô. Yange i mar un a angev mbu kpen alegh. Angev mbura na yô, fetyô u lamen tsembelee ga. Nahan ka mba hen tsombor na tseegh ve kaven kwaghôron na tsembelee ye. Dalia ngu vea ngô na u a nengen sha a na yô, mba yer un ér Galina. Shin er Dalia a ye ican ken uma na kpishi shi a lu ken ishimanyian nahan kpa, ngu a ishimaverenkeghen her. Ka nyi i wase un u lun a ishimaverenkeghene?

Galina kaa ér: “Ken inyom i 1999 la, anngôm u kwase, u i yer un ér Apolonija la yange va se inya. Yange se nenge ser Apolonija, u a lu Kwaseshiada u Yehova la fa Bibilo kpishi, nahan Dalia hii u pinen un mbampin. Ica i gbe ga yô, i hii u henen Bibilo a Dalia. Ashighe agen m tema hen kwaghhenen la sha u pasen iliam i Dalia. Nahan kpa, m nenge mer, Dalia lu zuan a iwasen ken hanma kwagh u lu henen cii. Ica kera gba ga maa mo kpa m kaa mer i hen Bibilo a mo.”

Dalia hiin u kaven mimi u Bibilo yô, kwagh ugen gba zan un iyol kpishi. Ken masejime yô, a kende a pine Apolonija ér: “Or u kpen alegh er mo nahan nana er nan ve nana pase kwagha?” (Mat. 28:19, 20) Apolonija taver un ishima, kaa ér: “De cie ga, gadia Yehova una wase u.” Shi Yehova wase Dalia er Apolonija kaa nahan.

Nahan Dalia pasen kwagh nena? Pasen kwagh sha igbenda kpishi. Anmgbianev mba kasev ka ve wase un u pasen loho u Bibilo sha u ngeren uwashika. Dalia ka a hii pasen anmgbianev mba kasev mbara mbamhen nav, maa ve nger washika sha mi. Dalia shi ka a pase kwagh sha u tindin ior a ilyoho sha hanseeti. Shi kwavaôndo ka ua lu shami wang yô, mba ken tiônnongo ve tôô un ve due a na sha u a lam a ior mba ve zough a ve sha ajiir a ior ve memen her kua sha godobi yô.

Dalia vea ngô na cii mba civir Aôndo her. Ve cii ve tsegha ayol a ve sha ci u Yehova shi yange ve er batisema ken uwer u Novemba 2004 la. Ken uwer u Setemba 2008 la, i ver annongo u lamen zwa Polish ken gar u Vilnius. Er kwagh a gbe sha mbapasenkwagh u Tartor hen annongo la yô, Dalia vea ngô na mba vea annongo shon. Dalia kaa ér: “Ka a kôr uwer ugen man mea lu a due kwaghpasen ga yô, ishima i zam iyol kpishi. Kpa ka mea er msen hen Yehova sha kwagh shon yô, ica i gba ga cii maa orpasenkwagh nan tsua u duen kwaghpasen vea mo.” Dalia, anmgbian wase u kwase u doon ishima ne nengen mlu na la nena? A kaa ér: “Angev mbura kpem alegh a iyolough, kpa mhen wam yô ngu her dedoo. Doom kpishi er m fetyô u ôron mbagenev kwagh u Yehova yô!”