E Berdad Encuanto Armagedon

‘E demoñonan a bai serka tur rei na mundu, i nan a reuní e reinan na un lugá ku na hebreo yama Armagedon.’ (Letter schuin ta di nos.)​—REVELACION 16:14, 16, Beibel na papiamentu koriente.

ARMAGEDON ta nomber di un luga. Pero ta parce cu e luga ey nunca a yega di existi.

Kico ta e berdadero nificacion di e palabra “Armagedon” anto? Dicon hopi bes e ta ser asocia cu un suceso manera, por ehempel, guera?

Reuni na un Luga Cu Yama Armagedon

E palabra Hebreo Har–Magedon ta nifica literalmente “Sero di Meguido.” Aunke nunca a existi un sero cu yama Meguido, tabatin un luga si cu tabata yama asina. E tabata situa na un crusada strategico noordwest di caminda e Israelitanan tabata biba. Hopi guera decisivo a tuma luga cerca di e luga ey. Pesey, e nomber Meguido ta ser asocia cu guera. *

Sinembargo, loke ta importante no ta cua guera a tuma luga na Meguido sino e motibo pakico a bringa e gueranan ey. Meguido tabata parti di e Tera Priminti cu Jehova Dios a duna e Israelitanan. (Exodo 33:1; Josue 12:7, 21) Dios a hura cu lo el a defende su pueblo contra nan enemigonan, y el a hacie. (Deuteronomio 6:18, 19) Por ehempel, ta na Meguido Jehova a defende e Israelitanan milagrosamente contra e ehercito invasor Cananeo di Rey Jabin y su hefe di ehercito Sisara.​—Huesnan 4:14-16.

Pesey, e palabra “Armagedon” tin un gran nificacion den sentido simbolico. E ta ser asocia cu un guera den cua dos ehercito poderoso ta confronta otro.

E profecia di Revelacion ta papia di un tempo den futuro cercano ora cu Satanas y su demoñonan lo reuni gobiernonan humano y nan ehercitonan pa opone e pueblo di Dios y nan trabou abiertamente. E ora ey, Dios lo derota e enemigonan ey, y miyones di hende lo perde nan bida.​—Revelacion 19:11-18.

Awor, dicon un Dios cu Bijbel ta describi como “un Dios di pordon, yen di gracia y compasion” lo causa morto di asina tanto hende? (Nehemias 9:17) Pa nos por compronde esey, nos tin cu contesta tres pregunta: (1) Ta ken ta inicia e guera? (2) Dicon Dios ta interveni? (3) Kico lo ta e resultado di e confrontacion ey pa planeta Tera y su habitantenan?

1. TA KEN TA INICIA E GUERA?

Na Armagedon, no ta Dios ta esun cu ta ataca prome. Mas bien, Dios lo interveni pa defende bon hende for di esnan cu di otro manera lo destrui nan. Esnan cu ta inicia e confrontacion aki ta “e reynan di henter e tera habita”, e lidernan di mundo. Dicon e gobernantenan di mundo y nan ehercitonan ta ataca Jehova su sirbidornan? Pasobra Satanas ta uza nan manera marioneta pa haci esey.​—Revelacion 16:13, 14; 19:17, 18.

Awendia varios pais ta duna hopi balor na libertad di expresion y di religion. Pesey, e idea di cu gobiernonan lo opone of asta caba cu movementonan religioso por parce masha irealistico. No obstante, e tipo di atakenan ey a tuma luga den siglo 20 y ta tumando luga awe tambe. * Ma tin por lo menos dos diferencia grandi entre e atakenan ey y esun cu lo hiba na Armagedon. Na prome luga, e atake ey lo tuma luga rond mundo. Di dos, e manera cu Jehova lo interveni lo ta di un magnitud sin precedente. (Jeremias 25:32, 33) Bijbel ta describi e confrontacion ey como “e guera cu lo tuma luga riba e gran dia di Dios, e Todopoderoso.”

2. DICON DIOS TA INTERVENI?

Jehova kier pa tur hende cu ta ador’e busca paz y stima nan enemigonan. (Mikeas 4:1-3; Mateo 5:43, 44; 26:52) Pues, nan lo no uza arma pa defende nan mes ora e atake cruel aki tuma luga. Si Dios no interveni pa scapa su pueblo, nan enemigonan lo caba cu nan. Anto si e agresornan logra caba cu su pueblo, lo parce comosifuera Jehova ta inhusto y cu e no tin amor ni poder. Pues, Jehova Dios su nomber, of reputacion, ta den wega. Pesey, Jehova nunca lo bandona su pueblo!​—Salmo 37:28, 29.

Como cu Dios no kier destrui ningun hende, e ta bisa nan di antemano kico e ta bay haci. (2 Pedro 3:9) Mediante e relatonan conserva den Bijbel, e ta corda nos cu el a yega di tuma venganza den pasado ora su pueblo a ser ataca. (2 Reynan 19:35) Ademas, Bijbel ta spierta nos cu ora Satanas y su marionetanan humano ataca e pueblo di Dios, Jehova lo uza su poder atrobe pa defende su pueblo. De echo, hopi tempo pasa, e Palabra di Dios a profetisa cu Jehova lo destrui e malbadonan. (Proverbionan 2:21, 22; 2 Tesalonicensenan 1:6-9) Ora esey sosode, e agresornan lo compronde bon cla cu ta contra e Todopoderoso nan ta bringando.​—Ezekiel 38:21-23.

3. KICO LO TA E RESULTADO DI E CONFRONTACION EY?

E guera di Armagedon lo nifica salbacion pa miyones di hende. Lo e introduci un periodo di paz riba tera.​—Revelacion 21:3, 4.

E buki di Revelacion ta bisa cu “un multitud grandi”, cu hende no por conta, lo sobrevivi e conflicto aki. (Revelacion 7:9, 14) Bou di e guia di Dios, e hendenan aki lo yuda haci henter tera un paradijs manera tabata Jehova su proposito for di principio.

Pero na ki tempo nan lo ataca e pueblo di Dios?

[Nota]

 [Plachi na pagina 6]

Den pasado, Jehova a defende su pueblo

 [Plachi na pagina 7]

Jehova lo bolbe defende su pueblo na Armagedon