Ang Biblia Nagapabag-o sang Kabuhi

NGAA gin-untatan sang isa ka mangunguma ang pagtanom sang tabako kag ang iya madugay na nga pagtuluuhan? Paano ginbag-o sang isa ka palainom ang iya kabuhi? Basaha ang ila panaysayon.

“Nalipay Ako nga Mangin Miembro Sining Daku nga Pamilya.”—DINO ALI

NATAWO: 1949

PUNGSOD: AUSTRALIA

KABUHI SANG UNA: NAGATANOM SANG TABAKO

ANG AKON NAGLIGAD: Sang 1939, naghalin ang akon mga ginikanan sa Albania kag nag-istar sa Mareeba, isa ka gamay nga banwa sa Queensland, Australia. May nag-istar man sa sini nga lugar nga mga Bosniano, Griego, Italyano, Serbiano, kag iban pa, nga nagresulta sa lainlain nga pagpati, kustombre, kag kultura. Ang Mareeba talamnan sang tabako, kag nagtanom man sini ang akon mga ginikanan.

Sang ulihi, natawo ang akon magulang nga babayi, dayon ang duha ko ka magulang nga lalaki kag ako. Pero isa pa lang ako ka tuig, napatay si Tatay sa atake sa tagipusuon. Namana liwat si Nanay kag namanghuran kami sing apat pa ka lalaki. Nagdaku kami sa ulumhan sang tabako sang ikaduha ko nga amay.

Naghalin ako sa balay sang tin-edyer ako. Sang beintehon na ako, nagpakasal kami ni Saime sa moske sa amon lugar kay mga Muslim kami. Tanan ko nga paryente mga Muslim man. Ginbasa ko ang Koran kag ang isa ka libro parte sa kasaysayan ni propeta Muhammad. Nagbasa man ako sang gamay nga Biblia. Mabasa sa Koran ang mga propeta nga ginsambit sa Biblia, kag nahibaluan ko paagi sa Biblia kon san-o sila nagkabuhi.

Nagakadto sa balay ang mga Saksi ni Jehova kag pirme kami ginahatagan sang mga libro kag magasin. Nanamian kami ni Saime magbasa sini. Madamo kami sing gin-istoryahan nga topiko upod sa mga Saksi. Nagdayaw gid ako kay sa baylo nga maghatag sang ila personal nga opinyon, ginagamit nila ang Biblia sa pagsabat sa akon mga pamangkot.

 Ginsilingan ako sang mga Saksi nga tun-an ang Biblia upod sa ila kag ginhagad nga magtambong sa ila pagtilipon, pero pirme ko ini ginabalibaran. Gusto ko gid sadto nga may kaugalingon nga uma kag daku nga pamilya. Wala ako nakapanag-iya sang uma, pero nalipay ako kay nakaangkon ako sang lima ka kabataan.

KON PAANO GINBAG-O SANG BIBLIA ANG AKON KABUHI: Bisan siam ka tuig na ang nagligad sa tapos ko maistorya ang mga Saksi ni Jehova, wala ko gihapon ginbag-o ang akon pagtuluuhan. Pero, nanamian ako magbasa sang tanan nila nga publikasyon. Kada Domingo, ginabasa namon ini ni Saime. Ginatago namon ang tanan nga magasin nga amon nabaton. Nakabulig gid ini sang gintilawan sang iban ang pagtuo nga nagatubo na sa akon tagipusuon.

Halimbawa, naatubang ko ang isa ka pastor nga nagtinguha nga kumbinsihon ako nga batunon si Jesus bilang akon Manluluwas. Nakumbinsi niya ang isa ko ka manghod kag ang manghod nga lalaki ni Saime. Gintinguhaan man sang akon mga kilala nga pasudlon ako sa ila relihion. Ang iban naghatag sa akon sang mga balasahon nga nagapakalain sa mga Saksi ni Jehova. Ginsilingan ko sila nga pamatud-an sa Biblia ang ila mga doktrina, pero indi nila masabat ang akon mga pamangkot.

Bangod sini nga mga pagpamatok, gintun-an ko pa gid ang Biblia paagi sa mga publikasyon sang mga Saksi. Narealisar ko nga dapat ko na bag-uhon ang akon kabuhi suno sa akon natun-an.

Bisan wala ako nagtuon sang Biblia sa mga Saksi, nagtambong ako sa ila pagtilipon. Sang primero, nakulbaan ako kag nahuya, pero mainabyanon sila kag nanamian ako sa akon natun-an. Desidido na ako nga mangin Saksi ni Jehova, kag sang 1981, ginsimbuluhan ko ang akon dedikasyon sa Dios paagi sa pagpabawtismo.

Wala namatok ang akon asawa, bisan pa kon kaisa nagaduhaduha sia nga basi naintuan lang ako. Pero ara sia sang ginbawtismuhan ako. Padayon ko nga ginasugid sa iya ang mga kamatuoran nga akon natun-an. Mga isa ka tuig sa tapos ako nabawtismuhan, samtang nagapauli kami halin sa bakasyon, nagsiling si Saime nga gusto niya mangin Saksi. Nasorpresa gid ako! Ginbawtismuhan sia sang 1982.

Ang pagbag-o sang amon kabuhi indi mahapos. Gin-untatan ko ang pagtanom sang tabako kay supak ini sa mga prinsipio sang Biblia. (2 Corinto 7:1; Santiago 2:8) Madugay pa kami nakakita sang permanente nga trabaho. Mga tinuig man nga wala kami ginbisitahan sang amon mga paryente. Gintinguhaan namon nga sundon ang prinsipio sa Biblia nga higugmaon sila. Sang ulihi, ginbaton na nila kami kag wala na ginpamatukan.

 MGA BENEPISYO: Ang mga kabudlayan pareho sang pagkamahuluy-on, problema sa pinansial, kag pagpamatok sang pamilya nagtudlo sa akon nga mapinasensiahon gid si Jehova nga Dios sa pagbulig sa akon mga problema. Halimbawa, bisan isa na ako ka manugdumala sang kongregasyon kag pirme nagapamulongpulong, nagaang-ang ako gihapon bangod sa kulba. Pero paagi sa bulig ni Jehova kag regular nga pangamuyo, nahimo ko ini nga responsibilidad.

Labi kami nga nagsuod nga mag-asawa. May sayop kami sa pagpadaku sa amon kabataan pero gintinguhaan namon nga ipaintiende sa ila ang mga kamatuoran sa Biblia nga amon natun-an. (Deuteronomio 6:6-9) Subong, ang akon subang nga bata kag ang iya asawa mga misyonero.

Nadumduman ko isa ka bes sang nagtambong kami sa pagtilipon sang mga Saksi, ginparking ko ang salakyan kag gintan-aw ang mga tawo sa sulod sang tilipunan. Ginpamangkot ko ang akon pamilya, “Ano ang nakita n’yo?” Ara sa sulod ang mga tawo nga lainlain sang kultura, ginhalinan, kag lenguahe—mga Aboriginal, Albaniano, Australiano, kag Croasiano—pero malipayon sila nga nagaupdanay. Nalipay ako nga mangin miembro sining daku nga pamilya sang mga kauturan, nga makita indi lamang sa Australia kundi sa bilog nga kalibutan.—1 Pedro 5:9.

‘Mapinasensiahon Gid ang Akon Magulang.’—YELENA VLADIMIROVNA SYOMINA

NATAWO: 1952

PUNGSOD: RUSYA

KABUHI SANG UNA: PALAINOM, NAGPLANO NGA MANGINMATAY

ANG AKON NAGLIGAD: Natawo ako sa Krasnogorsk, isa ka gamay kag malinong nga siudad malapit sa Moscow. Mga manunudlo ang akon ginikanan. Maalam man ako kag nagkuha sing kurso sa musika. Daw maayo gid ang akon buas-damlag.

Sang namana ako, nagsaylo kami sang akon bana sa lugar nga normal lang ang pagpamuyayaw, pagpahubog, kag pagpanigarilyo. Wala ko gid narealisar nga may malain ini nga epekto sa akon. Sang primero, nagakadto ako sa mga party para lang magkanta kag maggitara. Pero ginahagad ako sang mga tawo nga manigarilyo kag mag-inom. Gani nangin palainom na ako.

Ginguba sini ang akon kabuhi. Sang ulihi, naglala na gid ang akon kahimtangan amo nga wala na ako gana magkaon. Gusto ko na nga mapatay, gani gintilawan ko nga manginmatay. Pero nagapasalamat ako nga wala ako nadayunan.

Sa sining mabudlay nga kahimtangan, pirme ako ginabisitahan sang akon magulang nga babayi. Nangin Saksi sia ni Jehova, kag ginpaathag niya kon paano ang Biblia makabulig  sa akon. Indi ako interesado sa Biblia, gani ginhambalan ko sia nga indi na magbisita sa akon. Pero mapinasensiahon gid sia kag palangga niya ako, gani nagtuon ako sa Biblia.

KON PAANO GINBAG-O SANG BIBLIA ANG AKON KABUHI: Sang nagatuon na ako sa Biblia, nagdesisyon ako nga mag-untat sa pag-inom. Sadto nga tion, ginkastigo ako sang kaingod namon nga hubog. Natam-an gid ako gani gindala ako sa ospital. Nabali ang apat ko ka tul-an sa gusok kag nahalitan ang isa ko ka mata. Ang pagtener ko sa ospital nakabulig sa akon nga untatan ang pag-inom.

Sina nga tion, pirme ako nagapangamuyo. Nakabulig gid sa akon ang ginasiling sang Biblia sa Panalambiton 3:55, 56 (NW): “O Jehova, nagtawag ako sa imo ngalan halin sa pinakamadalom nga buho. Mabatian mo gid ang akon tingog. Indi pagtabuni ang imo dulunggan sa akon pagpangayo sing bulig.”

Nagapati gid ako nga ginpamatian ni Jehova ang akon mga pangamuyo. Ginpabakod niya ako nga indi na pagbalikan ang ginhimo ko sadto. Kon kaisa, ginasulay ako nga mag-inom. Pero nalipay ako nga nabatuan ko ini.

Natun-an ko sa Biblia nga dapat ko suportahan ang akon bana bilang ulo sang pamilya. (1 Pedro 3:1, 2) Indi ini mahapos kay naanad ako nga mandaran ang akon bana. Nangayo ako sing bulig kay Jehova, gani amat-amat nga nangin maayo ako nga asawa.

Nalipay gid ang akon bana sang nakita niya nga nagbag-o ako. Sina nga tion, indi pa sia interesado sa Biblia. Pero sang nagsiling ako nga untatan ko na ang pagpanigarilyo, nagsiling sia: “Kon himuon mo ina, matuon na ako sa Biblia!” Gani gin-untatan na namon ang pagpanigarilyo.

MGA BENEPISYO: Gintuman sang akon bana ang iya promisa kag nagtuon sia sa Biblia. Subong, updanay kami nga nagabasa sang Biblia kada adlaw. Ginapamalandungan namon ang amon nabasahan kag ginatinguhaan nga sundon ang mga laygay sini.

Nagbag-o gid ang akon kabuhi kag nag-uswag ang amon pamilya. Nagapasalamat ako kay Jehova nga ginbuligan niya ako nga mangin suod sa iya. (Juan 6:44) Nagapasalamat man ako sa akon magulang kay mapinasensiahon sia sa akon. Napamatud-an ko nga ang Biblia nagapabag-o gid sang kabuhi.

[Blurb sa pahina 11]

Narealisar ko nga dapat ko na bag-uhon ang akon kabuhi

[Blurb sa pahina 13]

Mapinasensiahon gid ang akon magulang kag palangga niya ako, gani nagtuon ako sa Biblia