O Kidi Kia Lungu ni Alumajedone
O Kidi Kia Lungu ni Alumajedone
‘Jinzumbi ja madimonho . . . jiia mu nhunga ku jisobha mu ngongo ioso . . . anga o jinzumbi jiji, ji bhongolola o jisobha bhu kididi a k’ixana mu mbimbi ia Hebeleu exi Alumajedone.’—DIJINGUNUINU 16:14, 16.
O KIZUELU Alumajedone, dijina dia kididi. Maji mu ixi, se-ku kididi ni dijina didi.
Ihi i lombolola o kizuelu “Alumajedone?” Mukonda diahi o kizuelu kiki ene mu ki sokesa ni izulukutu kála o ita?
A a bhongolola Bhu Kididi a ki Xana Alumajedone
Mu mbimbi ia Hebeleu, o kizuelu Alumajedone, kilombolola “Mulundu ua Mejidu.” Sumbala ki kuene mulundu ua Mejidu, maji kuene kididi ki exana Mejidu. Tu ki sanga bhu kaxi ka ikoka iiadi ku mbandu ia luiji, kua tungile akua Izalaiele. Ita ia makota akexile mu i bhanga bhua zukamene o kididi kiki. Kienhiki o dijina Mejidu dia lungu ni ita. *
Mu kidi o dijina Mejidu, ki dilombolola o ita ia kexile mu bhanga-ku, maji ilombolola mukonda diahi akexile mu bhânga. Mejidu iexile mbandu ia Ixi ia Kanana ia bhanene Jihova Nzambi, ku akua Izalaiele. (Makatukilu 33:1; Josuué 12:7, 21) Muéne ua kanena o mundu uenhó kuila, ueji ku a langa mu ita, iu ua a lange muene. (Matendelelu 6:18, 19) Mu kifika, ku Mejidu kuene kua zokela Jihova akua Izalaiele mu madiuanu, bhu maku a Sobha ia Kanana Jabine, ni Xixela kabhitangu ka masoladi mê.—Afundixi 4:14-16.
O kizuelu “Alumajedone,” kiala ni kijimbuluilu kia dikota. A ki sokesa ni ita i bhanga masoladi a mbandu jiiadi.
O kikanenu mu divulu dia Dijingunuinu, ki tanga o maka a-nda bhita ku hádia, kuila Satanaji ua-nda bhongolola o jinguvulu ja mundu phala kuongeka o masolad’â, mu ku bhanga kiki, a-nda kala mu zukutisa o mundu ua Nzambi, ni kikalakalu kiâ. O kizukutisu kiki, kia-nda jibha athu avulu, kioso Nzambi kia-nda buika o jinguma.—Dijingunuinu 19:11-18.
Mukonda diahi o Nzambi a mu tumbula mu Bibidia kuila, ‘Nzambi ia henda, ia ku loloka, ia ku tululuka ni henda, ia ku bhanga o mbote’ ua-nda jibha athu avulu? (Nehemiia 9:17) Phala kuijiia se mukonda diahi Nzambi ua-nda bhanga kiki, tua tokala kuijiia o itambuijilu ia ibhuidisu itatu: (1) Nanhi ua-nda mateka o ita? (2) Mukonda diahi Nzambi ua di te mu maka enhá? (3) Ihi ia-nda bheka o ita íii, ku ixi, ni ku athu?
1. NANHI UA-NDA MATEKA O ITA?
O ita ia Alumajedone, ki ujibhangânga ua Nzambi. Nzambi ua-nda bhulula o athu a iuka, kua ió eji ku a jibha. O ijibhangânga mu nvunda íii, o “ jisobha mu ngongo,” jene mu tumina o ixi. Mukonda diahi a-nda bhânga? Mukonda Satanaji ua-nda funhisa o jinguvulu, ni masolad’â phala ku zukutisa o abhezi a Jihova Nzambi.—Dijingunuinu 16:13, 14; 19:17, 18.
O athu mu jingeleja ala ni ufolo ua kuzuela, saí jixi lelu, ka xikina kuila saí kizuua o jinguvulu a-nda mesena ku zubha o jingeleja. Kiki kia bhiti kiá ku hama 20, maji kia-nda bhita dingi. * Maji o kizukutisu kia dianga, ki kia-nda difua ni Alumajedone. Kia dianga o kizukutisu kia-nda bhita ku mundu uoso. Kaiiadi, Jihova Nzambi, ua-nda zokela o mundu uê, kála kia bhangele m’ukulu. (Jelemiia 25:32, 33) O Bibidia ixana o nvunda íii, “ita ia kizuua kia Dikota kia Nzambi, Muteni-a-Ioso.”
2. MUKONDA DIAHI NZAMBI UA DI TE MU MAKA ENHÁ?
Jihova u longa o abhezi ku kala athu a tululuka, ni ku zola o jinguma jâ. (Mikeia 4:1-3; Matesu 5:43, 44; 26:52) Kienhiki ene ka-nda kuata mata phala ku bhânga kioso kia-nda mateka ku a zukutisa. Se Nzambi k’eza mu bhulula o mundu uê, a-nda ku u jikinisa. O dijina dia Nzambi, Jihova, a-nda di xonguena ku athu. Se o jinguma a jikinisa o mundu Uê, kia-nda londekesa kuila Jihova kene ni henda, mukua kisuéia, kale ni kutena. Kiki, ki ki tena ku bhita!—Jisálamu 37:28, 29.
Nzambi ka mesena ku buika muthu, kienhiki muéne u dimuna o athu mu íii ia-nda bhanga. (2 Phetele 3:9) Bhu kaxi ka misoso ia Bibidia, muéne u lembalala o izulukutu ioso ia bhiti ku dima, kioso kia jibha o athu akexile mu zukutisa o mundu uê. (2 Jisobha 19:35) O Bibidia i tanga ué kuila ku hádia kioso Satanaji ni mundu uê, kia-nda zukutisa o mundu ua Nzambi, Jihova ua-nda londekesa o ngunzu iê mu ku a jibha. O Mak’â Nzambi a kanena kiá ukulu kuila Jihova, ua-nda buika o athu a iibha. (Jisabhu 2:21, 22; 2 Tesalonika 1:6-9) Mu kithangana kieniókio, oso a-nda kuijiia kuila a mu bhânga ni Muteni-a-Ioso.—Izekiiele 38:21-23.
3. IHI IA-NDA BHEKA O ITA ÍII KU IXI NI ATHU?
Athu avulu a-nda bhuluka ku ita ia Alumajedone. Kua-nda kala kutululuka kua nzungule mu ixi.—Dijingunuinu 21:3, 4.
O divulu dia Dijingunuinu di zuela kuila, “mundu uavulu” ua-nda bhuluka ku ita íii. (Dijingunuinu 7:9, 14) Nzambi ua-nda ku a kuatekesa ku kitula o ixi Palaízu, kála kia mesenene Jihova tundé ku dimatekenu.
O kuila tuejiia thembu kuxi, ia-nda mateka ku zukutisa o mundu ua Nzambi?
[Tanga mu luji]
^ kax. 6 O ku sokesa o kididi ni ita, ki ki tokala ku tu sasumukisa. Mu kifika mu ixi ia Japão, o mbanza ia Hiroshima, kua io buikile-ku ditenda dizanza o munza, lelu o ditenda didi dizanza o munza dia kituka kiluezu kia ita i bhekesa uôma.
^ kax. 13 O ujibhangânga ua bhitile ku mundu, phangu ilondekesa kuila o jinguvulu a mesenene ku zubha o jingeleja ni athu ka tokala mu diembu dimoxi. Mu izuua ia União Soviética, saí ibuka ia jingeleja, kumoxi ni URSS, akexile mu a zukutisa. Tanga o mbandu: “Um Povo Pacífico Defende Seu Bom Nome,” mu Mulangidi ua 1 ua Kasambuadi ua 2011, mu phutu, a ka bhange ku Jimbangi ja Jihova.
[Kilombuelelu ku mbandu 6]
Jihova Nzambi ua zokela o mundu uê m’ukulu
[Kilombuelelu ku mbandu 7]
Jihova ua-nda zokela dingi o mundu uê mu ita ia Alumajedone
