Studeri na wan fasi di e gi moro prisiri èn di e tyari moro wini kon gi yu

Fa wi kan studeri Bijbel na wan fasi di e gi wi moro prisiri? Fa wi kan leri moro te wi e studeri? Meki wi luku dri sani di o yepi wi fu kisi moro wini fu a studeri di wi e studeri Bijbel.

1 BEGI: A fosi sani di wi musu du, na fu begi (Ps. 42:8). Fu san ede? Wi musu si a studeri di wi e studeri Gado Wortu leki wan pisi fu wi anbegi. Fu dati ede wi musu aksi Yehovah fu gi wi en santa yeye èn fu meki den sani di wi o leri abi krakti tapu wi ati nanga wi frustan (Luk. 11:13). Barbara di de wan zendeling bun langa kaba taki: „Ala leisi mi e begi fosi mi bigin leisi noso studeri Bijbel. Baka dati mi e firi taki Yehovah de nanga mi èn taki a e prisiri nanga san mi e du.” Te wi e begi fosi wi studeri Bijbel, dan dati o yepi wi fu sreka wi ati nanga wi frustan, so taki den furu sani di wi o leri abi moro krakti na wi tapu.

2 PRAKSERI FU SAN YU LERI: Fu di son sma no abi furu ten, meki den e leisi Gado Wortu frafra. Ma disi kan meki taki den no e leri so furu leki te den ben o studeri Bijbel. Carlos di e dini Yehovah moro leki 50 yari kaba, kon frustan taki efu wi wani kisi wini fu a studeri di wi e studeri Bijbel, dan a prenspari trutru fu teki ten fu prakseri fu den sani di wi leri. A taki: „Now mi no e leisi so furu na ini wan leisi. Mi e leisi sowan tu bladzijde fu Bijbel ibri dei. Dan mi kan teki moro ten fu prakseri fu den sani di mi leisi, èn na so fasi mi kan leri moro furu” (Ps. 77:12). Te wi e teki ten fu prakseri fu den sani di wi leri, dan wi o kon sabi èn frustan moro bun san na a wani fu Gado.​—Kol. 1:9-11.

3 DU SAN YU LERI: Wi e kisi moro wini fu wan sani, efu wi man si fa wi kan gebroiki en na ini wi libi. Na so a de tu nanga a studeri di wi e studeri Bijbel. Gabriel, wan yongu brada di e studeri Bijbel doronomo, taki: „Fu di mi e studeri Bijbel, meki mi man lusu problema na ini mi aladei libi èn mi kan gebroiki den sani di mi leri fu yepi trawan.” A taki tu: „Ala leisi te mi leri wan sani, mi e luku fa mi kan gebroiki dati na ini mi libi” (Deut. 11:18; Yos. 1:8). Iya, furu sani fu Gado de di wi kan leri èn gebroiki na ini wi libi.​—Odo 2:1-5.

SAN WI MUSU DU: Wi abi a bigi grani fu studeri Bijbel, so taki wi kan kisi moro sabi fu Yehovah, a sma di abi ala koni! (Rom. 11:33) Fu dati ede, tra leisi te yu o studeri Bijbel, hori na prakseri taki a fosi sani di yu musu du, na fu begi Yehovah. Yu musu aksi en fu gi yu en santa yeye èn fu meki den sani di yu o leri abi krakti tapu yu ati nanga yu frustan. Ibri tron te yu leisi wan pisi, yu musu teki pikinso ten fu prakseri fu den sani di yu leisi. Na ini yu aladei libi, yu musu pruberi tu fu du san yu leri. Te yu e du den prenspari sani disi, dan yu o si taki a studeri di yu e studeri Bijbel o gi yu moro prisiri èn a o tyari moro wini kon gi yu.