Nte Ẹkpenamde Ini Ukpepn̄kpọ Enen̄ede Enem Onyụn̄ Enyene Ufọn

Nso ke ikpanam man enen̄ede enem nnyịn ndikpep Bible? Nso ke ikpanam man ini ukpepn̄kpọ nnyịn enen̄ede enyene ufọn? Yak ineme akpan n̄kpọ ita ibio ibio, oro ẹdin̄wamde nnyịn inen̄ede ibọ ufọn ọkpọkpọ ukpepn̄kpọ Bible.

1 BỌN̄ AKAM: Akpa n̄kpọ edi ndibọn̄ akam. (Ps. 42:8) Ntak-a? Ikpenyene ndida edikpep Ikọ Abasi nte ubak utuakibuot nnyịn. Ke ntre, oyom iben̄e Jehovah anam nnyịn ikeme nditat esịt nnyịme se ikpepde onyụn̄ ọnọ nnyịn edisana spirit esie. (Luke 11:13) Barbara, emi anamde utom isụn̄utom ke ediwak isua, ọdọhọ ete: “Mmesibọn̄ akam kpukpru ini mbemiso n̄kotde m̀mê n̄kpepde Bible. Mma mbọn̄ akam, esitie mi nte Jehovah odu ye ami ye nte ke enye ama se nnamde.” Ndibọn̄ akam mbemiso ikpepde n̄kpọ esitat ekikere ye esịt nnyịn man inyịme ekese udia eke spirit oro iyomde ndidia ọyọhọ ọyọhọ.

2 TIE KERE: Sia ini ananade, ndusụk owo ẹsikot Ikọ Abasi enyọn̄ enyọn̄. Edi mmọ isibọhọ ufọn emi mmọ ẹkpebọde ẹto edikpep Bible. Carlos, emi anamde n̄kpọ Jehovah ebe isua 50, edikụt ke edi akpan n̄kpọ imọ ndisio ini nnịm ntie n̄kere n̄kpọ man se imọ ikpepde enen̄ede enyene ufọn. Enye ọdọhọ ete: “Idahaemi nsikot page Bible ifan̄—n̄kpọ nte page iba ke usen. Emi esinam n̄keme ndida ekese ini ntie n̄kere se n̄kotde man n̄kpep mme akpan n̄kpọ.” (Ps. 77:12) Ima ida ini itie ikere se ikpepde, emi esinam inen̄ede ifiọk uduak Abasi.—Col. 1:9-11.

3 NAM SE EKPEPDE: Ima ikụt ufọn n̄kpọ oro inamde, ọwọrọ ke imọbọ ufọn n̄kpọ oro. Onyụn̄ edi ntre ye ukpepn̄kpọ Bible. Gabriel, akparawa eyenete emi esikpepde Bible kpukpru ini, ọdọhọ ete: “Ukpepn̄kpọ esinam mi n̄kan mfịna kpukpru usen onyụn̄ anam mi n̄keme ndin̄wam mbon en̄wen.” Enye adian do ete: “Mmesidomo ndinam kpukpru se n̄kpepde.” (Deut. 11:18; Josh. 1:8) Ke akpanikọ, imenyene ekese ifiọk Abasi ndikpep nnyụn̄ nda nsịn ke edinam.—N̄ke 2:1-5.

FIAK DỤN̄ỌDE: Nso akwa ifet ke nnyịn inyene ntem ndikpep mban̄a ifiọk emi otode Jehovah, kpa Enye emi kpukpru ọniọn̄ otode! (Rome 11:33) Ntem, ama oyom ndikpep n̄kpọ, kụt ete ke emebem iso ọbọn̄ akam ọnọ Jehovah onyụn̄ eben̄e enye anam fi ekeme nditat esịt nnyịme se ekpepde onyụn̄ ọnọ fi edisana spirit esie. Sibet ndusụk ini tie kere se okotde. Ke adianade do, nam se ekpepde kpukpru usen. Ama anam akpan n̄kpọ ita emi, oyokụt ke ukpepn̄kpọ Bible fo eyenen̄ede enem onyụn̄ enyene ufọn.