‘Olsem Wanem Mi Inap Autim Tok?’
‘Olsem Wanem Mi Inap Autim Tok?’
Long olgeta hap bilong graun, i gat ol gutpela brata na sista husat i stap gutpela piksa long pasin bilong givim bel long autim tok maski ol i karim hevi bilong bikpela sik. Tingim Dalia, em i save stap long Vilnius, em biktaun bilong Lituenia.
Dalia em wanpela sista i gat 35 krismas samting. Em i gat sik cerebral apoplexy kirap long taim mama i karim em. Dispela sik i mekim na bodi olgeta bilong em i paralais na em i no inap kolim gut ol tok. Olsem na famili bilong em tasol, ol inap kliagut long toktok bilong em. Dalia i save stap wantaim mama bilong em, Galina, husat i save lukautim em. Maski laip bilong Dalia i gat planti hevi na em i save tingting planti, Dalia i save stap amamas. Olsem wanem em inap mekim olsem?
Galina i tok: “Long 1999, kasen bilong mi, Apolonija, i kam raun lukim mipela. Mipela i luksave olsem, Apolonija, husat i wanpela Witnes Bilong Jehova, i save gut long tok bilong Baibel, olsem na Dalia i kirap givim planti askim long em. I no longtaim na Dalia i kirap stadi long Baibel. Sampela taim mi save insait long stadi bambai mi ken kamapim klia tok Dalia i mekim. Mi luksave olsem olgeta samting Dalia i lainim i bin helpim em tru. Na i no longtaim mi tu i askim long stadi long Baibel.”
Taim Dalia i kirap long kliagut long ol tok i tru bilong Baibel, wanpela askim i wok long kamap strong moa long tingting bilong em. Em i kirap na askim Apolonija: “Olsem wanem wanpela paralais kain olsem mi, em inap mekim wok autim tok?” (Mat. 28:19, 20) Apolonija i mekim gut bel bilong Dalia na i tok: “No ken pret. Jehova bai helpim yu.” Na tru tumas, Jehova i save mekim olsem.
Orait, olsem wanem Dalia i save autim tok? Em i mekim long kain kain rot. Ol sista Kristen i save helpim em long raitim ol pas i gat ol tok bilong Baibel long en. Pastaim, Dalia i save kamapim tingting bilong em long ol sista. Na bihain, ol i raitim wanpela pas i kamapim ol tingting bilong em. Dalia i save autim tok tu long rot bilong salim ol teks mesis long mobail bilong em. Na long taim i no gat ren, ol bratasista long kongrigesen i save kisim em i go ausait bambai em inap autim tok long ol manmeri i stap long ol pak na long rot.
Dalia na mama bilong em i wok long kamap strong long tok i tru. Tupela wantaim i dediketim laip bilong ol long Jehova na ol i kisim baptais long Novemba 2004. Long Septemba 2008, ol i kamapim wanpela grup bilong tokples Polan, long Vilnius. Dispela grup i sot long ol pablisa bilong autim tok, olsem na Dalia wantaim mama bilong em ol i go helpim dispela grup. Dalia i tok: “Sampela taim, taim mun i laik pinis na mi no bin autim tok yet, mi save wari. Tasol bihain long mi beten long Jehova long dispela samting, i no longtaim wanpela i save kam pasim tok long go autim tok wantaim mi.” Gutpela susa bilong yumi Dalia i gat wanem tingting long sindaun bilong em? Em i tok: “Dispela sik i mekim na bodi bilong mi i paralais, tasol tingting bilong mi i no paralais. Mi amamas tru olsem mi inap tokim ol narapela long Jehova!”