Ti Biblia Balbaliwanna ti Biag

ANIA ti nangtignay iti maysa nga agmulmula iti tabako tapno baliwanna ti pagsapulanna ken ti nabayagen a narelihiosuan a patpatienna? Kasano a naaddaan iti bileg ti maysa a mangnginum tapno baliwanna ti biagna? Basaem ti salaysay dagitoy a tattao.

“Anian a Yamanko ta Kamengak iti Daytoy Nagdakkel a Pamilia.”​—DINO ALI

PANNAKAYANAKNA: 1949

NAKAYANAKANNA: AUSTRALIA

PAKASARITAANNA: DATI NGA AGMULMULA ITI TABAKO

TI NAPALABASKO: Albaniano dagiti nagannakko ngem immakarda idi 1939 iti bassit nga ili ti Mareeba iti Queensland, Australia. Agnanaed met sadiay ti adu a taga Bosnia, Grecia, Italia, Serbia, ken dadduma pay a pagilian, nga inkuyogda dagiti patpatien, kostumbre, ken kulturada. Tabako ti kangrunaan nga imulmula dagiti taga Mareeba, isu a dayta met ti trabaho dagiti nagannakko.

Sadiay ti nakayanakanmi nga uppat nga agkakabsat. Nakalkaldaang ta natay ni Tatang iti atake ti puso idi maysa pay laeng ti tawenko. Nakiasawa manen ni Nanang ket naaddaan iti uppat pay nga annak a lallaki. Dimmakkelkami amin iti katabakoan ti agsiuman kadakami.

Tin-edyerak pay idi inrugik ti agbiag nga agbukbukod. Nasurok la bassit a 20 ti tawenko idi nagkasarkami ken Saime iti mosque iti lugarmi. Agpadakami a Muslim, agraman ti amin a kakabagiak. Binasbasak ti Koran ken ti libro maipapan iti pakasaritaan ti propeta a ni Muhammad. Adda met bassit a Biblia a binasbasak. Dakamaten ti Koran dagiti propeta iti Biblia, ngem naammuak no kaanoda a nagbiag gapu iti panagbasbasak iti Biblia.

Masansan a sumarungkar dagiti Saksi ni Jehova iti pagtaenganmi ken kanayon a mangibatida kadagiti magasin ken libro, a pagaayatmi a basaen ken Saime. Malaglagipko pay ti adu a makapainteres a pannakisaritak kadagiti Saksi maipapan iti nagduduma a topiko maipapan iti relihion. Imbes nga agpannurayda iti bukodda a kapanunotan, kanayon nga usarenda ti Biblia a mangsungbat kadagiti saludsodko. Dayta ti nagbilibak kadakuada.

 Intukon dagiti Saksi a makipagadalak iti Biblia kadakuada ken awisendak a makigimong, ngem kanayon nga agkedkedak. Arapaapko ti maaddaan iti bukod a talon ken dakkel a pamilia. Diak pulos naaddaan iti talon ngem naaddaanak met iti lima nga annak.

NO KASANO A BINALBALIWAN TI BIBLIA TI BIAGKO: Kalpasan ti siam a tawen sipud iti damo a pannakisaritak kadagiti Saksi ni Jehova, diak pay la naiwaksi dagiti dati a patpatiek. Ngem pagaayatko ti umawat ken mangbasa iti amin a publikasionda. Iwayaanmi a basaen dagitoy ken Saime iti kada Domingo. Indulinmi ti amin a magasin nga inawatmi iti panaglabas dagiti tawen. Dakkel ti naitulong dagita idi namin-adu a nasubok ti pammati nga agrusrusing iti pusok.

Kas pagarigan, kinasabaannak ti maysa a kameng ti relihion nga Evangelical ket pinilitnak a mangawat ken Jesus kas Manangisalakanko. Napasurotna ti kayongko ken maysa a kabsatko iti ina. Kinombinsirdak pay ti adu a gagayyemko a makimiembroak iti nadumaduma a relihionda. Dadduma kadakuada ti nangted kaniak kadagiti pagbasaan a mangpadpadakes kadagiti Saksi ni Jehova. Kiniddawko kadagitoy a kritiko nga ipakitada kaniak iti Biblia ti nakaibatayan dagiti doktrinada, ngem awan ti maisungbatda.

Gapu kadagita, natignayak nga ad-adda a mangsukimat iti Biblia ken kadagiti naurnongko a literatura dagiti Saksi. Idi agangay, naamirisko a tiempon nga iyaplikarko dagiti nasursurok.

Nupay inrugik ti makigimong kadagiti Saksi, diak pay nagpayadal kadakuada iti Biblia. Idi damo, napalalo ti nerbios ken bainko, ngem mannakigayyem dagiti naam-ammok kadagiti gimong, ken nagustuak dagiti nasursurok. Inkeddengko ti agbalin a Saksi ni Jehova ket idi 1981, nagpabautisarak kas simbolo ti dedikasionko iti Dios.

Saan a kinontra ni baketko ti desisionko, nupay pasaray ibagana nga amangan no naallilawak laeng. Nupay kasta, immayna binuya ti panagpabautisarko. Intultuloyko nga inranud kenkuana dagiti kinapudno a maad-adalko. Makatawen kalpasan a nabautisaranak, bayat ti biahemi nga agawid manipud panagbakasion, inyebkas ni Saime a kayatnan ti agbalin a Saksi. Diak mailadawan ti napalaus a ragsakko! Nagpabautisar ni Saime idi 1982.

Saan a kaskarina a balbaliwanmi ti biagmi. Insardengko ti agmula iti tabako gapu ta saan a maitunos kadagiti prinsipio ti Biblia. (2 Corinto 7:1; Santiago 2:8) Nabayag bassit sakbay a nakabirokkami iti maitutop a panggedan. Adu a tawen a liniklikandakami ti dadduma a kakabagianmi. Ngem inkagumaanmi latta a tratuen ida sigun kadagiti prinsipio ti Biblia babaen ti panangipakitami iti ayat. Idi agangay, naawatda met laeng ti kasasaadmi ket saandakamin a likliklikan.

 NO KASANO A NAGUNGGONAANAK: Iti aniaman a karit a napagballigiak​—kinamanagbabain, pinansial a pakarigatan, wenno ibubusor ti kakabagian​—napaneknekak ti kinaanus ni Jehova a Dios a tumultulong kaniak. Kas pagarigan, maysaak itan a panglakayen iti kongregasion ket masansan a mangisuroak iti plataporma. Narigat daytoy para kaniak agingga ita ta agbeddalak no agnerbiosak. Ngem naitultuloyko nga ibaklay daytoy a pribilehio gapu iti kanayon a panangikararagko iti tulong ni Jehova.

Simmingedkami nga agassawa ket nakaragragsak ti panagkaduami. Adda dagiti nagkuranganmi iti panangpadakkelmi kadagiti annakmi ngem inkagumaanmi nga itukit kadakuada dagiti nasursuromi a kinapudno manipud iti Biblia. (Deuteronomio 6:6-9) Kinapudnona, agserserbi itan kas misionero ti inauna nga anakmi a lalaki ken ti asawana.

Adda malagipko a pasamak idi nabiit pay a tumabtabuno ti pamiliak kadagiti gimong dagiti Saksi. Imparadak ti luganmi ket kimmitaak kadagiti tattao iti uneg ti Kingdom Hall. Insaludsodko iti pamiliak, “Ania ti makitkitayo?” Adda sadiay dagiti tattao nga agduduma ti kultura, puli, ken lenguaheda​—Australiano, Albaniano, Croatiano, Katutubo​—ngem siraragsak nga aglalangenda. Anian a yamanko ta kamengak iti daytoy dakkel a pamilia dagiti agkakabsat iti naespirituan, a saan laeng nga adda iti Australia no di ket iti intero a lubong.​—1 Pedro 5:9.

“Nakaan-anus Kaniak ni Manangko.”​—YELENA VLADIMIROVNA SYOMINA

PANNAKAYANAKNA: 1952

NAKAYANAKANNA: RUSSIA

PAKASARITAANNA: DATI A MANGNGINUM, GINANDATNA TI AGPAKAMATAY

TI NAPALABASKO: Nayanakak idiay Krasnogorsk, maysa a bassit ken natalna a siudad iti asideg ti Moscow. Maestro ken maestra dagiti nagannakko. Nalaingak nga estudiante ket pinagadaldak iti eskuelaan ti musika. Agparang nga adda koma naraniag a masakbayak.

Idi nakiasawaak, immakarkami ken lakayko iti lugar a gagangay ti panagsao iti dakes, panagbartek, ken panagsigarilio. Diak ekspektaren idi a maimpluensiaan ti kababalinko iti kasta nga aglawlaw. Idi damo, mapmapanak kadagiti party tapno laeng agkanta ken aggitara. Ngem sadiay nga awisendak nga agsigarilio ken uminum iti arak. Idi agangay, nagbalinakon a mangnginum.

Gapu iti dayta, mangrugin a madadael ti biagko. Di nagbayag, nalapunosak iti liday agingga a diak payen makapangan. Kayatkon ti matay. Naimbag laengen ta saan a nagballigi ti gandatko nga agpakamatay.

Uray kasta ti kasasaadko, kanayon latta a bisitaennak ni manangko. Maysa idin a Saksi ni  Jehova, ket ilawlawagna no kasano a matulongannak ti Biblia. Saanak nga interesado idi iti Biblia isu nga up-upayek nga umay bumisita. Ngem nakaan-anus kaniak ni manangko. Gapu iti anus ken ayatna, nakipagadalak met laeng iti Biblia.

NO KASANO A BINALBALIWAN TI BIBLIA TI BIAGKO: Idi nagadalakon iti Biblia, inkarik nga isardengkon ti aginum. Naiparna met nga adda nabartek a kaarrubami a nangkabil kaniak ket nayospitalak. Natukkol ti uppat a paragpagko ken nadangran ti maysa a matak. Nupay kasta, nakatulong ti pannakayospitalko tapno maisardengko ti panaginumko.

Iti dayta a gundaway a kanayon a nagkarkararagak. Naliwliwaak iti kuna ti Biblia iti Un-unnoy 3:55, 56: “Inawagak ti naganmo, O Jehova, manipud iti kaadalman a kita ti abut. Ti timekko denggem koma. Dika ilemmeng ti lapayagmo iti pakagin-awaak, iti panagpatulongko.”

Kombinsidoak a sinungbatan ni Jehova dagiti kararagko. Inikkannak iti bileg tapno diakon sublian ti aginum. No dadduma, masulisogak a mangirugi manen ti aginum. Maragsakanak a mangibaga a diak pulos intulok a masulisogak.

Bayat nga intultuloyko ti agadal iti Biblia, naammuak a masapul a suportarak ni lakayko iti annongenna kas ulo ti pamilia. (1 Pedro 3:1, 2) Saan a nalaka dayta ta ugalik a mandaran ni lakayko. Inkararagko ti tulong ni Jehova. Kas resultana, in-inut a nagbalinak a nasaysayaat ken managpasakup nga asawa.

Nasdaaw ni lakayko idi makitana ti panagbalbaliwko. Saan pay idi nga interesado iti Biblia ni lakayko. Ngem idi imbagak nga isardengkon ti agsigarilio, kinunana: “No maisardengmo ti agsigarilio, irugik ti agadal iti Biblia!” Naggiddankami a nangisardeng iti panagsigarilio.

NO KASANO A NAGUNGGONAANAK: Tinungpal ni lakayko ti karina ket inrugina ti agadal iti Biblia. Agdanggaykami itan a mangbasa iti Biblia iti inaldaw. Utobenmi ti nabasami ken ikagumaanmi nga iyaplikar dagiti balakad manipud iti Biblia.

Dakkel ti nagbaliwak ken ti pamiliak. Agyamanak ken Jehova ta tinulongannak nga umasideg kenkuana. (Juan 6:44) Agyamanak met ken manangko ta kanayon nga inan-anusannak. Nagbanaganna, napaneknekak a mismo a ti Biblia mabalbaliwanna ti biag.

[Blurb iti panid 11]

Naamirisko a tiempon nga iyaplikarko dagiti nasursurok

[Blurb iti panid 13]

Gapu iti anus ken ayatna, nakipagadalak met laeng iti Biblia