‘Kasi Ningapharazga Wuli?’

Pa caru cose, tili na ŵabali na ŵadumbu awo nchakuwonerapo ciwemi comene pa nkhani ya kupharazga makani ghawemi mwakugomezgeka nangauli mbalwari. Yumoza wawo ni Mudumbu Dalia uyo wakukhala ku Vilnius, mu msumba wa Lithuania.

Dalia wali na vilimika vya m’ma 30. Kufuma waka apo wakababikira, wakusuzgika na nthenda ya sitiroku ya kuwongo. Nthenda iyi yili kumupendezga ndipo wakuyowoya mwakusuzgikira comene. Ntheura, ŵamumbumba yake ŵekha ndiwo ŵakupulika makora ivyo wakuyowoya. Dalia wakukhala na anyina, a Galina ndipo ndiwo ŵakumupwelelera. Nangauli umoyo wa Dalia ngwakuzura na masuzgo, kweni wakulutilira kuwona vinthu mwakwenelera. Cifukwa wuli?

Anyina ŵakati: “Mu 1999 kukiza munung’una wane Apolonija, mwana wa ŵamama ŵacoko. Tikawona kuti Apolonija pakuŵa yumoza wa Ŵakaboni ŵa Yehova, wakulimanya makora Baibolo. Ntheura, Dalia wakamba kumufumba mafumbo ghanandi. Nyengo yicoko waka, Dalia wakamba kusambira Baibolo. Nyengo zinyake, nane nkhaŵangapo pa sambiro kuti nilongosorenge ivyo Dalia wakuyowoya. Ndipouli, nkhawona kuti wakasanganga candulo na ivyo wakasambiranga. Nane nkhapempha sambiro la Baibolo.”

Dalia wakamba kupulikiska unenesko wa mu Baibolo, kweni wakaŵa na fumbo limoza ilo likamusuzganga. Wakafumba Apolonija kuti: “Kasi munthu nga ndine, wangapharazga wuli?” (Mat. 28:19, 20) Apolonija wakamusimikizgira kuti: “Ungawopanga, Yehova wakovwirenge.” Yehova wakamovwira nadi.

Kasi Dalia wakupharazga wuli? Wakupharazga mu nthowa zakupambanapambana. Ŵadumbu ŵakumovwira kulemba makalata agho ghakuŵa na uthenga wa mu Baibolo. Cakwamba, Dalia wakuphalira ŵadumbu maghanoghano ghake. Pamasinda, ivyo wayowoya ŵakulemba mu kalata. Dalia wakupharazgaso mwa kutumizga mauthenga pa selufoni. Para kwaca makora, ŵadumbu ŵakumutora kukapharazga ku malo gha kucezgera na mu msewu.

Dalia na ŵanyina ŵakukura mwauzimu. Wose ŵali kujipatulira kwa Yehova, ndipo ŵakabapatizika mu Novembala 2004. Mu Seputembala 2008, mu Vilnius mukakhazikiskika gulu la ciyowoyero ca Cipolishi. Dalia na ŵanyina ŵali kusamira ku gulu ili cifukwa likakhumbikwiranga ŵapharazgi ŵanandi. Dalia wakati: “Myezi yinyake nkhudandawura para natondeka kunjira mu uteŵeti. Kweni para nalomba kwa Yehova, mwaluŵiro nkhusanga kwiza mudumbu uyo wakukhumba kwenda nane mu uteŵeti.” Kasi mudumbu withu wakutemweka uyu, wakujipulika wuli? Iyo wakati: “Thupi ndakupendera, kweni maghanoghano ghane ngakupendera yayi. Nili wakukondwa kuti nkhuphalirako ŵanji vyakukhwaskana na Yehova.”