Edena dala ai Baibel stadilaia karana ita moalelaia diba? Edena dala ai eda stadi karana ese ita ia durua? Point toi do ita herevalaia. Unai point ta ta ese ita do idia durua eda Baibel stadilaia karana ita hanamoa totona.

1 GURIGURI: Dala ginigunana be guriguri. (Sal. 42:8) Dahaka dainai? Baibel stadilaia karana be iseda tomadiho ena kahana ta. Unai dainai, namona be Iehova ita noia lauma helaga do ia henia bona iseda lalona do ia kehoa ita stadilaia gaudia ita lalopararalaia totona. (Luka 11:13) Misinari taihu ta, Barbara ia gwau: “Lau ura Baibel lau duahia o egu stadi lau karaia neganai, lau guriguri guna. Unai murinai, lau mamia Iehova be lau ida ia noho bona lau karaia gauna ia moalelaia.” Unai dainai, sibona eda stadi ita do karaia lasi neganai, ita guriguri guna be gau badana.

2 LALOA DOBU: Haida be nega lasi dainai, Baibel idia duahia haraga bona Baibel stadilaia karana ena namo idia reaia. Carlos be lagani 50 mai kahana lalonai Iehova ia hesiai henia, bona ia laloparara nega bada ia atoa be namo ia stadilaia gaudia ia laloa dobu totona. Unai ia karaia neganai ena stadi amo ia dibaia gaudia ese ia idia durua bada. Ia gwau: “Hari, lau be dina ta ta ai Baibel ena rau rua sibona lau duahia. Bena nega bada lau atoa, lau duahia gaudia lau laloa dobu totona.” (Sal. 77:12) Oibe, laloa dobu karana ese eda diba ia habadaia bona Dirava ena ura ita lalopararalaia namonamo diba.​—⁠Kol. 1:9-11.

3 BADINAIA: Bema ita itaia ita karaia karana ta ese namo ia havaraia, mai iseda lalona ibounai ida unai do ita karaia noho. Baibel stadilaia karana be unai bamona. Tadikaka matamata Gabriel be mai ena stadi sediual bona ia gwau: “Baibel stadilaia karana ese lau ia durua dina ta ta ai lau davaria hekwakwanai lau hanaia bona ma haida lau hagoadaia totona. . . . Bona lau hekwarahi lau dibaia gaudia be egu mauri lalonai lau badinaia totona.” (Deu. 11:18; Ios. 1:8) Oibe, Baibel lalonai Dirava ena aonega herevadia momo ita dibaia bona badinaia diba.​—⁠Aon. 2:1-5.

RIVIU: Aonega ibounai edia badina be Iehova, bona ia amo diba ita abia be hahenamo badana ta! (Roma 11:33) Unai dainai, sibona emu stadi oi ura karaia gwauraia neganai, namona be Iehova oi guriguri henia guna. Oi noia ena lauma helaga do ia henia bona emu lalona do ia kehoa. Bena nega oi atoa oi duahia gaudia oi laloa dobu totona. Danu, oi hekwarahi oi dibaia gaudia be dina ta ta ai oi badinaia totona. Unai bamona oi karaia neganai, emu Baibel stadilaia karana do oi hanamoa bona oi moalelaia.