MATUOD bala nga nagaulikid si Jehova sa iya katawhan? Daw ano niya sila ka palangga? Masabat lamang ini kon hibaluon naton ang ginasiling sang Dios. Sa Biblia, maathag nga ginapakita ni Jehova ang iya ginabatyag. Binagbinaga ang ginasiling sang Isaias 49:15.

Para mahibaluan naton kon daw ano ka palangga ni Jehova ang iya katawhan, naggamit sia, paagi kay Isaias, sing makatalandog katama nga halimbawa. Si Jehova namangkot: “Magakalipat bala ang babayi sa iya bata nga nagasoso, nga indi sia magkalooy sa anak sang iya tiyan?” Kahapos lang sabton ini nga pamangkot. Imposible nga kalimtan sang iloy ang iya lapsag kay adlaw-gab-i ini nga nagasalig sa iya kag nagahibi kon nagakinahanglan sing atension! Pero may iban pa nga gusto ipahangop si Jehova.

Ngaa ginapasuso sang iloy ang iya lapsag kag ginahatag ang tanan sini nga kinahanglanon? Para lang bala pahipuson ini? Indi. Natural lamang para sa iloy nga “magkalooy sa anak sang iya tiyan.” Ginapahangop sini ang pagpakita sing kaluoy sa mga nagakinahanglan sing bulig. Ang pagpalangga sang iloy sa iya lapsag isa sa pinakamabaskog nga balatyagon nga mapakita sang tawo.

Pero makapasubo nga may mga iloy nga wala naluoy sa ila lapsag. “Ini sila [mahimo] malipat,” siling ni Jehova. Subong, madamo ang “di-mainunungon, [kag] wala sing kinaugali nga pagpalangga.” (2 Timoteo 3:1-5) May mga report nga ginpabay-an, gin-abusuhan, kag ginbayaan sang isa ka iloy ang iya lapsag. Parte sa Isaias 49:15, ang isa ka reperensia sa Biblia nagsiling: “Ang mga iloy makasasala kag kon kaisa ginadula sang kalainan ang ila pagpalangga. Bisan ang pinakamabaskog nga pagpalangga sang tawo mahimo madula.”

“Apang,” si Jehova nagapasalig sa aton, “Ako indi malipat sa imo.” Gani, maintiendihan na naton ang punto sang pamangkot ni Jehova nga mabasa sa Isaias 49:15. Indi lang ini isa ka pagpaanggid. Mahimo madula ang pagpalangga sang indi perpekto nga mga iloy sa ila lapsag, pero indi gid malipat si Jehova nga magpakita sing pagpalangga sa iya mga sumilimba. Gani ang reperensia nga ginsambit kaina nagsiling parte sa Isaias 49:15: “Mahimo isa ini sa pinakamabaskog nga ekspresyon sang gugma sang Dios nga makita sa Daan nga Testamento.”

Makalilipay gid mahibaluan ang parte sa “mapinalanggaon nga kaawa sang aton Dios.” (Lucas 1:78) Ngaa indi mo pagtun-an kon paano mangin suod kay Jehova? Ginapasalig sining mapinalanggaon nga Dios ang iya mga sumilimba: “Indi ko gid kamo pagbayaan ukon pagpatumbayaan.”—Hebreo 13:5.

Bahin sang Biblia nga mahimo basahon sa Pebrero:

▪ Isaias 43-62