Biblu Nọ Diọ Gbẹzan Mẹtọn

ETẸWẸ whàn dawe de he nọ lẹ̀ taba-gle nado jo azọ́n enẹ do podọ nado tọ́n sọn sinsẹ̀n etọn he go e tẹdo taun dai lọ mẹ? Etẹwẹ gọalọna nawe de he peve to ahàn sinsinyẹn nùnù mẹ nado diọ gbẹzan etọn? Hia nuhe omẹ ehelẹ dọ.

“Homẹ nọ hùn mi nado tin to whẹndo daho ehe mẹ.”—DINO ALI

OWHE HE MẸ N’YIN JIJI: 1949

OTÒ HE MẸ N’WÁ SỌN: AUSTRALIE

OTÀN ṢIE: N’NỌ LẸ̀ TABA-GLE

NUHE N’YIN DAI: To 1939, mẹjitọ ṣie lẹ sẹtẹn sọn Albanie bo wá sawhé do Mareeba he yin tòhò pẹvi Queensland tọn de mẹ to Australie. Bosnie-nu, Grèce-nu, Italie-nu po Serbie-nu susu po gọna mẹsusu devo lẹ wẹ wá sawhé do lẹdo ehe mẹ, podọ dopodopo yetọn wẹ tindo nuyiwa po aṣa voovo yetọn lẹ po. Taba-gle wẹ mẹhe to Mareeba lẹ nọ lẹ̀, enẹwutu mẹjitọ ṣie lẹ lọsu jẹ jinukun enẹ do ji.

E ma dẹn bọ mẹdaho ṣie yọnnu yin jiji, enẹgodo mẹdaho ṣie sunnu awe lẹ, bọ yẹn wá gbọngodo. Ṣigba, e blawu dọ owhe dopo poun wẹ n’tindo to whenue Papa hẹ́nu bo kú. Mama vọ́ alọwle bo ji visunnu ẹnẹ devo. Taba-gle otọ́ mẹgopọntọ ṣie tọn mẹ wẹ mímẹpo whẹ́n te.

N’gbẹ́ pò to owhe aflanmẹ tọn mẹ to whenue n’tọ́n sọn whégbè. To whenue n’tindo owhe 23, n’wlealọ hẹ Saime to maṣalaṣi lẹdo lọ tọn mẹ, na Malenu wẹ mí omẹ awe lẹ yin. Hẹnnumẹ ṣie lẹpo wẹ yin Malenu. N’nọ hia Koran po owe de he dọhodo gbẹzan Muhammad tọn ji po. To ojlẹ lọ mẹ, Biblu pẹvi de tin he n’sọ nọ hia. Na Koran dọhodo yẹwhegán he yin nùdego to Biblu mẹ lẹ ji wutu, Biblu lọ hihia gọalọna mi nado yọ́n ojlẹ he mẹ yẹwhegán enẹlẹ nọgbẹ̀ te.

Kunnudetọ Jehovah tọn lẹ nọ wá owhé ṣie gbè bo nọ saba yí linlinnamẹwe po owe lẹ po na yẹn po Saime po, podọ mí nọ mọ awuvivi susu to owe lọ lẹ hihia mẹ. N’flindọ whlasusu wẹ yẹn po Kunnudetọ lọ lẹ po tindo hodọdopọ ojlofọndotenamẹ tọn lẹ do hosọ sinsẹ̀n tọn voovo ji. Kakati nado nọ dọ linlẹn yetọn titi lẹ, Biblu wẹ yé nọ yizan to whepoponu nado na gblọndo na kanbiọ ṣie lẹ. Enẹ yinuwado ji e taun.

 Whlasusu wẹ Kunnudetọ lọ lẹ ze tito Biblu pinplọn tọn donukọnna mi bo basi oylọna mi nado wá opli yetọn lẹ, ṣigba n’nọ gbẹ́. Ahunmẹdunamẹnu ṣie to whelọnu wẹ nado tindo ogle ṣie titi podọ nado tindo ovi susu. N’ma penugo nado tindo ogle ṣie titi, amọ́ homẹ ṣie hùn dọ n’tindo ovi atọ́n.

LEHE BIBLU DIỌ GBẸZAN ṢIE DO: Owhe ṣinẹnẹ ko juwayi sọn whenue n’dọho hẹ Kunnudetọ Jehovah tọn lẹ, ṣigba kakajẹ whenẹnu n’ma ko diọ sinsẹ̀n. Etomọṣo, n’yiwanna owe yetọn lẹpo bosọ nọ hia yé. To dimanche lẹpo, yẹn po Saime po nọ yí whenu zan nado hia owe enẹlẹ. Owe he mí yí na owhe susu enẹ lẹpo wẹ mí sẹdo. Dile etlẹ yindọ yise ṣie ma ko ló sọmọ to ojlẹ lọ mẹ, nudọnamẹ họakuẹ he owe enẹlẹ bẹhẹn lẹ gọalọna mi taun to whenue mẹdevo lẹ jẹ yise ṣie whlepọn ji.

Di apajlẹ, yẹwhehodọtọ ṣọṣi evangelisti tọn de tẹnpọn nado hẹn mi po huhlọn po nado kẹalọyi Jesu taidi Mẹwhlẹngántọ ṣie. Yẹwhehodọtọ enẹ klọ́ apọ̀nmẹ na nọvisunnu Saime tọn po dopo to visunnu he onọ̀ ṣie ji na otọ́ mẹgopọntọ ṣie lẹ mẹ po bọ yé biọ sinsẹ̀n etọn mẹ. Enẹgodo, mẹyọnmẹ ṣie he tin to sinsẹ̀n voovo mẹ lẹ tẹnpọn nado dọ̀n mi biọ sinsẹ̀n yetọn mẹ. Delẹ to yé mẹ yí owe he jẹagọdo Kunnudetọ Jehovah tọn lẹ na mi. N’biọ to yé si nado do nugbo-yinyin sinsẹ̀n-nuplọnmẹ yetọn lẹ tọn hia mi to Biblu mẹ, ṣigba e glo yé.

Nukundiọsọmẹ he n’pehẹ enẹ lẹpo zọ́n bọ n’sọ plọnnu taun gando Biblu go bosọ basi dodinnanu sisosiso to owe Kunnudetọ lẹ tọn mẹ. To godo mẹ, n’wá mọdọ ojlẹ ko sọ na mi nado nọgbẹ̀ sọgbe hẹ nuhe plọn n’te lẹ.

Dile etlẹ yindọ to ojlẹ lọ mẹ, Kunnudetọ depope ma nọ plọn Biblu hẹ mi, n’jẹ opli yetọn lẹ yì ji. To bẹjẹeji, n’ma nọ voawu paali bosọ nọ kuwinyan taun, ṣigba mẹhe n’nọ mọ to opli enẹlẹ ji lẹ jọmẹ taun podọ n’yiwanna nuhe plọn n’te lẹ. N’basi dide nado lẹzun dopo to Kunnudetọ Jehovah tọn lẹ mẹ bo yí baptẹm to 1981.

Asi ṣie ma jẹagọdo nudide ṣie, ṣigba to whedelẹnu e nọ mọdọ kiklọ mi wẹ yé te. Mahopọnna enẹ, e wá baptẹm ṣie. N’nọ saba dọho hẹ ẹ do nugbo Biblu tọn susu he plọn n’te lẹ ji. To nudi owhe dopo to baptẹm ṣie godo he mí to aliji lẹkọ ja whégbè sọn whẹ̀ntintọ́n de, Saime dọna mi dọ emi jlo na lẹzun Kunnudetọ. Homẹhun mi sọmọ bọ n’dibla kùnhún biọ nukanmẹ. E yí baptẹm to 1982.

E ma bọawuna mí nado diọ gbẹzan mítọn. N’doalọtena taba-gle lilẹ̀, na e ma sọgbe hẹ gbedide Biblu tọn lẹ wutu. (2 Kọlintinu lẹ 7:1; Jakọbu 2:8) E yí whenu pẹẹde whẹpo mí do wá mọ azọ́n he na gọalọna mí nado penukundo nuhudo mítọn lẹ go. Humọ, na owhe susu, hẹnnumẹ mítọn delẹ masọ nọ wá mí dè ba. Mí dovivẹnu nado yinuwa hẹ yé po owanyi po dile Biblu biọ do. To godo mẹ, ninọmẹ lọ wá pọnte podọ hẹnnumẹ sẹpọmẹ mítọn lẹ masọ nọ họ̀nna mí ba.

ALE HE N’MỌYI LẸ: Po awusinyẹnnamẹnu voovo he n’pehẹ lẹ po, yèdọ winyankuku, nuhahun akuẹ tọn po nukundiọsọmẹ hẹnnumẹ  lẹ tọn po, n’wá mọ lehe Jehovah Jiwheyẹwhe gbọn homẹfa dali to alọgọna mi nado pehẹ nuhahun ṣie lẹ do sọ. Di apajlẹ to alọnu din, n’yin mẹho agun tọn bo nọ yì oplò ji whẹwhẹ nado plọnnumẹ. Kakajẹ din, azọngban enẹ ma nọ bọawuna mi, na winyankuku ṣie nọ zọ́n bọ n’nọ kukudẹ́. Ṣigba, dẹ̀hiho gbọzangbọzan po godonọnamẹ Jehovah tọn po nọ gọalọna mi nado penukundo azọngban ehe go.

Yẹn po asi ṣie po sọ vẹ́ dogọ taun. Mí ṣì onú delẹ wà to ovi mítọn lẹ pinplọn mẹ, ṣigba mí wà nuhe go mí pé lẹpo nado do nugbo Biblu tọn he mí plọn lẹ do ahun yetọn mẹ. (Deutelonomi 6:6-9) Dopo to ale he enẹ hẹnwa lẹ mẹ wẹ yindọ visunnu ṣie mẹho po asi etọn po to devizọnwa taidi mẹdehlan.

N’flindọ ojlẹ kleun de to whenue n’jẹ opli Kunnudetọ lẹ tọn yì ji po whẹndo ṣie po godo, n’glinhún ṣie to gbèdopo bo pọ́n mẹhe to plitẹnhọ lọ mẹ lẹ hlan bosọ kanse whẹndo ṣie dọ, “Etẹ go mì doayi?” To ohọ̀ lọ mẹ, mẹhe wá sọn otò voovo mẹ, nọ do ogbè voovo bosọ tindo aṣa voovo lẹ—yèdọ Aborigène lẹ, Albanie-nu lẹ, Australie-nu lẹ, po Croatie-nu lẹ po—wẹ tin to finẹ, etomọṣo yemẹpo wẹ to nuyiwa dopọ po ayajẹ po. Homẹ nọ hùn mi nado tin to whẹndo daho ehe mẹ, ehe bẹ mẹmẹsunnu po mẹmẹyọnnu gbigbọmẹ tọn lẹ po hẹn to Australie, podọ lẹdo aihọn pé.—1 Pita 5:9.

“Mẹdaho ṣie ma jo mi do pọ́n gbede.”—YELENA VLADIMIROVNA SYOMINA

OWHE HE MẸ N’YIN JIJI: 1952

OTÒ HE MẸ N’WÁ SỌN: RUSSIE

OTÀN ṢIE: N’PEVE TO AHÀN SINSINYẸN NÙNÙ MẸ BOSỌ TẸNPỌN NADO HÙ DEE

NUHE N’YIN DAI: N’yin jiji to Krasnogorsk, yèdọ tòhò pẹvi abọẹ-abọẹ de sẹpọ Moscou. Mẹplọntọ wehọmẹ tọn wẹ mẹjitọ ṣie lẹ yin. N’nọ wazọ́n ganji to wehọmẹ podọ n’plọn hànjiji po hànjinu lẹ hihò po. Enẹ lẹpo zọ́n bọ e taidi dọ sọgodo dagbe de wẹ to nukọnna mi.

To whenue n’wlealọ godo, yẹn po asu ṣie po sẹtẹn yì lẹdo de mẹ, fie mẹzunzun, ahànnumu po azọ̀-nùnù po gbayipe te. Aṣa ylankan enẹlẹ jẹ nuyiwa do ji e ji to mayọnẹn mẹ. To bẹjẹeji, nado jihàn bo hò ginta poun wutu wẹ n’nọ yì agọ́ lẹ tẹnmẹ. Ṣigba eyin n’jẹ dọ́n, mẹhe to finẹ lẹ nọ basi oylọna mi nado wá nù azọ̀ po ahàn po hẹ yé. E ma dẹn bọ n’wá peve to ahàn sinsinyẹn nùnù mẹ.

Aṣa ylankan enẹ jẹ gbẹzan ṣie hẹngble ji. To ojlẹ kleun de godo, ninọmẹ ṣie wá ylan sọmọ bọ n’masọ nọ dùnú ba. E tlẹ jlo mi dọ ma kú, podọ n’tẹnpọn nado hù dee. Ṣigba, n’dopẹ́ dọ e ma pà mi.

To ojlẹ enẹ lẹpo mẹ, mẹdaho ṣie yọnnu gbẹ́ nọ wá dla mi pọ́n whẹwhẹ. To whenẹnu, ewọ  ko yin dopo to Kunnudetọ Jehovah tọn lẹ mẹ, podọ e dovivẹnu nado do lehe Biblu sọgan gọalọna mi do hia mi. To bẹjẹeji, na n’ma tindo ojlo to Biblu mẹ wutu, n’masọ nọ jlo dọ ewọ ni wá dè e ba. Etomọṣo, mẹdaho ṣie ma jo mi do pọ́n gbede. E do owanyi po homẹfa po hia mi sọmọ bọ to godo mẹ n’yigbe nado plọn Biblu.

LEHE BIBLU DIỌ GBẸZAN ṢIE DO: To whenue n’bẹ Biblu pinplọn jẹeji godo, n’magbe sinsinyẹn nado jo ahànnunu do. To ojlẹ lọ mẹ, kọmẹnu ṣie he nùahànmú de tọ́navùn mi bo hò mi kúdaa-gbẹ̀daa bọ n’yin zize yì dotowhé. Adàjahú ṣie ẹnẹ wẹ wẹ́n, podọ nukunzìn ṣie dopo gble. Ṣigba, ojlẹ enẹ he n’yizan to dotowhé gọalọna mi nado duto ojlo zogbe he n’tindo na ahàn sinsinyẹn ji.

To ojlẹ lọ mẹ, n’nọ hodẹ̀ gbọzangbọzan. Wefọ Biblu tọn he miọnhomẹna mi taun wẹ Avigbè Jelemia tọn 3:55, 56 he dọmọ: “Yẹn dawhá ylọ oyín towe, sọn odò pete akoṣó tọn mẹ, OKLUNỌ E. Hiẹ sọ sè ogbè ṣie: a whlá otó towe do gbigbọ ṣie go blo, do awhá ṣie go.”

N’kudeji dọ Jehovah sè odẹ̀ ṣie lẹ. Ewọ na mi huhlọn ma nado lẹkọyi aṣa hoho ṣie kọ̀n. To ojlẹ delẹ mẹ, n’ko yin whiwhlepọn nado gọ̀ ahànnunu bẹ. Ṣigba, homẹ ṣie hùn dọ n’masọ jai jẹ whlepọn enẹ mẹ gbede ba.

Dile n’to nukọnzindo to Biblu pinplọn ṣie mẹ, n’wá mọnukunnujẹemẹ dọ n’dona nọgodona asu ṣie to azọngban etọn taidi tatọ́ whẹndo tọn mẹ. (1 Pita 3:1, 2) Ṣigba, mọwiwà ma bọawuna mi na n’tindo aṣa lọ nado nọ paṣẹna asu ṣie. N’biọ alọgọ Jehovah tọn to odẹ̀ mẹ. E yí whenu pẹẹde to asi e nado diọ, ṣigba vudevude, n’lẹzun asi dagbe de bo nọ nọgodona asu ṣie.

Awuji asu ṣie to whenue e mọ diọdo he basi n’te lẹ. Kakajẹ whenẹnu, ewọ ma tindo ojlo to Biblu mẹ. Ṣigba to whenue n’de nado jo azọ̀-nùnù do, e dọmọ: “Eyin a jo azọ̀-nùnù do, be n’na jẹ Biblu plọn ji!” Azán dopolọ gbè wẹ mí omẹ awe lẹ jo azọ̀-nùnù do.

ALE HE N’MỌYI LẸ: Dile asu ṣie dọ do, e jẹ Biblu plọn ji nugbo. Todin, mí nọ hia Biblu dopọ egbesọegbesọ, nọ lẹnayihamẹpọn do nuhe mí hia lẹ ji bosọ nọ dovivẹnu nado yí ayinamẹ lọ lẹ do yizan mẹ.

Hogbe lẹ whèdo mi nado dọ lehe ninọmẹ whẹndo mítọn tọn pọnte do sọ gọna ale he yẹnlọsu mọyi lẹ. N’nọ dopẹ́ dọ Jehovah dọ̀n mi wá ede dè. (Johanu 6:44) N’sọ nọ dọnudo mẹdaho ṣie, na e ma jo mi do pọ́n gbede. Po nujijọ ehelẹ po, n’wá mọ na dee dọ Biblu nọ diọ gbẹzan mẹtọn nugbonugbo.

[Yẹdide to weda 11]

N’wá mọdọ ojlẹ ko sọ na mi nado nọgbẹ̀ sọgbe hẹ nuhe plọn n’te lẹ

[Yẹdide to weda 13]

Mẹdaho ṣie do owanyi po homẹfa po hia mi sọmọ bọ to godo mẹ n’yigbe nado plọn Biblu