Mu Ikole Tuto mi mu Tusiwe ki Yona

Lu kona cwañi ku ikola ku ituta Bibele? Lu kona ku tusiwa cwañi ha lu ituta? Ha lu nyakisiseñi ka bukuswani lika za butokwa ze taalu ze lu kona ku eza ilikuli lu tusiwe hahulu ki tuto ya luna ya Bibele ya ka butu.

1 MU LAPELE: Nto ya pili ye mu lukela ku eza ki ku lapela. (Samu 42:8) Ki kabakalañi? Ku ituta Linzwi la Mulimu ki nto ya butokwa ye lu swanela ku eza mwa bulapeli bwa luna. Kabakaleo, lu swanela ku kupanga Jehova kuli a lu tuse ku utwisisa ze lu ituta ni ku lu fa moya wa hae o kenile. (Luka 11:13) Bo Barbara ba ba se ba bile balumiwa ka nako ye telele ba li: “Na lapelanga ni si ka kalisa kale ku bala Bibele kamba ku ituta yona. Ha ni se ni lapezi, ni ikutwanga kuli Jehova u inzi ni na ni kuli wa tabela ze ni eza.” Ku lapela pili lu si ka ituta kale ku kwalulanga minahano ni lipilu za luna ilikuli lu amuhele lituto za Mulimu ze lu tuha lu ituta.

2 MU KENGEYELE: Bakeñisa ku tokwa hande nako, ba bañwi ba balanga Linzwi la Mulimu ka ku mata-mata. Kono ha ba eza cwalo ha ba tusiwangi ki ku ituta Bibele. Bo Carlos ba ba se ba sebelelize Jehova ka lilimo ze fitelela 50, ba lemuhile butokwa bwa ku banga ni nako ya ku kengeyela ilikuli ba tusiwe hahulu ki ze ba ituta. Ba li: “Mazazi a, ni balanga feela makepe a likani a mwa Bibele—ili makepe a bato eza a mabeli ka zazi. Mi ni itusisanga nako ye ñata ku kengeyela ze ni bala ilikuli ni itute lituto za butokwa.” (Samu 77:12) Ha lu ba ni nako ya ku kengeyela, lu ka zwelapili ku ziba ni ku utwisisa tato ya Mulimu.—Makolo. 1:9-11.

3 MU SEBELISE ZE MU ITUTA: Haiba lu ziba kuli nto ye ñwi ya tusa, lu ka i eza. Ni Bibele i cwalo. Haiba lu ziba kuli ya kona ku lu tusa, lu ka eza ze i bulela. Muzwale ya li mucaha ya bizwa Gabriel ili ya itutanga Bibele kamita u bulela kuli: “Ku ituta Bibele ku ni tusanga ku tula butata bwa mwa bupilo mi ku ni konisanga ku tusa ba bañwi.” U zwelapili, u li: “Ni ikatazanga ku belekisa lika kaufela ze ni ituta.” (Deut. 11:18; Josh. 1:8) Kaniti, ku na ni litaba ze ñata ze zwa ku Mulimu ze lu kona ku ituta ni ku li sebelisa.—Liprov. 2:1-5.

LUNDULULO: Lu na ni litohonolo le lituna la ku batisisa zibo ya lu fa Jehova, yena Muñaa butali kaufela! (Maro. 11:33) Kabakaleo, ha mu ka ituta, pili mu lapele ku Jehova mi mu kupe kuli a mi fe moya wa hae o kenile ni kuli a mi tuse ku utwisisa. Mi ka linako ze ñwi mu kutumanange kuli mu kengeyele ze mu bala. Hape mu sebelise ze mu ituta. Ha mu eza lika za butokwa zeo, mu ka ikolanga hahulu ku ituta Bibele mi mu ka tusiwanga hahulu ki yona.