‘Ndzi Ta Swi Kotisa Ku Yini Ku Chumayela?’

Emisaveni hinkwayo, hi ni swikombiso leswi hlamarisaka swa vamakwerhu va xinuna ni va xisati lava chumayelaka hi ku tshembeka hambileswi va nga ni swiphiqo leswikulu swa rihanyo. Un’wana wa vona i Dalia, loyi a tshamaka edorobeni ra Vilnius, leri nga ntsindza wa tiko ra Lithuania.

Dalia i makwerhu wa xisati loyi a nga ni malembe ya kwalomu ka 35. Hi mpfhuka a velekiwile, u karhatiwa hi vuvabyi lebyi vuriwaka cerebral apoplexy. Vuvabyi byebyo byi endle leswaku a oma swirho naswona a nga ha swi koti kahle ku vulavula. Hikwalaho ka sweswo, i swirho swa ndyangu wa ka vona ntsena leswi kotaka ku n’wi twisisa kahle loko a vulavula. Dalia u tshama ni mana wakwe, Galina, loyi a n’wi khathalelaka. Hambileswi vutomi bya Dalia byi teleke maxangu ni ku karhateka, u tshama a ri ni langutelo lerinene. U swi kotisa ku yini sweswo?

Galina u te: “Hi 1999, Apolonija, muzala wa mina, u hi endzerile. Hi xiye leswaku Apolonija, loyi a nga Mbhoni ya Yehovha, a a yi tiva kahle Bibele naswona Dalia u sungule ku n’wi vutisa swivutiso swo tala. Swi nga si ya kwihi, u sungule ku dyondzela Dalia Bibele. Minkarhi yin’wana a ndzi hlanganyela eka dyondzo ya vona leswaku ndzi pfuneta ku hlamusela leswi Dalia a a swi vula. Kambe ndzi xiye leswaku hinkwaswo leswi a a swi hlaya a swi n’wi vuyerisa swinene. Hi ku hatlisa na mina ndzi kombele ku dyondzeriwa Bibele.”

Loko Dalia a sungula ku twisisa tidyondzo ta Bibele, ku ve ni xivutiso xin’wana lexi sunguleke ku n’wi karhata. Eku heteleleni, u tiphofurile a vutisa Apolonija a ku: “Ndzi ta swi kota njhani ku chumayela tanihi leswi ndzi omeke swirho?” (Mat. 28:19, 20) Hi moya wo rhula Apolonija u n’wi tiyisekise a ku: “U nga chavi. Yehovha u ta ku pfuna.” Hakunene Yehovha u n’wi pfunile.

Dalia u chumayela njhani? Hi ku tirhisa tindlela to hlayanyana. Vamakwerhu va xisati va n’wi pfuna ku lunghiselela rungula ra le Bibeleni leri a nga ta ri tsala eka mapapila. Xo sungula, Dalia u byela vamakwerhu volavo leswi a lavaka ku swi tsala. Kutani va swi tsala eka papila. Nakambe u chumayela hi ku rhumela ti-SMS hi selfoni yakwe. Naswona loko ri xe kahle, swirho swa vandlha swi famba na yena leswaku a ya chumayela vanhu lava va hlanganaka na vona emintangeni ya kwalaho ni le switarateni.

Dalia ni mana wakwe va hambete va endla nhluvuko entiyisweni. Va tinyiketele eka Yehovha naswona va khuvuriwe hi November 2004. Hi September 2008, ku sunguriwe ntlawa lowu vulavulaka Xipholixi edorobeni ra Vilnius. Leswi ku nga ni xilaveko lexikulu xa vahuweleri va Mfumo lava engetelekeke eka ntlawa wolowo, Dalia ni mana wakwe va sungule ku hlanganyela na wona. Dalia u te: “Ndza karhateka loko ndzi vona n’hweti yi ya eku heleni ndzi nga si swi kota ku ya ensin’wini. Kambe endzhakunyana ko khongela hi mhaka yoleyo, makwerhu un’wana u ta hlela ku famba na mina ensin’wini.” Makwerhu wa hina loyi a rhandzekaka u titwa njhani hi xiyimo lexi a nga eka xona? U ri: “Vuvabyi lebyi byi ndzi omise swirho, kambe ku nga ri miehleketo. Ndza tsaka swinene leswi ndzi kotaka ku byela van’wana hi Yehovha!”