Kia Mataora e kia Puapingaia te Tuatau Apii

Akapeea tatou e mataora ai mei te apiianga i te Pipiria? Akapeea to tatou tuatau apii e puapinga ai? E toru takainga puapinga ka akamanako tatou kia puapinga atu ta tatou uaorai apii Pipiria.

1 PURE: Takainga mua kia pure. (Sala. 42:8) No teaa ra? Kia akamanako tatou i te apiianga i te Tuatua a te Atua ei tuanga no ta tatou akamorianga. No reira, e pati tatou kia Iehova kia tauturu mai ia tatou kia marama e kia ariki i ta tatou e apii ra, e kia oronga katoa mai i tona vaerua tapu. (Luka 11:13) Te karanga ra a Barbara, kua roa te riro anga ei mitinari e: “E pure ua ana au i mua ake ka tatau me kore ka apii ei i te Pipiria. Muri mai, kua kite au e tei te pae a Iehova iaku e te ariki maira i taku e rave ra.” Ka tauturu te pure i mua ake i te apii i to tatou manako e te ngakau kia ariki pu tikai i te au kai pae vaerua tei orongaia mai kia tatou.

2 AKAMANAKO OONU: No te kare e rava ana te taime, e tatau viviki ua ana tetai pae i te Tuatua a te Atua. Inara, kare ratou e puapingaia mei te apiianga i te Pipiria. Kua kite mai a Carlos, tei tavini ana ia Iehova tere atu i te 50 mataiti, i te puapinga i te tuku anga i tetai taime no te akamanako oonu kia puapinga atu tana apii. Kua akakite mai aia e: “Teianei e tatau ua ana au i tetai nga kapi o te Pipiria—mei tetai rua kapi i te ra. Kia rauka iaku i te akapou i toku taime i te akamanako oonu anga i taku i tatau kia kite au i te au apiianga puapinga.” (Sala. 77:12) Me tuku tatou i tetai taime i te akamanako oonu, ka maata atu to tatou kite e te marama i te anoano o te Atua.​—Kolo. 1:9-11.

3 TAANGAANGA: Ka puapinga atu tatou me kite tatou i te puapinga i te rave i tetai angaanga. Mei te reira katoa te apiianga i te Pipiria. “Kua tauturu mai te apii iaku kia autu atu i toku au manamanata, e te akapapa iaku kia tauturu atu i tetai ke,” i akakite mai ei a Gabriel, e taeake mapu e apii ua ana i tana Pipiria. Kua akakite katoa aia e: “E tauta ana au i te taangaanga i te au mea ravarai taku i apii mai.” (Deu. 11:18; Iosu. 1:8) Ae, e maata ta tatou ka kite mai mei te Atua te ka rauka ia tatou i te taangaanga.​—Mase. 2:1-5.

AKARA AKAOU: E tikaanga ngateitei to tatou i te kimikimi atu i te kite tei orongaia mai e Iehova, te Tumu o te pakari ravarai! (Roma 11:33) No reira, me apii akaou koe, akapapu e kia pure na mua kia Iehova e kia pati kiaia kia oronga mai i te tu manako tau e tona vaerua tapu. Akamanako oonu i tetai au taime i taau i tatau ana. Kia aru e kia taangaanga katoa i te au mea taau i kite i roto i toou oraanga. Me rave koe i teia au takainga puapinga, ka kite mai koe e ka mataora e ka puapinga atu taau apiianga i te Pipiria.