«Ximodo ndiʼ gucheecheʼ diidxaʼ yaʼ»

Lu guidubi naca Guidxilayú nuu xpinni Cristu rucheeche diidxaʼ neca huará. Tobi de laacabe nga Dalia, ti gunaa xpinni Cristu nabeza ndaaniʼ guidxi Vilna, capital stiʼ Lituania.

Dalia napa 35 iza. Dede dxi gúlebe qué randa rizabe ne huaxiéʼ riníʼ chaahuibe pur ti derrame gúpabe lu cerebru stibe. Nga runi, ca binnilídxisibe nga riene xi riniʼbe, ne jma nga riene jñaabe Galina laabe, laa nabezané laabe ne rapa laabe. Neca huadxaagalube stale desgracia lu xquendanabánibe ne nuu stale cosa ni riguu xizaa laabe, nuube nayecheʼ. Xi rúnibe para chuʼbe zacá ya?

Jñaabe na sicaríʼ: «Lu iza 1999, beeda ganna xprimaʼ Apolonija laadu, laabe nácabe testigu stiʼ Jiobá. Bidiʼdu cuenta nabé nánnabe xi rusiidiʼ Biblia. Dalia gunabadiidxaʼ laabe stale cosa ne guná gúʼndanebe laa Biblia. Nuu tiru gurieniáʼ laacabe para ganda gusieneʼ laabe xii ngue na xiiñeʼ. Cumu biiyaʼ nabé cayacané ni cayuundabe que laabe stale la? laaca bizuluáʼ biindaʼ Biblia».

Ora ziziidiʼ Dalia de cani rusiidiʼ Biblia, guyuu ti cosa ni guluu xizaa laabe, ngue runi gunabadiidxabe Apolonija: «Ne guendahuará napaʼ riʼ, ximodo ndiʼ gucheecheʼ diidxaʼ yaʼ» (Mat. 28:19, 20). Laabe gudixhedxibe ladxidóʼ Dalia né ca diidxaʼ riʼ: «Cadi guidxíbiluʼ; Jiobá zacané lii». Ne zacá huayácani.

Ximodo rucheechebe diidxaʼ yaʼ. Laabe rusiidibe binni de Dios pur carta. Para ganda gúnibe ni racané caadxi gunaa xpinni Cristu laabe, laacaʼ rucaacaʼ ni rábibe laacaʼ. Laaca rucheechebe diidxaʼ ora ruseendabe mensaje pur teléfono. Ne ora galán nuu tiempu la? rireené chupa chonna xpinni Cristu laabe para chigucheechecabe diidxaʼ ra parque ne ndaaniʼ calle.

Dalia ne jñaa qué nusaana de niniisicaʼ lu stiidxaʼ Dios dede bidxiña dxi bidiicaʼ laacaʼ Jiobá ne guyuunísacaʼ lu beeu noviembre iza 2004. Despué guyuucabe lu ti grupu de binni ni riníʼ diidxaʼ polaco ni bizulú ndaaniʼ guidxi Vilna lu beeu septiembre 2008, ne nabé caquiiñeʼ grupu que tu gacané laacaʼ. Dalia guníʼ sicaríʼ: «Nuu beeu nabé riuaaʼ xizaa purtiʼ caʼruʼ chigucheecheʼ diidxaʼ. Nga runi, runeʼ orar Jiobá, ne qué riaadxaʼ ti xpinni Cristu guni invitar naa guireeniáʼ laa». Ne laaca guniʼbe: «Guendahuará napaʼ riʼ qué rudiini lugar naa sayaʼ, peru qué rucueeza diʼ ni naa de guiníʼ iqueʼ. Nabé nayecheʼ nuaaʼ purtiʼ randa rusiideʼ binni de Jiobá».