Astawan gustachikunapaqjina, yanapachikunapaqjinataq ukhuncharina

¿Imaynatá Bibliata ukhunchaspa astawan gustachikusunman? ¿Imatá ruwasunman ukhunchasqanchik yanapanawanchikpaq? Kimsa yuyaychaykuna mayta yanapawasun.

1 MAÑAKUY: Ñawpaqtaqa Diosmanta mañakuna (Sal. 42:8). Imaraykuchus Palabranta ukhunchaspaqa payta yupaychachkanchik. Chayrayku espíritu santonta, allin yuyayta ima qunawanchikta mañakunanchik tiyan (Luc. 11:13). Hermana Barbara, unayña misionera, jinata nin: “Niraq Bibliata leechkaspa chayri ukhunchachkaspa, Jehovamantaraqpuni mañakuni. Chayrayku yanapawasqanta, ruwasqayta allinpaq qhawasqanta ima reparani”, nispa. Diosmanta mañakuyqa, paymanta jamuq yachachiyta sumaqta japʼinapaq yuyayninchikta, sunqunchikta ima wakichin.

2 TʼUKURIY: Wakinqa mana tiempoyuq kasqankurayku, Diospa Palabranta pata patallanta leerparinku. Chayraykutaq ni ima yanapata tarinkuchu. Carlos pichus 50 watastaña Jehovata yupaychachkan, tʼukurinapaq tiempochakuy may sumaq kasqanmanta jinata nin: “Kunanqa sapa pʼunchay manaña achkhatachu leerparini, manaqa iskay paginatajinalla. Ajinamanta leesqaypi tʼukurinaypaq aswan tiempoyuq kani, chaytaq sumaq yachachiykunata yachakunaypaq yanapawan”, nispa (Sal. 77:12). Tʼukurinapaq tiempochakusun chayqa Diospa munayninta astawan riqsisun, entiendesun ima (Col. 1:9-11).

3 YACHAKUSQAYKIMANJINA RUWAY: Ima ruwayllapis aswan sumaq kasqanta rikuspaqa, astawan yanapachikunchik. Bibliata ukhunchasqanchikwanqa kikillantaq. Ajinapuni kasqanmanta juk joven Gabriel sutiyuq, jinata nin: “Bibliata ukhunchasqayqa, chʼampaykunata atipanaypaq, wakkunata yanapanaypaq ima wakichiwan. Chaypaqqa yachakusqaymanjina ruwanaypaq kallpachakunay tiyan”, nispa (Deu. 11:18; Jos. 1:8). Arí, Diospa yachayninmanta yachakuy, chaymanjina ruway ima, may chhikaraqpuni (Pro. 2:1-5).

YUYARIY: Diospa yachayninta ukhunchayta atisqanchikqa, ¡may sumaqpuni! Imaptinchus chay yachayqa paymanta jamun (Rom. 11:33). Chayrayku, niraq Bibliata ukhunchachkaspa kaykunata ruwaypuni: 1) espíritu santonta, allin yuyayta ima qusunanpaq Jehovamanta mañakuy, 2) leesqaykipi tʼukurinaykipaq tiempochakuy, 3) yachakusqaykimanjina ruwanaykipaq kallpachakuy. Kaykunata ruwanki chayqa, Bibliata ukhunchaspa mayta gustachikunki, maytataq yanapachikunki.